“ວັນທີ 23–29 ເດືອນກັນຍາ: ‘ຈົ່ງລຸກຂຶ້ນ ແລະ ອອກມາຫາເຮົາເຖີດ.’ 3 ນີໄຟ 8–11,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 23–29 ເດືອນກັນຍາ. 3 ນີໄຟ 8–11,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

ຮູບພາບ

ພຣະເຢຊູກຳລັງປະກົດຕົວຕໍ່ຊາວນີໄຟ

I Am the Light of the World [ເຮົາເປັນຄວາມສະຫວ່າງຂອງໂລກ], ໂດຍ ເຈມສ໌ ຟູເມີ

ວັນທີ 23–29 ເດືອນກັນຍາ: “ຈົ່ງລຸກຂຶ້ນ ແລະ ອອກມາຫາເຮົາເຖີດ”

3 ນີໄຟ 8–11

“ຈົ່ງເບິ່ງ, ເຮົາຄືພຣະເຢຊູຄຣິດ, ຜູ້ທີ່ສາດສະດາໄດ້ໃຫ້ຖ້ອຍຄຳວ່າຈະມາຍັງໂລກນີ້” (3 ນີໄຟ 11:10). ດ້ວຍຖ້ອຍຄຳເຫລົ່ານີ້, ພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນໄດ້ແນະນຳພຣະອົງເອງ, ເຮັດໃຫ້ຄຳທຳນາຍຫລາຍກວ່າ 600 ປີ ຂອງພຣະຄຳພີມໍມອນເກີດເປັນຈິງ. “ການປະກົດນັ້ນ ແລະ ການປະກາດນັ້ນ,” ແອວເດີ ແຈັບຟະຣີ ອາ ຮໍແລນ ໄດ້ຂຽນ, “ໄດ້ກໍ່ຕັ້ງຈຸດສູນກາງ, ຊ່ວງເວລາທີ່ສຸດຍອດ, ໃນປະຫວັດສາດທັງໝົດຂອງພຣະຄຳພີມໍມອນ. ມັນເປັນການສະແດງໃຫ້ປະຈັກ ແລະ ເປັນຄຳສັ່ງທີ່ບອກໃຫ້ຮູ້ ແລະ ດົນໃຈສາດສະດາຊາວນີໄຟທຸກຄົນ. … ທຸກຄົນໄດ້ເວົ້າເຖິງພຣະອົງ, ໄດ້ຮ້ອງເພງກ່ຽວກັບພຣະອົງ, ໄດ້ຝັນເຖິງພຣະອົງ, ແລະ ໄດ້ອະທິຖານຂໍໃຫ້ພຣະອົງມາປະກົດ—ແຕ່ໃນທີ່ສຸດພຣະອົງກໍໄດ້ສະເດັດມາ. ວັນແຫ່ງການລໍຄອຍ! ພຣະເຈົ້າທີ່ປ່ຽນຄ່ຳຄືນທີ່ມືດມົວເປັນເຊົ້າແຫ່ງຄວາມສະຫວ່າງໄດ້ສະເດັດມາແລ້ວ” (Christ and the New Covenant [1997], 250–51).

ເບິ່ງ “Jesus Christ Appears in the Ancient Americas” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

3 ນີໄຟ 8–11

ພຣະເຢຊູຄຣິດເປັນຄວາມສະຫວ່າງຂອງໂລກ.

ທ່ານອາດສັງເກດເຫັນວ່າ ຫົວຂໍ້ນັ້ນກ່ຽວຂ້ອງກັບຄວາມມືດ ແລະ ຄວາມສະຫວ່າງ ຖືກກ່າວຊ້ຳຕະຫລອດທົ່ວ 3 ນີໄຟ 8–11. ທ່ານຮຽນຮູ້ຫຍັງແດ່ຈາກບົດເຫລົ່ານີ້ກ່ຽວກັບຄວາມມືດ ແລະ ຄວາມສະຫວ່າງທາງວິນຍານ? (ເບິ່ງ, ຍົກຕົວຢ່າງ, 3 ນີໄຟ 8:19–23; 9:18; 10:9–13). ແມ່ນຫຍັງທີ່ນຳຄວາມມືດມາສູ່ຊີວິດຂອງທ່ານ? ແມ່ນຫຍັງທີ່ນຳຄວາມສະຫວ່າງມາໃຫ້? ທ່ານຄິດວ່າເປັນຫຍັງພຣະຜູ້ຊ່ວຍໃຫ້ລອດຈຶ່ງແນະນຳພຣະອົງເອງວ່າ “ເປັນຄວາມສະຫວ່າງ ແລະ ເປັນຊີວິດຂອງໂລກ”? (3 ນີໄຟ 9:18; 11:11).

