Pagkadisipulo sa Inadlaw-adlaw nga Kinabuhi

Imahe

Presidente M. Russell Ballard

“Tingali mibati kamo nga wala kamo sa ‘tradisyonal’ nga dalan nga gisubay sa inyong mga kaedad. Tingali nahadlok kamo bahin sa pagpadayon sa kinabuhi tungod kay basin makaadto kamo sa daghang lainlaing mga direksyon. Tingali nabalaka kamo bahin sa pagkahimo sa unsay gusto sa Ginoo nga kamo mamahimo—miungot diha sa nagsanga nga mga dalan sa posibilidad.

“Imbes mabalaka kon anaa ka pa ba sa saktong dalan, itutok ang imong kusog sa pagbuhat sa mga butang nga makahimo og kalainan. Pagtakda og klaro ug piho nga mga tumong aron mamahimo sa unsay imong gusto. Tinguhaa ang giya sa Ginoo sa tibuok niini nga proseso.

“Kon dili ka segurado sa sunod nga lakang diha sa imong dalan, lihok ‘nga ingon og’ ikaw ang tawo nga gusto nimo nga mamahimo. Kon buhaton nimo kana, ikaw molambo ngadto niana nga matang sa tawo. Sa kataposan ang imong mga binuhatan, ang imong kinaiya, mogiya nimo nga mahimong matang sa tawo nga ikaw gusto nga mamahimo.

“Samtang naningkamot ka nga mamahimong ingon niini nga tawo ug ikaw adunay hugot nga pagtuo sa plano sa Dios alang nimo, bation nimo ang kalinaw nga ang imong kinabuhi nagpadayon paingon sa positibo nga direksyon—bisan kon dili pa kaayo kini klaro o lahi kini kaysa niadtong anaa sa imong palibot.”

Imahe

Elder Jeffrey R. Holland

“Ang Dios nagbantay kanato[.] … Makasalig kita Kaniya sa kanunay[.] … Siya sa kasagaran motubag sa atong mga pag-ampo pinaagi sa uban nga mga tawo.

“Sa mga adlaw nga kita mobati nga kita gitukmod ngadto sa atong limitasyon, kita gipahinumdoman nga dili kita itukmod lapas pa sa atong hugot nga pagtuo. Ang karaang panultihon mao, ‘ang kalisdanan sa tawo kahigayonan sa Dios.’ Dili nato makita kon unsa gayod ang atong kalig-on hangtod nga kini masulayan, mahashasan, ug masulayan pag-usab.

“Kanunay—tingali kasagaran—ang lisod, mapugsanon nga mga panahon sa atong kinabuhi mao ang mga panahon sa paglambo—mga panahon sa pagtino. Mao kini ang modala nato gikan sa kon si kinsa kita karon ngadto sa kon si kinsa kita angay nga mamahimo.”

Imahe

Elder Dieter F. Uchtdorf

“Si Harriet ug ako bag-ohay lang nga mipauli gikan sa talagsaong pagbisita sa pagpangalagad didto sa Dubai. …

“… Mitambong kami sa matahom nga panagtigom alang sa sakramento sa usa ka giabangan nga hotel, nagsimba sa Dios kuyog sa ubang mga disipulo ni Jesukristo gikan sa tibuok kalibotan. Ang among kasingkasing napuno sa pasalamat samtang among gibati nga gigakos sa mga miyembro sa Simbahan didto. Pagkanindot nga mahimong kabahin sa tibuok kalibotan nga simbahan nga nagsangyaw ug nagtuman sa malukpanon nga ebanghelyo ni Jesukristo.

“Bisan kinsa man kita o bisan asa man kita, si Jesukristo mao ang atong kalig-on. Kita makakaplag og kalinaw diha Kaniya ug panaghiusa uban sa Iyang matinud-anong mga disipulo bisan kon anaa man kita sa Utah o sa Dubai, sa London o sa Brazil. Bisan asa man kita sa kalibotan, kitang tanan nagkahiusa diha sa dalan sa pakigsaad balik ngadto sa atong mahigugmaong Amahan.”

