Ang Akong Labing Mahinungdanon nga mga Bahandi

Imahe

mga kamot nga nag-andam og pagkaon, nga may Basahon ni Mormon sa duol

Paghulagway ni Ben Simonsen

Ang akong trabaho isip usa ka chef mao ang akong kinabuhi. Mibiyahe ko sa kalibotan nga nagluto diha sa mahalon nga mga hotel ug sa mga cruise ship. Miapil ko sa usa ka grupo sa bantogan nga mga tigluto nga nakadaog sa daghang internasyonal nga mga kompetisyon sa pagluto.

Kausa, nalayo ko sa pamilya sulod sa tulo ka tuig. Ang akong inahan kanunayng motawag nako nga maghilak ug moingon nga papaulion ko.

Usa ka adlaw didto sa Milan, Italy, diin nakakontrata ko nga moluto sa usa ka hotel, nahimamat nako ang full-time nga mga misyonaryo sa usa ka puno sa tawo nga estasyonan sa tren. Gisultihan ko nila mahitungod sa Ang Simbahan ni Jesukristo sa mga Santos sa Ulahing mga Adlaw ug mipakigbahin og pipila ka baroganan sa ebanghelyo. Nalingaw ko labi na sa unsay ilang gitudlo nako mahitungod sa pamilya.

Ang mga misyonaryo mihatag nako og kopya sa Basahon ni Mormon ug mihangyo nako sa pag-ampo mahitungod niini. Gihatagan usab ko nila og pampleta nga may mga instruksiyon kon unsaon pag-ampo.

Mibalik ko sa akong hotel nga malipayon, misulod sa akong lawak, nag-ampo, ug misugod sa pagbasa. Kon mas mobasa ko sa Basahon ni Mormon, mas ganahan ko nga mobasa pa. Walay swerte, ang trabaho ang nakapugong nako gikan sa pagpakigkita sa mga misyonaryo pag-usab. Sa dihang nahuman na ang akong kontrata sa hotel, mipauli ko sa Bari, diin misugod ko sa pagluto alang sa laing hotel.

Usa ka adlaw diha sa restawran sa hotel, ang laing tigluto, alang sa dili maayo nga mga rason, misulay sa pagpakigdeyt sa pipila ka waitress didto. Nasuko siya tungod kay ang mga waitress, nga mga Santos sa Ulahing mga Adlaw, mibalibad nga mogawas kuyog niya.

Nahinumdom sa mga misyonaryo nga akong nahimamat sa Milan, gisultihan nako ang tigluto nga ang mga waitress may katungod nga mobalibad niya.

“Mormon sab ka?” siya nangutana.

Tungod kay ganahan ko sa mga baroganan nga gitudlo sa mga misyonaryo nako ug aron morag makataronganon sa pagdepensa sa mga waitress, mitubag ko og, “Oo.”

Sa sunod higayon nga nakita sa tigluto ang mga waitress, siya miingon nila nga usa ko ka Santos sa Ulahing mga Adlaw. Nalipay sila. Sa dihang nagkatapok kami alang sa paniudto, misugod sila sa pagpangutana nako mahitungod sa Simbahan didto sa Milan. Gisultihan nako sila mahitungod sa siyudad ug nga nahimamat nako ang mga misyonaryo didto. Sa dihang naabot na ang among paniudto, mikab-ot ko sa baso nga may bino diha sa lamesa.

“Unsay imong gibuhat moinom ka og bino?” usa sa mga waitress nangutana.

“Aduna bay sayop niana?” Miingon ko.

“Aktibo ka ba?” nangutana ang usa.

“Sa unsa nga paagi?” Miingon ko.

“Unsa ang imong gisul-ob sa adlaw nga gibunyagan ka?” nangutana sila.

“Wala ko kahinumdom,” miingon ko nila. “Usa pa lang ka bulan ang akong pangidaron.”

Nasuko kaayo sila tungod kay nagtuo sila nga nagbugal-bugal ko nila. Mipaniguro ko nila nga wala ko magbugal-bugal. Miangkon ko nga dili ko miyembro sa Simbahan, apan giingnan nako sila nga ganahan ko sa Basahon ni Mormon ug sa mga baroganan sa ebanghelyo nga akong nakat-onan. Dayon nangutana ko kon unsaon nga makakat-on pa ko og dugang mahitungod sa ilang simbahan.

Wala madugay ang mga waitress mipailaila nako ngadto sa mga misyonaryo. Dili sila makatuo nga nakahuman ko sa mga hisgotanan ug nagpabunyag.

Imahe

inahan ug amahan uban sa duha ka batang lalaki

Litrato sa pamilya sa maayong kabubut-on sa tagsulat

Sa akong pagpabunyag, ang akong kinabuhi nausab. Akong nakat-onan nga dili pwede nga ang imong usa ka tiil anaa sa kalibotan ug ang usa ka tiil anaa sa ebanghelyo. Akong nakat-onan nga ang trabaho dili mao ang labing importante nga butang sa kinabuhi. Akong nakat-onan nga ang Ginoo ug ang akong pamilya mao ang unahon. Sa kataposan, akong nasabtan ang kaguol nga gibati sa akong inahan nga wala ko, ug nangayo ko niya og pasaylo.

Mihunong ko sa pagbiyahe sa kalibotan, naminyo didto sa Bern Switzerland Temple, nagsugod og pamilya, ug nakakuha og trabaho sa pagpangluto didto sa usa ka lokal nga ospital, diin akong gigamit ang akong talento sa pagtabang sa masakiton nga mga tawo nga mamaayo. Karon ako na ang nagdumala sa human resources sa ospital. Ang pagtrabaho nga anaa ra sa duol nakahatag nako og panahon nga igahin nako sa akong pamilya ug sa mga calling sa Simbahan.

Sukad sa adlaw nga miadto ko sa templo ug midawat sa akong pagtuga duha ka tuig human sa akong bunyag, ganahan na ko sa kasagrado sa templo ug sa buhat didto. Sa dihang ang akong amahan namatay upat ka tuig human niana, nasagmuyo ko. Siya ang akong bayani. Salamat sa ebanghelyo ni Jesukristo, nahibalo ko nga mabuhi gihapon siya.

Sa dihang misulod ko sa celestial nga lawak human sa mahinungdanon nga buhat alang sa akong amahan, nabati nako ang iyang gakos. Nianang higayona, ako nasayod nga ang akong amahan midawat sa ebanghelyo ug sa gugma sa Ginoo alang sa Iyang mga anak.

Kita nga mga Santos sa Ulahing mga Adlaw napanalanginan nga masayod sa tinuod nga ebanghelyo. Mapasalamaton ko kon giunsa niini pag-usab ang akong kinabuhi. Diha sa ebanghelyo akong nakaplagan ang tinuod nga kalipay. Ang ebanghelyo ug ang akong pamilya mao ang akong labing mahinungdanon nga mga bahandi.