Jeneral Konfrens
Long Dei Ia
Oktoba 2022 jeneral konfrens

Long Dei Ia

I Kam long Elda Ronald A. Rasband

Blong Kworom blong Olgeta Twelef Aposol

Profet blong yumi we i stap laef, i stap mekem pat blong hem blong fulumap wol ia wetem Buk blong Momon. Yumi mekem olsem hem.

Ol dia brata mo sista blong mi, long Buk blong Momon toktok ia “long dei ia”1 oli ripriptim blong pulum tingting i kam long kaonsel, ol promes mo ol tijing. King Benjamin, long las toktok blong hem, hem i wonem ol pipol, “yufala we i save harem ol toktok blong mi we bae mi talemaot long yufala tedei; … openem ol sora blong yufala blong mekem se yufala i save harem, mo openem hat blong yufala blong mekem se yufala i save andastanem, mo openem ol tingting blong yufala blong mekem se mi save eksplenem ol sikret blong God blong mekem se yufala i save luksave olgeta.”2 Jeneral konfrens i stap long semmak ples. Yumi kam blong harem kaonsel blong “dei ia,” blong yumi save stap “tru long evri taem”3 long Lod mo gospel blong Hem. Filing we i kam strong long mi “long dei ia” hem i hamas, i impoten blong mekem i niu bakegen komitmen blong yumi long Buk blong Momon, we Josef Smit i singaotem “se Buk blong Momon i moa stret bitim eni narafala buk long wol.”4

Pikja
Kopi blong Buk blong Momon blong Elda Rasband

Mi holem long han blong mi wan kopi blong Buk blong Momon. Hemia i olfala kopi blong mi stat long 1970, mo hem i spesel tumas long mi. Taem yu luk, hem i taet mo i olfala, be i nogat wan narafala buk we i impoten long laef blong mi mo testemoni blong mi olsem hemia. Taem mi ridim, mi kasem wan witnes tru long Tabu Spirit se Jisas Kraes i Pikinini blong God,5 se Hem i Sevya blong mi,6 se ol skripja ia oli toktok blong God,7 mo se gospel i bin kambak.8 Ol trutok ia oli impoten pat, dip insaed long mi. Olsem we profet Nifae i talem, “Sol blong mi i glad long ol samting blong Lod.”9

Pikja
Elda Rasband wetem misin presiden blong hem

Lef i go long raet: Elda Ronald A. Rasband, yang misinari ; Presiden Harold Wilkinson, presiden blong ol Is Stet Misin; mo Elda Marion D. Hanks, Jeneral Atoriti blong ol Seventi.

Hemia i histri blong buk blong mi. Olsem wan yang misinari, mi tekem kaonsel blong Elda Marion D. Hanks,we i visitim mifala long Is blong Ol Stet Misin. Hem i foma presiden blong Britis Misin, mo i gat tu long ol misinari blong hem we oli stap long fored long dei ia: dia brata blong mi Elda Jeffrey R. Holland mo Elda Quentin L. Cook.11 Semmak long ol misinari blong hem long Inglan, hem i givim jalenj long yumi blong ridim wan kopi blong Buk blong Momon we oli makem, tu taem olsem. Mi tekem jalenj ia. Fas riding, mi makem o putum laen andanit long evri samting we i poenem o testifae abaot Jisas Kraes. Mi yusum wan red pensel mo putum laen andanit long plante sentens. Seken taem, Elda Hanks i talem blong haelaetem ol prinsipol mo doktrin blong gospel, mo naoia mi yusum blu blong makem ol skripja. Mi ridim Buk blong Momon tu taem, olsem we oli askem, mo afta tu moa taem, mi yusum yelo mo blak blong makem ol sentens we oli impoten long mi.12 Olsem we yufala i save luk, mi mekem plante smol not.