ເຫດການທີ່ບັນຍາຍຢູ່ໃນ 3 ນີໄຟ 9–11 ແມ່ນໜຶ່ງໃນເຫດການທີ່ສັກສິດທີ່ສຸດໃນພຣະຄຳພີມໍມອນ. ອ່ານມັນຢ່າງຊ້າໆ, ແລະ ໄຕ່ຕອງຢ່າງຖີ່ຖ້ວນ. ຕໍ່ໄປນີ້ແມ່ນບາງຄຳຖາມເພື່ອຊ່ວຍທ່ານ. ໃຫ້ຄິດທີ່ຈະບັນທຶກຄວາມປະທັບໃຈທີ່ມາສູ່ທ່ານ.

ເຮົາຈະຮູ້ສຶກແນວໃດຖ້າຫາກເຮົາເປັນຜູ້ໜຶ່ງໃນບັນດາຜູ້ຄົນເຫລົ່ານັ້ນ?
ແມ່ນຫຍັງທີ່ປະທັບໃຈເຮົາກ່ຽວກັບພຣະຜູ້ຊ່ວຍໃຫ້ລອດໃນບົດເຫລົ່ານີ້?
ເຮົາຮູ້ໄດ້ແນວໃດວ່າພຣະເຢຊູຄຣິດເປັນພຣະຜູ້ຊ່ວຍໃຫ້ລອດຂອງເຮົາ?
ພຣະອົງໄດ້ເປັນຄວາມສະຫວ່າງໃນຊີວິດຂອງເຮົາສະເໝີມາແນວໃດ?

ເບິ່ງ Sharon Eubank, “Christ: The Light That Shines in Darkness,” Liahona, May 2019, 73–76 ນຳອີກ.

ບັນທຶກຄວາມປະທັບໃຈ. ເມື່ອທ່ານຂຽນຄວາມປະທັບໃຈທາງວິນຍານທີ່ທ່ານໄດ້ຮັບລົງໄວ້, ສ່ວນຫລາຍແລ້ວທ່ານຈະໄດ້ຮັບຕື່ມອີກ.

3 ນີໄຟ 9–10

ພຣະເຢຊູຄຣິດກະຕືລືລົ້ນທີ່ຈະໃຫ້ອະໄພ.

ແອວເດີ ນຽວ ແອວ ແອນເດີເຊັນ ໄດ້ກ່າວວ່າ, “ຂ້າພະເຈົ້າເປັນພະຍານວ່າ ພຣະຜູ້ຊ່ວຍໃຫ້ລອດສາມາດ ແລະ ພ້ອມແລ້ວທີ່ຈະອະໄພບາບໃຫ້ເຮົາ” (“Repent … That I May Heal You,” Liahona, Nov. 2009, 40). ໃຫ້ຄົ້ນຄວ້າ 3 ນີໄຟ 9–10 ເພື່ອຊອກຫາຫລັກຖານເຖິງຄວາມວ່ອງໄວຂອງພຣະອົງທີ່ຈະໃຫ້ອະໄພ. ທ່ານພົບເຫັນຫຍັງແດ່ ຢູ່ໃນ 3 ນີໄຟ 9:13–22; 10:1–6 ທີ່ຊ່ວຍໃຫ້ທ່ານຮູ້ສຶກເຖິງຄວາມຮັກ ແລະ ຄວາມເມດຕາຂອງພຣະອົງ? ເມື່ອໃດທີ່ທ່ານຮູ້ສຶກວ່າພຣະອົງ “ເຕົ້າໂຮມ” ແລະ “ບຳລຸງລ້ຽງ” ທ່ານ? (ເບິ່ງ 3 ນີໄຟ 10:4).

3 ນີໄຟ 9:19–22

ພຣະຜູ້ເປັນເຈົ້າຮຽກຮ້ອງ “ຫົວໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ.”

