“ວັນທີ 24–30 ເດືອນມິຖຸນາ: ‘ເຂົ້າໄປໃນທີ່ພັກຂອງພຣະຜູ້ເປັນເຈົ້າ.’ ແອວມາ 13–16,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 24–30 ເດືອນມິຖຸນາ. ແອວມາ 13–16,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
ຮູບພາບແອວມາ ແລະ ແອມມິວເລັກ ຖືກປົດປ່ອຍອອກຈາກຄຸກ, ໂດຍ ແອນດຣູ ໂບສ໌ລີ
ວັນທີ 24–30 ເດືອນມິຖຸນາ: “ເຂົ້າໄປໃນທີ່ພັກຂອງພຣະຜູ້ເປັນເຈົ້າ”
ແອວມາ 13–16
ໃນຫລາຍວິທີທາງ, ຊີວິດໃນເມືອງອຳໂມນໄນຮາ ບໍ່ດີສະເໝີໄປສຳລັບແອມມິວເລັກ ແລະ ຊີເອສຣອມ. ແອມມິວເລັກໄດ້ເປັນ “ຄົນທີ່ຖືກນັບຖືພໍສົມຄວນ,” ພ້ອມທັງ “ມີພີ່ນ້ອງ ແລະ ໝູ່ເພື່ອນຫລາຍຄົນ” ແລະ “ມີສິ່ງຂອງອັນມີຄ່າຢ່າງຫລວງຫລາຍ” (ແອວມາ 10:4). ຊີເອສຣອມເປັນທະນາຍທີ່ມີຄວາມຊຳນານ ຜູ້ທີ່ມີຄວາມມ່ວນຊື່ນກັບ “ທຸລະກິດຫລາຍຢ່າງ” (ແອວມາ 10:31). ແລ້ວແອວມາກໍໄດ້ມາຮອດພ້ອມດ້ວຍຄຳເຊື້ອເຊີນໃຫ້ກັບໃຈ ແລະ “ເຂົ້າໄປໃນທີ່ພັກຂອງພຣະຜູ້ເປັນເຈົ້າ” (ແອວມາ 13:16). ຕໍ່ແອມມິວເລັກ, ຊີເອສຣອມ, ແລະ ຄົນອື່ນໆ, ການຮັບເອົາຄຳເຊື້ອເຊີນນັ້ນ ຮຽກຮ້ອງໃຫ້ເສຍສະລະ ແລະ ແມ່ນແຕ່ຈະພາໄປສູ່ຄວາມຍາກລຳບາກຫລາຍທີ່ສຸດ ຈົນເກືອບຈະທົນຕໍ່ບໍ່ໄຫວ.
ແຕ່ແນ່ນອນ ເລື່ອງລາວບໍ່ໄດ້ສິ້ນສຸດລົງພຽງເທົ່ານັ້ນ. ໃນ ແອວມາ 13–16, ເຮົາໄດ້ຮຽນຮູ້ເຖິງສິ່ງທີ່ໄດ້ເກີດຂຶ້ນໃນທີ່ສຸດ ຕໍ່ຜູ້ທີ່ເຊື່ອ “ໃນອຳນາດຂອງພຣະຄຣິດອັນຈະນຳໄປສູ່ຄວາມລອດ” (ແອວມາ 15:6). ບາງເທື່ອກໍມີການປົດປ່ອຍ, ບາງເທື່ອກໍມີການປິ່ນປົວ—ແລະ ບາງເທື່ອບາງສິ່ງກໍບໍ່ງ່າຍຂຶ້ນໃນຊີວິດ. ແຕ່ “ພຣະຜູ້ເປັນເຈົ້າຈະຮັບເອົາ [ຜູ້ຄົນຂອງພຣະອົງ] ຂຶ້ນໄປຫາພຣະອົງໃນລັດສະໝີພາບ” ສະເໝີ (ແອວມາ 14:11). ພຣະຜູ້ເປັນເຈົ້າຈະປະທານ “ອຳນາດໃຫ້, ຕາມສັດທາ [ຂອງເຮົາ] … ໃນພຣະຄຣິດ” ສະເໝີ (ແອວມາ 14:28). ແລະ ສັດທານັ້ນຈະໃຫ້ “ຄວາມຫວັງວ່າ [ເຮົາ] ຈະໄດ້ຮັບຊີວິດນິລັນດອນ” ສະເໝີ (ແອວມາ 13:29). ຂະນະທີ່ທ່ານອ່ານບົດເຫລົ່ານີ້, ທ່ານສາມາດອຸ່ນໃຈໄດ້ກັບຄຳສັນຍາເຫລົ່ານີ້, ແລະ ທ່ານອາດເຂົ້າໃຈຫລາຍກວ່າເກົ່າເຖິງສິ່ງທີ່ແອວມາໝາຍເຖິງ ເມື່ອເພິ່ນກ່າວກ່ຽວກັບການເຂົ້າໄປໃນ “ທີ່ພັກຂອງພຣະຜູ້ເປັນເຈົ້າ” (ແອວມາ 13:16).