Pikja
Kopi blong Buk Momon we oli makem

I gat moa samting long riding blong mi bitim blong stap makem ol skripja nomo. Wetem wanwan taem blong ridim Buk blong Momon, stat kasem en, mi fulap wetem lav long Lod. Mi filim wan dip mo strong witnes blong trutok blong ol tijing blong Hem mo olsem wanem oli blong yusum “long dei ia.” Buk ia i go stret gud wetem taetol blong hem, “Wan Narafala Testeman blong Jisas Kraes.”12 Wetem stadi ia mo witnes long saed blong spirit we oli kasem, mi kam wan misinari blong Buk blong Momon mo wan disaepol blong Jisas Kraes.14

“Long dei ia,” wan long ol gudfala misinari blong Buk blong Momon, hem i Presiden Russell M. Nelson. Taem oli singaotem hem olsem wan niufala Aposol, hem i givim wan toktok long Akra, Kana.15 I bin gat ol impoten pipol, i gat king blong wan traeb long Afrika, we hem i toktok wetem hem tru long wan intepreta. King hem i wan series studen blong Baebol mo hem i lavem Lod. Folem ol las toktok blong Presiden Nelson, king i kam toktok wetem hem, mo i toktok gud Inglis, “?Talem nomo se, yu huia?” Presiden Nelson i eksplenem se hem i wan Aposol blong Jisas Kraes we oli odenem.16 Nekis kwestin blong king i we “?Wanem nao yu save tijim long mi abaot Jisas Kraes?”16

Presiden Nelson i pusum han mo karemaot Buk blong Momon mo openem long 3 Nifae 11. Tugeta Presiden Nelson mo king tufala i ridim toktok blong Sevya we i go long ol man blong Nifae: “Luk, mi mi Jisas Kraes, we ol profet oli bin testifae se bambae mi kam long wol. … Mi mi laet mo laef blong wol.”17

Presiden Nelson i soem Buk blong Momon ia long king, mo king i ansa, “Yu save givim ol daeman o rubi long mi be, i nogat wan samting we i moa gud long mi bitim ekstra save ia abaot Lod, Jisas Kraes.”18

Hemia i no wan eksampol ia nomo blong olsem wanem profet blong yumi i stap serem Buk blong Momon. Hem i bin givim handred long ol kopi blong Buk blong Momon long ol pipol, oltaem hem i stap talem witnes blong hem abaot Jisas Kraes. Taem presiden Nelson i mit wetem ol visita, ol presiden, ol king, hed blong Stet, mo ol lida blong ol bisnis mo ol oganaesesen blong ol defdefren bilif, nomata long ol hedkwota blong Jos o long ples blong olgetawan, hem i soem wetem respek, buk ia blong skripja we oli talemaot. Hem i save givim plante samting long olgeta, we oli kavremap long ol ribon we oli save putum long wan tebol o kapod olsem wan samting blong rimaenem olgeta long visit blong hem. Be, hem i givim wanem we i moa impoten long hem, we i moa bitim ol rubi mo daeman, olsem we king i bin tokbaot.

“Ol trutok abaot Buk blong Momon,” Presiden Nelson i bin talem, “i gat paoa blong hilim, givim kamfot, putumbak, helpem, mekem i kam strong moa, tok sore, mo mekem sol i glad.”19 Mi bin wajem, olsem wanem ol han oli holemtaet ol kopi blong Buk blong Momon long han blong olgeta, we oli bin kasem long profet blong yumi. I no save gat wan presen we i moa bigwan.

Pikja
Presiden Nelson wetem fas ledi blong Gambia

I no longtaem i pas, hem i mit wetem fas ledi blong Gambia long ofis blong hem, mo wetem tingting we i stap daon, hem i givim wan Buk blong Momon long hem. Hem i no stop nomo long ples ia. Hem i openem ol pej blong buk mo ridim wetem hem, blong tijim mo testifae abaot Jisas Kraes, Atonmen blong Hem, mo lav blong Hem long—evri pikinini blong God.

Profet blong yumi we i stap laef, i stap mekem pat blong hem blong fulumap wol ia wetem Buk blong Momon.21 Be hem i no save fulumap wol ia hemwan. Yumi mekem olsem hem.

Insperesen we i kam tru long eksampol blong hem, mi bin stap traem blong putum mi daon mo gat filing blong wantem serem Buk blong Momon.

