’A ’imi māite noa ’e e ’itehia mai ia ’outou

Hou ’oia ’a fa’aru’e mai ai i teie fenua, ’ua fafau mai tō tātou Fa’aora, ’o Iesu Mesia, i tāna mau pipi ē, e tono mai te Metua i te Fa’aa’o, ’aore rā i te Vārua Maita’i, nō te ha’amaita’i ia rātou. ’Ua parau Iesu ē, te Fa’aa’o « e ha’api’i mai ia ’outou i te mau mea ato’a, ’e e fa’a’ite fa’ahou mai ho’i ia ’outou i te mau parau ato’a » (Ioane 14:26).

Te hō’ē ti’ara’a tumu o te Vārua Maita’i ’o te rirora’a ïa ’ei heheu nō te parau mau (hi’o Ioane 16:13). ’O tō tātou Metua i te ao ra te puna nō te mau parau mau ato’a i heheuhia mai, mea nā roto mai ānei i te mau peropheta, te mau hi’o ’e te mau heheu parau ’aore rā ’ua hōro’ahia mai ia tātou tāta’itahi nā roto i te Vārua Maita’i. ’A tūtava ai tātou i te fāri’i i te auhoara’a o te Vārua Maita’i, e arata’i tō tātou Metua i te ao ra ia tātou i roto ato’a i te mau taime fifi roa.

Nō te mea ’ua hina’aro tō tātou Metua i te ao ra e fa’auru, e ha’api’i ’e e fa’ateitei ia tātou, ’ua ’anihia ia tātou e « ani, ’e e hōro’ahia mai tā ’outou ; ’ia ’imi, ’e e ’itea ia ’outou ; ’ia pātōtō atu, ’e e ’īritihia mai ia ’outou » (Mataio 7:7 ; hi’o ato’a Luka 11:9 ; 3 Nephi 14:7).

I tō Nephi fa’aro’ora’a i te mau parau a tōna metua tāne, ’o Lehi, nō ni’a i te ’ōrama a Lehi nō ni’a i te tumu rā’au nō te ora, ’ua parau Nephi « ’ua hina’aro ato’a vau ’ia ’ite mata, ’e ’ia fa’aro’o, ’e ’ia ’ite ho’i i taua mau mea ra, nā roto i te mana o te Vārua Maita’i, ’oia ho’i te hōro’a a te Atua i te feiā pā’āto’a e ’imi māite iāna » (1 Nephi 10:17).

Te ’imira’a i te parau mau e ’imira’a māite ïa. ’Ia ’imi mā’ite ana’e tātou, e tūtava tāmau tātou, ma te ’ā’au tae ’e te pūai nō te ’ite i te parau mau ’e te hina’aro o te Fatu nō tō tātou orara’a. Te ’imira’a māite i te parau mau nō ’ō mai i te Fatu ra, e ha’afātata atu ia tātou iāna ra i roto i te mau tuha’a ato’a o tō tātou orara’a.

’Ua ha’api’i ’oi’oi mai te peropheta Iosepha Semita i roto i tōna orara’a ē, te hō’ē o te mau rāve’a maita’i roa nō te ’ite mai i te parau mau, ’o te ’imira’a ïa ma te ha’apa’o maita’i i te mau pāhonora’a i te mau uira’a (hi’o Iosepha Semita—’Ā’amu 1:10, 18). E nehenehe tātou e ui i teie mau uira’a i muri nei, ’a ’imi ai tātou i te parau mau. E hōro’a mai te mau pāhonora’a i te hō’ē hōho’a ’o tā tātou e nehenehe o pe’e nō te ’ite i te parau mau.

Hōho’a

vahine e tāpe’a ra i te mau pāpa’ira’a mo’a ’e e pure ra

’O vai tā tātou e fāriu atu nō te parau mau ?

I te pae hope’a o te Buka a Moromona, tē ani nei te peropheta Moroni i te mau ta’ata ato’a ’ia ani i te Atua ma te ’ā’au hina’aro mau, ma te mana’o pāpū ’e ma te fa’aro’o i te Mesia, « e ’ere ānei teie mau mea i te parau mau ». Tē fa’a’ite pāpū nei Moroni ē, « e fa’a’ite mai te Atua i te parau mau nō [te Buka a Moromona] ia ’outou, nā roto i te mana o te Vārua Maita’i. « ’E nā roto i te mana o te Vārua Maita’i e ’ite ai ’outou i te parau mau o te mau mea ato’a ra » (Moroni 10:4–5).

