“ວັນທີ 10–16 ເດືອນມິຖຸນາ: ‘ພວກທ່ານເຄີຍປະສົບການປ່ຽນແປງອັນຍິ່ງໃຫຍ່ນີ້ໃນໃຈຂອງພວກທ່ານແລ້ວບໍ?’ ແອວມາ 5–7,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 10–16 ເດືອນມິຖຸນາ. ແອວມາ 5–7,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

ຮູບພາບ

ແອວມາຜູ້ເປັນລູກກຳລັງສິດສອນຊາວໂຊຣຳ

ວັນທີ 10–16 ເດືອນມິຖຸນາ: “ພວກທ່ານເຄີຍປະສົບການປ່ຽນແປງອັນຍິ່ງໃຫຍ່ນີ້ໃນໃຈຂອງພວກທ່ານແລ້ວບໍ?”

ແອວມາ 5–7

ແອວມາບໍ່ຮູ້ກ່ຽວກັບການຜ່າຕັດປ່ຽນຫົວໃຈໃນປະຈຸບັນນີ້, ຊຶ່ງເປັນການເອົາຫົວໃຈທີ່ດີ ມາໃສ່ແທນຫົວໃຈທີ່ບໍ່ດີ ຫລື ເປັນພະຍາດ. ແຕ່ເພິ່ນຮູ້ກ່ຽວກັບສິ່ງທີ່ມະຫັດສະຈັນຫລາຍກວ່າ ນັ້ນຄື “ການປ່ຽນແປງໃນໃຈ” (ແອວມາ 5:26)—ຊຶ່ງໂດຍທາງນັ້ນ ພຣະຜູ້ຊ່ວຍໃຫ້ລອດໄດ້ປະທານຊີວິດໃໝ່ທາງວິນຍານໃຫ້ເຮົາ, ຄືກັນກັບການ “ເກີດໃໝ່” (ເບິ່ງ ແອວມາ 5:14, 49). ແອວມາສາມາດເຫັນໄດ້ວ່າ ການປ່ຽນແປງໃນໃຈນີ້ ເປັນສິ່ງທີ່ຊາວນີໄຟຢ່າງຫລວງຫລາຍຕ້ອງການ. ບາງຄົນຮັ່ງມີ ແລະ ບາງຄົນຍາກຈົນ, ບາງຄົນທະນົງຕົວ ແລະ ບາງຄົນຖ່ອມຕົວ, ບາງຄົນຂົ່ມເຫັງ ແລະ ບາງຄົນຖືກຂົ່ມເຫັງ (ເບິ່ງ ແອວມາ 4:6–15). ແຕ່ທຸກຄົນໃນພວກເຂົາຕ້ອງໄດ້ມາຫາພຣະເຢຊູຄຣິດ ເພື່ອຮັບການປິ່ນປົວ—ຄືກັນກັບທີ່ເຮົາທຸກຄົນຕ້ອງເຮັດ. ບໍ່ວ່າເຮົາຈະສະແຫວງຫາທີ່ຈະເອົາຊະນະຄວາມທະນົງຕົວ ຫລື ອົດທົນກັບຄວາມທຸກທໍລະມານ, ຂ່າວສານຂອງແອວມາກໍຍັງເໝືອນເດີມ ທີ່ວ່າ: “ຈົ່ງມາເຖີດ, ຢ່າສູ່ຢ້ານ” (ແອວມາ 7:15). ຈົ່ງໃຫ້ພຣະຜູ້ຊ່ວຍໃຫ້ລອດປ່ຽນແປງໃຈທີ່ແຂງກະດ້າງ, ເປັນບາບ, ຫລື ເຈັບປວດ ເປັນໃຈທີ່ຖ່ອມ, ບໍລິສຸດ, ແລະ ໃໝ່.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ແອວມາ 5:14–33

ເຮົາຕ້ອງປະສົບກັບ—ແລະ ສືບຕໍ່ຮູ້ສຶກ—ການປ່ຽນແປງອັນຍິ່ງໃຫຍ່ໃນໃຈ.

