« ’Ua amo vau ia ’oe », Liahona, Tiurai/’Ātete 2022.
Te reo o te feiā mo’a i te mau mahana hope’a nei
’Ua amo vau ia ’oe
Nō te pūai o te mana’o mana rahi tei ha’aputapū iā’u, ’ua topa turi a’era vau.
E toru noa matahiti tō’u ’e ’aita vau i hina’aro e fa’aru’e i te fare ma’i, tē fa’a’ana’anaeahia ra tō’u nā metua i reira.
Hōho’a piahia ma te parau fa’ati’a a te ta’ata pāpa’i ; hōho’a nā Getty Images
E rave rahi matahiti tō’u arora’a i te māuiui ’e te ahoaho ’āpitihia mai e te hō’ē ’ati pere’o’o, tei roto ho’i tō’u nā metua ’e o vau iho, i te torura’a o tō’u matahiti. ’Aita tō’u taea’e i fānau-’ore-hia i ora mai.
I te 25ra’a o te matahiti o teie ’ati purūmu, ’ua puta fa’ahou mai taua ’ohipa ra i roto i tō’u ferurira’a. E rave rahi ’āva’e i muri mai, tē ’aro noa ra vau ’a parau mai ai te hō’ē hoa iā’u ē, ’ia fāriu atu vau i ni’a i tō’u Metua i te ao ra. ’Ua ’ata vau ’e ’ua ui atu, « e aha tāna e rave nō’u ? »
’Ua tāmau noa tā’u mau arora’a. I muri a’e hō’ē ’aore rā e piti matahiti, ’ua rohirohi roa vau i te māuiuira’a ’e tē riro nei tō’u mamae ’ei riri. ’Ua pe’e au i te parau a’o a tō’u hoa ’e ’ua ha’amata i te fāriu atu i ni’a i te Atua.
« Mai te mea tei ’ō nei mau ’oe, ’a tono mai i te hō’ē ta’ata—te huru o te ta’ata » ’ua pure au. « Tē hina’aro nei au i te hō’ē ta’ata ! »
’Ua tae mai te mahana ’e ’ua reva atu ’a ti’a noa ai au i te ’ūputa ’o tō’u fare ma te tīa’i faufa’a ’ore noa.
« ’A hi’o na, e te Atua, ’aita e ta’ata e tau’a mai nei ! » ’Ua parau vau. « ’Aita e ta’ata e haere mai ! »
’A tahe noa ai tō’u roimata, ’ua tomo marū atu vau i roto i te fare ’e ’ua tāpiri i te ’ūputa. ’Ua ta’uma vau i te ’ē’a ma te ’oto rahi. I tō’u taera’a i ni’a i te hope’a o te ’ē’a, ’ua puta mai te hō’ē mana’o pūai i roto iā’u. Nō te pūai o te reira, ’ua topa turi au i raro.
I reira teie mana’o i te taera’a mai i roto i tō’u ferurira’a : « E ReNae, ’ua amo vau ia ’oe ».
’Ua hōro’a mai te Metua i te ao ra i teie mana’o pūai iā’u ma te here ’a hina’aro rahi ai au i te reira. ’Ua ’ite a’era vau ē, ’ua here ’oia iā’u ’e ’ua ’ite maita’i ’oia iā’u. Nō tōna here rahi iā’u, ’ua hōro’a mai ’oia iā’u i te ti’amāra’a mōrare. E’ita ’oia e fa’ahepo iā’u ’aore rā i te tahi atu ta’ata ’ia pe’e iāna, tē ani mai nei rā ’oia ’e tāna tamaiti ia tātou ’ia haere mai ia rāua ra (hi’o Mataio11:28–30).
Mai taua mahana ra, ’ua ’ite au ē e nehenehe tā’u e tūru’i i ni’a iāna. E mea maita’i a’e tō’u orara’a i teienei nō te mea tē tūtava nei au i te pe’e iāna ’e i te fa’aro’o iāna i te mau mahana ato’a. ’A fa’ati’a ai te Metua i te ao ra ’e ’o Iesu Mesia iā’u ’ia māuiui, ’ua hōro’a ato’a mai rāua iā’u i te hau, te tāmāhanahana, te pūai ’e te itoito ’ia ti’a iā’u ’ia ha’api’i mai nā roto i te ravera’a i te mau ’ohipa ’atā. E tauturu te ’itera’a i te māuiui iā’u ’ia hāro’aro’a ’e ’ia pāturu ia vetahi ’ē ’o tē aro nei.
E’ita roa paha tātou e ’ite hope roa e aha tā vetahi ’ē e fa’aruru nei, e nehenehe rā tātou e fa’a’ite i te here i te feiā ’ati a’e ia tātou. E māuruuru rahi tō’u i te ’itera’a ē, tē here nei tō’u Metua i te ao ra iā’u ’e tē fa’aro’o nei ’oia iā’u ’ia ti’aoro ana’e au iāna.