Blong Ol Yut Oli Kam Strong Gaed We Oli Apdeitem

Jos i bin luklukbak mo mekembak gaed blong hem blong Ol Lata-dei Sent yut. Blong Ol Yut Oli Kam Strong: Wan Gaed blong Mekem Ol Joes i invaetem ol yut blong yusum paoa blong olgeta blong jusum mo lukaotem insperesen blong laef folem ol standet blong gospel.

“Bes gaed we yu save gat blong stap mekem ol joes hem i Jisas Kraes. Jisas Kraes i paoa blong ol yut,” Elda Dieter F. Uchtdorf blong Kworom blong Olgeta Twelef i tijim long Satedei moning sesen blong jeneral konfrens. “Stamba tingting blong Blong Ol Yut Oli Kam Strong i blong poenem yu i go long Hem. Hem i tijim yu ol trutok we i no save finis blong gospel ia blong Hem we i kambak bakegen—ol trutok abaot huia yu, huia Hem, mo wanem yu save winim wetem paoa blong Hem” (“Jisas Kraes I Paoa blong Ol Yut,” Liahona, Nov. 2022, 10–11).

Oli leftemap tingting blong ol yut blong yusum ol prinsipol insaed long gaed ia blong mekem ol stret mo gud joes long evri eria blong laef blong olgeta. Ol papa mo mama, lida, mo yut bae oli wantem blong stadi mo serem gaed ia long hom, long ol Sandei miting, long ol aktiviti, we i tekem tu ol kamp mo yut konfrens. Ol Yang Man mo Ol Yang Woman lida bae oli wantem blong tokbaot moa ol prinsipol we i stap insaed long gaed ia oltaem. Ol prinsipol ia oli save olsem stamba lukluk blong standet naet blong ol yut we i hapen evri yia wetem ol papa mo mama blong olgeta.

Niufala gaed ia i gat i stap long dijitol long 50 lanwis long seksen blong Ol Yut long Gospel Laebri mo long youth.ChurchofJesusChrist.org. Bae oli sendem ol kopi we oli printim i no long taem, i kam long ol wod mo branj raon long wol.