ປະທານເອັມ ຣະໂຊ ບາເລີດ ໄດ້ກ່າວວ່າ: “ຂ້າພະເຈົ້າຕ້ອງໃຊ້ເວລາຖາມຕົວເອງເປັນປະຈຳວ່າ, ‘ເຮົາເປັນຈັ່ງໃດ?’ … ເພື່ອຈະໃຫ້ມີການຊີ້ນຳສຳລັບຕົວຂ້າພະເຈົ້າລະຫວ່າງການສຳພາດສ່ວນຕົວນີ້, ຂ້າພະເຈົ້າມັກອ່ານ ແລະ ໄຕ່ຕອງຖ້ອຍຄຳທີ່ກໍ່ໃຫ້ເກີດການທົບທວນເຖິງຊີວິດຂອງຕົນ ທີ່ພົບເຫັນຢູ່ໃນບົດທີຫ້າຂອງ ແອວມາ” (“Return and Receive,” Liahona, May 2017, 64).

ໃຫ້ຄິດທີ່ຈະອ່ານ ແອວມາ 5:14–33 ຄືກັບວ່າທ່ານກຳລັງສຳພາດຕົວເອງ ແລະ ສຳຫລວດໃຈຂອງທ່ານ. ທ່ານກໍຄວນບັນທຶກຄຳຕອບຂອງທ່ານ ຕໍ່ຄຳຖາມເຫລົ່ານັ້ນໄວ້. ທ່ານຮຽນຮູ້ຫຍັງແດ່ກ່ຽວກັບຕົວທ່ານເອງ? ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ຕາມຜົນຂອງການສຳພາດຂອງທ່ານ?

ເບິ່ງ Dale G. Renlund, “Preserving the Heart’s Mighty Change,” Liahona, Nov. 2009, 97–99 ນຳອີກ.

ເມື່ອເຮົາຫັນໄປຫາພຣະເຈົ້າ, ເຮົາຈະສາມາດປະສົບກັບ “ການປ່ຽນແປງໃນໃຈ.”

ແອວມາ 5:44–51

ເຮົາສາມາດມີປະຈັກພະຍານຂອງຕົວເອງເຖິງພຣະຜູ້ຊ່ວຍໃຫ້ລອດ ແລະ ຄຳສອນຂອງພຣະອົງ ຜ່ານທາງພຣະວິນຍານບໍລິສຸດ.

ໃນ ແອວມາ 5, ເມື່ອແອວມາໄດ້ອະທິບາຍວ່າເພິ່ນໄດ້ຮັບປະຈັກພະຍານຂອງເພິ່ນເຖິງພຣະຜູ້ຊ່ວຍໃຫ້ລອດແນວໃດ, ເພິ່ນບໍ່ໄດ້ກ່າວເຖິງປະສົບການຂອງເພິ່ນທີ່ໄດ້ເຫັນທູດສະຫວັນ (ເບິ່ງ ໂມໄຊຢາ 27:10–17). ແອວມາໄດ້ມາຮູ້ຄວາມຈິງດ້ວຍຕົວເອງໄດ້ແນວໃດ? ບາງທີທ່ານສາມາດໃຊ້ສິ່ງທີ່ທ່ານພົບເຫັນຢູ່ໃນ ແອວມາ 5:44–51 ເພື່ອຂຽນ “ສູດ” ສຳລັບການໄດ້ຮັບປະຈັກພະຍານເຖິງພຣະເຢຊູຄຣິດ ແລະ ຄຳສອນຂອງພຣະອົງ. ມີ “ສ່ວນປະກອບ” (ຄວາມຈິງຂອງພຣະກິດຕິຄຸນ) ແລະ “ຄຳແນະນຳ” (ສິ່ງທີ່ເຮົາສາມາດສະແຫວງຫາເພື່ອຄວາມຈິງ) ໃດແດ່ທີ່ແອວມາໄດ້ລວມເຂົ້າໄວ້? ມີ “ສ່ວນປະກອບ” ແລະ “ຄຳແນະນຳ” ໃດແດ່ທີ່ທ່ານສາມາດເພີ່ມໃສ່ສູດຂອງທ່ານຈາກປະສົບການຂອງທ່ານເອງ ຫລື ປະສົບການອື່ນໆໃນພຣະຄຳພີ?