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
![]()
ຮູບພາບໄອຄອນຫ້ອງຮຽນສາດສະໜາ
ຖ້ອຍຄຳຂອງແອວມາໃນ ແອວມາ 13 ເປີດເຜີຍຄວາມຈິງທີ່ມີພະລັງກ່ຽວກັບອຳນາດຖານະປະໂລຫິດຂອງພຣະເຈົ້າ ແລະ ຈຸດປະສົງຂອງມັນ—ເພື່ອຕຽມເຮົາໃຫ້ເຂົ້າໄປໃນ “ທີ່ພັກຂອງພຣະຜູ້ເປັນເຈົ້າ,” ຫລື ຊີວິດນິລັນດອນ (ແອວມາ 13:16). ບາງທີທ່ານສາມາດຂຽນຢ່າງໜ້ອຍຄວາມຈິງຢ່າງໜຶ່ງໃນແຕ່ລະຂໍ້ ຢູ່ໃນ ແອວມາ 13:1–19. ຕໍ່ໄປນີ້ແມ່ນຕົວຢ່າງຈຳນວນໜຶ່ງ ເພື່ອຊ່ວຍທ່ານເລີ່ມຕົ້ນ:
-
ຂໍ້ທີ 1.ຖານະປະໂລຫິດຖືກເອີ້ນວ່າ “ລະບຽບຂອງພຣະບຸດ [ຂອງພຣະເຈົ້າ]” (ເບິ່ງ ຄຳສອນ ແລະ ພັນທະສັນຍາ 107:1–4 ນຳອີກ).
-
ຂໍ້ທີ 2.ພຣະເຈົ້າແຕ່ງຕັ້ງປະໂລຫິດໃຫ້ຊ່ວຍເຫລືອຜູ້ຄົນ ເພື່ອຫວັງເພິ່ງພຣະບຸດຂອງພຣະອົງສຳລັບການໄຖ່.
ທ່ານພົບເຫັນຫຍັງອີກແດ່? ທ່ານຮູ້ສຶກແນວໃດກ່ຽວກັບຖານະປະໂລຫິດ ຂະນະທີ່ທ່ານໄຕ່ຕອງກ່ຽວກັບຄວາມຈິງເຫລົ່ານີ້?
ທ່ານເຄີຍຄິດກ່ຽວກັບພິທີການຖານະປະໂລຫິດວ່າເປັນຂອງປະທານຈາກພຣະເຈົ້າ ເພື່ອຊ່ວຍໃຫ້ທ່ານ “ລະນຶກຫາພຣະບຸດຂອງພຣະອົງເພື່ອການໄຖ່”? (ຂໍ້ທີ 2; ເບິ່ງ ຂໍ້ທີ 16 ນຳອີກ). ບາງເທື່ອທ່ານອາດສາມາດຂຽນລາຍການຂອງພິທີການຕ່າງໆທີ່ທ່ານເຄີຍໄດ້ຮັບ, ເຊັ່ນ: ການບັບຕິສະມາ, ການຢືນຢັນ, ສິນລະລຶກ, ການແຕ່ງຕັ້ງສູ່ການເອີ້ນຢ່າງເປັນທາງການ, ພອນແຫ່ງການປອບໂຍນ ຫລື ການປິ່ນປົວ, ປິຕຸພອນ, ແລະ ພິທີການພຣະວິຫານຕ່າງໆ. ໄຕ່ຕອງປະສົບການຂອງທ່ານກ່ຽວກັບພິທີການຕ່າງໆເຊັ່ນນີ້. ພິຈາລະນາສັນຍາລັກທີ່ກ່ຽວຂ້ອງ ແລະ ພຣະວິນຍານທີ່ທ່ານຮູ້ສຶກ. ແຕ່ລະພິທີການເຫລົ່ານີ້ ຊີ້ໃຫ້ທ່ານໄປຫາພຣະເຢຊູຄຣິດສຳລັບການໄຖ່ແນວໃດ?
