“ວັນທີ 2–8 ເດືອນກັນຍາ: ‘ລະນຶກເຖິງພຣະຜູ້ເປັນເຈົ້າ.’ ຮີລາມັນ 7–12,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 2–8 ເດືອນກັນຍາ. ຮີລາມັນ 7–12,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

ຮູບພາບ

ນີໄຟກຳລັງອະທິຖານຢູ່ເທິງຫໍສູງຢູ່ໃນສວນ

ຮູບພາບນີໄຟຢູ່ເທິງຫໍສູງຢູ່ໃນສວນ, ໂດຍ ແຈຣີ ທອມສັນ

ວັນທີ 2–8 ເດືອນກັນຍາ: “ລະນຶກເຖິງພຣະຜູ້ເປັນເຈົ້າ”

ຮີລາມັນ 7–12

ຮີລາມັນ ບິດາຂອງນີໄຟໄດ້ຊັກຊວນພວກລູກຊາຍຂອງເພິ່ນໃຫ້ “ຈື່ຈຳໄວ້, ຈື່ຈຳໄວ້.” ເພິ່ນຢາກໃຫ້ພວກເພິ່ນຈື່ຈຳບັນພະບຸລຸດຂອງພວກເພິ່ນ, ຈື່ຈຳຖ້ອຍຄຳຂອງສາດສະດາ, ແລະ ເໜືອສິ່ງອື່ນໃດ ໃຫ້ຈື່ຈຳ “ພຣະຜູ້ໄຖ່ຂອງພວກເຮົາ, ຄື ພຣະຄຣິດ” (ເບິ່ງ ຮີລາມັນ 5:5–14). ມັນແຈ່ມແຈ້ງວ່າ ນີໄຟໄດ້ຈື່ຈຳ ເພາະນີ້ແມ່ນຂ່າວສານຢ່າງດຽວກັນກັບທີ່ເພິ່ນໄດ້ປະກາດຫລາຍປີຈາກນັ້ນ ຢ່າງ “ບໍ່ຮູ້ຈັກອິດເມື່ອຍ” ຕໍ່ຜູ້ຄົນ (ຮີລາມັນ 10:4). “ພວກທ່ານລືມພຣະເຈົ້າຂອງພວກທ່ານໄດ້ແນວໃດ? ເພິ່ນຖາມ (ຮີລາມັນ 7:20). ຄວາມພະຍາຍາມທັງໝົດຂອງນີໄຟ—ການສັ່ງສອນ, ການອະທິຖານ, ການກະທຳການມະຫັດສະຈັນ, ແລະ ການອ້ອນວອນຕໍ່ພຣະເຈົ້າທູນຂໍຄວາມອຶດຢາກ—ແມ່ນຄວາມພະຍາຍາມທີ່ຈະຊ່ວຍໃຫ້ຜູ້ຄົນຫັນມາຫາພຣະເຈົ້າ ແລະ ຈື່ຈຳພຣະອົງ. ໃນຫລາຍວິທີທາງ, ການລືມພຣະເຈົ້າເປັນບັນຫາໃຫຍ່ກວ່າທີ່ບໍ່ຮູ້ຈັກພຣະອົງ. ແລະ ມັນງ່າຍທີ່ຈະລືມພຣະອົງ ເມື່ອຄວາມຄິດຂອງເຮົາຖືກລົບກວນໂດຍ “ສິ່ງທີ່ບໍ່ມີປະໂຫຍດຂອງໂລກ” ແລະ ປົກຄຸມດ້ວຍບາບ (ຮີລາມັນ 7:21; ເບິ່ງ ຮີລາມັນ 12:2) ນຳອີກ. ແຕ່, ດັ່ງທີ່ການປະຕິບັດສາດສະໜາກິດຂອງນີໄຟ ສະແດງໃຫ້ເຫັນ, ມັນບໍ່ເຄີຍສາຍເກີນໄປ ທີ່ຈະຈື່ຈຳ ແລະ “ຫັນ … ມາຫາພຣະຜູ້ເປັນເຈົ້າອົງເປັນພຣະເຈົ້າຂອງພວກທ່ານ” (ຮີລາມັນ 7:17).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຮີລາມັນ 7–11

ຮູບພາບ
seminary icon
ສາດສະດາເປີດເຜີຍພຣະປະສົງຂອງພຣະເຈົ້າຕໍ່ຜູ້ຄົນ.

