Te mau parau o te parau mau

Nō tō’u pa’arira’a i roto i te hō’ē ta’ere e ’ere i te keretetiano, i Tāiuane, ’aita roa vau i pa’ari i roto i te ha’apa’ora’a fa’aro’o. ’Ua ti’aturi au i te Atua, ’aita rā vau i ’ite i te hō’ē mea nō ni’a ia Iesu Mesia. Tā’u ha’apa’ora’a fa’aro’o ’o tō’u ïa tōro’a ’ohipa ’e te orara’a tōtiare ’āpe’e tei ’ī maita’i i te ’ohipa. Tei roto ato’a te inura’a rahi ’e te puhipuhira’a i te ’ava’ava. E ta’ata inu rahi ato’a vau i te taofe ’e te tī. E mau tuha’a ana’e nō tō mātou ta’ere taiete.

’Ua mātau vau i Te ’Ēkālesia a Iesu Mesia i te Feiā Mo’a i te mau Mahana Hope’a nei nā roto i tā’u tāne momo’a ’e tōna ’utuāfare. E ta’ata marite ’o Chase. ’Ua pa’ari ’oia i roto i te ’Ēkālesia ’e ’ua tāvini i te hō’ē misiōni, ’aita rā ’oia i te mea itoito i taua taime ra. Teie rā, tē fa’aineine ra tāna tamaiti matahiapo nō te tāvini i te hō’ē misiōni, ’e ’ua turu Chase i tāna fa’aotira’a.

I roto i te ’ōpanipanira’a nō te ma’i COVID-19, ’ua haere atu mātou i te purera’a ’ōro’a i te fare o nā metua o Chase, ma te māta’ita’ira’a i te mau ha’apurorora’a nā roto mai i tā rātou fare purera’a. I te hopera’a te mau a’ora’a, ’ua ha’amaita’i ’e ’ua ’ōpere nā tamaiti a Chase i te pāne ’e te pape.

E rave rahi uira’a tā’u. E mea fa’a’oroma’i tā’u tāne momo’a i te pāhonora’a i te reira. ’O vai ’o Iesu ? E aha teie mana’o i roto i tō’u ’ā’au i te mau taime ato’a e putuputu mātou, nō te mau purera’a a te ’Ēkālesia ? ’O te mana’o ’o tā’u i ’ore i putapū nā mua a’e nei. E aha te fa’ahōho’ara’a o te pāne ’e te pape ? Nō te aha te roimata e tahe ai ’a rave ai au i te ’ōro’a mo’a ? E aha teie hau tā’u e putapū nei ?

I te hō’ē pō, ’ua ’itehia mai iā’u te hō’ē tahua natirara nā roto i tō’u reo tumu, e fa’ata’a nei ’o vai ’o Iesu Mesia ma te fa’ati’a i tōna orara’a. I te mahana i muri iho, ’ua parau atu vau i te metua vahine o tō’u tāne momo’a ē, ’ua hāro’aro’a vau ’o vai ’o Iesu ’e ’ua ti’aturi au iāna.

I te hō’ē sābati, ’ua haere mai te ’episekōpo i te fare nō te mea e fa’atōro’a te tamaiti matahiapo a Chase i tōna teina ’ei tahu’a. I te tu’ura’a te tamaiti matahiapo i tōna nā rima i ni’a i te upo’o o tōna teina, ’aita i ti’a iā’u e fa’aea i te ta’i. ’Ua putapū roa tō’u ’ā’au i teie ’ā’āina rahi, ’aita i ti’a iā’u e tāpe’a i te roimata. I muri a’e, ’ua fa’ata’a mai tā’u tāne momo’a ē, ’ua putapū vau i te Vārua Maita’i ’e ’ua putapū ato’a ’oia i te reira.

’Ua nehenehe iā’u e ’ite ē, ’ua ho’i fa’ahou mai te here o tā’u tāne momo’a nō tāna ’ēkālesia. E au ē, ’ua ’ite au ē te mau mea ato’a tā’u i putapū ’ua tū’ati ïa i te Atua ’e i te hō’ē mea mau. ’Ua putapū vau i te here ’o tā’u i ’ore i putapū a’enei na mua atu.

