“ວັນທີ 27 ເດືອນພຶດສະພາ–ວັນທີ 2 ເດືອນມິຖຸນາ: ‘ພວກເຂົາຖືກເອີ້ນວ່າຜູ້ຄົນຂອງພຣະເຈົ້າ.’ ໂມໄຊຢາ 25–28,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 27 ເດືອນພຶດສະພາ–ວັນທີ 2 ເດືອນມິຖຸນາ. ໂມໄຊຢາ 25–28,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

ຮູບພາບ

ທູດກຳລັງປະກົດຕົວຕໍ່ແອວມາ ແລະ ພວກລູກຊາຍຂອງໂມໄຊຢາ

Conversion of Alma the Younger [ການປ່ຽນໃຈເຫລື້ອມໃສຂອງແອວມາຜູ້ເປັນລູກ], ໂດຍ ແກຣີ ແອວ ແຄບ

ວັນທີ 27 ເດືອນພຶດສະພາ–ວັນທີ 2 ເດືອນມິຖຸນາ: “ພວກເຂົາຖືກເອີ້ນວ່າຜູ້ຄົນຂອງພຣະເຈົ້າ”

ໂມໄຊຢາ 25–28

ຫລັງຈາກເກືອບເຖິງສາມລຸ້ນຄົນຂອງການອາໄສຢູ່ໃນຕ່າງແຜ່ນດິນ, ແລ້ວຊາວນີໄຟກໍໄດ້ລວມເຂົ້າເປັນຜູ້ຄົນດຽວກັນອີກ. ຜູ້ຄົນຂອງລິມໄຮ, ຜູ້ຄົນຂອງແອວມາ, ແລະ ຜູ້ຄົນຂອງໂມໄຊຢາ—ແມ່ນແຕ່ຜູ້ຄົນຂອງເຊຣາເຮັມລາ, ຜູ້ບໍ່ໄດ້ເປັນທາຍາດຂອງນີໄຟ—ບັດນີ້ ທຸກຄົນຖືກ “ນັບເຂົ້າຢູ່ກັບຊາວນີໄຟ” (ໂມໄຊຢາ 25:13). ພວກເຂົາຫລາຍຄົນກໍຢາກກາຍເປັນສະມາຊິກຂອງສາດສະໜາຈັກຂອງພຣະຜູ້ເປັນເຈົ້າ, ດັ່ງທີ່ຜູ້ຄົນຂອງແອວມາໄດ້ເປັນ. ສະນັ້ນ ທຸກຄົນທີ່ “ປາດຖະໜາທີ່ຈະຮັບເອົາພຣະນາມຂອງພຣະຄຣິດ” ຈຶ່ງໄດ້ຮັບບັບຕິສະມາ, “ແລະ ພວກເຂົາຖືກເອີ້ນວ່າຜູ້ຄົນຂອງພຣະເຈົ້າ” (ໂມໄຊຢາ 25:23–24). ຫລັງຈາກຫລາຍປີຂອງການຂັດແຍ້ງ ແລະ ການເປັນຊະເລີຍ, ເບິ່ງຄືວ່າໃນທີ່ສຸດ ຊາວນີໄຟຈະໄດ້ຊື່ນຊົມກັບຄວາມສະຫງົບສຸກ.

ແຕ່ບໍ່ດົນ, ຜູ້ທີ່ບໍ່ເຊື່ອກໍເລີ່ມຕົ້ນຂົ່ມເຫັງໄພ່ພົນ. ສິ່ງທີ່ເຮັດໃຫ້ເຈັບປວດໃຈຫລາຍໂດຍສະເພາະແມ່ນວ່າ ຜູ້ທີ່ບໍ່ເຊື່ອເຫລົ່ານີ້ ແມ່ນລູກຂອງຜູ້ທີ່ເຊື່ອນັ້ນເອງ—ພວກ “ຄົນລຸ້ນໃໝ່” (ໂມໄຊຢາ 26:1), ລວມທັງພວກລູກຊາຍຂອງໂມໄຊຢາ ແລະ ລູກຊາຍຄົນໜຶ່ງຂອງແອວມາ. ເລື່ອງລາວບອກເຖິງການມາຢ້ຽມຢາມຂອງທູດຢ່າງອັດສະຈັນ. ແຕ່ການມະຫັດສະຈັນທີ່ແທ້ຈິງຂອງເລື່ອງນີ້ບໍ່ແມ່ນພຽງແຕ່ກ່ຽວກັບການມາປະກົດຕົວຂອງທູດຕໍ່ພວກລູກຊາຍທີ່ຫົວດື້ເທົ່ານັ້ນ. ການປ່ຽນໃຈເຫລື້ອມໃສແມ່ນການມະຫັດສະຈັນທີ່, ບໍ່ວ່າໃນທາງໃດກໍທາງໜຶ່ງ, ຈຳເປັນຕ້ອງເກີດຂຶ້ນກັບເຮົາທຸກຄົນ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ໂມໄຊຢາ 26:1–6