Pikja
Elda Rasband wetem presiden blong Mosambik

I no longtaem i pas, mi kasem wan asaenmen long Mosambik. Ol sitisen blong naesfala kantri ia oli stap traehad wetem fasin blong stap pua, pua long helt, nogat wok, ol strong win, mo ol raorao from politik. Mi bin gat ona blong mitim presiden blong kantri, Filipe Nyusi. Long taem ia, mi prea from hem mo nesen blong hem. Mi talem long hem se mifala stap bildim wan tempol blong Jisas Kraes22 long kantri blong hem. Long en blong visit blong mifala, mi soem wan kopi blong Buk blong Momon long lanwis blong Potugal, lanwis we oli toktok long hem. Mo hem i glad mo akseptem buk, mi testifae abaot hop mo promes blong pipol blong hem, we oli stap long ol toktok blong Lod, long ol pej blong hem.23

Pikja
Elda Rasband wetem king mo kwin blong Lesoto

Long wan narafala taem, waef blong mi, Melanie, mo mi i mitim King Letsie III blong Lesoto mo waef blong hem long hom blong olgeta.24 Blong mifala, samting we i haelaetem visit blong mifala i blong stap soem wan kopi blong Buk blong Momon wetem olgeta, mo afta stap serem testemoni blong mi. Taem mi lukluk i go bak long eksperiens ia mo ol narawan, wan ves insaed long ol skripja blong taem ia i kam long maen blong mi: “Olgeta we oli no strong mo oli simpol bae oli talemaot ful gospel blong mi kasem evri en blong wol, mo long fored blong ol king mo ol man blong rul.”25

Pikja
Elda Rasband wetem Ambasada blong Pandey
Pikja
Ol lida blong Jos wetem Hae Man Petriak Bartholomew

Mi bin serem Buk blong Momon wetem Ambasada,long Yunaeted Nesen long Geneva, Indra Mani Pandey25; wetem Hae Petriak Bartholomew26 blong Is Ortodok Jos, mo plante narawan. Mi bin filim Spirit blong Lod i stap wetem mifala taem miwan mi givim long olgeta “ki ston blong relijin”28 mo serem witnes blong mi abaot Jisas Kraes, konaston blong fet blong yumi.29

Naoia. Ol brata mo sista, yufala i no nid blong go long Mosambik o India o blong mit wetem ol king mo man we i rul blong givim long wan, buk ia blong ol tabu tijing mo ol promes. Mi invaetem yufala long, dei ia, blong givim wan Buk blong Momon long ol fren mo famli, olgeta long wok ples blong yu, koj blong yu blong futbol, o hemia we i mekem long maket. Oli nidim ol toktok blong Lod we i stap insaed long buk ia. Oli nidim ol ansa long ol evri dei laef mo laef we i no save finis, we i stap kam. Oli nid blong save rod blong kavenan we oli putum i stap long fored blong olgeta, mo lav blong Lod we i gohed blong stap wetem olgeta. Evri samting ia oli stap ia long Buk blong Momon.

Taem yu givim wan Buk blong Momon long olgeta, yu stap openem maen mo hat blong olgeta long ol toktok blong God. Yu no nidim blong karem ol kopi we oli printim wetem yu. I isi blong yu save serem tru long fon blong yu, long skripja seksen blong Gospel Laebri ap.30

Tingting long olgeta we bae oli save kasem blesing tru gospel long laef blong olgeta mo afta sendem wan kopi blong Buk blong Momon tru long fon blong yu. Tingbaot blong putum tu testemoni blong yu mo olsem wanem buk ia i bin blesem laef blong yu.

Ol dia fren blong mi, olsem wan Aposol blong Lod,mi invaetem yufala blong folem profet we yumi lavem, Presiden Nelson, blong stap fulumap wol wetem Buk blong Momon. I gat bigfala nid long hemia; yumi nid blong mekem aksen naoia. Mi promesem yufala se taem bae yufala i stap tekpat long “bigfala wok long wol ia,” we i karem i kam tugeta Isrel,31 taem yu kasem insperesen blong helpem olgeta we oli “no save trutok from oli no save wea ples blong faenem.”32 Oli nidim testemoni blong yu, mo witnes long olsem wanem buk ia i bin jenisim laef blong yu, mo mekem yu kam moa kolosap long God, pis blong Hem,33 mo “nius we i karem bigfala glad i kam.”34

Mi testifae se tru long tabu plan blong Buk blong Momon we oli bin rere long hem long Amerika blong bifo blong i go fored blong talemaot toktok blong God, blong karem ol sol i kam long Lod, Jisas Kraes mo gospel blong Hem we i bin kambak long “dei ia”. Long nem blong Jisas Kraes, amen.

