Ol Nius blong Jos
Presiden Nelson I Kam Presiden blong Jos We I Moa Olfala
Presiden Russell M. Nelson i bon i kam long wol long 9 Septemba, 1924, mo i bin selebretem 98 betdei blong hem i no long taem i pas. Long 14 Epril, 2022, hem i kam Presiden blong Jos we i moa olfala long histri blong Jos.
Presiden Dallin H. Oaks, Fas Kaonsela insaed long Fas Presidensi, i stap luklukbak long seves mo laef blong Presiden Nelson mo talem, “Hem i wan lida blong insperesen mo wan waes lida mo i wan man we i kaen mo naes, we bae yu hop tumas blong save hem.”
Presiden Henry B. Eyring, Seken Kaonsela, i serem ol tingting blong hem abaot wok blong Presiden Nelson olsem profet blong Lod: “Evri taem mitufala i wokbaot i kam aotsaed long ofis, Presiden Oaks mo mi bae i talem, ‘I hapen bakegen.’ Bae yu jes luk revelesen i kam. Bae yu luk hem i askem kaonsel, mo afta desisen bae i kam mo evri man insaed long rum i save se hem i raet mo i kam long God. Bae hem i talem kwaet nomo se, ‘Mi ting se hemia i wanem Lod i wantem yumi blong mekem.’ Hem i taem afta long taem.”