ບາງຄົນເຊື່ອຢ່າງຜິດໆວ່າ ພິທີການຕ່າງໆ—ແລະ ສິດອຳນາດຂອງຖານະປະໂລຫິດໃນການປະກອບພິທີນັ້ນ—ບໍ່ມີຄວາມຈຳເປັນ. ທ່ານຈະຕອບຕໍ່ແນວຄິດນີ້ແນວໃດ? ນີ້ແມ່ນຂ່າວສານຈາກກອງປະຊຸມໃຫຍ່ສາມັນສອງສະບັບ ທີ່ສາມາດແຈ້ງຕໍ່ຄວາມຄິດຂອງທ່ານ; ໃຫ້ເລືອກເອົາສະບັບໜຶ່ງ, ແລະ ຂຽນຄຳຕອບໃດໆທີ່ມາສູ່ທ່ານ: Russell M. Nelson, “Spiritual Treasures,” Liahona, Nov. 2019, 76–79; Dale G. Renlund, “The Priesthood and the Savior’s Atoning Power,” Liahona, Nov. 2017, 64–67.
ເບິ່ງ ຄຳສອນ ແລະ ພັນທະສັນຍາ 84:19–22; Gospel Topics, “Covenant,” ຫ້ອງສະໝຸດພຣະກິດຕິຄຸນ ນຳອີກ.
ພິທີການຂອງຖານະປະໂລຫິດຊ່ວຍເຮົາໃຫ້ຫວັງເພິ່ງພຣະເຢຊູຄຣິດສຳລັບການໄຖ່ແນວໃດ.
ພຣະຜູ້ເປັນເຈົ້າເຊື້ອເຊີນເຮົາໃຫ້ເຂົ້າໄປໃນທີ່ພັກຂອງພຣະອົງ.
ຄຳເຊື້ອເຊີນໃຫ້ “ເຂົ້າໄປໃນທີ່ພັກຂອງພຣະຜູ້ເປັນເຈົ້າ” (ແອວມາ 13:16) ໄດ້ມີການຢໍ້າຢ່າງຊໍ້າໆໃນ ແອວມາ 13. ບາງເທື່ອທ່ານອາດສາມາດຊອກຫາທຸກໆຂໍ້ທີ່ມີຄຳວ່າ “ທີ່ພັກ” ປະກົດ ແລະ ໄຕ່ຕອງສິ່ງທີ່ແຕ່ລະຂໍ້ສິດສອນທ່ານກ່ຽວກັບວ່າ “ທີ່ພັກຂອງພຣະຜູ້ເປັນເຈົ້າ” ອາດໝາຍຄວາມວ່າແນວໃດ. ມັນແຕກຕ່າງຈາກທີ່ພັກທາງຮ່າງກາຍແນວໃດ? ເຮົາຈະພົບມັນໄດ້ແນວໃດ?
ເບິ່ງ Russell M. Nelson, “Overcome the World and Find Rest,” Liahona, Nov. 2022, 95–98; “ປັນຍາ ແລະ ຄວາມຮັກຍິ່ງໃຫຍ່,” ເພງສວດ ແລະ ເພງຂອງເດັກນ້ອຍ, 20 ນຳອີກ.
ໃນຊ່ວງເວລາແຫ່ງຄວາມທຸກທໍລະມານ, ເຮົາຕ້ອງໄວ້ວາງໃຈພຣະຜູ້ເປັນເຈົ້າ.