Ol Not

  1. Luk long Jekob 2:2–3; Mosaea 2:14, 30; 5:7; Alma 7:15; mo plante narafala ves insaed long Buk blong Momon.

  2. Mosaea 2:9.

  3. Alma 53:20.

  4. Teachings of Presidents of the Church: Joseph Smith (2007), 64. Stetmen we Josef Smit i givimaot long Novemba 28, 1841, insaed long kaonsel wetem ol Twelef Aposol: “Mi bin talem long ol brata se Buk blong Momon i moa stret long eni narafala buk long wol, mo i ki ston blong bilif long God blong yumi, mo wan man bae i kam moa kolosap long God sapos hem i folem ol tijing blong hem, bitim eni narafala buk.” Ki toktok ia “stret” i go wetem revelesen we oli kasem insaed long translesen mo doktrin blong buk we Buk blong Momon i tijim we i kamaot moa gud bitim eni narafala buk we “ i klia mo gudgudfala” trutok blong gospel (luk long 1 Nifae 13:40

  5. Luk long “The Living Christ: The Testimony of the Apostleswan toksave we i kam tru long Fas Presidensi mo Kworom blong Olgeta Twelef blong 1 Jenuware, 2000: “Mifala i talem testemoni ia, olsem ol Aposol blong Hem we oli odenem mifala long stret fasin we Hem i mekem—se Jisas Hem i Kraes we i Laef, Pikinini blong God we i no save ded. Hem i bigfala King Imanuel, we i stanap tedei long raet han blong Papa blong Hem. Hem i laet, laef, mo hop blong wol. Rod blong Hem i rod we i lidim yumi go long hapines long laef ia mo laef we i no save finis long wol we bae i kam. Yumi talem tangkyu long God long presen blong Hae Pikinini blong Hem, presen ia we i no gat samting moa i semmak” (ChurchofJesusChrist.org).

  6. Luk Aesea 49:26; 1 Nifae 21:26; 22:12; Doktrin mo ol Kavenan 66:1.

  7. Toktok blong God oli save luk insaed long ol skripja. Eksampol, insaed long Buk blong Momon, Leman mo Lemyul i stap askem, “Wanem nao i minim aean rod?” we Lihae i bin luk long drim blong hem. “Mo Nifae i bin talem long olgeta se i bin toktok blong God, mo eni man we bae i lisin long toktok blong God, mo bae i holem taet long hem,bae oli no save lus; mo tu ol temtesen mo ol spia blong devel, we i gat faea long hem, i no save winim olgeta kasem taem we oli kam blaen, blong lidim olgeta i gowe blong lus” (1 Nifae 15:23–24).

  8. Luk long “Restoresen blong Gospel blong Jisas Kraes, we I Fulwan: Tu Handred Yia Ofisol Toktok I Go long Wol,” we i tekem olgeta ia tu: “Mifala i stap talem se Jos Ia blong Jisas Kraes blong Ol Lata-dei Sent, we i bin oganaes long 6 Epril 1830, i Niu Testeman Jos blong Kraes, we oli putumbak. Jos ia i angka long stret laef blong jif konaston blong hem, Jisas Kraes, mo long Atonmen blong Hem, we i no gat en, mo long stret Laef Bakegen long Ded blong Hem. Wan moa taem bakegen, Jisas Kraes i bin singaotem Ol Aposol, mo i bin givim olgeta atoriti ia blong prishud. Hem i stap invaetem yumi evriwan blong go long Hem mo long Jos blong Hem, blong kasem Tabu Spirit, ol odinens blong fasin blong sevem man, mo blong kasem glad ia we i stastap. … Mifala i glad blong talemaot se Restoresen we Hem i promesem, i stap go fored tru long revelesen we i stap gogohed. Wol ia bae i neva semmak bakegen, from se God bae i ‘putum evri samting i kam joen wanples long Kraes’ (Efesas 1:10” (ChurchofJesusChrist.org).

