Ol Nius blong Jos
Ol Lida blong Jos Oli Givhan long Plante Kantri
Ol lida blong Jos oli gohed long givhan blong olgeta raon long wol, ova long ol sikis manis we i pas. Hemia samfala haelaet long plante aktiviti blong olgeta stat long las jeneral konfrens.
Presiden Oaks I Luklukbak long Paoa blong Ol Woman
Long wan vidio we oli rilisim long Septemba, Presiden Dallin H. Oaks, Fas Kaonsela long Fas Presidensi, i tokbaot paoa blong mama mo apu woman blong hem, we i bin helpem hem blong developem wan testemoni mo fet long Lod. Paoa blong ol woman long laef blong hem i gohed wetem waef blong hem, Sista June Oaks, mo afta long ded blong hem, narafala waef blong hem, Sista Kristen Oaks.
“Ol tija we oli moa impoten, we mi bin gat long saed blong doktrin blong Jos mo seves mo ol famli responsabiliti—we i go stret antap wetem ol profet blong Jos—oli bin ol woman,” Presiden Oaks i talem.
Elda Uchtdorf I Toktok long Ol Rifuji
Elda Dieter F Uchtdorf blong Kworom blong Olgeta Twelef Aposol i bin go long Polan long Epril. Hem i bin prisaed long wan devosen blong ol rifuji blong Yukren we oli bin faenem wan sef ples long Polan blong wan sot taem.
Long visit ia, Elda Uchtdorf, we i bin wan rifuji tu long yangfala laef blong hem, i talem se hat blong hem i fulap wetem “wan bigfala harem nogud from safaring” blong Ol Lata-dei Sent mo ol narafala we wo i spolem kantri blong olgeta, be hem i talem tangkyu tu.
“Ol wanwan man, woman mo famli we oli bin kam moa strong mo oli leftemap mifala wetem gud fasin blong olgeta, tras blong olgeta, mo fet long mo from Sevya mo ol tabu stamba tingting blong Hem,” hem i talem. “Harriet mo mi i stap hop blong mekem olgeta i kam moa strong mo givim kamfot long olgeta, be olgeta oli bin karem laet, hop, mo kamfot blong heven i kam long hat blong mitufala.”
Elda Bednar I Toktok long Nasonal Pres Klab long Wasington, D.K.
Elda David A. Bednar blong Kworom blong Olgeta Twelef Aposol, i bin toktok long wan Nasonal Pres Klab long Mei, mo i tokbaot gud wanem mo from wanem abaot ol stamba tingting blong yumaniterian blong Jos blong Jisas Kraes raon long wol, welfea, edukesen, tempol, misinari, mo wok blong famli histri.
“Stamba tingting blong Jos Ia blong Jisas Kraes blong Ol Lata-dei Sent, i blong helpem ol pipol blong lanem abaot ol fasin blong God, blong lavem God, blong kam ol disaepol blong Boe blong Hem, Jisas Kraes, mo blong lavem mo givim seves long ol brata mo sista blong yumi,” Elda Bednar i talem.
Ol Jeneral Presiden blong Rilif Sosaeti mo Praemeri Oli Visitim Saot Amerika
Presiden Camille N. Johnson, Rilif Sosaeti Jeneral Presiden, mo Presiden Susan H. Porter, Praemeri Jeneral Presiden, oli mit wetem ol lida blong taon mo ol Jos memba long Ajentina, Jael, Yurugwe, mo Paragwe long wan 10-dei givhan visit.
Oli mit wetem ol gavman oganaesesen we i helpem ol woman blong stap go tru long ol had situesen long Paragwe mo long Ajentina.
“Jos blong mifala i wantem wok wetem yufala blong mekem ol janis blong edukesen mo fasin blong stap dipen long yuwan, blong ol woman i kam moa gud,” Presiden Johnson i talem.
Antap long visit ia, Presiden Johnson mo Porter i bin givhan tu long ol memba blong Jos. Oli bin mekem ol miting blong ol yang papa mo mama, wan devosen blong ol singgel woman, ol kam tugeta miting blong ol famli we oli gat ol pikinini, mo ol trening blong ol kongregesen lida.