ແອວມາ 7

“ຂ້າພະເຈົ້າເຫັນວ່າພວກທ່ານຢູ່ໃນທາງອັນຊອບທຳ.”

ບາງເທື່ອເຮົາກໍເປັນຄືກັນກັບຜູ້ຄົນຂອງເຊຣາເຮັມລາ, ຜູ້ທີ່ຈຳເປັນຕ້ອງຖືກເອີ້ນໃຫ້ກັບໃຈ (ເບິ່ງ ແອວມາ 5:32) ບາງເທື່ອເຮົາກໍເປັນຄືກັນກັບຜູ້ຄົນຂອງກີເດໂອນຫລາຍກວ່າ, ຜູ້ທີ່ໄດ້ພະຍາຍາມກ້າວເດີນໄປ “ຢູ່ໃນທາງອັນຊອບທຳ” (ແອວມາ 7:19). ທ່ານພົບເຫັນຫຍັງແດ່ໃນຂ່າວສານຂອງແອວມາໃນເມືອງກີເດໂອນ (ຢູ່ໃນ ແອວມາ 7) ທີ່ຄ້າຍຄືກັນກັບສິ່ງທີ່ເພິ່ນໄດ້ກ່າວຢູ່ໃນແຜ່ນດິນເຊຣາເຮັມລາ (ຢູ່ໃນ ແອວມາ 5)? ທ່ານສັງເກດເຫັນຄວາມແຕກຕ່າງຢ່າງໃດແດ່? ໃຫ້ຊອກຫາສິ່ງທີ່ແອວມາໄດ້ສິດສອນທີ່ສາມາດຊ່ວຍທ່ານໃຫ້ “ຢູ່ໃນທາງຊຶ່ງຈະນຳໄປສູ່ອານາຈັກຂອງພຣະເຈົ້າ” (ແອວມາ 7:19).

ແອວມາ 7:7–16

ຮູບພາບ
ໄອຄອນຫ້ອງຮຽນສາດສະໜາ
ພຣະຜູ້ຊ່ວຍໃຫ້ລອດໄດ້ຮັບເອົາບາບ, ຄວາມເຈັບປວດ, ແລະ ຄວາມທຸກທໍລະມານຂອງເຮົາໄປ.

ທ່ານເຄີຍຮູ້ສຶກວ່າ ບໍ່ມີໃຜເຂົ້າໃຈການດີ້ນລົນ ຫລື ການທ້າທາຍຂອງທ່ານຢູ່ບໍ? ຖ້າເຄີຍ, ຄວາມຈິງທີ່ແອວມາໄດ້ສິດສອນສາມາດຊ່ວຍໄດ້. ຂະນະທີ່ທ່ານອ່ານ, ໃຫ້ສະທ້ອນຄິດກ່ຽວກັບສິ່ງທີ່ຂໍ້ເຫລົ່ານີ້ສິດສອນກ່ຽວກັບຈຸດປະສົງຂອງການເສຍສະລະຂອງພຣະຜູ້ຊ່ວຍໃຫ້ລອດ. ທ່ານອາດເຮັດຕາຕະລາງພ້ອມດ້ວຍຫົວຂໍ້ ສິ່ງທີ່ພຣະຜູ້ຊ່ວຍໃຫ້ລອດໄດ້ທົນທຸກທໍລະມານ ແລະ ເປັນຫຍັງພຣະອົງຈຶ່ງທົນທຸກທໍລະມານ ແລະ ຂຽນລາຍການກ່ຽວກັບສິ່ງທີ່ທ່ານພົບເຫັນຢູ່ໃນ ແອວມາ 7:7–16 (ເບິ່ງ ເອຊາຢາ 53:3–5) ນຳອີກ. ທ່ານສາມາດຄິດເຖິງເວລາທີ່ທ່ານໄດ້ທົນທຸກທໍລະມານກັບສິ່ງເຫລົ່ານີ້ໄດ້ບໍ? ຕໍ່ໄປນີ້ຄືບາງຕົວຢ່າງຈາກພຣະຄຳພີ: ມັດທາຍ 4:1–13; 26:55–56; 27:39–44; ມາຣະໂກ 14:43–46; ລູກາ 9:58. ທ່ານສາມາດເພີ່ມຫຍັງແດ່ໃສ່ກັບລາຍການຂອງທ່ານຈາກຂໍ້ເຫລົ່ານີ້?

