Iesu Mesia i roto i te Buka a Moromona

Hōho’a

Iesu Mesia e ’aupuru ra i te nuna’a nō ’Amerika

’O vai tā ’outou e parau ’o ’oia te ta’ata rahi i roto i te Buka a Moromona ? Tē parau nei paha te tahi pae ’o Nephi, ’o Alama, ’e ’aore rā ’o Moromona, te ta’ata rahi mau rā, ’o Iesu Mesia īa. ’Ua pāpa’i Nephi :

« ’Ua itoito ho’i tātou i te pāpa’i ’e ’ia fa’aitoito i tā tātou mau tamari’i … ’ia ti’aturi i te Mesia. …

« ’E tē parauparau nei tātou nō ni’a i te Mesia, tē ’oa’oa nei tātou nō te Mesia, tē a’o nei tātou nō ni’a i te Mesia, tē tohu nei tātou nō ni’a i te Mesia » (2 Nephi 25:23, 26).

I te matahiti 1978, ’ua nene’i ’o Susan Ward Easton i te hō’ē parau tāpa’o, ma te fa’a’ite pāpū ē ’o Iesu Mesia te ta’ata rahi i roto i te Buka a Moromona. ’Ua ’itehia iāna te mau ti’ara’a ta’a ’ē ’o Iesu Mesia ’e ’ua fa’a’ite mai ē, ’ua fa’ahitihia tōna i’oa ’e ’aore rā tōna upo’o parau e 3 925 taime i roto i te Buka a Moromona, ’o tē ti’a i te rahira’a taime i roto i te 1.7 o te mau ’īrava ato’a.¹

Tē ha’apāpū nei teie tuatāpapara’a faufa’a rahi i te faufa’a tumu ’otahi ’o te Fa’aora i roto i te Buka a Moromona ; terā rā, te aura’a e’ita e tai’o hia te pinepinera’a o te fa’ahitihia te Mesia ma te fa’ata’a ’ē i te mau fa’ahitira’a nō ni’a iāna.

I te pae hope’a, e ’ere te rahira’a o te mau fa’ahorora’a nō Iesu Mesia i te mea faufa’a roa nō te ha’api’i atu nā roto i te Buka a Moromona ; terā rā, e nehenehe te mau fa’ahitira’a tāta’itahi nō ni’a iāna e ha’api’i ia tātou nō ni’a i tōna nātura atuara’a ’e tāna misiōni. ’Ua hi’opo’a māite mātou i te Buka a Moromona, ma te ’imi i te mau fa’ahitira’a ato’a nō Iesu Mesia, ’oia ato’a te mau ti’ara’a ’e te mau ta’o. ’Ua ’itehia ia mātou e 7 452 fa’ahorora’a tā’āto’a—hō’ē fāito hau atu i te hō’ē fa’ahorora’a ’īrava.² Tē fa’a’ite nei te mau upo’o parau nō te Mesia fātata e 50 i ni’a i te hānere o te mau fa’ahorora’a parau o te Mesia i roto i te Buka a Moromona, e te toe’a nō roto mai ïa i te mau fa’ahitira’a parau.

E hōro’a mai te ’imira’a ia Iesu Mesia i te tahi rāve’a ’ōtahi nō te ha’api’i mai nō ni’a iho Iāna. ’A hi’o mai te aha te huru o te ’īrava i muri nei i te fa’a’ite pāpū nei i ni’a iāna : « ’Ia ha’amata i te ti’aturi i te Tamaiti a te Atua, ē e haere mai ’oia nō te fa’aora i tōna ra mau ta’ata, ’e e ha’amāuiuihia ’oia ’e e pohe ho’i nō te ha’amatara i tā rātou mau hara ; ’e e ti’a fa’ahou mai ’oia mai te pohe mai, ’ia tupu te ti’afa’ahoura’a, ’e e ti’a atu te mau ta’ata ato’a i mua iāna, ’ia ha’avāhia i te mahana hope’a ’e te mahana ha’avāra’a, mai te au i tā rātou mau ’ohipa. » (Alama 33:22 ; reta tei fa’ahuru-ē-hia).