ເຮົາສາມາດຊ່ວຍໃຫ້ຄົນອື່ນມາຫາພຣະເຢຊູຄຣິດ.

ການປ່ຽນໃຈເຫລື້ອມໃສແມ່ນເປັນເລື່ອງສ່ວນຕົວ—ມັນບໍ່ສາມາດຖືກສົ່ງຕໍ່ໃຫ້ລູກໆຄືກັນກັບມໍລະດົກ. ຂະນະທີ່ທ່ານອ່ານ ໂມໄຊຢາ 26:1–6, ໃຫ້ໄຕ່ຕອງເຫດຜົນທີ່ເປັນໄປໄດ້ ທີ່ “ຄົນລຸ້ນໃໝ່” ໄດ້ຕົກໄປ, ແລະ ສັງເກດເບິ່ງຜົນສະທ້ອນຂອງຄວາມບໍ່ເຊື່ອຖືຂອງພວກເຂົາ. ທ່ານອາດຄິດກ່ຽວກັບຜູ້ຄົນທີ່ທ່ານຢາກພາມາຫາພຣະຄຣິດນຳອີກ. ຕະຫລອດທົ່ວການສຶກສາຂອງທ່ານໃນ ໂມໄຊຢາ 25–28, ພຣະວິນຍານອາດສື່ມບອກທ່ານກ່ຽວກັບສິ່ງທີ່ທ່ານສາມາດເຮັດ ເພື່ອຊ່ວຍພັດທະນາສັດທາຂອງພວກເຂົາໃນພຣະເຢຊູຄຣິດ.

ໂມໄຊຢາ 26:6–39

ຜູ້ຮັບໃຊ້ທີ່ຊື່ສັດຂອງພຣະເຈົ້າ ຈະສະແຫວງຫາທີ່ຈະເຮັດຕາມພຣະປະສົງຂອງພຣະອົງ.

ບາງເທື່ອເຮົາອາດຄິດວ່າ ຜູ້ນຳຂອງສາດສະໜາຈັກເຊັ່ນ ແອວມາຮູ້ຈັກວ່າຈະເຮັດສິ່ງໃດສະເໝີ. ໃນ ໂມໄຊຢາ 26 ເຮົາອ່ານກ່ຽວກັບບັນຫາໃນສາດສະໜາຈັກທີ່ແອວມາບໍ່ເຄີຍປະເຊີນມາກ່ອນ. ແອວມາໄດ້ເຮັດສິ່ງໃດ ໃນສະຖານະການເຊັ່ນນີ້? (ເບິ່ງ ໂມໄຊຢາ 26:13–14, 33–34, 38–39). ປະສົບການຂອງແອວມາ ແນະນຳສິ່ງໃດກ່ຽວກັບວິທີທີ່ທ່ານອາດເຂົ້າຫາບັນຫາທີ່ຫຍຸ້ງຍາກຢູ່ໃນຄອບຄົວຂອງທ່ານ ຫລື ໃນການຮັບໃຊ້ສາດສະໜາຈັກຂອງທ່ານ?

ພຣະຜູ້ຊ່ວຍໃຫ້ລອດໄດ້ສິດສອນຫຍັງແດ່ໃຫ້ກັບແອວມາໃນ ໂມໄຊຢາ 26:15–32? ໃຫ້ສັງເກດເບິ່ງຄຳຕອບຂອງພຣະຜູ້ເປັນເຈົ້າບາງຢ່າງ ບໍ່ໄດ້ກົງກັບຄຳຖາມຂອງແອວມາ. ສິ່ງນີ້ແນະນຳຫຍັງກ່ຽວກັບການອະທິຖານ ແລະ ການຮັບການເປີດເຜີຍສ່ວນຕົວ?

