« Te ’itera’a i te ’īra’a nā roto ia Iesu Mesia », Liahona, Tēnuare 2024.
Te ruhiruhiāra’a i roto i te ha’apa’o maita’i
Te ’itera’a i te ’īra’a nā roto ia Iesu Mesia
Ma te ti’amāra’a i ’itehia mai, te mau rāve’a ’e te hō’ē orara’a ’orihaerera’a ’ei hō’ē vāhi ta’ata ’ore, nō te aha ’aita vau i ’oa’oa roa ? E aha te mea e toe ra ?
Faʼahōho’ara’a nā Dilleen Marsh
’Ua tahe te roimata ’a pure ai au nō te hau, i te fa’a’īra’a tā’u tamaiti ’āpī roa a’e i tāna anira’a misiōnare. ’Ua hina’aro mau vau e haere ’oia i te misiōni. ’Ua nā reira vau. ’Ua tāmata noa vau i te ha’apāpū iā’u iho nō te reira.
’Ua here au i tō’u Fa’aora ’e ’ua ’oa’oa roa vau nō te rāve’a e ti’a ai i tā’u tamaiti, ’ia fa’a’ite i te ’oa’oa ’o tā tātou e nehenehe e fāri’i nā roto ia Iesu Mesia. Teie rā, i roto roa iā’u, tē ri’ari’a nei au ’ia haere atu ’oia. ’Ua ’ite au ē, e’ita roa atu ’oia e ho’i fa’ahou mai i te fare i muri a’e i tāna misiōni. Noa atu e ora mai ’oia i te fare, e ’ere te reira i te hō’ē ā huru.
’Ua parau mai tō’u mau hoa iā’u ē, e mea fa’ahiahia mau te ti’ara’a ’ei vāhi ta’ata ’ore. ’Ua ’oa’oa roa māua tā’u tāne ’e te tīa’ira’a ma te fa’aoroma’i i te ti’amāra’a ’e te mau rāve’a, ’o tā māua i ’ore i fāri’i ’a aupuru ai māua i tā māua mau tamari’i.
Ma teie ti’amāra’a i ’itehia mai, ’ua tomo atu vau i roto e rave rahi ’ātivite. ’Ua rātere haere māua tā’u tāne, ’ua ha’api’i au i te ha’uti i te hāmonia nō tō’u pi’ira’a, ’ua ha’uti au ’e tā’u mau mo’otua, ’e ’ua rave i te ’ohipa hiero ’e te ’ā’amu ’utuāfare.
’Ua ’itehia iā’u te ’oa’oa ’e te orihaerera’a. ’Ua ’itehia iā’u te ha’amaita’ira’a iā’u iho. ’Ua ’itehia iā’u te mau mea fa’ahiahia mau.
Teie rā, tē vai noa ra ā te tahi mea e toe ra. Hō’ē mea ’aita ā e vai ra. I te revara’a tā’u tamaiti, ’ua rave atu ’oia i te hō’ē tuha’a rahi o tō’u māfatu, ’o tā’u e ’ore nei e nehenehe e fa’a’ī.
Fātata hō’ē matahiti i muri a’e i te revara’a tā’u tamaiti, ’ua tupu te hō’ē riri ’ū’ana i roto iā’u tei ’aifāito i te mau riri ’ū’ana ato’a o tā’u mau tamari’i i tō rātou ’āpīra’a. ’Ua hi’o mai tā’u tāne fa’aipoipo iā’u ’e ’ua nā ’ō mai, « e Michelle, e ti’a ia ’oe ’ia tāvini ». ’Ua tāpa’o atu vau iā’u nō te hō’ē ’ohipa tāvinira’a.
Tē māuiui noa ra rā tō’u māfatu. E mea fifi roa nō’u i te fa’aōra’a atu i roto i te tāvinira’a ’aore rā i roto i te tahi atu mau ’ohipa i fa’ata’ahia. Ma te revara’a tā’u mau tamari’i pā’āto’a, e au ra iā’u ē, e’ita roa atu tō’u orara’a i te mea hope roa.
I te hō’ē pō ’a pure ai au nō te ani i te tauturu, ’ua fa’aara mai te Vārua iā’u ē, tē fāri’i nei au i te ’erera’a nā roto mai i te mo’era’a—te mo’era’a te ’ōpuara’a. ’Ua mana’o vau ē, ’ua upo’oti’a vau i ni’a i taua ’oto ta’a ’ē ra ma te fa’a’īra’a i tō’u orara’a i teie mau ’ātivite fa’ahiahia mau ato’a.