ມັນເປັນອີກເລື່ອງໜຶ່ງທີ່ຈະເຊື່ອວ່າພຣະຜູ້ຊ່ວຍໃຫ້ລອດໄດ້ທົນທຸກທໍລະມານເພື່ອທ່ານ. ແຕ່ຄວາມທຸກທໍລະມານຂອງພຣະອົງສ້າງຄວາມແຕກຕ່າງໃນຊີວິດປະຈຳວັນຂອງທ່ານແນວໃດ? ຕໍ່ໄປນີ້ແມ່ນຂໍ້ພຣະຄຳພີທີ່ສະແດງໃຫ້ເຫັນວ່າ ພຣະເຢຊູຄຣິດສາມາດ “ຊ່ວຍເຫລືອ” ທ່ານໄດ້: ເອໂນດ 1:5–6; ໂມໄຊຢາ 16:7–8; 21:15; 24:14–15; 3 ນີໄຟ 17:6–7; ອີເທີ 12:27–29; ຄຳສອນ ແລະ ພັນທະສັນຍາ 121:7–10. ທ່ານຮຽນຮູ້ຫຍັງແດ່ຈາກຂໍ້ເຫລົ່ານີ້? ມີວິທີໃດອີກແດ່ທີ່ພຣະອົງເຂົ້າມາຊ່ວຍເຫລືອທ່ານ? ເມື່ອໃດທີ່ທ່ານໄດ້ປະສົບຄວາມຊ່ວຍເຫລືອຂອງພຣະອົງ?

ເພງສວດດັ່ງເຊັ່ນ “ຂໍເພິ່ງພຣະທຸກຊົ່ວໂມງ” ຫລື “ເຮົາຮູ້ພຣະຜູ້ໄຖ່ຊົງພຣະຊົນ” (ເພງສວດ ແລະ ເພງຂອງເດັກນ້ອຍ, 12, 42) ສາມາດເຮັດໃຫ້ຄວາມຮູ້ສຶກບຸນຄຸນຂອງທ່ານສຳລັບຄວາມຊ່ວຍເຫລືອຂອງພຣະຜູ້ຊ່ວຍໃຫ້ລອດເລິກເຊິ່ງຫລາຍຂຶ້ນໄດ້. ມີວະລີໃດແດ່ໃນເພງສວດເຫລົ່ານີ້ທີ່ສະແດງເຖິງຄວາມຮູ້ສຶກຂອງທ່ານທີ່ມີຕໍ່ພຣະອົງ?

ເບິ່ງ Gospel Topics, “Atonement of Jesus Christ,” ຫ້ອງສະໝຸດພຣະກິດຕິຄຸນ; “His Grace” (ບ່ອນເກັບກຳວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ເປັນພະຍານເຖິງພຣະເຢຊູຄຣິດ. ໃຫ້ໄຕ່ຕອງວິທີທີ່ທ່ານສາມາດແບ່ງປັນປະຈັກພະຍານຂອງທ່ານເຖິງພຣະຜູ້ຊ່ວຍໃຫ້ລອດ ແລະ ຄວາມສູງສົ່ງ, ພຣະຄຸນ, ແລະ ຄວາມຮັກຂອງພຣະອົງ. ທ່ານສາມາດຊຸກຍູ້ຜູ້ຄົນທີ່ທ່ານສິດສອນໃຫ້ເປັນພະຍານເຖິງພຣະອົງ ໂດຍການຖາມຄຳຖາມທີ່ກະຕຸ້ນເຂົາເຈົ້າໃຫ້ແບ່ງປັນວ່າເຂົາເຈົ້າຮູ້ສຶກແນວໃດກ່ຽວກັບພຣະອົງ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ແອວມາ 5:44–48

ເຮົາສາມາດມີປະຈັກພະຍານຂອງເຮົາເອງ ຜ່ານທາງພຣະວິນຍານບໍລິສຸດ.