ຮີລາມັນ 7–11 ເປັນບ່ອນດີພິເສດທີ່ຈະຮຽນຮູ້ກ່ຽວກັບວ່າສາດສະດາເຮັດຫຍັງ. ຂະນະທີ່ທ່ານອ່ານບົດເຫລົ່ານີ້, ໃຫ້ເອົາໃຈໃສ່ຕໍ່ການກະທຳ, ຄວາມຄິດ, ແລະ ປະຕິກິລິຍາຂອງນີໄຟຕໍ່ພຣະຜູ້ເປັນເຈົ້າ. ການປະຕິບັດສາດສະໜາກິດຂອງນີໄຟ ຊ່ວຍໃຫ້ທ່ານເຂົ້າໃຈຫລາຍກວ່າເກົ່າ ເຖິງບົດບາດຂອງສາດສະດາແນວໃດ? ຕໍ່ໄປນີ້ແມ່ນຕົວຢ່າງຈຳນວນໜຶ່ງ: ທ່ານພົບເຫັນຫຍັງອີກແດ່?

ຮີລາມັນ 7:17–22: ສາດສະດາເອີ້ນປ່າວການກັບໃຈ ແລະ ເຕືອນເຖິງຜົນສະທ້ອນຂອງບາບ.
ຮີລາມັນ 7:29; 9:21–36:
ຮີລາມັນ 8:13–23:
ຮີລາມັນ 10:7:
ຮີລາມັນ 10:4–7, 11–12:

ອີງຕາມສິ່ງທີ່ທ່ານໄດ້ອ່ານ, ທ່ານຈະບັນຍາຍວ່າ ສາດສະດາຄືໃຜ ແລະ ເພິ່ນເຮັດຫຍັງ? ໃຫ້ຄິດທີ່ຈະຂຽນຄຳນິຍາມສັ້ນໆ. ແລ້ວເບິ່ງວ່າ ທ່ານຈະຕື່ມຫຍັງໃສ່ຄຳນິຍາມຂອງທ່ານ ຫລັງຈາກການອ່ານຂໍ້ຄວາມກ່ຽວກັບ “ສາດສະດາ” ໃນຄູ່ມືພຣະຄຳພີ (ຫ້ອງສະໝຸດພຣະກິດຕິຄຸນ) ຫລື “Follow the Living Prophet” (Teachings of Presidents of the Church: Ezra Taft Benson [2014], 147–55).

ທ່ານໄດ້ສັງເກດບໍວ່າ ນີໄຟກ້າຫານຫລາຍຂະໜາດໃດໃນ ຮີລາມັນ 7:11–29? ເປັນຫຍັງທ່ານຈຶ່ງຮູ້ສຶກວ່າ ບາງຄັ້ງສາດສະດາຈຳເປັນຕ້ອງໄດ້ກ່າວຢ່າງກ້າຫານເໝືອນດັ່ງນີໄຟໄດ້ເຮັດ? ໃຫ້ຄິດທີ່ຈະຊອກຫາຄຳຕອບຢູ່ໃນພາກກ້ອງຫົວຂໍ້ “ບໍ່ຕ້ອງແປກໃຈ” ໃນຂ່າວສານຂອງແອວເດີ ນຽວ ແອວ ແອນເດີເຊັນ “The Prophet of God” (Liahona, May 2018, 26).

