Ang Labing Mahinungdanong Tawo diha sa Basahon ni Mormon

Daghang katuigan na ang milabay, ang akong tigpangalagad nga mga igsoong lalaki midapit nako nga magtuon og tinuoray sa Basahon ni Mormon. Sa paghatag nila nako niini nga pagdapit, akong naamgohan nga, bisan kon nagbasa ko og ginagmay gikan sa Basahon ni Mormon matag adlaw, wala ko magtuon niini sa tinuoray.

Sila mipakigbahin og usa ka saad kanako nga gibase sa mga pulong ni Presidente Ezra Taft Benson: “Adunay gahom sa [Basahon ni Mormon] nga magsugod sa pagdagayday sa inyong mga kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dakong gahom sa pagsagubang sa tintasyon … sa paglikay sa panglingla … nga magpabilin sa higpit ug pig-ot nga dalan” (Mga Pagtulon-an sa mga Presidente sa Simbahan: Ezra Taft Benson [2014], 169).

Gidawat nako ang ilang pagdapit, ug sa misunod nga mga bulan nakita nako nga ang ilang saad natuman. Nakapausab kini sa akong kinabuhi.

Ang usa ka dakong rason nga ang Basahon ni Mormon naghatag nato og espirituhanong gahom mao nga kini makapaduol nato ngadto ni Jesukristo. Diha sa artikulo ni Presidente Henry B. Eyring sa pahina 4, siya nagsulat nga, “Kadtong sinsero nga nagbasa sa Basahon ni Mormon, nagsunod sa mga pagtulon-an niini, ug nag-ampo mahitungod sa kamatuoran niini mobati sa Espiritu Santo ug molambo ang ilang hugot nga pagtuo, ug pagpamatuod, sa Manluluwas.”

Si Jesukristo mao ang labing mahinungdanong tawo diha sa Basahon ni Mormon. Samtang ang akong kauban nga tagsulat, si Madison Sinclair, ug ako mipakigbahin sa among artikulo nga, “Si Jesukristo diha sa Basahon ni Mormon” (pahina 10), adunay sobra sa 7,000 ka pakisayran nga naghisgot sa Manluluwas diha sa Basahon ni Mormon.

Nasayod ko nga samtang magtuon kita sa Basahon ni Mormon niining tuiga sa Dali, Sunod Kanako, kita mapaduol ngadto ni Jesukristo.

Inubanan sa gugma,

John Hilton III

Propesor sa Religious Education, Brigham Young University

Imahe

babaye nga nagbasa og mga kasulatan

Paghulagway pinaagi ni J. Kirk Richards