ກ່ອນການສະເດັດມາຂອງພຣະຜູ້ຊ່ວຍໃຫ້ລອດ, ການຖວາຍສັດເປັນສັນຍາລັກຂອງການເສຍສະລະຂອງພຣະເຢຊູຄຣິດ (ເບິ່ງ ໂມເຊ 5:5–8). ແມ່ນຫຍັງຄືພຣະບັນຍັດຂໍ້ໃໝ່ທີ່ພຣະຜູ້ຊ່ວຍໃຫ້ລອດໄດ້ປະທານໃຫ້ໃນ 3 ນີໄຟ 9:20–22? ມັນຊີ້ບອກເຮົາໃຫ້ໄປຫາພຣະອົງ ແລະ ການເສຍສະລະຂອງພຣະອົງແນວໃດ?

ການເສຍສະລະດ້ວຍຫົວໃຈທີ່ຊອກຊ້ຳ ແລະ ວິນຍານທີ່ສຳນຶກຜິດໝາຍຄວາມວ່າແນວໃດ? ທ່ານຮູ້ສຶກວ່າເປັນຫຍັງພຣະຜູ້ຊ່ວຍໃຫ້ລອດຈຶ່ງຕ້ອງການການເສຍສະລະນີ້ຈາກທ່ານ?

3 ນີໄຟ 11:1–8

ຮູບພາບ
seminary icon
ເຮົາສາມາດຮຽນທີ່ຈະຮັບຟັງ ແລະ ເຂົ້າໃຈສຸລະສຽງຂອງພຣະເຈົ້າ.

ທ່ານຈະຮູ້ຈັກຕອນທີ່ພຣະເຈົ້າກ່າວກັບທ່ານໄດ້ແນວໃດ? ບາງທີປະສົບການຂອງຜູ້ຄົນ ຢູ່ໃນ 3 ນີໄຟ 11:1–8 ສາມາດຊ່ວຍໃຫ້ທ່ານເຂົ້າໃຈຫລັກທຳບາງຢ່າງຂອງເລື່ອງການຮັບຟັງ ແລະ ເຂົ້າໃຈສຸລະສຽງຂອງພຣະເຈົ້າ. ທ່ານຄວນສັງເກດເບິ່ງຈຸດພິເສດຂອງສຸລະສຽງຂອງພຣະເຈົ້າ ທີ່ຜູ້ຄົນໄດ້ຍິນ ແລະ ສິ່ງທີ່ພວກເຂົາໄດ້ເຮັດ ເພື່ອຈະໄດ້ເຂົ້າໃຈສຸລະສຽງໄດ້ດີກວ່າເກົ່າ.

ມັນອາດເປັນປະໂຫຍດທີ່ຈະຄົ້ນຄວ້າຂໍ້ພຣະຄຳພີອື່ນໆ ທີ່ບັນຍາຍກ່ຽວກັບສຸລະສຽງຂອງພຣະເຈົ້າ ຫລື ອິດທິພົນຂອງພຣະວິນຍານຂອງພຣະອົງ. ຕໍ່ໄປນີ້ແມ່ນຈຳນວນໜຶ່ງ. ບາງທີ, ຫລັງຈາກອ່ານຂໍ້ເຫລົ້ານີ້ແລ້ວ, ທ່ານສາມາດຂຽນແນວທາງຊີ້ນຳບາງຂໍ້ສຳລັບການຮັບຮູ້ການເປີດເຜີຍລົງໄວ້: 1 ກະສັດ 19:11–12; ຄາລາເຕຍ 5:22–23; ແອວມາ 32:27–28, 35; ຮີລາມັນ 10:2–4; ອີເທີ 4:11–12; ຄຳສອນ ແລະ ພັນທະສັນຍາ 9:7–9; 11:11–14.

ທ່ານກໍສາມາດໄດ້ຮັບຜົນປະໂຫຍດຈາກການໄດ້ຍິນຈາກສາດສະດາ, ອັກຄະສາວົກ, ແລະ ຜູ້ນຳຂອງສາດສະໜາຈັກຄົນອື່ນໆນຳອີກ ຜູ້ທີ່ເຄີຍປະສົບກັບການໄດ້ຍິນ ແລະ ການເຮັດຕາມສຸລະສຽງຂອງພຣະເຈົ້າ. ຫລາຍທ່ານໄດ້ແບ່ງປັນປະສົບການຂອງພວກເພິ່ນຢູ່ໃນບ່ອນເກັບກຳວິດີໂອ “Hear Him!” ໃນຫ້ອງສະໝຸດພຣະກິດຕິຄຸນ. ໃຫ້ຄິດທີ່ຈະເບິ່ງເລື່ອງໜຶ່ງ ຫລື ຫລາຍກວ່ານັ້ນ.