ດ້ວຍຄວາມຈິງທັງໝົດເຫລົ່ານີ້ຢູ່ໃນໃຈ, ໃຫ້ໄຕ່ຕອງວ່າພຣະຜູ້ເປັນເຈົ້າໄດ້ໃຫ້ພອນແກ່ທ່ານ ຜ່ານທາງການປະຕິບັດສາດສະໜາກິດຂອງສາດສະດາຂອງພຣະອົງແນວໃດ. ພຣະອົງໄດ້ສິດສອນທ່ານຫຍັງແດ່ເມື່ອບໍ່ດົນມານີ້ ຜ່ານທາງສາດສະດາທີ່ມີຊີວິດຢູ່ຂອງເຮົາ? ທ່ານກຳລັງເຮັດສິ່ງໃດໃນການຮັບຟັງ ແລະ ເຮັດຕາມການຊີ້ນຳຂອງພຣະຜູ້ເປັນເຈົ້າ?

ເບິ່ງ Gospel Topics, “Prophets,” ຫ້ອງສະໝຸດພຣະກິດຕິຄຸນ.

ຮີລາມັນ 9; 10:1, 12–15

ສັດທາຂອງເຮົາໃນພຣະເຢຊູຄຣິດຈະຕ້ອງຖືກສ້າງຂຶ້ນນອກເໜືອໄປກວ່າເຄື່ອງໝາຍ ແລະ ສິ່ງມະຫັດສະຈັນ.

ຖ້າຫາກເຄື່ອງໝາຍ ແລະ ສິ່ງມະຫັດສະຈັນແມ່ນພຽງພໍທີ່ຈະປ່ຽນໃຈຂອງບຸກຄົນ, ຊາວນີໄຟທຸກຄົນ ຄົງໄດ້ປ່ຽນໃຈເຫລື້ອມໃສ ໂດຍເຄື່ອງໝາຍທີ່ໜ້າອັດສະຈັນໃຈ ທີ່ນີໄຟໄດ້ມອບໃຫ້ ຢູ່ໃນ ຮີລາມັນ 9. ແຕ່ມັນບໍ່ໄດ້ເກີດຂຶ້ນ. ໃຫ້ສັງເກດເບິ່ງປະຕິກິລິຍາຕ່າງໆຂອງຜູ້ຄົນຕໍ່ການມະຫັດສະຈັນໃນ ຮີລາມັນ 9–10. ຍົກຕົວຢ່າງ, ທ່ານອາດປຽບທຽບການຕອບຮັບຂອງຜູ້ຊາຍຫ້າຄົນ ແລະ ຫົວໜ້າຜູ້ຕັດສິນໃນ ຮີລາມັນ 9:1–20 (ເບິ່ງ ຮີລາມັນ 9:39–41; 10:12–15 ນຳອີກ). ທ່ານຮຽນຮູ້ຫຍັງແດ່ຈາກປະສົບການເຫລົ່ານີ້ກ່ຽວກັບວິທີທີ່ຈະເສີມສ້າງສັດທາຂອງທ່ານໃນພຣະເຢຊູຄຣິດ?

ເບິ່ງ 3 ນີໄຟ 1:22; 2:1–2 ນຳອີກ.

ຮີລາມັນ 10:1–12

ພຣະຜູ້ເປັນເຈົ້າປະທານອຳນາດໃຫ້ຜູ້ຄົນທີ່ສະແຫວງຫາທີ່ຈະເຮັດຕາມພຣະປະສົງຂອງພຣະອົງ ແລະ ພະຍາຍາມຮັກສາພຣະບັນຍັດຂອງພຣະອົງ.

ຂະນະທີ່ທ່ານສຶກສາ ຮີລາມັນ 10:1–12, ໃຫ້ສັງເກດເບິ່ງສິ່ງທີ່ນີໄຟໄດ້ເຮັດ ເພື່ອຈະໄດ້ຮັບຄວາມໄວ້ວາງໃຈຈາກພຣະຜູ້ເປັນເຈົ້າ. ເພິ່ນໄດ້ສະແດງໃຫ້ເຫັນໃນວິທີໃດ ວ່າເພິ່ນໄດ້ສະແຫວງຫາທີ່ຈະເຮັດຕາມພຣະປະສົງຂອງພຣະຜູ້ເປັນເຈົ້າ ແທນທີ່ຈະເຮັດຕາມຄວາມປະສົງຂອງຕົວເອງ? ປະສົບການຂອງນີໄຟດົນໃຈທ່ານໃຫ້ເຮັດຫຍັງ?

