E Dua na Siganisucu me Vakamareqeti

Ena veiyabaki keirau dau gole vakaveiwatini ki na dua na keba vata kei iratou na dui wekai keirau me marautaki na olidei ni cava na yabaki. Keimami dau digitaka e dua na vanua me veirauti kei keimami ka qai keba mai na Ivi ni Siganisucu me yacova ni sa oti na iMatai ni Siga ni Yabaki Vou.

Na keba oqo era sa gauna totoka dina me keimami vaqaqacotaka kina na neimami duavata vakavuvale. Ena vuku ni levu vei keimami e lewe ni Lotu i Jisu Karisito ni Yalododonu Edaidai, na keba oqo era sa vakaukauwataka na neimami ivakadinadina i Karisito kei na Nona Lotu ni da marautaka na Nona sucu.

Ena mua ni 2020, keimami a kunea e dua na vanua mai na Koro o Bikenibeu, e Tarawa, ka tiko kina e dua na mwaneaba levu (e dua na valenisoqo ni vanua) me keimami moce kina vakamatavuvale. Sa qai dau tomani keimami mai o ganei watiqu o Meteta, ki na marautaki ni keba.

E tiko vata kei keirau o Meteta, ka sa yabaki 71, ka sa vaka me sa tinai keirau tiko. E se bulabula vinaka ka veisotoyaki tiko, vakavo ga ni sa titoko rua tiko baleta ni a sele ena 20 na yabaki sa oti. Sa dautaleitaka o Meteta na neimami ilakolako ni keba ni Siganisucu ka dau maqusa me vakaitavi ena neimami qito kei na itaviqaravi vakamatavuvale.

Enai ka 31 ni Tiseba, ni vo e vica na auwa me marautaki kina na Yabaki Vou, sa marau sara vakalevu o Meteta. Sa sili sara vakatotolo, vakaisulu ka dabe sara ena loma ni mwaneaba, me vakarau marautaka na bogi. Oi keimami na kena vo sa veiciciyaki sara, ka vakavakarau talega.

Oti o ya, ena loma ni vakavakarau kece oqo, a vosa vakamalua mai vei au o Meteta, “Sa mosi vakaukauwa mai na serequ.” Au a biuta na veika kece au a cakava tiko, ka kacivi watiqu kei na dua tale na ganena, ka vica vei keimami sa qai saga me vukei koya.

E totolo sara ga na kena yaco. Ni oti toka e tinikalima na miniti, sa sasaga cegu cake mai o Meteta. Rau sa qai vakalougatataki koya vaka-Matabete o watiqu kei luvei keirau cauravou ni waraki tiko na lori ni valenibula. E ka ni rarawa, ni ra sa sega ni ra cakava rawa vua na vuniwai e dua na ka. Ni keimami qai yaco yani e valenibula, sa mai takali e kea o Meteta.

Ena yakavi o ya, sa tu vakadua vei keimami o vuravura. Keitou sa lesu tale yani ki na vanua ni keba—ka wasea yani kivei ira yadua na itukutuku ni leqa ka me sa cava talega e kea na keba—keirau sa qai nanuma lesu vakaveiwatini na iotioti ni gauna nei Meteta. Era sa cakava na vuniwai na nodra vinaka taucoko mera vakabulai koya, kei ira era tiko volekati keirau a saga mera veivakanuinuitaki vei keirau, ia keirau a vakila e dua na vakacegu e duatani e tukuna mai ni sa gauna vei Meteta me sa gole.

Na neirau vakabauti Jisu Karisito kei na ivakadinadina ni Nona kosipeli a vukei ira talega na vo ni neimami matavuvale mera sa ciqoma na ka sa mai yaco. Se qai dua ga na macawa na neimami vakayagataka e dua na macawa ni marau vakayago ka vakayalo, ia ni mai veisau na neimami keba ni olidei ki na dua na somate, keimami sa moici vuravura vakadua.

Keimami a mai vakalolokutaka na takali nei Meteta daulomani—a dua o koya na ivurevure qaqa ni duavata ena neitou itikotiko, ka gadrevi me keimami na veisautaka e vuqa na ituvatuva ni sa mai yali o koya—ia ni sa mai takali oqo, keimami sa veivosakitaka vakalevu na ibalebale ni neimami dui bula yadua.

Keimami sa qai raicamatua na neimami iVakabula kei na Nona isolisoli vakalou ni bula vakacerecerei. Keimami sa vakavinavinakataka vakabibi na Nona solibula veisorovaki kei na Nona qaqa mai na mate. Sa gauna ni veivakavoui vakayalo vei keimami taucoko. Ni kemami cakacaka vata me tuvanaki ka vakavakarau ki na vakamoce vakayago vei Meteta, keimami sa nanuma ga na Yavu ni Veivakabulai nei Tamada Vakalomalagi, kei na Luvena, ni sa rawa kina vei keda meda duavata tale kei Meteta, ena dua tale na siga.

Na neimami keba ni olidei sa dau dua na gauna malaude, levu na sereivakatagi kei na danisi, ivakaraitaki ni taledi, na veidredrevaki kei na marau, ia ena Siganisucu oqo, na neimami mamarau ni itaviqaravi sa vaka me katabuto ena raraba ni reki dina—na reki e kauta mai na noda iVakabula o Jisu Karisito ena gauna a sucu mai kina ki na vuravura oqo me solia vei keda na bula.

Na neimami a kila vinaka na Nona kosipeli a kauta mai na vakacegu ki na neimami matavuvale ni sa mai takali o Meteta. A vukea me keimami nanuma tiko na ibalebale dina ni Siganisucu.