ເພື່ອຊ່ວຍລູກໆຂອງທ່ານຮຽນຮູ້ທີ່ຈະເຮັດໃຫ້ປະຈັກພະຍານຂອງພວກເຂົາເຕີບໂຕ, ທ່ານສາມາດສະແດງຮູບພາບທີ່ຢູ່ຂ້າງລຸ່ມ ແລະ ຖາມພວກເຂົາວ່າ ເຮົາຊ່ວຍລູກສັດໃຫ້ເຕີບໂຕແນວໃດ. ແລ້ວທ່ານກໍສາມາດປຽບທຽບສິ່ງນີ້ໃສ່ກັບການດູແລປະຈັກພະຍານຂອງເຮົາ. ປະຈັກພະຍານຂອງເຮົາຕ້ອງການການດູແລແບບໃດແດ່? ເຮົາຈະຮູ້ໄດ້ແນວໃດວ່າ ມັນກຳລັງເຕີບໂຕ?

ຮູບພາບ
ເດັກຊາຍສອງຄົນກັບລູກສັດ

ເມື່ອເຮົາຮັບເອົາພຣະກິດຕິຄຸນ, ມັນກໍຄືກັນກັບການເລີ່ມຕົ້ນຊີວິດໃໝ່.
ແອວມາໄດ້ຮັບປະຈັກພະຍານທີ່ເຂັ້ມແຂງຂອງເພິ່ນເຖິງພຣະເຢຊູຄຣິດໄດ້ແນວໃດ? ທ່ານສາມາດອ່ານ ແອວມາ 5:44–46 ກັບລູກໆຂອງທ່ານ ເພື່ອທີ່ຈະຊອກຫາຄຳຕອບໃຫ້ກັບຄຳຖາມຂໍ້ນີ້. ບາງທີລູກໆຂອງທ່ານກໍສາມາດຂຽນແຜນການລົງໄວ້ທີ່ຈະເຮັດສິ່ງໜຶ່ງໃນອາທິດນີ້ ເພື່ອເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງພວກເຂົາ.

ແອວມາ 7:10–13

ພຣະຜູ້ຊ່ວຍໃຫ້ລອດໄດ້ຮັບເອົາບາບ, ຄວາມເຈັບປວດ, ແລະ ຄວາມທຸກທໍລະມານຂອງເຮົາໄປ.

ທ່ານຈະສາມາດຊ່ວຍລູກໆຂອງທ່ານໃຫ້ເຂົ້າໃຈ ແອວມາ 7:10–13 ເພື່ອວ່າພວກເຂົາຈະສາມາດຮູ້ໄດ້ວ່າ ພຣະເຢຊູຄຣິດຫ່ວງໃຍພວກເຂົາ ແລະ ສາມາດຊ່ວຍພວກເຂົາໄດ້ແນວໃດ? ບາງທີທ່ານກໍສາມາດຂໍໃຫ້ພວກເຂົາແບ່ງປັນປະສົບການຕອນທີ່ພວກເຂົາບໍ່ສະບາຍ ຫລື ເຈັບປວດ ຫລື ມີບັນຫາຢ່າງອື່ນ ທີ່ເຮັດໃຫ້ພວກເຂົາເສົ້າໃຈ. ຄົນອື່ນໄດ້ຊ່ວຍພວກເຂົາໃຫ້ຮູ້ສຶກດີຂຶ້ນແນວໃດ? ສະແດງປະຈັກພະຍານຂອງທ່ານວ່າພຣະຜູ້ຊ່ວຍໃຫ້ລອດໄດ້ທົນທຸກກັບສິ່ງເຫລົ່ານີ້ຄືກັນ, ແລະ ເວົ້າລົມກັນກ່ຽວກັບເວລາຕອນທີ່ພຣະອົງໄດ້ປອບໂຍນ ແລະ ຊ່ວຍເຫລືອທ່ານ.
ຂະນະທີ່ທ່ານ ແລະ ລູກໆຂອງທ່ານອ່ານ ແອວມາ 7:11–13, ໃຫ້ຊອກຫາສິ່ງທີ່ພຣະເຢຊູຄຣິດໄດ້ທົນທຸກທໍລະມານແທນເຮົາ. ເຊື້ອເຊີນລູກໆຂອງທ່ານໃຫ້ໃຊ້ຖ້ອຍຄຳ ແລະ ວະລີທີ່ພວກເຂົາໄດ້ພົບເຫັນ ເພື່ອປະກອບປະໂຫຍກນີ້ໃຫ້ສົມບູນ: “ພຣະເຢຊູໄດ້ທົນທຸກທໍລະມານ ເພື່ອວ່າພຣະອົງຈະສາມາດຊ່ວຍເຫລືອເຮົາ.” ມັນຊ່ວຍເຮົາໄດ້ແນວໃດທີ່ຈະຮູ້ວ່າພຣະເຢຊູເຂົ້າໃຈການດີ້ນລົນຂອງເຮົາ? ເຮົາຈະຮັບເອົາຄວາມຊ່ວຍເຫລືອຂອງພຣະອົງແນວໃດ? ແບ່ງປັນປະຈັກພະຍານຂອງທ່ານເຖິງພຣະເຢຊູຄຣິດ.

