Ol Haelaet blong Namba 192 Medel Yia Jeneral Konfrens

Tempol Skwea i stap long pis long taem blong 192 Medel Yia Jeneral Konfrens blong Jos. Noes blong konstraksen long graon blong mekem histri bilding blong Sol Lek Tempol i stanap long taem blong etkwek, i stop.

Be wan defren kaen pis i fulumap ol hom mo hat taem yumi stopem ol noes blong wol mo lisin long ol profet mo aposol we oli laef.

“Long pulpit ia, tedei mo tumoro bae yu gohed blong harem trutok,” Presiden Russell M. Nelson i tijim wan saen long ae blong hem. “Wetem fasin blong prea, askem Lod blong konfemem long yu se wanem yu bin harem i tru” (luk long pej 29).

Truaot long konfrens, ol spika oli tijim ol trutok we i mekem testemoni i kam moa strong, we i tekem tu blong stap mekem mo holemtaet ol tabu kavenan (luk long pej 95 mo 73), stap kasem revelesen blong yuwan (luk long pej 16), mo fasin blong stap olsem wan disaepol (luk long pej 77).

“Taem yu stap gohed blong mekem testemoni blong yu i kam strong long Jisas Kraes i nambawan samting,” Presiden Nelson i talem, “lukluk long ol merikel we bae i hapen long laef blong yu.” (luk long pej 95).

Afta we jeneral konfrens i finis, wok long Sol Lek Tempol i gohed bakegen. Wok mo fasin blong stap rere i stat tu long 125 tempol raon long wol we oli anaonsem o oli stap bildim. Naoia hemia i tekem tu 18 niu tempol we Presiden Nelson i anaonsem long las sesen blong konfrens ia (luk long pej 121).

“[Lod] i stap mekem i moa isi blong ol man i save go long ol tempol blong Hem evri ples,” Presiden Nelson i talem. “Hem i stap hariap blong mekem yumi bildim ol tempol. Hem i stap givim moa paoa long yumi blong karem Isrel i kam tugeta” (luk long pej 121).