’Ua tāpe’a te Fatu i tāna parau fafau.

Hōho’a

e tōpatara’a hinu i roto i te hō’ē ’āu’a

E piti ’āva’e i muri a’e i tō’u pi’ira’ahia ’ei tauturu i roto i tō mātou peresidenira’a titi, ’ua ’ere au i tā’u ’ohipa. ’Ua pe’ape’a vau, e nāhea vau ’ia fa’a’amu i tā’u vahine fa’aipoipo ’e tā māua nā tamari’i.

’A ’imi ai au i te hō’ē ’ohipa ’āpī, ’ua ha’amo’a vau iā’u iho nō tō’u pi’ira’a, tei hōro’a mai iā’u e rave rahi mau rāve’a nō te tāvini i tō’u mau taea’e ’e mau tuahine. Nō te rahi o tā’u ’ohipa i roto i tō’u pi’ira’a, ’ua uiui noa tā’u vahine tē vai rā ānei te tahi atu ta’ata i roto i te titi e nehenehe e rave i te tahi o tā’u mau ’ohipa.

I te hō’ē pō ua, hou te purera’a pō ’utuāfare, ’ua ta’i mai te niuniu. ’Ua hina’aro te hō’ē taea’e ma’i rahi i roto i te titi i te hō’ē ha’amaita’ira’a, ’e ’ua ani mai iā’u e haere e hi’o iāna. I reira noa, ’ua fa’anaho a’era vau i te hō’ē hoa nō te ’āpe’e mai iā’u.

I tō māua taera’a atu, ’ua ta’a ’oi’oi au ’o vai te taea’e i ma’ihia ’e ’ua māuruuru vau nō te niuniu. Tau mahana nā mua atu, ’ua uiuihia ’oia nō te hō’ē pi’ira’a nō te titi. I muri a’e i tō māua fa’atāhinura’a ’e te ha’amaita’ira’a iāna, ’ua parau atu māua iāna ē, e ho’i fa’ahou mai ā māua nō te hi’o iāna.

’Ua maoro ri’i i tō’u taera’a atu i te fare ’e te rari ho’i, terā rā e taime ā tō mātou nō te hō’ē ha’api’ira’a poto nō te pō ’utuāfare. ’Ua fa’aoti mātou e māta’ita’i i te hō’ē video nō Elia ’e te vahine ’ivi nō Zarephate.

’A fa’aineine ai te vahine ’ivi i te tunu i te mā’a hope’a nāna ’e tāna tamaiti, nā ’ō atu ra Elia iāna, « e mata na rā i te hāmani i te hō’ē vāhi iti nā’u ’a hopoi mai ai iā’u nei, ’a hāmani ai i tā ’oe ’e tā tō tamaiti ». Nō tōna ha’apa’o, « e ’ore te hue faraoa e iti, e ’ore ho’i e pau te fa’ari’i hinu, e tae noa atu i te mahana e hōpoi mai ai Iehova i te ua i te fenua nei » (1 Te mau Ari’i 17:13–14).

’Ua puta roa tō’u ’ā’au i te mau parau a Elia « e mata na rā i te hāmani … nā’u ». Ma te roimata i tō’u nā mata, nā ’ō atu ra vau i tā’u vahine ē, « Tera mau ! ’A tahi, e ti’a ia tātou ’ia rave i te mau mea ato’a tā te Fatu e fa’aue mai, ’e i muri iho e tae mai te mau ha’amaita’ira’a ».

Mai te tupura’a o te parau fafau a Elia i te vahine ’ivi, ’aita tā matou mā’a ’e te hinu i « ha’amāu’ahia » ’a vai ai au ma te ’ohipa ’ore. ’Ua ’ite te Fatu i tō mātou fifi i te pae faufa’a, ’e ’ua ha’amaita’i ’oia ia mātou. I te po’ipo’i a’e nō tā mātou iho pō ’utuāfare, ’ua pūpūhia mai iā’u i te hō’ē ’ohipa.

’Ua ’ite au ē, e tāpe’a te Fatu i tāna mau parau fafau. Maoti teie ’ohipa i tupu, ’ua rahi tō’u fa’aro’o, mai tō’u māuruuru rahi iāna.