ຫລັກທຳແມ່ນນິລັນດອນ. ໃຫ້ພິຈາລະນາວິທີທີ່ເລື່ອງລາວ ແລະ ຄຳສອນໃນພຣະຄຳພີກ່ຽວຂ້ອງກັບຊີວິດຂອງທ່ານແນວໃດ. ຍົກຕົວຢ່າງ, ທ່ານສາມາດຖາມຕົວເອງວ່າ, “ປະສົບການໃດແດ່ທີ່ເຮົາເຄີຍມີ ທີ່ຄ້າຍຄືກັນກັບຂອງແອວມາ?” ຫລື “ຄວາມຈິງຢ່າງໃດແດ່ທີ່ສິດສອນໂດຍແອວມາ ສາມາດຊ່ວຍເຮົາໄດ້?”

ໂມໄຊຢາ 26:15–31

ພຣະເຈົ້າໃຫ້ອະໄພແກ່ເຮົາຢ່າງເຕັມພຣະໄທ ເມື່ອເຮົາກັບໃຈ ແລະ ໃຫ້ອະໄພຄົນອື່ນ.

ການກັບໃຈ ແລະ ການໃຫ້ອະໄພແມ່ນຫົວຂໍ້ທີ່ເກີດຂຶ້ນຊ້ຳໆໃນ ໂມໄຊຢາ 26–27. ໃຫ້ຊອກຫາຂໍ້ຄວາມ ແລະ ວະລີທີ່ສິດສອນກ່ຽວກັບການກັບໃຈ ແລະ ການໃຫ້ອະໄພໃນ ໂມໄຊຢາ 26:22–24, 29–31; 27:23–37.

ບາງຄົນອາດສົງໄສວ່າພຣະເຈົ້າໄດ້ໃຫ້ອະໄພແກ່ເຂົາເຈົ້າແທ້ໆບໍ. ທ່ານຄິດວ່າ ແອວມາຜູ້ເປັນບິດາໄດ້ແນະນຳສະມາຊິກຄົນໜຶ່ງຂອງສາດສະໜາຈັກໃນເຊຣາເຮັມລາ ທີ່ມີຄວາມກັງວົນເຊັ່ນນັ້ນແນວໃດ? ແອວມາໄດ້ຮຽນຮູ້ຫຍັງແດ່ຈາກພຣະຜູ້ເປັນເຈົ້າໃນ ໂມໄຊຢາ 26:15–31 ທີ່ສາມາດຊ່ວຍສະມາຊິກຂອງສາດສະໜາຈັກຄົນນີ້? (ເບິ່ງ ໂມໂຣໄນ 6:8; ຄຳສອນ ແລະ ພັນທະສັນຍາ 19:16–18; 58:42–43 ນຳອີກ).

ໂມໄຊຢາ 27:8–37; 28:1–4

ຮູບພາບ
ໄອຄອນຫ້ອງຮຽນສາດສະໜາ
ຜ່ານທາງພຣະເຢຊູຄຣິດ, ເຮົາສາມາດປ່ຽນເປັນຄົນດີກວ່າເກົ່າ.

ເຫັນໄດ້ຢ່າງແຈ່ມແຈ້ງວ່າ ແອວມາຜູ້ເປັນລູກຕ້ອງການເກີດໃໝ່ທາງວິນຍານ. ເພິ່ນ ແລະ ພວກລູກຊາຍຂອງໂມໄຊຢາເປັນຄົນ “ຊົ່ວຮ້າຍແທ້ໆໃນຄົນບາບ” (ໂມໄຊຢາ 28:4). ແຕ່ບໍ່ດົນຫລັງຈາກການປ່ຽນໃຈເຫລື້ອມໃສຂອງເພິ່ນ, ແອວມາໄດ້ເປັນພະຍານວ່າ ການປ່ຽນໃຈເຫລື້ອມໃສແມ່ນຈຳເປັນ—ຕໍ່ທຸກຄົນ: “ຢ່າໄດ້ແປກໃຈເລີຍ,” ເພິ່ນເວົ້າ, “ວ່າມະນຸດ ທັງປວງ … ຕ້ອງເກີດໃໝ່ເສຍກ່ອນ” (ໂມໄຊຢາ 27:25; ເນັ້ນຄຳເນີ້ງ).

