E fa’aherehere na ia Māmā

Hōho’a

e metua vahine e fa’atāmā’a ra i tāna tamāhine

Hōho’a hō-mai-hia e te ta’ata pāpa’i

I te 10ra’a o tō’u matahiti, ’ua ’ino tā’ue te māfatu o tō’u metua vahine. E rave rahi hepetoma ’oia i te fare ma’i, i te ’arora’a nō tōna ora.

I terā mau taime, e haere mai tō’u ’orometua Paraimere, ’o te tuahine Ellen Johnson, e farerei iā’u i te fare hō’ē taime i te hepetoma. Nō ha’amata noa nei au i te haere i te Paraimere, e mea iti roa tō’u māramarama i te ’evanelia. I te mau hepetoma ato’a, e fa’a’ite mai te tuahine Johnson i tōna ’itera’a pāpū iā’u, ma te paraparau mai nō ni’a i te pure. ’Ua ha’api’i mai ’oia ē, e fa’aro’o mai te Metua i te ao ra i tā’u mau pure.

Tau hepetoma i muri mai, ’ua ’ino roa atu ā ’o Māmā. ’Ua ’ino te tāpo’i pe’epe’e o tōna māfatu, tītauhia te tātā’ira’a. ’Aita ana’e e tāmata i te hō’ē rāve’a ’āpī nō te tāpū i tōna māfatu, ’ua fa’aara tōna taote e’ita paha ’ōna e ora mai. 50 noa rā i ni’a i te hānere e riro ’oia i te ora roa mai.

I te ’ōmuara’a o te mau matahiti 1960, e ’ohipa ’āpī e te ataata te tāpūra’a māfatu. Nō te tae i te māfatu o Māmā, ’ua ’ōpua te mau taote tāpū e tāpū i iāna mai tōna ’ōuma ē tae roa i tōna ivi tua, ’e i muri iho e vāhi i tōna ivi ’ao’ao. E rave rahi ta’ata tei ’ore i ora mai i teie tāpūra’a. ’Ua riri au ’e ’ua taiā ato’a ’o te pohe tō’u metua vahine.

I te rahira’a o te taime, tei te ’ohipa o Pāpā, ’aore rā tei te fare ma’i i pīha’i iho ia Māmā. Nā tō’u tua’ana, ’o Pam, i ha’apa’o ia māua tō’u taea’e. ’Ia pō, e mana’o taiā ’e te mo’emo’e tē tupu mai, e feruri rā vau i tā te tuahine Johnston i ha’api’i mai iā’u nō ni’a i te pure. Pinepine au i te tūturi i te pae o tō’u ro’i ma te ta’i, ma te tāparu i te Metua i te ao ra ’ia fa’aherehere ia Māmā.

’E i te hō’ē taime ’ua pure au ma te ta’i, e hau rahi tei tae mai, fa’aea a’era vau i te ta’i. ’Ua tae mai te mana’o ē, e ’āfaro te mau mea ato’a. ’Ua tae mai te mana’o hau ē, e ora mai tō’u metua vahine nō te ’ite iā’u i te pa’arira’a, ’e ’eiaha vau e ha’ape’ape’a. ’Aita e reo, ’aita e ’ōrama, e mana’o marū rā nō te hau. ’Aita tō’u fē’a’a i te reira. ’Ua pāhono mai te Metua i te ao ra i tā’u pure, ’ua ’ite au i te reira.

Hōho’a

rima tūfetu pīha’i iho i te hō’ē mētāi

Fa’ahōho’ara’a nā Alex Nabaum

’Ua ora mai Māmā i te tāpūra’a. E mea paruparu ’oia e te ma’ima’i i te rahira’a o tōna orara’a, terā rā, ’ua pahono mai te Metua i te ao ra i tā’u mau pure ’e ’ua fa’aherehere iāna. ’Ua ora ’oia nō te hi’o iā’u ’ia pa’ari, ’ia fa’aipoipo ’e ’ia fānau i te tamari’i.

Tau matahiti i muri mai, i te rirora’a te peresideni Russell M. Nelson ’ei āpōsetolo, ’ua parau mai tō’u metua vahine ē, ’o ’oia te taote tāpū māfatu i ora mai ai ’oia. ’Ua pāpa’i au iāna i te hō’ē rata nō te ha’amāuruuru iāna. I tōna pāpa’ira’a mai, ’ua ha’amāuruuru mai ’oia iā’u nō tā’u rata ma te fā’i i te tauturu a te Atua i roto i tāna ’ohipa.