Te ’imira’a i te mau pāhonora’a
’A ’imi ai au i te mau pāhonora’a, ’ua ’itehia mai iā’u teie fa’ahitira’a parau nō roto mai i te ’ā’amu ’o te peropheta Iosepha Semita : « ’Ia mo’e ana’e ia tātou [te hō’ē ’ohipa ’aore rā te hō’ē ta’ata], i ni’a iho i te reira tātou i tu’u ai i tō tātou ’ā’au, e ti’a i te reira ’ia riro ’ei fa’aarara’a ia tātou… E ti’a i tō tātou here ’ia tu’uhia i ni’a i te Atua ’e i tāna ’ohipa, hau atu te pūai i ni’a i tō tātou mau ta’ata tupu ».1
Nā te hō’ē pura o te māramarama i pātia i te ata pōiri i ni’a a’e i tō’u māfatu. ’Ua tāmata vau i te fa’a’ī i tō’u ’āpo’o ’oto hōhonu i te mau mea, te mau ’ohipa e rave ’e te mau ’itera’a rau—te tāvinira’a, te herera’a ’e te ’imira’a i te mau tārēni. E mau ’ohipa maita’i ana’e, ’aita rā te reira i fa’a’ī i tō’u ’āpo’o fatafata. ’Aita te reira i fa’aora mai te au i te fa’aorara’a ’o tā’u i hina’aro.
’Ua ’ite a’era vau ē, e tae mai taua huru hau ra ’e te tupura’a nā roto ana’e i tō tātou Fa’aora, ’o Iesu Mesia. ’Ua ha’api’i Iesu, « ’o vau te ’ē’a, ’e te parau mau ’e te ora » (Ioane 14:6). E mea nā roto ana’e iāna tātou e ’ite ai i te ’oa’oa ’e te ’īra’a, te hau ’e te poupou. Tē nā ’ō ra te Salamo 16:11, « e riro ’oe i te fa’a’ite mai iā’u i te ’ē’a ora : ’E te ’īra’a o te ’oa’oa i mua i tō ’aro nā ».
Nāhea vau i te tauira’a
’Aita te orara’a i taui ’oi’oi noa. ’Aita tō’u māfatu i ora ’oi’oi noa. ’Ua ’ite rā vau i hea e ti’a ai iā’u e rōtahi ’ia nehenehe te reira ’ia tupu.
’Ua taui tā’u mau pure. ’Ua ha’amata vau i te ani i te Metua i te ao ra ’ia tauturu mai iā’u ’ia patu i te hō’ē aura’a pūai a’e ’e tō’u Fa’aora. ’Ia tarapape ana’e au, e ha’amana’o pāpū vau iā’u iho ē, tei reira Iesu Mesia nō’u, ’e nā roto i te aroha o tōna mana tāra’ehara, e tauturu mai ’oia iā’u. ’Ua rōtahi rahi atu ā tā’u tuatāpapara’a pāpa’ira’a mo’a i ni’a i te patura’a i te hō’ē aura’a ’e ’ōna. E tītau te reira i te taime, ’ua tāmau noa rā vau i te arata’i i tō’u mau ’āehuehu, tō’u pūai ’e tō’u mau ferurira’a i ni’a ia Iesu Mesia.
’A nā reira ai au, ’ua ha’amata te pōiri teimaha i te matara. ’Ua ’ite au i te ’oa’oa rahi a’e i roto i te mau ’ohipa tāvinira’a ha’iha’i ’e te here i te mau mahana ato’a. ’Ua ha’amāramarama te māramarama ’e te tīa’ira’a i tō’u ’ē’a ’e ’ua fa’a’ī i te pau o tō’u māfatu. Te tu’ura’a i te Fa’aora nā mua roa, ’ua hōro’a mai i te aura’a ’e te ’oa’oa hōhonu a’e i roto i te mau tuha’a ato’a o tō’u orara’a, te tāvinira’a ’e te ravera’a i te taime nō tō’u ’utuāfare, te rāterera’a nō te fa’ananeara’a i tō’u mau tārēni. ’Ua riro mai ’ei mea faufa’a rahi a’e te mau mea ato’a ma te Mesia i rōpū.
E mea ’ōtahi te rāterera’a o te ta’ata tāta’itahi i roto i te mau tau tāuiui noa o te orara’a. Teie rā, te rāve’a nō tō tātou mau ’oto ’o te pāhonora’a ïa i te pi’ira’a a te Mesia ’a parau ai ’oia ē, « ’o te haere mai iā’u ma te ’ā’au hina’aro mau, ’e nā’u e fa’aora ia [’outou] » (3 Nephi 18:32). E mea nā roto ana’e iāna e ’ite ai tātou i te fa’aorara’a mau, te hau, te here ’e te ’oa’oa.
Tē ora nei te ta’ata pāpa’i i Utaha, Marite.