ຂະນະທີ່ທ່ານອ່ານກ່ຽວກັບປະສົບການຂອງແອວມາໃນ ໂມໄຊຢາ 27:8–37, ໃຫ້ຄິດທີ່ຈະລອງເອົາຕົວເອງເຂົ້າໄປຢູ່ໃນເລື່ອງລາວຂອງເພິ່ນ. ທ່ານສາມາດຄິດຫາສິ່ງໃດບໍທີ່ຕົວທ່ານເອງຕ້ອງການປ່ຽນແປງ? ເຊັ່ນດຽວກັນກັບບິດາຂອງແອວມາ, ທີ່ອາດອະທິຖານເພື່ອທ່ານ “ດ້ວຍສັດທາຫລາຍ”? ປະສົບການໃດແດ່ທີ່ໄດ້ຊ່ວຍ “ເຮັດໃຫ້ [ທ່ານ] ສຳນຶກເຖິງອຳນາດ ແລະ ສິດອຳນາດຂອງພຣະເຈົ້າ”? (ໂມໄຊຢາ 27:14). “ສິ່ງຍິ່ງໃຫຍ່” ໃດແດ່ທີ່ພຣະຜູ້ເປັນເຈົ້າໄດ້ກະທຳເພື່ອທ່ານ ຫລື ຄອບຄົວຂອງທ່ານ ທີ່ທ່ານຄວນ “ຈື່ຈຳ”? (ໂມໄຊຢາ 27:16). ທ່ານຮຽນຮູ້ຫຍັງແດ່ຈາກຖ້ອຍຄຳ ແລະ ການກະທຳຂອງແອວມາຜູ້ເປັນລູກ ກ່ຽວກັບຄວາມໝາຍຂອງການເກີດໃໝ່? ທ່ານເຄີຍເຫັນຕົວຢ່າງໃດແດ່?

ໃຫ້ໃຊ້ເວລາບຶດໜຶ່ງເພື່ອບັນທຶກບາງວິທີທີ່ພຣະຜູ້ຊ່ວຍໃຫ້ລອດກຳລັງຊ່ວຍທ່ານປ່ຽນແປງ—ຫລື ເກີດໃໝ່ອີກຄັ້ງ—ເຖິງແມ່ນວ່າປະສົບການຂອງທ່ານອາດບໍ່ຕື່ນເຕັ້ນ ຫລື ກະທັນຫາຄືກັນກັບຂອງແອວມາ. ມີເພງສວດໃດບໍທີ່ທ່ານສາມາດຮ້ອງ ຫລື ຟັງ ທີ່ສະແດງຄວາມຮູ້ສຶກຂອງທ່ານ, ເຊັ່ນ “ຂ້າເຝົ້າພິສະຫວົງ”? (ເພງສວດ ແລະ ເພງຂອງເດັກນ້ອຍ, 24). ໃຜອາດຈະໄດ້ຮັບຜົນປະໂຫຍດຈາກການໄດ້ຍິນກ່ຽວກັບປະສົບການຂອງທ່ານ?

ແອວເດີ ເດວິດ ເອ ແບ໊ດນາ ໄດ້ປຽບທຽບການເກີດໃໝ່ອີກຄັ້ງກັບຂັ້ນຕອນຂອງໝາກແຕງທີ່ກາຍເປັນໝາກແຕງດອງ (ເບິ່ງ “Ye Must Be Born Again,” Liahona, May 2007, 19–22). ການປຽບທຽບນີ້ສິດສອນທ່ານຫຍັງແດ່ກ່ຽວກັບການປ່ຽນໃຈເຫລື້ອມໃສ?

