« 3 parau tumu arata’i nō te fa’a’ohipara’a i te ihi anoa ha’a ’e te rāve’a ha’apararera’a », Liahona, Māti 2024.
3 parau tumu arata’i nō te fa’a’ohipara’a i te ihi anoa ha’a ’e te rāve’a ha’apararera’a
’A tāmau noa ai te ihi anoa ha’a i te nu’u i mua, e tauturu mai teie mau arata’ira’a nō ni’a i te rāve’a ha’apararera’a ’ia haere i mua ma te pa’ari.
Tē taui tāmau noa nei te ihi anoa ha’a. ’E i te nu’ura’a tāta’itahi o te ihi anoa ha’a, e peu ’āpī i te pae nō rāve’a ha’apararera’a. ’Ua taui rahi roa te fare nene’ira’a i te rahira’a ta’ata e fāna’o i te mau parau pāpa’i. ’Ua taui roa ato’a te ratio ’e te ’āfata teata i te huru o tā tātou fa’a’itera’a i te parau ’āpī, te ha’amāramaramara’a ’e te mau fa’a’oa’oara’a. ’Ua taui te natirara i te rahira’a ’ohipa ’o tē noa’a ia tātou ’e ’o vai tē nehenehe e hāmani i te reira. ’Ua taui te mau rāve’a tūreiara’a tōtiare i tō tātou ’aravihi nō te hi’o mai, nō te paraparau ’e nō te tū’ati i te ta’ata. Ma te hitira’a mai te ’a’apo ha’ahia, tē fa’aruru nei tātou i te mau uira’a ’āpī.
E ’ere te ihi anoa ha’a ’āpī i te mea maita’i noa ’aore rā i te mea ’ino noa. ’Aita, mea pinepine te reira mai te hō’ē hi’o fa’arahi ’o tē nehenehe e fa’arahi i te mau rāve’a ’āpī ’e i te mau māna’ona’ora’a ’āpī. ’A tūtava ai tātou ’ia riro rahi atu ā mai te Mesia te huru, ’o tā tātou pāhonora’a i te ihi anoa ha’a ’āpī ’e i te rāve’a ha’apararera’a tā te reira e nehenehe e hōpoi mai i roto i tō tātou orara’a te mea faufa’a a’e.
E arata’i tei niuhia i ni’a i te mau parau tumu
’Ua ta’a iho ā ïa ia tātou ē, ’aita e tāpura ture nō te arata’i i te mau fa’aotira’a ato’a tā tātou e rave nō ni’a i te ihi anoa ha’a ’e te rāve’a ha’apararera’a. E nehenehe rā tātou e ha’api’i mai i te mau parau tumu ’o tē tauturu mai i roto i tā tātou mau mā’itira’a. ’Ua ha’api’i Elder Dieter F. Uchtdorf nō te pupu nō te Tino ’Ahuru ma Piti ’āpōsetolo : « E mea mure ’ore ’e nō te ao tā’āto’a nei te mau parau tumu. E mea tere maita’i te mau ture ’aore rā te mau fa’a’ohipara’a ta’a ’ē o teie mau parau tumu i te tahi mau vāhi, ’eiaha rā i te tahi atu mau vāhi. Te mea e tāhō’ē nei ia tātou, ’o Iesu Mesia ïa ’e te mau parau mau mure ’ore ’o tāna i ha’api’i, noa atu e mea ta’a ’ē ri’i te mau fa’a’ohipara’a i roto i te tau ’e i roto i te mau ta’ere tumu.1
E tauturu mai te pe’era’a i te mau parau tumu tei niuhia i ni’a i te mau parau mau o te ’evanelia ’ia fa’aea noa i ni’a i te ’ē’a nō te fafaura’a. E arata’i te Vārua ia tātou ’a tūtava ai tātou i te rave i te mau mā’itira’a tei niuhia i ni’a i teie mau parau tumu. Nō reira, e aha te mau parau tumu e nehenehe e tauturu ia tātou ’ia arata’i i tā tātou mau mā’itira’a nō ni’a i te ihi anoa ha’a ’e te rāve’a ha’apararera’a ?
1. E nehehene au e fa’a’ohipa i tō’u ti’amāra’a mōrare nō te rave i te mau mā’itira’a nō te fa’atere i te ihi anoa ha’a. ’Aita te reira e fa’atere iā’u.