’Ua ha’amau te Atua, tō tātou Metua Mure ’Ore, i te hō’ē rāve’a ’ōhie ’e te pāpū ’ia ti’a i tāna mau tamari’i e ani iāna (hi’o Iakobo 1:5) ’e ’ia ha’afātata atu iāna i te mau mahana ato’a, te mau hora ato’a—i te mau taime ato’a. Teie rāve’a ’ōhie ’e te pūai ’o te pure ïa.

Te mau ha’api’ira’a a Alama i tāna tamaiti ia Helamana e tano hope roa ia tātou : « ’A ti’aoro atu i te Atua ’ia tauturu mai ’oia ia ’oe i te mau mea ato’a ra ». I roto i « te mau mea ato’a tā ’oe e rave ra … ’e te mau vāhi tā ’oe e haere … , ’ia vai māite tō ’oe mau mana’o i te Fatu ra ; ’oia ïa, ’ia tu’uhia te aroha o tō ’ā’au i ni’a i te Fatu ra ē a muri noa atu » (Alama 37:36). ’Ua ha’api’i ato’a Alama, « ’a paraparau atu i te Fatu i te mau mea ato’a tā ’oe e rave ra, ’e nāna ho’i ’oe e arata’i i te maita’i » (Alama 37:37). ’Aita e tītauhia ia tātou i te tahi taime ’aore rā i te tahi vāhi ta’a ’ē nō te pure. Noa atu ē e’ita tātou e nehenehe e pure ha’apūai i te mau taime ato’a, e nehenehe noa rā tātou e pure i roto i tō tātou ’ā’au (hi’o Alama 34:27).

’Aita te mau pāhonora’a tā tātou e fāri’i nei nā roto mai i tā tātou mau pure, e tū’ati noa i te mea tā tātou e tīa’i ra. I te tahi taime, e riro te reira i te pāto’i i tō tātou hina’aro. E nehenehe ato’a tā tātou mau pure e taere i te pāhonohia mai, mai te hina’arohia e tātou. I te tahi taime, e nehenehe te reira e fāri’i-poupou-hia e te muhu ’ore nō te tahi taime. Terā rā, tē ha’ape’ape’a nei tō tātou Metua i te ao ra i tō tātou mau hina’aro. E riro noa tāna mau pāhonora’a ’ei maita’i nō tātou. Tītau-noa-hia ia tātou ’ia nu’u i mua ma te fa’aro’o ia Iesu Mesia. (Hi’o Luka 11:9–13.)¹

’Ua parau tō tātou Fa’aora ’e Tāra’ehara ē, e’ita roa atu tātou e tae i te Metua i te ao ra maori rā nā roto iāna. « ’O vau te ’ē’a, te parau mau, ’e te ora », ’ua parau Iesu. « ’Aore roa e ta’ata e tae i te Metua ra, maori rā ’ei iā’u » (Ioane 14:6). E fa’aore te reira i te tahi atu ā rāve’a, ’aore rā te tahi atu fifi, i roto i tā tātou ’āparaura’a i te Atua. Nō reira te mau pure ato’a, te mau a’ora’a, te mau ’itera’a pāpū, te mau piha ha’api’ira’a, ’e e rave rahi atu ā mau mea tā tātou e rave nei—i te fare purera’a, i te fare ’e tō tātou ’utuāfare, ’aore rā tātou ana’e—e ravehia ïa nā roto i te i’oa o Iesu Mesia.

Nō te ’ite mai i te parau mau, e ti’a ia tātou ’ia vai te ’ā’au tae ’e ’ia hina’aro pāpū mau. ’Ia ti’aoro ana’e tātou ma te ha’eha’a i te Metua i te ao ra, ’ua ineine tātou nō te rave mai te au i te mau pāhonora’a tā tātou e fāri’i ’e e fa’arahi atu ā i tō tātou ’aravihi nō te rave i te reira.

Nā te ’ā’au tae ’e te hina’aro pāpū mau e tūra’i ia tātou ’ia rave i te mau mea tā te Metua i te ao ra e hina’aro ’ia rave tātou, ’eiaha ra te mea tā tātou e hina’aro e rave. E fa’a’ite māramarama tātou i tō tātou Metua i te ao ra i tō tātou ti’aturi iāna, ’ia « auraro [ana’e tātou], ’ia marū, ’ia ha’eha’a, ’ia fa’a’oroma’i, ’ia ’ī i te aroha, te hina’aro ’ia auraro i te mau mea ato’a tā te Fatu e hina’aro ’ia tu’u mai i ni’a ia [tātou] » (Mosia 3:19). Nā roto i teie mau huru maita’i, e māramarama mai ’e e ti’aturi tātou ē, e rave noa te Metua i te ao ra i te mea maita’i a’e nō tātou.