ຮີລາມັນ 10:2–4

ການໄຕ່ຕອງກ່ຽວກັບພຣະຄຳຂອງພຣະເຈົ້າເຊື້ອເຊີນການເປີດເຜີຍ.

ເມື່ອທ່ານຮູ້ສຶກຖືກຢຽບຍ່ຳ, ກັງວົນ, ຫລື ສັບສົນ, ທ່ານສາມາດຮຽນຮູ້ບົດຮຽນທີ່ສຳຄັນ ຈາກຕົວຢ່າງຂອງນີໄຟ ຢູ່ໃນ ຮີລາມັນ 10:2–4. ເພິ່ນໄດ້ເຮັດຫຍັງ ເວລາເພິ່ນຮູ້ສຶກ “ເສົ້າສະຫລົດໃຈ”? (ຂໍ້ທີ 3).

ປະທານເຮັນຣີ ບີ ໄອຣິງ ໄດ້ອະທິບາຍວ່າ, “ເມື່ອເຮົາໄຕ່ຕອງ, ເຮົາຈະເຊື້ອເຊີນການເປີດເຜີຍໂດຍພຣະວິນຍານ” (“Serve with the Spirit,” Liahona, Nov. 2010, 60). ທ່ານຈະສ້າງນິໄສທີ່ມັກໄຕ່ຕອງໄດ້ແນວໃດ?

ຮີລາມັນ 12

ພຣະຜູ້ເປັນເຈົ້າປະສົງໃຫ້ເຮົາຈື່ຈຳພຣະອົງ.

ທ່ານຈື່ຈຳຂໍ້ມູນທີ່ສຳຄັນແນວໃດ—ດັ່ງເຊັ່ນ ວັນເກີດຂອງສະມາຊິກໃນຄອບຄົວ ຫລື ຂໍ້ມູນກ່ຽວກັບການສອບເສັງ? ສິ່ງນີ້ຄ້າຍຄືກັນກັບຄວາມພະຍາຍາມທີ່ຕ້ອງໃຊ້ເພື່ອ “ຈື່ຈຳພຣະຜູ້ເປັນເຈົ້າ” ແນວໃດ? (ຮີລາມັນ 12:5). ມັນແຕກຕ່າງແນວໃດ?

ຮີລາມັນ 12 ບັນຍາຍຫລາຍສິ່ງທີ່ເຮັດໃຫ້ຜູ້ຄົນລືມພຣະຜູ້ເປັນເຈົ້າ. ບາງທີທ່ານສາມາດຂຽນມັນລົງໄວ້ ແລະ ໄຕ່ຕອງວ່າສິ່ງເຫລົ່ານີ້ລົບກວນທ່ານຈາກການຈື່ຈຳພຣະອົງຫລືບໍ່. ສິ່ງໃດຊ່ວຍໃຫ້ທ່ານຈື່ຈຳພຣະເຢຊູຄຣິດ? ທ່ານໄດ້ຮັບການດົນໃຈໃຫ້ເຮັດສິ່ງໃດແດ່ ອີງຕາມສິ່ງທີ່ທ່ານໄດ້ຮຽນຮູ້?

ເບິ່ງ ຄຳສອນ ແລະ ພັນທະສັນຍາ 20:77, 79; “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5 ນຳອີກ.