I te tahi taime ē, mai te huru ē tē fa’atere roa ra te ihi anoa ha’a i tō ’oe orara’a. E mea faufa’a roa ’ia ha’amana’o ē, e nehenehe ’outou e rave i te mau mā’itira’a nō te fa’atere i te ihi anoa ha’a. ’Aita te reira e fa’atere ia ’outou. E nehenehe ’outou e mana’o pāpū e mā’iti ’ia fa’a’ohipa i te ihi anoa ha’a ’e te rāve’a ha’apararera’a nō te fa’atupu i te maita’i ’e nō te mā’imi i te mau mea « vi’ivi’i ore, te mau mea maita’i, ’e te fa’ahiahia, ’e te ro’o maita’i ’e te poupouhia ra » (Te mau Hīro’a Fa’aro’o 1:13).
’Ua parau te Fatu : « E ’ohipa rahi tā’u, tā te Fatu, nā ’oe nō te rave » (Te Ha’api’ira’a Tumu ’e te mau Fafaura’a 112:6). ’A feruri e nāhea ’outou i te fa’a’ohipa i te ihi anoa ha’a nō te rave fa’aoti i te reira ’ohipa rahi ’e ’ia vai te « ’ana’anatae i te ’ohipa maita’i » (Te Ha’api’ira’a Tumu ’e te mau Fafaura’a 58:27). E tītauhia paha ia fa’a’ohipa i te ihi anoa ha’a i roto i tā ’outou ’ohipa. E nehenehe ’outou e fa’a’ohipa i te reira nō te ’ite mai i te mau huru fa’a’oa’oara’a maita’i. E nehenehe te reira e tauturu ’ia tū’ati atu ia vetahi ’ē. ’E e nehenehe te reira e tauturu ia ’outou ’ia ’apo mai, ’ia tupu i te rahi ’e ’ia rave fa’aoti te ohipa a te Fatu. Terā rā, e nehenehe te tahi atu mau fa’a’ohipara’a e fa’anevaneva, e mea tano ’ore, ’aore rā e mea ’ino. ’Eiaha e vaiiho i te ihi anoa ha’a ’ia ha’avī ia ’outou, ’a fa’a’ohipa rā i te pa’ari ’e te arata’ira’a a te Vārua nō te rave i te mau mā’itira’a ’o tē hōro’a ia ’outou i te fa’aterera’a.
2. ’Ia fa’a’ohipa ana’e au i tō’u ti’amāra’a mōrare nō te fa’anaho ātea, e maita’i a’e au ’e e rave au i te mau mā’itira’a maita’i a’e.
Pēnei a’e ’ua ora ’outou i te hō’ē ’ohipa tei tupu, i tō ’outou ravera’a i te hō’ē mā’itira’a nō te ihi anoa ha’a, e au ra ē e ’ere i te mea tano. ’O te rāve’a ha’apararera’a ānei tā ’oe i fa’a’ohipa, ’aore rā ’o te taime tei pau i ni’a i te tahi ’ohipa ri’i. ’Eiaha e fa’aea noa i ni’a i te mau hape tā ’outou i rave, e mea maita’i a’e ’ia rōtahi atu i ni’a i te tupura’a tāmau. Mai te peu e fa’anaho ātea ’outou, e maita’i a’e te mau mā’itira’a i te ravera’a i te mau mā’itira’a ato’a i te reira iho taime. E nehenehe ’outou e ha’amau i te mau arata’ira’a a te ta’ata iho i ni’a i te rēni ’e te mau fa’aturera’a o te ’evanelia nō te tauturu ia ’outou ’ia rave i te mau mā’itira’a maita’i.
Mai te peu teie ’oe tē fa’a’ohipa hape ra, ’aore rā, tē fa’a’ohipa rahi nei i te rāve’a ha’apararera’a, ’ei itoito i te tūtavara’a i te taui. ’Ei hi’ora’a, mai te peu ’aita te tahi mau huru rāve’a ha’apararera’a e fa’auru mai ’aore rā e ’āfa’i mai i te hō’ē mana’o maita’i, ’a fa’atano i tā ’outou mau ravera’a. Mai te peu tē fa’a’ohipa ra ’outou i te ihi anoa ha’a nō te fa’a’ohipa i te rāve’a ha’apararera’a ’aore rā, nō te rave mai i te peu ’o tā ’outou i ’ite e ’ere i te mea ti’a, ’a fa’aitoito i te taui—’e ’a fa’a’oroma’i ia ’outou iho ’a tauto’o ai ’outou i te fa’atupu mai i teie mau tauira’a. ’A feruri i te tahi mau ’ohipa ’ōhie ’o tā ’outou e nehenehe e rave nō te taui. ’Ei hi’ora’a, mai te peu e mea fifi a’e nō ’outou ’ia rave i te mau fa’aotira’a maita’i i te tahi taime ta’a ’ē o te mahana, e nehenehe e fa’anaho i te mau taime e fa’a’ohipa ai ’outou i te ihi anoa ha’a ’e te mau taime e’ita ’outou e fa’a’ohipa i te reira.