ເບິ່ງ Gospel Topics, “Become like Jesus Christ,” ຫ້ອງສະໝຸດພຣະກິດຕິຄຸນ; “Alma Testifies He Has Been Born of God” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ໂມໄຊຢາ 27:8–24

ພຣະເຈົ້າໄດ້ຍິນຄຳອະທິຖານຂອງເຮົາ ແລະ ຈະຕອບຄຳອະທິຖານເຫລົ່ານັ້ນອີງຕາມພຣະປະສົງ ແລະ ເວລາຂອງພຣະອົງ.

ບາງທີທ່ານເຄີຍຢູ່ໃນສະຖານະການແບບດຽວກັນກັບແອວມາຜູ້ເປັນບິດາ ກັບສະມາຊິກຄົນໃດຄົນໜຶ່ງໃນຄອບຄົວທີ່ເລືອກທຳລາຍ. ທ່ານພົບເຫັນຫຍັງແດ່ໃນ ໂມໄຊຢາ 27:8–24 ທີ່ໃຫ້ຄວາມຫວັງແກ່ທ່ານ? ຂໍ້ເຫລົ່ານີ້ມີອິດທິພົນຕໍ່ຄຳອະທິຖານຂອງທ່ານ ເພື່ອຄົນອື່ນແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ໂມໄຊຢາ 26:30–31

ພຣະຜູ້ເປັນເຈົ້າຕ້ອງການໃຫ້ເຮົາໃຫ້ອະໄພ.

ເພື່ອໃຫ້ລູກໆຂອງທ່ານຄົ້ນພົບສິ່ງທີ່ພຣະຜູ້ເປັນເຈົ້າໄດ້ສິດສອນແອວມາກ່ຽວກັບການໃຫ້ອະໄພ, ທ່ານສາມາດເຊື້ອເຊີນພວກເຂົາໃຫ້ອ່ານ ໂມໄຊຢາ 26:29–31 ແລະ ນັບເບິ່ງຄຳວ່າ “ໃຫ້ອະໄພ” ປະກົດຈັກເທື່ອ. ຂໍ້ເຫລົ່ານີ້ສິດສອນຫຍັງແດ່ກ່ຽວກັບການໃຫ້ອະໄພຄົນອື່ນ? (ເບິ່ງ “ຄວາມເມດຕາເລີ່ມຈາກເຮົາ,” ເພງສວດ ແລະ ເພງຂອງເດັກນ້ອຍ, 69 ນຳອີກ.)
ເພື່ອເນັ້ນຕົວຢ່າງຂອງພຣະຜູ້ຊ່ວຍໃຫ້ລອດກ່ຽວກັບການໃຫ້ອະໄພ, ທ່ານສາມາດສະແດງຮູບຂອງພຣະອົງຢູ່ເທິງໄມ້ກາງແຂນໃຫ້ພວກເຂົາເບິ່ງ ແລະ ອ່ານ ລູກາ 23:33–34 ນຳກັນ. ພຣະເຢຊູໄດ້ທູນຂໍໃຫ້ພຣະບິດາເທິງສະຫວັນເຮັດຫຍັງເພື່ອຜູ້ຄົນທີ່ຄຶງພຣະອົງ? ຫລັງຈາກການສົນທະນານີ້ແລ້ວ, ລູກໆຂອງທ່ານສາມາດຫລິ້ນລະຄອນກ້ອມກ່ຽວກັບການໃຫ້ອະໄພກັນແລະກັນ.
ບາງເທື່ອມັນຍາກທີ່ຈະໃຫ້ອະໄພຕົວເອງ ເມື່ອເຮົາເຮັດຄວາມຜິດ. ພຣະຄຳຂອງພຣະເຈົ້າຕໍ່ແອວມາຊ່ວຍໄດ້ແນວໃດ? ລູກໆຂອງທ່ານສາມາດທຳທ່າວ່າພວກເຂົາກຳລັງເວົ້າກັບຄົນໃດຄົນໜຶ່ງ ຜູ້ທີ່ຄິດວ່າພຣະເຈົ້າຈະບໍ່ມີວັນໃຫ້ອະໄພແກ່ເຂົາ. ເຊື້ອເຊີນລູກໆຂອງທ່ານໃຫ້ຊອກຫາບາງສິ່ງໃນ ໂມໄຊຢາ 26:22–23, 29–30 ທີ່ອາດຊ່ວຍບຸກຄົນນັ້ນໄດ້.