ໃຊ້ບົດຮຽນທີ່ໃຊ້ສິ່ງຂອງ. ພຣະຜູ້ຊ່ວຍໃຫ້ລອດມັກຈະປຽບທຽບຫລັກທຳພຣະກິດຕິຄຸນໃສ່ກັບສິ່ງຕ່າງໆໃນຊີວິດປະຈຳວັນທີ່ຜູ້ຄົນຄຸ້ນເຄີຍ. ເມື່ອຮຽນຮູ້ ຫລື ສິດສອນກ່ຽວກັບ ຮີລາມັນ 12:1–6, ທ່ານສາມາດປຽບທຽບ “ຄວາມບໍ່ໜັກແໜ້ນ … ຂອງມະນຸດ” ກັບວິທີທີ່ເຮົາຮູ້ສຶກເມື່ອພະຍາຍາມຢືນກົງດ້ວຍຂາຂ້າງດຽວ. ເຮົາຈະມີຄວາມໜັກແໜ້ນທາງວິນຍານຢູ່ຄືເກົ່າໄດ້ແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຮີລາມັນ 7:20–21

ພຣະຜູ້ເປັນເຈົ້າປະສົງໃຫ້ເຮົາຈື່ຈຳພຣະອົງ.

ເພື່ອເລີ່ມຕົ້ນການສົນທະນາກ່ຽວກັບການຈື່ຈຳພຣະຜູ້ເປັນເຈົ້າ, ທ່ານສາມາດບອກລູກໆຂອງທ່ານ ກ່ຽວກັບເວລາທີ່ທ່ານໄດ້ລືມບາງຢ່າງ. ປ່ອຍໃຫ້ພວກເຂົາແບ່ງປັນປະສົບການຂອງຕົວເອງ. ແລ້ວພວກທ່ານສາມາດອ່ານ ຮີລາມັນ 7:20–21 ນຳກັນ ແລະ ຖາມລູກໆຂອງທ່ານວ່າ ການລືມພຣະເຈົ້າໝາຍຄວາມວ່າແນວໃດ. ບາງທີລູກໆຂອງທ່ານສາມາດແຕ້ມຮູບກ່ຽວກັບສິ່ງທີ່ເຮັດໃຫ້ເຮົາລືມພຣະຜູ້ເປັນເຈົ້າ ແລະ ໃຊ້ຮູບຂອງພວກເຂົາເພື່ອປິດຮູບພຣະເຢຊູໄວ້. ແລ້ວພວກເຂົາສາມາດຄິດເຖິງສິ່ງທີ່ພວກເຂົາສາມາດເຮັດເພື່ອຈື່ຈຳພຣະອົງ. ຂະນະທີ່ພວກເຂົາແບ່ງປັນຄວາມຄິດຂອງພວກເຂົາ, ພວກເຂົາສາມາດຈັບເອົາຮູບແຕ້ມອອກເທື່ອລະໃບ ຈົນກວ່າຈະເຫັນຮູບພຣະຜູ້ຊ່ວຍໃຫ້ລອດ.

ຮີລາມັນ 8:13–23

ສາດສະດາເປັນພະຍານເຖິງພຣະເຢຊູຄຣິດ.

ຊ່ວຍລູກໆຂອງທ່ານຄົ້ນຄວ້າ ຮີລາມັນ 8:13–23 ເພື່ອຊອກຫາຊື່ຂອງບັນດາສາດສະດາທີ່ໄດ້ສິດສອນກ່ຽວກັບພຣະເຢຊູຄຣິດ. ບາງທີພວກເຂົາສາມາດສົ່ງຕໍ່ຮູບພຣະເຢຊູທຸກເທື່ອທີ່ພວກເຂົາພົບເຫັນສາດສະດາທ່ານໜຶ່ງ. ສາດສະດາທີ່ມີຊີວິດຢູ່ຂອງເຮົາໄດ້ສິດສອນຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ?
ພວກທ່ານກໍສາມາດຮ້ອງເພງນຳກັນນຳອີກ ກ່ຽວກັບສາດສະດາ, ດັ່ງເຊັ່ນ “ເຮົາຂອບພຣະໄທສຳລັບສາດສະດາ” (ເພງສວດ ແລະ ເພງຂອງເດັກນ້ອຍ, 40). ບາງທີທ່ານ ແລະ ລູກໆຂອງທ່ານສາມາດເລືອກເອົາວະລີສຳຄັນບາງອັນຈາກເພງ ແລະ ຂຽນຄຳໜຶ່ງຈາກວະລີນັ້ນໃສ່ໃນເຈ້ຍຮອຍຕີນແຕ່ລະອັນ. ແລ້ວທ່ານສາມາດວາງຮອຍຕີນໄວ້ໃນພື້ນຫ້ອງ ທີ່ນຳພາໄປຫາຮູບພຣະຜູ້ຊ່ວຍໃຫ້ລອດ, ແລະ ລູກໆຂອງທ່ານສາມາດຍ່າງຕາມຮອຍຕີນໄປຫາຮູບ. ການຕິດຕາມສາດສະດານຳພາເຮົາໄປຫາພຣະເຢຊູຄຣິດແນວໃດ?