Imahe

Elder Dieter F. Uchtdorf

“Gikan sa Iyang pagkatawo ngadto sa Iyang paglansang sa krus ug sa kataposan, sa pagkabanhaw, si Jesukristo anaa sa usa ka panaw sa pagtuman sa misyon nga gitakda alang Kaniya. Ang atong misyon isip Iyang mga disipulo mao ang pagkat-on sa pagsunod sa Iyang dalan.

“Malipayon kaayo ang kasinatian karong semanaha nga sa espirituhanon ug sa pisikal nga paagi mosunod sa mga tunob sa Manluluwas—lakip didto sa Betlehem, ang lugar nga gipakatawo ang Manluluwas ug diin ang Iyang yutan-ong panaw nagsugod.

“Samtang mibisita sa Simbahan sa St. Catherine, nga nailhan isip tradisyonal nga lugar nga natawhan ni Jesukristo, naghunahuna ko sa panaw sa pagkadisipulo nga gisubay natong tanan. Gipakigbahin nako ang pipila sa akong mga hunahuna mahitungod sa pagkadisipulo atol sa debosyonal sa BYU Jerusalem Center.

“Isip mga sumusunod ni Jesukristo, nagtinguha kita nga mahimong sama sa atong Manluluwas ug nagsunod sa Iyang ehemplo diha sa tanan natong gibuhat. Sugod gayod sa gutlo nga mitunob kita sa dalan sa pagkadisipulo, ang makita ug dili makita nga mga panalangin gikan sa Dios misugod sa pag-abot kanato.

“Bisan asa man kita, kamo ug ako mahimong molakaw diha sa dalan sa pagkadisipulo karon. Magmapainubsanon kita; mag-ampo kita sa atong Amahan sa Langit sa tibuok natong kasingkasing ug ipahayag ang atong mga tinguha sa pagpaduol ngadto Kaniya ug magkat-on mahitungod Kaniya.”

Imahe

duha ka gidrowing nga mga hulagway diha sa usa ka dalan

Imahe

Elder Neil L. Andersen

“Buhata. Mamahimo. Buntoga. Ipakigbahin.

“Adunay pipila ka kasinatian nga ingon ka makapabayaw sama sa pagpakig-uban sa mga misyonaryo diha sa MTC. Makapadasig kini! Si Kathy ug ako, uban sa pipila ka sakop sa among pamilya, bag-ohay lang miadto didto. Ania ang pipila ka hunahuna nga magamit natong tanan.

“Ang mga misyonaryo kinahanglang mopalambo og lig-on ug klarong panabot bahin sa unsay ilang gituohan, unsay ilang nahibaloan, ug unsay ilang gibati. Aduna kini lig-ong epekto diha sa unsay ilang gihimo. Tinuod usab kini alang ninyo ug nako.

“Ang pagkahimong disipulo ni Jesukristo mas labaw pa kaysa pagkat-on bahin Kaniya. Nagkinahanglan kini ug pagtuon sa mga pulong sa Dios diha sa mga kasulatan, paglihok sumala sa atong hugot nga pagtuo, ug pagsunod sa ehemplo sa Manluluwas. Ang pagkat-on ug pagsunod mag-uban.

“Pinaagi sa kasinatian sa misyon, akong nakat-onan kon unsaon ang pagsalig sa Manluluwas, pagsandig Kaniya, pagtinguha Kaniya, ug pagtugot Kaniya sa paghupay nako samtang nagsugakod ko sa mga hagit. Kini nga mga leksiyon nakagiya kanako sa tibuok nakong kinabuhi, ingon nga ang inyong mga kasinatian nakagiya kaninyo.

“Isip mga misyonaryo—ug mga sumusunod ni Jesukristo—kita motudlo ug motabang niadtong andam nga mopaduol sa Manluluwas. Pinaagi sa atong mga buhat ug mga pulong, ang tanang tawo nga atong ikahinabi mobati og pagsaksi sa gugma sa Dios alang nila ug sa atong debosyon sa atong Manluluwas, si Jesukristo.”