Hōho’a

ta’ata e pārahi ra ’e e hi’o ra i te mou’a

Hōho’a nā Lee Michael Ragsdale

Nāhea te mau pāhonora’a e tae mai ai ?

Hou te fa’aotira’a e ho’o mai ’aore rā e tārahu i te hō’ē fare, ’ua pure māua tā’u vahine, ’ua feruri ’e ’ua ’āparau rahi nō te reira. I te hope’a, ’ua tae mai te mana’o i tō māua vaerua ’e tō māua ’ā’au ē, ’eiaha māua e ho’o mai i te hō’ē fare. ’Ua pe’e māua nā roto i te fa’aro’o mai te au i te pāhonora’a tā māua i fāri’i, ma te ’ite ’ore e aha tē tupu mai i roto i tō māua orara’a.

Fātata e 18 ’āva’e i muri mai, i te ’āva’e ’Ēperēra 2022, ’ua pi’ihia vau ’ei Hitu ’Ahuru huimana fa’atere rahi. I muri a’e i te ’āmuira’a rahi nō ’Ēperēra 2022, e toru noa hepetoma tō māua nō te fa’aru’e ia Peretīria nō tā māua tonora’a mātāmua. Tē orara’a i roto i te hō’ē fare tārahu i taua taime ra, ’ua fa’a’ōhie roa te ’ohipa nō te tauira’a te vāhi fa’aeara’a. I teie mahana, ’ua ’ite pāpū māua Regina ē, ’ua arata’i te Fatu ia māua i roto i tā māua fa’aotira’a.

’Ua fāri’i ato’a Nephi mai te au i tōna hina’aro. Ma te ’imi-māite-ra’a i te parau mau ’e te fa’aro’ora’a ’e te ti’aturira’a ē, e heheu mai te Metua i te ao ra i te parau mau iāna, ’ua fāri’i Nepuhi i te ha’amaita’ira’a ’ia ’ite i te mau mea tā tōna metua tāne i ’ite. ’Ua ’ite ’oia i te tumu rā’au nō te ora, ’o tē fa’ahōho’a i te aroha o te Atua—te aroha « o te mea hina’aro-roa-hia ïa i ni’a a’e i te mau mea ato’a ra » ’e « te mea ’oa’oa roa a’e nō te vārua » (1 Nephi 11: 22, 23).

Nā roto i te Vārua Maita’i, e heheu mai tō tātou Metua i te ao ra i te parau mau e roa’a i tāna mau tamari’i ato’a. ’Ua heheu te Fatu nā roto i te peropheta Iosepha Semita ē, e nehenehe te Vārua Maita’i e paraparau i tō tātou vaerua ’e i tō tātou ’ā’au (hi’o Te Ha’api’ira’a Tumu ’e te mau Fafaura’a 8:2), « ’ia vai noa te reira … i roto i [tō tātou] ferurira’a » (Te Ha’api’ira’a Tumu ’e te mau Fafaura’a 128:1), e fa’a’īhia tō tātou ’ōuma i te « ahu i roto [ia tātou] » (Te Ha’api’ira’a Tumu ’e te mau Fafaura’a 9:8), ’e ’o tē fa’a’ī ho’i i tō tātou ’ā’au i te ’oa’oa, ’o tē ha’amāramarama i tō tātou vaerua, ’aore rā ’o tē tāmaru i tō tātou ’ā’au pe’ape’a (hi’o Te Ha’api’ira’a Tumu ’e te mau Fafaura’a 11:13 ; 6:14–15, 22–23).

Tē fa’a’ite pāpū nei au ē, e ti’avāru te parau mau a te Atua i te fē’a’a ’e te mata’u ’e e ha’apūai ’oia i tō tātou ’itera’a pāpū. Mai ia Nephi, tē parau atu nei au ē, « ’o tē ’imi māite ra, e ’itea ïa » (1 Nephi 10:19). E heheu mai te Atua i te parau mau mai te mea e ’imi māite tātou i te reira, nō te mea, « e fa’autu’a ’oia i te feiā i ’imi pāpū iāna ra » (Hebera 11:6). ’E e nā reira ’oia ma te pāpū maita’i, e ’ore ’oia e vaiiho i te fē’a’ara’a i te mea te arata’i nei tōna rima i tō tātou orara’a.