ຮີລາມັນ 10:1–4

ການໄຕ່ຕອງພຣະຄຳຂອງພຣະເຈົ້າເຊື້ອເຊີນການເປີດເຜີຍ.

ເພື່ອຊ່ວຍໃຫ້ລູກໆຂອງທ່ານເຂົ້າໃຈວ່າ ການໄຕ່ຕອງໝາຍຄວາມວ່າແນວໃດ, ພວກທ່ານສາມາດອ່ານ “ໄຕ່ຕອງ” ໃນຄູ່ມືພຣະຄຳພີ (ຫ້ອງສະໝຸດພຣະກິດຕິຄຸນ) ນຳກັນ. ມີຄຳໃດອີກແດ່ທີ່ຄ້າຍຄືກັນກັບຄຳວ່າ ໄຕ່ຕອງ? ບາງທີພວກທ່ານສາມາດອ່ານ ຮີລາມັນ 10:1–3 ນຳກັນ ແລະ ປ່ຽນຄຳວ່າ ໄຕ່ຕອງ ກັບຄຳເຫລົ່ານັ້ນ. ເວົ້າລົມກັບລູກໆຂອງທ່ານເຖິງວິທີທີ່ຈະເຮັດໃຫ້ການໄຕ່ຕອງເປັນພາກສ່ວນໜຶ່ງໃນການສຶກສາພຣະຄຳພີຂອງພວກເຂົາແນວໃດ.

ຮີລາມັນ 10:11–12

ເຮົາຈະເຊື່ອຟັງພຣະບິດາເທິງສະຫວັນ.

ນີໄຟໄດ້ເຊື່ອຟັງພຣະບິດາເທິງສະຫວັນ ແມ່ນແຕ່ເມື່ອມັນໝາຍເຖິງການເຮັດບາງສິ່ງທີ່ຍາກ. ສຳລັບຕົວຢ່າງເຖິງສິ່ງນີ້, ທ່ານ ແລະ ລູກໆຂອງທ່ານສາມາດອ່ານ ຮີລາມັນ 10:2, 11–12. ບາງທີລູກໆຂອງທ່ານສາມາດສະແດງຕາມສິ່ງທີ່ນີໄຟໄດ້ເຮັດ—ຍ່າງໄປຫາຟາກໜຶ່ງຂອງຫ້ອງ (ຄືກັບວ່າ ພວກເຂົາກຳລັງເມືອເຮືອນ), ຢຸດ, ຫັນຫລັງ, ແລະ ຍ່າງໄປຫາອີກຟາກໜຶ່ງຂອງຫ້ອງ (ຄືກັບວ່າ ພວກເຂົາກຳລັງກັບຄືນມາເພື່ອສິດສອນຜູ້ຄົນ). ມີສິ່ງໃດແດ່ທີ່ພຣະບິດາເທິງສະຫວັນປະສົງໃຫ້ເຮົາເຮັດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຜ່ານທາງຂອງປະທານແຫ່ງການທຳນາຍ, ນີໄຟໄດ້ແກ້ຄະດີການຄາດຕະກຳຂອງຫົວໜ້າຜູ້ຕັດສິນ.

ຮູບພາບ

ໜ້າກິດຈະກຳ: ພຣະຜູ້ເປັນເຈົ້າປະສົງໃຫ້ເຮົາລະນຶກເຖິງພຣະອົງ