Imahe

Elder Gerrit W. Gong

“‘May kalig-on ako sa pagsagubang sa tanan tungod sa gahom nga gihatag kanako ni Kristo.’ (Mga Taga-Filipos 4:13). …

“Isip batan-ong mga disipulo ni Kristo niining panahona, kamo mag-atubang og makahahadlok nga mga babag. …

“Palihog hinumdomi nga ang dalan sa pakigsaad mao ang labing luwas, labing paspas, ug labing malipayon nga dalan paingon sa unahan. Kini nga mga pakigsaad—uban sa mga propeta, mga manalagna, ug mga tigpadayag—naglihok isip mga tighimo og mga marka nga subayon, naggiya sa inyong panaw balik ngadto sa atong Langitnong Amahan.”

Imahe

Elder Ulisses Soares

“Isip mga sumusunod ni Jesukristo, kita mga tigpasiugda og kalinaw nga madagayaong gitanyag pinaagi Kaniya ug sa Iyang maulaong sakripisyo.

“Usa ka paagi nga atong mapasiugdahan ang kalinaw sa Manluluwas mao ang pamaagi sa atong pagtagad sa usag usa. Usa sa labing klaro nga mga timailhan nga kita mas nagpaduol ngadto sa Manluluwas ug mas mahisama Kaniya mao ang mahigugmaon, mapailobon, ug mabination nga paagi nga kita motagad sa atong isigkatawo, bisan unsa pa ang mga kahimtang.

“Samtang maningkamot kita sa pagpalambo sa mga kinaiya nga sama sa Manluluwas, kita mahimong mga instrumento sa Iyang kalinaw sa kalibotan sumala sa sumbanan nga Siya Mismo ang miestablisar. Ako modapit ninyo sa pagkonsiderar sa mga paagi nga kita makausab sa atong kaugalingon ngadto sa mobayaw ug mosuporta nga mga tawo, mga tawo nga adunay masinabtanon ug mapasayloon nga kasingkasing, mga tawo nga nagtan-aw alang sa labing maayo diha sa uban, kanunayng naghinumdom nga “kon adunay mga butang nga mahiyason, matahom, o maayo og dungog o dalaygon, kami naninguha sa pagpangita niining mga butanga” (Mga Artikulo sa Hugot nga Pagtuo 1:13).”

Imahe

Elder Ulisses Soares

“Ang akong bag-ohay nga pagbisita didto sa Brazil naglakip sa wala damha—apan dili makalimtan—nga kasinatian uban sa usa ka makapadasig nga disipulo ni Kristo nga ginganlan og Marcos Rossi.

“Si Marcos natawo nga adunay Hanhart syndrome, usa ka talagsaong sakit nga nakapugong sa iyang mga bukton ug mga bitiis gikan sa hingpit nga paglambo. Ang mga doktor mihatag lamang niya og 30 ka tuig nga mabuhi, apan karon nakalatas niana nga tagal, siya nagpadayon sa pagtan-aw lapas pa sa iyang mga limitasyon. Siya usa ka bana ug amahan, usa ka tagsulat, usa ka surfer, skateboarder, scuba diver, DJ, singer, internasyonal nga mamumulong, ug daghan pa.

“Kitang tanan adunay mga limitasyon, apan ang mahinungdanon kon unsaon nga kita makakat-on ug molambo gikan sa mga babag nga mahimong makapahugno kanato. Bisan pa sa iyang mga pakigbisog, ang pagtuo ni Marcos lig-on. Siya nakasabot nga ang iyang mga pagsulay temporaryo ra. Ang iyang pagkamapasalamaton sa mahangtorong plano sa Langitnong Amahan ang nakapalipay ug nakapadasig kaniya matag adlaw.

“Ang atong Amahan gusto nga kita makabalik Kaniya usa ka adlaw ug kita gisaaran nga kita mahimong hingpit diha sa Manluluwas. Hangtod moabot kanang adlawa, Siya magauban nato sa matag lakang sa atong mortal nga panaw. Sa atong pagbalik ngadto Kaniya, kita makakaplag og hingpit nga kalipay bisan pa man sa mga hagit nga atong giatubang.”