’Ua hope tā’u tītiromana rātere ’e ’ua tītauhia iā’u e ho’i i Tāiuane. I roto i te mau ’āva’e i muri iho, ’ua mihi au i te mea tā’u i putapū. Nō te hō’ē tau, ’ua ’ī au i te hepohepo ’e te pōiri. Nō te teimaha o teie mau mana’o, ’ua hina’aro roa vau e fa’aru’e. ’Aita vau i ’ite maita’i i te pure, ’ua pi’i rā vau i te Atua ’e ’ua parau atu i te mau mana’o ato’a i tō’u ’ā’au ’e i tō’u ferurira’a. Tae mai nei te mana’o nō te hau—hō’ē ā mana’o ’o tā’u i putapū i te haerera’a vau i tā mātou purera’a i te fare. ’Ua ’ite au ’o te Vārua Maita’i te reira. ’Ua tāmarū ’oia i tō’u ’ā’au.

I muri a’e i te reira, ’ua tono mai tā’u tāne momo’a i te mau misiōnare nō te ha’api’i iā’u. ’Ua parau atu vau ia rāua ē, ’ua ’ite a’ena vau e parau mau te ’evanelia tei fa’aho’i-fa’ahou-hia mai, ’e ’ua māramarama vau e aha te putapūra’a i te Vārua Maita’i. Terā rā ’ua pe’ape’a vau nō te fifi e fa’aea i te puhipuhi i te ’ava’ava ’e i te inura’a i te taohe ’e te tī.

’Ua ha’amata vau i te haere i te purera’a, i te tai’o i te Buka a Moromona, ’e i te fārerei i te mau tuahine misiōnare e toru ’aore rā, e maha taime i te hepetoma. I te hope’a, ’ua tauturu mai te Vārua Maita’i iā’u ’ia fa’aea i te puhipuhi i te ’ava’ava ’e i te inu i te taohe ’e te tī.

’Ua ha’amata tō’u hoa, māua i te tamari’ira’a, i te ’ite i te mau tauira’a i ni’a iā’u, i terā hepetoma ’e terā hepetoma. ’Ua ani manihini atu vau iāna ’ia haere mai i tā’u mau fārereira’a ’e te mau misiōnare. ’A fa’aro’o noa ai ’oia, ’ua putapū ato’a ’oia i te Vārua Maita’i ’e ’ua fāri’i i te hō’ē ’itera’a pāpū. I te marūra’a te fifi o te ma’i COVID-19, ’ua ti’a i tā’u tāne momo’a, tei itoito roa mai i roto i te ’Ēkālesia, ’ia haere mai i te hope’a i Tāiuane. ’Ua fa’aipoipohia māua ’e ’ua bāpetizo ’oia iā’u. E ta’ata ’āpī au.

Hōho’a

e pupu ta’ata e ti’a ra i mua i te hōho’a o te Fa’aora

’Ua parau mai tō’u mau hoa rahi ’e tō’u mau hoa ’ohipa, tē vai ra e mau fatu fare moni ’e e mau rave ’ohipa nō te mātete faufa’a, tē ’ite nei rātou e mea ta’a ’ē roa vau ’e te ’oa’oa a’e. ’Ua ani manihini au ia rātou i tō’u bāpetizora’a ’e ’ua haere mai rātou. I muri iho, ’ua parau mai rātou iā’u ē, ’ua putapū rātou i te hō’ē mea ’o tā rātou i ’ore roa i putapū nā mua a’e nei.

’Aita vau e mata’u nei ’ia parau ia vetahi ’ē i te mea tā’u i ’ite ’e i te mea tā’u i putapū nō ni’a ia Iesu Mesia—’oia ho’i e parau mau tā’u i ’ite. ’Ua ’ite au e mea ’ana’ana tō’u ’itera’a pāpū. Tē ’ite nei te tahi atu mau ta’ata tei mātau maita’i iā’u i tō’u orara’a tā’āto’a, i te reira. Nō tō rātou fa’atura i tō’u fa’aro’o, ’ua fa’aea ato’a rātou i te puhipuhi i te ’ava’ava ’e ’ia inu, i roto i te mau putuputura’a ’ohipa ’e te mau tāmā’ara’a. ’O teie te tahi ’ohipa ta’a ’ē roa i roto i tō mātou ta’ere taiete.

Hōho’a

e piti vahine e ti’a ra i mua i te hō’ē fare a te ’Ēkālesia

’Aita vau e mata’u nei ’ia hi’o mai, ’ia fa’aro’o mai ’e ’ia putapū mai te ta’ata i tō’u ’itera’a pāpū. Tē ti’aturi nei au ē, e rave rahi ta’ata tei ’ore i ’ite e nāhea i te ’imi i te Atua ’e ia Iesu Mesia, ’o tē putapū mai tā’u i putapū, ’ia fa’aro’o ana’e rātou i te mau parau o te parau mau. E vai ineine noa vau nō te fa’a’ite i te mau parau tei taui i tō’u orara’a.