ຄືກັນກັບຫລາຍຄົນ, ທ່ານອາດສົງໄສວ່າ ເປັນຫຍັງສິ່ງທີ່ບໍ່ດີຈຶ່ງເກີດກັບຜູ້ທີ່ພະຍາຍາມດຳລົງຊີວິດຢ່າງຊອບທຳ. ທ່ານອາດບໍ່ພົບເຫັນຄຳຕອບທັງໝົດ ຕໍ່ຄຳຖາມທີ່ຍາກນີ້ ຢູ່ໃນ ແອວມາ 14, ແຕ່ມັນມີຫລາຍສິ່ງທີ່ຈະຮຽນຮູ້ຈາກວິທີທີ່ແອວມາ ແລະ ແອມມິວເລັກຕອບຮັບຕໍ່ສິ່ງຮ້າຍແຮງ. ຖ້ອຍຄຳ ແລະ ການກະທຳຂອງພວກເພິ່ນ ສິດສອນທ່ານຫຍັງແດ່ກ່ຽວກັບເຫດຜົນທີ່ບາງເທື່ອພຣະຜູ້ເປັນເຈົ້າປ່ອຍໃຫ້ຄົນຊອບທຳຮັບທຸກທໍລະມານ? ຄຳແນະນຳໃດແດ່ທີ່ແອວມາ ແລະ ແອມມິວເລັກອາດມອບໃຫ້ເຮົາ ເມື່ອເຮົາກຳລັງປະເຊີນກັບການທົດລອງທີ່ຍາກລຳບາກ?
ເບິ່ງ ໂຣມ 8:35–39; 1 ເປໂຕ 4:12–14; ຄຳສອນ ແລະ ພັນທະສັນຍາ 122:5–9; Dale G. Renlund, “Infuriating Unfairness,” Liahona, May 2021, 41–45 ນຳອີກ.
ພ້ອມຢູ່ສະເໝີ. ຊ່ວງເວລາແຫ່ງການສິດສອນແມ່ນຜ່ານໄປຢ່າງໄວວາ, ສະນັ້ນ ຕ້ອງສວຍໂອກາດ ເມື່ອໄດ້ຈັງຫວະ. ສິ່ງຮ້າຍແຮງທີ່ເກີດຂຶ້ນຢູ່ໃນໂລກ, ຍົກຕົວຢ່າງ, ອາດເປັນໂອກາດທີ່ຈະແບ່ງປັນຫລັກທຳຈາກ ແອວມາ 14 ກ່ຽວກັບເຫດຜົນທີ່ບາງເທື່ອພຣະຜູ້ເປັນເຈົ້າປ່ອຍໃຫ້ຄົນທີ່ບໍ່ມີຄວາມຜິດ ຮັບທຸກທໍລະມານ.
ການເປັນສານຸສິດຮຽກຮ້ອງການເສຍສະລະ.
ມັນອາດເປັນສິ່ງທີ່ໜ້າສົນໃຈທີ່ຈະຂຽນບາງສິ່ງທີ່ແອມມິວເລັກໄດ້ປະຖິ້ມ ເພື່ອຮັບເອົາພຣະກິດຕິຄຸນ (ເບິ່ງ ແອວມາ 10:4–5; 15:16) ແລະ ປຽບທຽບມັນໃສ່ກັບຈຳນວນທີ່ເພິ່ນໄດ້ຮັບ (ເບິ່ງ ແອວມາ 15:18; 16:13–15; 34:8). ທ່ານເຕັມໃຈທີ່ຈະເສຍສະລະຫຍັງແດ່ເພື່ອກາຍເປັນສານຸສິດທີ່ຊື່ສັດຫລາຍກວ່າເກົ່າຂອງພຣະເຢຊູຄຣິດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເພາະວັນອາທິດນີ້ເປັນວັນອາທິດທີຫ້າຂອງເດືອນ, ຄູສອນປະຖົມໄວຖືກຊຸກຍູ້ໃຫ້ນຳໃຊ້ກິດຈະກຳການຮຽນຮູ້ທີ່ຢູ່ໃນ “ພາກຫ້ອຍທ້າຍ ຂ: ການກະກຽມເດັກນ້ອຍໃຫ້ຢູ່ໃນເສັ້ນທາງແຫ່ງພັນທະສັນຍາຂອງພຣະເຈົ້າໄປຕະຫລອດຊີວິດ.”