ໂມໄຊຢາ 27:8–37

ພຣະເຢຊູຄຣິດຊ່ວຍໃຫ້ເຮົາກາຍເປັນເໝືອນດັ່ງພຣະອົງຫລາຍຂຶ້ນ.

ການກັບໃຈຂອງແອວມາຜູ້ເປັນລູກ ແລະ ພວກລູກຊາຍຂອງໂມໄຊຢາ ສາມາດສະແດງໃຫ້ລູກໆຂອງທ່ານເຫັນວ່າ, ດ້ວຍອຳນາດຂອງພຣະຜູ້ຊ່ວຍໃຫ້ລອດ, ທຸກຄົນສາມາດປ່ຽນແປງໄດ້. ທ່ານ ຫລື ລູກໆຂອງທ່ານສາມາດໃຊ້ຮູບພາບຢູ່ໃນໂຄງຮ່າງນີ້, ໜ້າກິດຈະກຳຂອງອາທິດນີ້, ແລະ ຂໍ້ພຣະຄຳພີສຳຄັນສອງສາມຂໍ້ຈາກ ໂມໄຊຢາ 27:8–37 ເພື່ອເລົ່າເລື່ອງ (ເບິ່ງ “ບົດທີ 18: ແອວມາຜູ້ເປັນລູກກັບໃຈ,” ໃນ ເລື່ອງພຣະຄຳພີມໍມອນ, 49–52 ນຳອີກ). ໃຫ້ເນັ້ນຂໍ້ທີ 24 ເປັນພິເສດ, ເພື່ອສິດສອນວ່າ ແອວມາໄດ້ກັບໃຈ ແລະ ພຣະເຢຊູຄຣິດໄດ້ຊ່ວຍໃຫ້ເພິ່ນປ່ຽນແປງ. ປ່ອຍໃຫ້ລູກໆຂອງທ່ານສະແດງຕາມເລື່ອງຖ້າຫາກພວກເຂົາຢາກເຮັດ.

His Father Rejoiced [ບິດາຂອງເພິ່ນປິຕິຍິນດີ], ໂດຍ ວາວເຕີ ເຣນ

ໂມໄຊຢາ 27:8–24

ເຮົາສາມາດອະທິຖານ ແລະ ຖືສິນອົດເຂົ້າເພື່ອໃຫ້ພຣະເຈົ້າໃຫ້ພອນແກ່ຜູ້ຄົນທີ່ເຮົາຮັກ.

ອ່ານ ໂມໄຊຢາ 27:8–24 ນຳກັນ, ແລະ ຂໍໃຫ້ລູກໆຂອງທ່ານລະບຸສິ່ງທີ່ແອວມາ ແລະ ຜູ້ຄົນຂອງເພິ່ນໄດ້ເຮັດ ເພື່ອຊ່ວຍແອວມາຜູ້ເປັນລູກ. ທ່ານເຄີຍຖືສິນອົດເຂົ້າ ແລະ ອະທິຖານເພື່ອຄົນໃດຄົນໜຶ່ງບໍ? ແບ່ງປັນປະສົບການຂອງທ່ານກັບລູກໆຂອງທ່ານ, ແລະ ປ່ອຍໃຫ້ພວກເຂົາແບ່ງປັນປະສົບການຂອງພວກເຂົາ.
ທ່ານ ຫລື ລູກໆຂອງທ່ານຮູ້ຈັກຄົນໃດຄົນໜຶ່ງທີ່ຕ້ອງການຄວາມຊ່ວຍເຫລືອຈາກພຣະເຈົ້າບໍ? ໃນການເຮັດຕາມຕົວຢ່າງຂອງແອວມາ, ບາງທີພວກທ່ານສາມາດອະທິຖານນຳກັນເພື່ອບຸກຄົນນັ້ນ ແລະ, ຖ້າຫາກລູກໆຂອງທ່ານສາມາດ, ຖືສິນອົດເຂົ້າເພື່ອເຂົານຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບພາບ

ໜ້າກິດຈະກຳ: ພຣະເຢຊູຄຣິດຊ່ວຍໃຫ້ເຮົາກາຍເປັນເໝືອນດັ່ງພຣະອົງຫລາຍຂຶ້ນ