  9. 2 Nifae 4:16.

  10. Luk long Quentin L. Cook, “Be Not Weary in Well-DoingBrigham Young University devotional, Aug. 24, 2020), speeches.byu.edu; Eliza Smith-Driggs, “Sosol blong Wik ia: Olsem Wanem blong Divelopem Lav long Lod,” Church NewsJuly 17, 2020, thechurchnews.com.

  11. Nambatri ridim, yelo: jioloji o jiografi; nambafo ridim blak: stori laen blong Buk blong Momon.

  12. “Wan narafala Testeman blong Jisas Kraes” we oli ademap olsem sabtaetol long ol edisen blong Buk blong Momon. Ol lida blong Jos oli mekem nem ia i jenis i go moa blong soem stamba tingting blong buk ia we i stap long taetol pej: “Mo tu, blong winim tingting blong ol Jiu mo Jentael se Jisas hem i Kraes, God we I no Save Finis, we i soemaot hemwan long evri kantri.”

  13. Blong stap olsem wan disaepol blong Jisas Kraes i soemaot lav ia we yumi gat long Hem. Ol disaepol oli bin kasem baptaes; mo oli tekem long olgetawan nem blong Jisas Kraes; oli traehad blong folem Hem taem oli stap akseptem ol fasin blong Kraes we Aposol Pol i talem; “ Nao from samting ya, yufala i mas traehad blong mekem fasin blong yufala i kam gud moa. Yufala i gat fasin blong bilif finis, ale yufala i mas soemaot bilif ya long ol fasin we i stret. Mo taem yufala i stap mekem ol fasin we i stret, ale yufala i mas soemaot we yufala i gat save. Mo taem yufala i kasem save ya finis, ale yufala i mas soemaot we yufala i save blokem ol samting we yufala nomo i wantem. Mo taem yufala i save mekem olsem, ale yufala i mas soemaot we yufala i gat paoa blong holem wok longtaem. Mo taem yufala i gat paoa blong holem wok longtaem, ale yufala i mas soemaot samting ya long fasin ya we yufala i stap mekem ol samting we God i wantem. Mo taem yufala i stap mekem ol samting we God i wantem, ale yufala i mas soemaot we yufala i lavem ol brata blong yufala. Mo taem yufala i stap lavem ol brata blong yufala, ale yufala i mas soemaot we yufala i lavem olgeta man” (2 Pita 1:5–7; luk tu long Prijim Gospel Blong Mi: Wan Gaed blong Misinari Seves [2019], 121–32).

  14. Presiden Russell M. Nelson, oli bin save hem olsem wan dokta blong hat bifo oli singaotem hem i kam long Kworom blong olgeta twelef Aposol long 1984, hem i givim wan toktok long medikol skul blong Akra, Kana, long 1986 long histri blong ol dokta blong hat. Afta intaviu blong hem long media, hem i bin eksplenem se hem i stap “olsem wan wokman blong Lod blong helpem [ol pipol] blong kam ol gudgudfala sitisen, blong bildim wan strong famli, blong kasem tru hapines mo blong kam antap gud long graon.” Hem i gobak long Akra, Kana, long Novemba 16, 2001, blong graon breking blong tempol long Akra Kana (luk “Ground Broken for First Temple in West Africa,” Church NewsNov. 24, 2001, thechurchnews.com).

  15. Luk long Jeneral Hanbuk: Stap Givim Seves insaed long Jos blong Jisas Kraes blong Ol Lata-dei Sent, 5.1.1.1: Long dei blong yumi tedei, Lod i singaotem ol man tru long Presiden blong Jos blong oli odenem hem blong kam olsem wan Aposol mo wok insaed long Kworom blong olgeta Twelef Aposol (luk long Doktrin mo ol Kavenan 18:26–28ChurchofJesusChrist.org).

  16. Luk long Russell M. Nelson, “Buk blong Momon: ?Bae Laef blong Yu I Olsem Wanem Sapos Yu no gat Buk Ia?,” LiahonaNovemba 2017, 60.