ອຳນາດຂອງຖານະປະໂລຫິດຊ່ວຍໃຫ້ເຮົາເຂົ້າໃກ້ຊິດກັບພຣະຄຣິດຫລາຍຍິ່ງຂຶ້ນ.
-
ວິທີໜຶ່ງທີ່ຊ່ວຍໃຫ້ລູກໆຂອງທ່ານເຫັນວ່າ ອຳນາດຂອງຖານະປະໂລຫິດຊີ້ໃຫ້ເຮົາໄປຫາພຣະຄຣິດໄດ້ແນວໃດ ແມ່ນການສະແດງຮູບພາບຂອງວິທີຕ່າງໆທີ່ອຳນາດຂອງຖານະປະໂລຫິດໄດ້ຖືກນຳໃຊ້ (ເບິ່ງ ປຶ້ມຮູບພຣະກິດຕິຄຸນ, ເລກທີ 103–110). ລູກໆຂອງທ່ານອາດສາມາດຊ່ວຍໃຫ້ທ່ານຄິດອອກເຖິງວິທີຕ່າງໆທີ່ພຣະເຢຊູໄດ້ໃຊ້ອຳນາດຂອງພຣະອົງ (ເບິ່ງ, ຍົກຕົວຢ່າງ, ມັດທາຍ 26:26–28; ມາຣະໂກ 5:22–24, 35–43; ປຶ້ມຮູບພຣະກິດຕິຄຸນ, ເລກທີ 38–41). ແລ້ວພວກທ່ານສາມາດອ່ານ ແອວມາ 13:2 ນຳກັນ ແລະ ລົມກັນກ່ຽວກັບວ່າ ອຳນາດຂອງຖານະປະໂລຫິດຊ່ວຍໃຫ້ເຮົາ “ລະນຶກຫາພຣະບຸດຂອງ [ພຣະເຈົ້າ]” ແລະ ກາຍເປັນເໝືອນດັ່ງພຣະອົງແນວໃດ.
ຮູບພາບການບັບຕິສະມາຮູບພາບພຣະເຢຊູກຳລັງແຕ່ງຕັ້ງອັກຄະສາວົກ -
ເປັນຫຍັງພຣະເຈົ້າຈຶ່ງມອບພິທີການຖານະປະໂລຫິດໃຫ້ແກ່ເຮົາ? ຊ່ວຍໃຫ້ລູກໆຂອງທ່ານພົບຄຳຕອບໃນ ແອວມາ 13:16. ຖ້າພວກເຂົາຕ້ອງການຄວາມຊ່ວຍເຫລືອເພື່ອຈະໄດ້ຮູ້ວ່າ ພິທີການແມ່ນຫຍັງ, ມີລາຍການຢູ່ໃນ ຄູ່ມືທົ່ວໄປ, 18.1 ແລະ 18.2. ບາງເທື່ອທ່ານ ແລະ ລູກໆຂອງທ່ານສາມາດເວົ້າລົມກັນກ່ຽວກັບປະສົບການຂອງພວກທ່ານໃນການຮັບພິທີການເຫລົ່ານີ້. ມັນຊ່ວຍໃຫ້ເຮົາ “ລະນຶກຫາ [ພຣະເຢຊູຄຣິດ] ເພື່ອການປົດບາບຂອງ [ເຮົາ]” ໄດ້ແນວໃດ? ເພງດັ່ງເຊັ່ນ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70) ສາມາດຊ່ວຍໃຫ້ລູກໆຂອງທ່ານຄິດເຖິງເຫດຜົນອື່ນໆໃນການຂອບຄຸນສຳລັບພິທີການຖານະປະໂລຫິດໄດ້.
ພຣະເຢຊູຄຣິດສາມາດເຮັດໃຫ້ເຮົາສະອາດໄດ້.