Imahe

Presidente Camille N. Johnson

“Kita makakaplag og kahupayan—gikan sa kahigawad, sa kasakit, ug sa bisan unsa nga hagit—samtang atong ipahisubay ang atong mga kasingkasing ug mga hunahuna ngadto kang Jesukristo. Sa paghimo ug sa pagpabilin nga nahisubay Kaniya, kita moapil sa inadlaw-adlaw nga debosyon ngadto sa Dios, mag-ampo ug magtuon sa mga kasulatan. Kita maghinulsol matag adlaw. Kita moserbisyo. Kita mogamit og mga pulong nga ‘mahiyason, matahom, o maayo og dungog o dalaygon’ (Mga Artikulo sa Hugot nga Pagtuo 1:13).

“Kining tanan nagdapit sa Espiritu nga maanaa sa atong kinabuhi. Maminaw kita og maayo sa mga pagpabati sa Espiritu Santo. Atong usbon ang atong mga hunahuna ug ang unsay gigahinan sa atong mga panahon sa pagseguro nga naghimo kita og padayon nga koneksyon sa langit.”

Imahe

Sister Kristin M. Yee

“Midagan ko og 5K sa miaging Sabado uban sa labing talagsaong kababayen-an ug kalalakin-an didto sa Utah YSA nga komperensiya nga ‘Manag-uban diha ni Kristo’ [‘Together in Christ.’] Natandog ko sa Espiritu nianang gabhiona. Nalingaw kaayo kami ug mibati og kalagsik samtang nagpundok kami ug naghisgot bahin ni Kristo ug midagan duol sa Iyang balaan nga balay. Adunay pipila ka analohiya nga nakapatandog nako nga gusto nakong ipakigbahin nganha kaninyo.

“Una, kita kinahanglang modagan sumala sa atong kaugalingong gipaspason.

“Ang akong tumong alang niining 5K mao ang pagpadayon sa pagdagan, dili mohunong, ug mohuman (ipabiling ubos ang gikusgon!). Samtang nangandam ko, akong naamgohan nga mas layo ang akong maabtan kon modagan ko sumala sa akong gipaspason ug magmakanunayon. Niining nindot nga pagdagan, ang ubang tawo paspas nga midagan, ang uban hinay nga midagan, ang uban naglakaw, ug ang uban nagtulod sa mga higala o pamilya nga naglingkod sa mga wheelchair. Dili kadto mahitungod sa kon kinsay una o kataposang miabot, apan mahitungod kadto sa pagdasig sa usag usa sa pagpadayon, sa paghimo niini nga manag-uban, ug sa paghuman.

“Ang imong gipaspason ug pag-uswag anaa ra tali kanimo ug sa Ginoo. Ug sa akong hunahuna dili kaayo Siya mohatag og importansya sa imong nahimutangan kon itandi sa tawo nga nag-una nimo o naulahi nimo. Kondili, sa akong hunahuna Siya nagtutok sa pagtabang nimo sa pagpadayon bisan asa man ka sa imong personal nga panaw balik ngadto Kaniya. Mao nga hibaloi ug tagamtama ang gipaspason nga epektibo nimo, ug tugoti ang Langitnong Amahan ug ang Manluluwas sa paglig-on ug sa pagdan-ag sa imong mga lakang!

“Ikaduha, mas makadagan kita og maayo nga magkauban!

“Ganahan kong makighimamat ug modagan uban sa daghan kaayong banggiitan nga mga disipulo sa Manluluwas! Kuyog sa uban nga anaa sa akong tupad, mibati ko og kadasig sa pagpadayon, ug ang gilay-on dili kaayo layo pamation. Usa ka sister miingon nako, ‘Mas makadagan ko og maayo kon kuyog ka!’ Ganahan ko nga magdinasigay sa usag usa. Ang pagtabang sa uban subay sa dalan sa pagkatinuod maghatag nato og kadasig sa pagpadayon. Morag duna gihapon koy hangin sa pagpakig-istorya samtang nagdagan ug mibati nga morag makapadayon gihapon ko. Tingali tungod kana kon si kinsa ang akong kauban sa pagdagan ug si Kinsa ang hinungdan sa among pagdagan. Kami nagpundok diha ni Kristo.