Nā reira ato’a, mai te peu e fa’a’ohipa ’outou i te ihi anoa ha’a nō te ha’apūai ia ’outou, nō te tū’ati atu ia vetahi ’ē, ’e nō te rave-fa’aoti-ra’a i te ’ohipa a te Fatu, ’e tē ’ite ra ’outou i te Vārua, ’a tāmau noa ïa i te rave i te reira mau mea. ’A vai ha’avare ’ore mau noa ai ’outou ia ’outou iho nō ni’a i tā ’outou mau mā’itira’a, e nehenehe tō ’outou fa’aro’o i te Fatu e tauturu ia ’outou ’ia fa’a’ohipa i tō ’outou ti’amāra’a nō te fa’atupu i te mana’o au atu ā, ’e nō te tāmau i te rave i te mau mā’itira’a maita’i a’e.
3. E nehenehe au e fa’a’ohipa i tō’u ti’amāra’a mōrare nō te fa’aea ri’i ’e nō te fa’aātea ’ē.
Tē mana’o ra paha ’outou ē, e tāmau noa te mau uira’a nō ni’a i te ihi anoa ha’a ’e te rāve’a ha’apararera’a. E aha te fāito nō te tāhitira’a ? E ti’a ānei iā’u e ha’amara’a ’aore rā e fa’aiti mai i tā’u fa’a’ohipara’a i te rāve’a ha’apararera’a ’e te ihi anoa ha’a ? Tē fa’a’ohipa ra ānei au i tō’u taime ma te pa’ari ? ’A tāmata nā ’eiaha e vaiiho i te mau uira’a mai teie e fa’ateimaha roa ia ’outou. ’A ha’amana’o ē e mea maita’i ’ia fa’aea ri’i ’e ’ia fa’aātea ’ē i te mau rāve’a ha’apararera’a. Te fa’aāteara’a ’o te mā’itira’a ïa i te fa’a’ana’anataera’a ’ē atu i te hi’ora’a i te hō’ē paruai nō te tahi ma’a hora ’aore rā, te ’orera’a e fa’a’ohipa i te tahi ihi anoa ha’a, mai te mau rāve’a tūreiara’a tōtiare, nō te hō’ē tau roa.
E hōro’a mai te ihi anoa ha’a i te mau ha’amaita’ira’a rahi nō te tauturu ia tātou ’ia tū’ati noa i te tahi atu mau ta’ata ; teie rā, e ’ere nō te mea ē e nehenehe e tū’ati noa i te mau taime ato’a, e tītauhia ïa ’ia vai tū’ati noa ’outou i te mau taime ato’a. Tē fa’aha’amana’o mai nei te Fatu ia tātou : « ’A fa’aea noa na ma te hau ’e ’ia ’ite mai ē ’o vau nei te Atua » (Te Ha’api’ira’a Tumu ’e te mau Fafaura’a 101:16). ’A ha’apāpū ē tē rave nei ’outou i te taime nō te tū’ati atu iāna.
’Ia vai te pa’ari
’A tāmau noa ai te ihi anoa ha’a i te nu’u i mua, e fa’aruru pā’āto’a tātou i te mau fa’aotira’a e rave rahi. ’Eiaha e fāriu i ni’a i te ’Ēkālesia nō te fa’ari’i i te mau ture ’e te mau tāpura ’ohipa ta’a ’ē, e nehenehe maoti rā tātou e fāriu atu i ni’a i te Metua i te ao ra, i te Fa’aora, i te mau pāpa’ira’a mo’a ’e i te mau parau a te mau peropheta nō teie ’anotau, nō te ’ite mai i te mau parau tumu ’o tē tauturu i te arata’i i tā tātou mau mā’itira’a. E tauturu mai te Vārua ia tātou ’ia ’ite ē, e mea maita’i ānei tā tātou mau mā’itira’a. E tano ato’a te mau parau a Iakoba i teie mahana mai te taime mātāmua ’a ha’api’i ai ’oia ia rātou : « ’Ei pa’ari ho’i tō ’outou na ; e aha atu ā te ti’a iā’u ’ia parau atu ? » (Iakoba 6:12).