5 ka Yano nga mga Paagi sa Pagpakigbahin sa Basahon ni Mormon

Ni Mike Judson

Departamento sa Kasaysayan sa Pamilya [Family History Department]

Mas sayon karon ang pagtabang sa uban nga mobati sa gahom sa Basahon ni Mormon diha sa ilang kinabuhi.

Imahe

duha ka babaye nga nagtan-aw sa selpon

Ang mga pamahayag gikan sa mga propeta ug apostoles sa modernong panahon bahin sa mga panalangin sa pagbasa sa Basahon ni Mormon makapatandog kaayo.

Si Propeta Joseph Smith miingon: “Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi nga maduol sa Dios pinaagi sa pagsunod sa iyang mga lagda, kay sa bisan hain nga basahon.”¹

Si Presidente Ezra Taft Benson (1899–1994) mitudlo: “Ang Basahon ni Mormon mao ang instrumento nga gidisenyo sa Dios nga ‘mosilhig sa yuta ingon sa usa ka lunop, aron pagpundok sa [Iyang] pinili’ (Moises 7:62).”²

Bag-ohay lang, si Presidente Russell M. Nelson mipamatuod: “Kini ang basahon nga makatabang sa pag-andam sa kalibotan alang sa Ikaduhang Pag-anhi sa Ginoo.”³

Ang ingon ka gamhanan nga mga pamahayag nagpahinumdom nato sa kaimportante sa pagpakigbahin sa Basahon ni Mormon ngadto niadtong anaa sa atong palibot. Kon kita mobuhat niini, kita makatabang sa uban nga makadawat og dugang nga gahom sa ilang kinabuhi pinaagi sa mga kamatuoran nga gitudlo niini, sama sa gipamatuod ni Presidente Nelson sa dihang miingon siya:

“Kon maghunahuna ako sa Basahon ni Mormon, maghunahuna ako sa pulong nga gahom. Ang mga kamatuoran sa Basahon ni Mormon adunay gahom sa pag-ayo, paghupay, pagpahiuli, pagtabang, paglig-on, pagpakalma, ug pag-abiba sa atong mga kalag.”⁴

Mga Ideya nga Mahimo Ninyong Sulayan

Sa atong moderno nga kalibotan, adunay walay kataposan nga mga posibilidad sa pagpakigbahin sa Basahon ni Mormon. Samtang maghunahuna kita kon unsaon sa pagpakigbahin, kita makasugod pinaagi sa paghunahuna kon kang kinsa kita mopakigbahin sa Basahon ni Mormon ug kon unsay nahitabo sa ilang kinabuhi. Dayon atong sundon ang Espiritu aron masayod kon sa unsang paagi ang Basahon ni Mormon makapanalangin gayod nila. Ania ang lima ka ideya (sa daghan!) nga mahimo natong sulayan:

Sa atong pagtuon sa Basahon ni Mormon, kita mahimong mangita sa mga bersikulo nga nakapatandog nato. Ang usa ba niini makapahunahuna nato sa usa ka tawo nga atong kaila? Makasunod kita sa pag-aghat ug mahigugmaong mopakigbahin sa mga pulong nga atong nabasa niana nga tawo pinaagi sa pag-text, pag-email, pagtawag sa telepono, o pagsulat.
Kon kita mibati nga positibong naimpluwensya sa Basahon ni Mormon, kita mahimong mag-ampo ug mangutana sa Dios kon kinsa pa ang makabenepisyo gikan sa pagpaminaw sa atong mga kasinatian. Dayon makapaambit kita sa atong mga istorya, mosalig sa saad sa Ginoo nga “Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libot kaninyo, aron sa pagtabang kaninyo” (Doktrina ug mga Pakigsaad 84:88).
Natandog ba kita sa istorya nga gipakita diha sa usa ka bidyo gikan sa Mga Bidyo sa Basahon ni Mormon nga koleksiyon? Nagkadaghan, ang mga tawo nakakaplag niini nga mga bidyo sa online ug nadala ngadto sa mga kamatuoran sa ebanghelyo pinaagi sa mga istorya nga gipakita niini. Pag-usab, kon kita nadasig samtang nagtan-aw kita, maghunahuna kita kon kinsa pa kaha ang gustong makatagamtam sa susama nga kasinatian ug dayon ipakigbahin ang link sa bidyo ngadto nila.
Usa sa labing sayon nga mga paagi sa pagpakigbahin mao ang pagtuplok sa button sa Basahon ni Mormon nga app. Mahimo nimong ipakigbahin ang link ngadto sa usa ka tawo o ipa-scan lang nila ang code gikan sa app sa imong selpon. Bisan kon maglingkod tupad sa usa ka tawo sa bus, mahimo ka nga mopakigbahin niini ug mohatag nila og akses sa Basahon ni Mormon sa bisan unsa nga pinulongan. Ang app naglangkob sa kinatibuk-ang teksto sa Basahon ni Mormon. Naglakip usab kini og Mga Bidyo sa Basahon ni Mormon ug daghan pang kapanguhaan nga makagiya sa mga tawo sa pagkat-on pa og dugang bahin ni Jesukristo ug sa Iyang mga pagtulon-an.
Usa sa labing tradisyonal nga mga paagi nga kita makapakigbahin sa Basahon ni Mormon mao ang paghatag lang ngadto sa usa ka tawo og giimprinta nga kopya niini. Daghang tawo ang nangita og maayong libro nga basahon. Kita mahimong mopakigbahin nila sa Basahon ni Mormon ug mosulti nila kon nganong makahuloganon kaayo kini nato.

Ang Basahon ni Mormon adunay mga tubag sa mga hagit sa kinabuhi!⁵ Kini mopalahutay sa hugot nga pagtuo diha ni Jesukristo⁶ ug mopunting sa mga tawo ngadto Kaniya! Kini makapahaw-as sa mga tawo gikan sa pagpakasala ug kagul-anan, makatudlo nila kon unsaon aron bation ang kalinaw sa Manluluwas,⁷ ug makapalapad sa ilang panabot kon kinsa sila sa matag higayon nga sila mobasa niini!

Sama sa giingon ni Presidente Nelson, ang Basahon ni Mormon mao ang “instrumento sa Dios sa pagpahinabo [sa] panagpundok [sa Israel].”⁸ Ang Ginoo mipagawas sa Basahon ni Mormon isip kabahin sa Iyang buhat, ug kini atong oportunidad nga ipakigbahin ang mga maayong balita niini ngadto sa uban. Bisan kon sa unsang paagi pa kita mopakigbahin sa Basahon ni Mormon, kita makaseguro nga kita miapil sa buhat sa Ginoo alang sa kaluwasan ug kahimayaan sa pagtabang sa pagpundok sa Iyang mga anak.