Te rēni rātio ti’a

Hōho’a

e manureva na’ina’i ’e te pare arata’i terera’a manureva i muri

Fa’ahōho’ara’a nā Roger Motzkusart

I te hō’ē avatea, i tā’u ha’api’ipi’ira’a ’ei ta’ata ha’apa’o i te terera’a manureva i te tahua manureva i Tijuana, i Mehiko, ’ua ’ite atu māua tō’u ’orometua i te hō’ē pu’e rūpehu nā te moana mai, tei tāpo’i i te taura’a manureva ’e i te hō’ē tuha’a rahi o te ’oire. Terā rā, tei roto te ’iteātea i te mau ’ōti’a e fa’ati’ahia, nō te taura’a ’e te fa’areva o te mau manureva.

’Aita i maoro roa, ’ua ’ite atu māua i ni’a i te rātio hi’ohi’o i te hō’ē Cessna 172 e tere mai ra nā te pae apato’a nā te hiti fenua, tē rere ra mai te au i te mau ture rerera’a ’ite-mata-hia (TRI). Te TRI, e ’ite te mau pairati i te hi’o i te mau tāpa’o fa’a’ite i ni’a i te tahua nō te tāpae i tō rātou vāhi tāpaera’a.

Te vāhi pe’ape’a, ’ua mo’e te pairati i roto i te rūpehu. E fa’a’ohu noa ra ’oia nā te hiti fenua, ’ua tāmata ’oia i te fa’a’ite i tōna vaira’a ’ia ’au i te tahua manureva, ’ua tā’ōti’ahia rā tōna hi’ora’a e te ’iteātea ’ino. ’Ua ui atu vau i tō’u ’orometua e aha tā māua e nehenehe e rave nō te tauturu iāna.

« E ti’a iāna e tūhono i ni’a i te rēni rātio a te pare arata’i manureva ’e e paraparau mai ia tāua », ’ua pāhono mai ’oia. « ’Aita ana’e, ’aita atu e ’ohipa e ti’a ia tāua e rave nōna ».

’Aita vau i ta’a roa nō te aha ’aita te pairati mo’e i paraparau mai ia māua. E fifi ānei tōna ’e tāna rātio ? ’Ua mana’o paha ’oia ē, e nehenehe noa ’oia iho e matara mai nā roto mai i terā fifi ?

’Ua tere noa te mau minuti. I te pae hope’a, ’ua tūhono mai te pairati i ni’a i te rēni rātio a te pare. Ma te reo pe’ape’a, ’ua ani mai ’oia i te tauturu. ’Ua hōro’a ’oi’oi atu māua iāna i te mau arata’ira’a nō te tere atu ma te pāruruhia e tae roa atu i te vāhi taura’a manureva. ’Ua tītau-noa-hia iāna ’ia ti’aturi i tā māua mau arata’ira’a ’e i tāna mau mauiha’a rerera’a.

Te ’itera’a atu i te manureva i te fāra’a mai nā roto mai i te rūpehu tau minuti i muri iho, ’e i te taura’a ma te pe’ape’a ’ore, ’ua tupu mai te ’oa’oa rahi i roto ia māua.

I tō’u ho’ira’a i te fare, ’ua feruri au i te mea tā te pairati i fa’aruru. Te pi’ira’a mai ia māua i ni’a i te rēni rātio ti’a, tei fa’atupu i te ta’a-’ē-ra’a i rotopū i te fāri’ira’a i te tauturu ’aore rā te rere fa’a’ohu-noa-ra’a—’aore rā te mea ’ino roa atu.

Mai teie pairati, e mo’e au i te tahi taime i roto i te « māhu pōiri » (1 Nephi 8:23). ’Ia hina’aro ana’e au i te arata’ira’a a te Atua, e tīa’i ’oia ma te fa’a’oroma’i e fa’aro’o i tō’u reo.

Mai tā’u e nehenehe e hi’o i te manureva mo’e i ni’a i te rātio hi’ohi’o, tē hi’o nei tō tātou Metua i te ao ra ia tātou ’e tō tātou mau tāmatara’a. Tē māuruuru nei au ē, tē hōro’a mai nei ’oia ia tātou i te arata’ira’a. E hōro’a mai ’oia i te tauturu nā roto i te pure, te mau pāpa’ira’a mo’a, te mau peropheta ora, ’e te hōro’a o te Vārua Maita’i. E ’īriti mai ’oia ia tātou nā roto mai i te fifi pae tino ’e te fifi pae vārua, mai te mea e tūhono atu tātou i ni’a i te rēni ti’a, te anira’a i te arata’i ’e te fa’aro’ora’a i tōna reo.