’I roto i te tuatāpapara’a mātāmua ’a te tuahine Easton, e tai’ohia teie ’īrava mai te tahi fa’ahorora’a nō te Mesia e tōna upo’o parau « Tamaiti a te Atua. » Teie rā, ’ua fa’ahitihia te Fa’aora e pae fa’ahou ā taime. Te ha’apāpū nei teie ’īrava ’eiaha noa ē, e Tamaiti ’o Iesu Mesia nā te Atua, o ’Oia ato’a rā te hōho’a tei fa’aora ia tātou nā roto i Tāna Taraehara mure ’ore ’e Tōna Ti’a-fa’ahou-ra’a ’e e riro ’oia ’ei ha’avā nō tātou.

Penei a’e ma te pūai hope, tē parau nei te Mesia iāna iho i roto i te Buka a Moromona. ’Ei hi’ora’a, tē tai’o nei tātou ē ’ua parau te Fa’aora, « ’E ’ia haere mai te ta’ata iā’u nei, e fa’a’ite atu (vau) ia rātou i tō rātou paruparu. Tē hōro’a neiau i te paruparu i te ta’ata nei ’ia tupu tō rātou ha’eha’a ; ’e e nava’i ho’i tō’u maita’i nō te feiā ato’a i fa’aha’eha’a ia rātou iho i mua iā’u nei, ’e ’ia fa’aha’eha’a rātou ia rātou iho i mua iā’u nei, ’e ’ia vai ho’i tō rātou fa’aro’o iā’u nei, ’ei reira vau e fa’ariro ai i te mau mea paruparu ’ei mea pūai nō rātou » (Etera 12:27 ; reta tei fa’ahuru-’ē-hia). Noa atu ē, ’aita te i’oa ’o te Mesia e itehia i roto i teie ’īrava, tē fa’ahiti nei te Fa’aora i tōna iho i’oa e va’u taime. ’Ua ha’apāpūhia tāna ’ohipa ’ia ’imi ana’e tātou i te Fa’aora i roto i teie ’īrava.

Tē fa’a’ite nei teie mau ’īrava i muri nei i te tū’atira’a tā te Fa’aora i fāri’i i ni’a i te ta’ata tāta’itahi ’e te mea tā rātou i fāri’i iāna ra :

« ’A haere mai iā’u nei, ’ia tu’u mai i tō ’outou rima i tō’u nei ’ao’ao, ’e ’ia fāfā ato’a mai ’outou i te mau puta naero i tō’u nei nā rima ’e i tō’u nei nā ’āvae, ’ia ’ite ’outou ē, ’o vau nei te Atua nō ’Īserā’ela, ’e te Atua nō tō te ao ato’a nei, ’e i taparahihia na vau nō te mau hara a tō te ao nei.

« … ’Ua haere atu ra te mau ta’ata ra, ’e ’ua tu’u atu ra i tō rātou rima tōna ’ao’ao, ’e ’ua fāfā atu ra i te puta naero i tōna nā rima ’e i tōna nā ’āvae » (3 Nephi 11:14–15 ; reta tei fa’ahuru-’ē-hia).

Noa atu ē ’aita tātou e nehenehe e fāri’i i tāna mau tāpa’o i te pae tino nei, nā roto rā i te Buka a Moromona, e nehenehe tātou e fa’ahōhonu atu ā i tō tātou iho ’itera’a pāpū nō Iesu Mesia.

Nā te mau fa’ahitira’a pinepine i ni’a i te Fatu i roto i te Buka a Moromona e tauturu ia tātou ’ia ’ite i tōna ti’ara’a tumu i roto i teie ’ohipa mo’a. Te ’itera’a i te Fa’aora i roto i te Buka a Moromona : Te tahi fa’ahou ā ’ite nō Iesu Mesia o te hō’ē īa rāve’a pūai nō te ha’afātata atu iāna.