ແອວມາ 5:14; 7:19–20

ການຕິດຕາມພຣະເຢຊູຄຣິດຮັກສາເຮົາໃຫ້ຄົງຢູ່ໃນເສັ້ນທາງຊື່ທີ່ນຳກັບຄືນໄປຫາພຣະບິດາເທິງສະຫວັນ.

ໃຫ້ລູກໆຂອງທ່ານຫລຽວເບິ່ງກະຈົກຂະນະທີ່ທ່ານອ່ານ ແອວມາ 5:14 (ເບິ່ງໜ້າກິດຈະກຳສຳລັບອາທິດນີ້ນຳອີກ). ການມີເງົາຂອງພຣະຜູ້ຊ່ວຍໃຫ້ລອດຢູ່ໃນໃບໜ້າຂອງເຮົາໝາຍຄວາມວ່າແນວໃດ?
ທ່ານຈະສາມາດໃຊ້ຄຳບັນຍາຍຂອງແອວມາເຖິງເສັ້ນທາງທີ່ນຳກັບຄືນໄປຫາພຣະບິດາເທິງສະຫວັນ ເພື່ອຊ່ວຍລູກໆຂອງທ່ານໃຫ້ຮຽນຮູ້ທີ່ຈະເລືອກສິ່ງດີໄດ້ແນວໃດ? ທ່ານສາມາດອ່ານ ແອວມາ 7:19–20 ໃຫ້ພວກເຂົາຟັງ ແລະ ໃຫ້ພວກເຂົາທຳທ່າຍ່າງໄປໃນ “ເສັ້ນທາງຄົດ” ແລະ ຍ່າງໄປໃນເສັ້ນທາງຊື່. ຊ່ວຍພວກເຂົາໃຫ້ຄິດເຖິງທາງເລືອກທີ່ຊ່ວຍເຮົາໃຫ້ຄົງຢູ່ໃນເສັ້ນທາງ ແລະ ທາງເລືອກອື່ນທີ່ນຳເຮົາອອກໄປຈາກເສັ້ນທາງ. ພວກທ່ານກໍສາມາດເບິ່ງຮູບພາບຂອງພຣະເຢຊູນຳກັນ ແລະ ເວົ້າລົມກ່ຽວກັບສິ່ງທີ່ພຣະອົງໄດ້ເຮັດເພື່ອສະແດງໃຫ້ເຮົາເຫັນເສັ້ນທາງທີ່ນຳກັບຄືນໄປຫາພຣະບິດາເທິງສະຫວັນ. ເພງດັ່ງເຊັ່ນ: “ເຮົາຮ້ອງສັນເສີນນາມເຢຊູເຈົ້າ,” (ເພງສວດ ແລະ ເພງຂອງເດັກນ້ອຍ, 27) ກໍໃຫ້ແນວຄິດບາງຢ່າງໄດ້.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

Our Advocate [ຜູ້ວິງວອນແທນເຮົາ], ໂດຍ ເຈ ບະໄຣອັນ ຫວອດ

ຮູບພາບ

ໜ້າກິດຈະກຳ: ເຮົາສາມາດມີເງົາຂອງພຣະຜູ້ຊ່ວຍໃຫ້ລອດຢູ່ໃນໃບໜ້າຂອງເຮົາ