-
ຫລັງຈາກທີ່ອ່ານຂໍ້ເຫລົ່ານີ້ນຳກັນແລ້ວ, ໃຫ້ພິຈາລະນາເຖິງວິທີຕ່າງໆໃນການຊ່ວຍໃຫ້ລູກໆຂອງທ່ານເຫັນພາບໃນສິ່ງທີ່ຂໍ້ພຣະຄຳພີສິດສອນ. ບາງເທື່ອພວກທ່ານອາດສາມາດລ້າງບາງສິ່ງບາງຢ່າງນຳກັນ. ເຮົາຮູ້ສຶກແນວໃດ ເມື່ອເຮົາເປິເປື້ອນ? ເຮົາຮູ້ສຶກແນວໃດ ເມື່ອເຮົາກັບມາສະອາດອີກຄັ້ງ? ຄວາມຮູ້ສຶກເຫລົ່ານີ້ ຄ້າຍຄືກັນກັບສິ່ງທີ່ເຮົາຮູ້ສຶກ ຕອນເຮົາເຮັດຄວາມຜິດບາບ ແລະ ແລ້ວກັບໃຈ ແລະ ກັບມາສະອາດຄືນໃໝ່ ຜ່ານທາງການຊົດໃຊ້ຂອງພຣະຜູ້ຊ່ວຍໃຫ້ລອດແນວໃດ?
ພຣະບິດາເທິງສະຫວັນເພີ່ມຄວາມເຂັ້ມແຂງໃຫ້ເຮົາ ເມື່ອເຮົາມີສັດທາໃນພຣະເຢຊູຄຣິດ.
-
ໜ້າກິດຈະກຳຂອງອາທິດນີ້ສາມາດຊ່ວຍທ່ານ—ຫລື ລູກໆຂອງທ່ານ—ເລົ່າເລື່ອງລາວໃນ ແອວມາ 14:18–29 ໄດ້ (ເບິ່ງ “ບົດທີ 22: ການສອນສາດສະໜາຂອງແອວມາຕໍ່ອຳໂມນໄນຮາ,” ເລື່ອງພຣະຄຳພີມໍມອນ, 58–63 ນຳອີກ). ໃຫ້ເນັ້ນໜັກວ່າ ແອວມາ ແລະ ແອມມິວເລັກໄດ້ຮັບຄວາມເຂັ້ມແຂງຍ້ອນ “ສັດທາຂອງ [ພວກເພິ່ນ] ອັນມີຢູ່ໃນພຣະຄຣິດ” (ແອວມາ 14:26). ທ່ານຍັງສາມາດເວົ້າລົມກ່ຽວກັບຊ່ວງເວລາທີ່ພຣະເຈົ້າໄດ້ໃຫ້ຄວາມເຂັ້ມແຂງແກ່ທ່ານ “ຕາມສັດທາຂອງ [ທ່ານ].” ເຮົາຈະສາມາດຊື່ສັດຄືກັນກັບແອວມາ ແລະ ແອມມິວເລັກໄດ້ແນວໃດ?
ພຣະເຢຊູຄຣິດສາມາດປ່ຽນແປງຈິດໃຈໄດ້.
-
ການປ່ຽນແປງຈິດໃຈຂອງຊີເອສຣອມຜ່ານທາງພຣະເຢຊູນັ້ນ ຊ່າງເປັນແຮງບັນດານໃຈ. ໃຫ້ຄິດທີ່ຈະທົບທວນກັບລູກໆຂອງທ່ານກ່ຽວກັບສິ່ງທີ່ພວກເຂົາໄດ້ຮຽນຮູ້ອາທິດແລ້ວນີ້ກ່ຽວກັບຊີເອສຣອມ. ແລ້ວພວກທ່ານກໍສາມາດອ່ານ ແອວມາ 15:3–12 ນຳກັນ ເພື່ອຄົ້ນຫາວ່າ ລາວໄດ້ປ່ຽນແປງໄປແນວໃດ. ເຮົາຮຽນຮູ້ຫຍັງແດ່ຈາກປະສົບການຂອງຊີເອສຣອມກ່ຽວກັບອຳນາດຂອງພຣະຜູ້ເປັນເຈົ້າ? (ເບິ່ງ “Zeezrom Is Healed and Baptized” [ວິດີໂອ], ຫ້ອງສະໝຸດພຣະກິດຕິຄຸນ).
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Alma and Amulek in Prison [ແອວມາ ແລະ ແອມມິວເລັກ ຢູ່ໃນຄຸກ], ໂດຍ ແກຣີ ແອວ ແຄບ