  17. 3 Nifae 11:10–11.

  18. Luk long Russell M. Nelson, “Buk blong Momon: ?Bae Laef blong Yu I Olsem Wanem Sapos Yu No Gat?,” 61.

  19. Russell M. Nelson, “Buk blong Momon: ?Bae Laef blong Yu I Olsem Wanem Sapos Yu no gat Buk Ia?61.

  20. Luk Moses 7:62.

  21. Presiden Russell M. Nelson i bin anaonsem tempol blong Bera Mosambik, long 4 Epril, 2021. Moa long ol haf blong ol milian pipol we oli stap laef long Bera, we i stap long kos blong Indian Osen.

  22. Ol eksampol blong hop mo ol promes oli save faenem insaed long Buk blong Momon we i gat tu 2 Nifae 31:20; Jekob 4:4–6; Alma 13:28–29; 22:16; 34:41; Ita 12:32; Moronae 7:41; 8:26.

  23. Elda mo Sista Rasband tufala i mitim royol famli long 10 Febwari, 2020, long asaenmen we oli givim blong dediketem Duban Saot Afrika Tempol long Afrika.

  24. Doktrin mo Ol Kavenan 1:23.

  25. Elda Rasband i bin mitim Ambasada, Indra Mani Pandey, Ripresentativ blong India long Yunaeted Nesen mo Narafala Intanasonol Oganaesesen long Geneva, taem hem i kasem asaenmen blong Ol Defdefren Bilif Forom long Bologna, Itali, long 17 Septemba, 2021.

  26. Elda Rasband i bin mitim King, Ecumenical PetriakBartholomew blong Is Orthodox Jos taem hem i kasem asaenmen blong Ol Defdefren Bilif Forom long Bologna, Itali, long 13 Septemba, 2021.

  27. Teachings: Joseph Smith, 64. Wan ki ston i wan ston we ol saed blong hem oli katem gud, we i stap long medel, antap long wan ak (haf sekol) we i lokem ol nara ston tugeta Profet Josef i tokbaot Buk blong Momon olsem “ki ston blong relijin blong yumi” from stamba wok blong hem i blong yunaetem Jos tru ol prinsipol mo ol odinens. Buk blong Momon i givim seves olsem “ki ston” blong laef blong ol memba, blong stap helpem olgeta blong stap strong long rod blong Kavenan.

  28. Luk long Efesas 2:19–20. Jisas Kraes Hem i jif konaston blong Jos, we i karem nem blong Hem. Semmak olsem oli putum wan konaston long tempol i wan saen blong mein ston we i fomem kona blong fandesen blong haos blong God, Jisas Kraes i konaston blong fet blong yumi mo sevem yumi. Hem i givim laef blong Hem blong yumi save laef, i nogat wan we paoa blong hem i ikwol long Hem, long stamba tingting o long lav blong Hem.

  29. Yu save serem tru long mobael fon blong yu. Wan wei i blong openem Gospel Laebri ap, go long koleksen blong ol “Skripja”, mo afta prestem “Share Now” long top. O insaed long Buk blong Momon ap yu save prestem “Share” aekon, we bae i soem wan dijitol kod we wan fren i save skanem isi nomo taem i yusum fon blong hem.

  30. Russell M. Nelson, “Hope of Israel” wol yut divosen, 3 Jun 2018), HopeofIsrael.ChurchofJesusChrist.org. “Long 3 Jun, 2018, Presiden Russell M. Nelson mo waef blong hem, Wendy W. Nelson, oli invaetem ol yut blong ‘blong oli joen blong faet blong Lod mo tekempat long ‘bigfala jalenj, bigfala risen ia, mo bigfala wok ia long wol ia.’ ?Mo wanem nao i bigfala jalenj ia? Blong karem i kam tugeta Isrel” (Charlotte Larcabal, “A Call to Enlist and Gather Israel,” New Era, Maj. 2019, 24).

  31. Doktrin mo Ol Kavenan 123:12.

  32. Luk long 2 Nifae 4:27; Mosaea 4:3; 15:18; Alma 46:12.

  33. 1 Nifae 13:37.