“Ug ingon nga kami nagbayaw ug nagdasig sa usag usa niining 5K nga pagdagan, ang Manluluwas sa kasagaran molihok pinaagi sa uban niining mortal nga pagdagan aron sa pagkuha sa atong mga palas-anon ug sa paghatag nato og kalig-on, kadasig, seguridad, kahupayan, ug nag-uswag nga kalipay. Siya mohatag nato og kahupayan pinaagi niadtong nagdagan tupad nato.

“Ang kataposang daganon mao ang taas kaayo ug pasaka ug paingon diretso sa Saratoga Springs Utah Temple, nga nagdan-ag sa kagabhion. Dili nako makalimtan ang panaghigalaay ug gugma nga gihatag ug nadawat samtang nagpadayon kami sa among pagdagan paingon sa utlanan. Hinaot nga atong palig-onon ang usag usa ug bation ang nag-uswag nga kalipay samtang nagdagan kita niini nga panaw nga manag-uban diha ni Kristo.”

Imahe

Sister Tracy Y. Browning

“Si Jesukristo nagdapit nato sa pagsunod sa Iyang ehemplo sa atong inadlaw-adlaw nga kinabuhi. Ug Siya nagsaad usab og kalipay samtang kita maningkamot sa paghimo sa atong labing maayo sa pagsunod Kaniya ug mopahisubay sa atong kinabuhi sa Iyang kinabuhi. Bag-ohay lang mibati ko og mas dakong tinguha nga mahimong mas mapailobon sama sa atong Manluluwas. Si Jesukristo, sa Iyang yutan-ong kinabuhi ug pangalagad, mao ang hingpit nga ehemplo sa pagkamapailobon. Siya miantos sa tanang butang ug mihimo sa tanang butang uban sa kaandam sa pagtugyan ngadto sa Langitnong Amahan. …

“Ganahan ko [sa] kanta nga [‘Maninguha Kong Mahimong Mahisama kang Jesus’] tungod kay narepresentar kaayo kini sa unsay akong gipaningkamotan nga buhaton sa matag adlaw, nga mao ang pagsunod sa ehemplo sa atong Manluluwas.

“… Ang kabahin sa unang bersikulo nag-ingon … : ‘Maninguha kong mahimong; mahisama kang Jesus.’ Ganahan ko niana nga mensahe.

“Kita makakat-on og dugang pa bahin niana diha sa Juan 13:15 [:] ‘Kay usa ka panig-ingnan ang akong gihatag kaninyo, aron nga kamo usab kinahanglan nga magabuhat sama sa akong gibuhat kaninyo.’ Kana usa ka gamhanang panudlo ngari nako nga ang Manluluwas naghatag og sumbanan aron atong sundon, nga kon kita magtinguha alang Kaniya ug magtinguha sa Iyang sumbanan, nga kita mahimong mas mahisama Kaniya.

“Mao nga ako modapit ninyo nga magkat-on karon: Unsa ang mga paagi nga gusto ni Jesus kanato aron kita mahimong mas mahisama Kaniya? Ug magmahunahunaon bahin sa pagpaningkamot sa paglakip niadtong uban nimong mga kinaiya ug imong mga binuhatan ug imong mga inistoryahan karon.”

Imahe

Sister Tracy Y. Browning

“Ang kabataan tingali gamay sa pamarog, apan lig-on ang ilang espiritu. Kadaghanan sa kabataan dili mogamit og lawom nga mga pulong, ug sila mopasabot sa mga butang sa yano kaayo nga paagi. Sila walay kahadlok diha sa unsay ilang nasayran nga tinuod. Sila mosangyaw sa mga butang. Walay daghang paligoy-ligoy. Nakapahimo kini sa ilang pagpamatuod nga gamhanan ngari nako, ug nanghinaot ko nga kita makakita kanila isip mga disipulo ni Jesukristo.

“Kita nagdapit nila sa paghimo og mga pakigsaad kon mag-edad og otso anyos, ug ilang gihimo. Ug sila mga disipulo usab. Kon kita modapit nila nga gamiton ang ilang pagkadisipulo, motan-aw nila isip mga disipulo, ug motratar nila isip mga disipulo, sila motuman sa bisan unsa nga sumbanan nga atong gitakda alang nila.”