ທ່ານຈະນຳໃຊ້ສິ່ງທີ່ທ່ານໄດ້ຮຽນຮູ້ ເພື່ອຟັງ ແລະ ຮັບຮູ້ສຸລະສຽງຂອງພຣະເຈົ້າຢ່າງແຈ່ມແຈ້ງຫລາຍຂຶ້ນໄດ້ແນວໃດ?

ເບິ່ງ Russell M. Nelson, “Hear Him,” Liahona, May 2020, 88–92; “ເຮົາຮ້ອງສັນເສີນນາມເຢຊູເຈົ້າ,” ເພງສວດ ແລະ ເພງຂອງເດັກນ້ອຍ, 27; Gospel Topics, “Personal Revelation,” ຫ້ອງສະໝຸດພຣະກິດຕິຄຸນ ນຳອີກ.

3 ນີໄຟ 11:8–17

ພຣະເຢຊູຄຣິດເຊື້ອເຊີນເຮົາໃຫ້ມີປະຈັກພະຍານສ່ວນຕົວເຖິງພຣະອົງ.

ປະມານ 2,500 ຄົນໄດ້ເຕົ້າໂຮມກັນຢູ່ທີ່ພຣະວິຫານໃນເມືອງອຸດົມສົມບູນ ຕອນພຣະເຢຊູຄຣິດໄດ້ມາປະກົດຕົວ (ເບິ່ງ 3 ນີໄຟ 17:25). ເຖິງແມ່ນມີຜູ້ຄົນຢ່າງຫລວງຫລາຍ, ແຕ່ພຣະຜູ້ຊ່ວຍໃຫ້ລອດໄດ້ເຊື້ອເຊີນໃຫ້ແຕ່ລະຄົນມາສຳຜັດຮອຍຕະປູຢູ່ທີ່ພຣະຫັດ ແລະ ພຣະບາດຂອງພຣະອົງ “ເທື່ອລະຄົນ” (3 ນີໄຟ 11:14–15). ຂະນະທີ່ທ່ານອ່ານ, ໃຫ້ຈິນຕະນາການວ່າ ຈະເປັນແນວໃດຖ້າທ່ານໄດ້ຢູ່ທີ່ນັ້ນ. ໃນທາງໃດແດ່ທີ່ພຣະຜູ້ຊ່ວຍໃຫ້ລອດກຳລັງເຊື້ອເຊີນທ່ານໃຫ້ “ລຸກຂຶ້ນ ແລະ ອອກມາຫາ” ພຣະອົງ? (3 ນີໄຟ 11:14).

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ເພາະວັນອາທິດນີ້ເປັນວັນອາທິດທີຫ້າຂອງເດືອນ, ຄູສອນປະຖົມໄວຖືກຊຸກຍູ້ໃຫ້ນຳໃຊ້ກິດຈະກຳການຮຽນຮູ້ທີ່ຢູ່ໃນ “ພາກຫ້ອຍທ້າຍ ຂ: ການກະກຽມເດັກນ້ອຍໃຫ້ຢູ່ໃນເສັ້ນທາງແຫ່ງພັນທະສັນຍາຂອງພຣະເຈົ້າໄປຕະຫລອດຊີວິດ.”

3 ນີໄຟ 8–9

ເມື່ອເຮົາຢູ່ໃນຄວາມມືດ, ພຣະເຢຊູຄຣິດສາມາດເປັນແສງສະຫວ່າງໃຫ້ເຮົາ.

ເພື່ອຊ່ວຍໃຫ້ລູກໆຂອງທ່ານຮູ້ສຶກເຖິງປະສົບການທີ່ບັນຍາຍ ຢູ່ໃນ 3 ນີໄຟ 8–9, ທ່ານສາມາດເລົ່າລຶ້ມຄືນ ຫລື ຟັງການບັນທຶກບາງພາກສ່ວນຂອງບົດເຫລົ່ານີ້ ຢູ່ໃນຫ້ອງມືດ. ສົນທະນາກ່ຽວກັບວ່າ ມັນຊິເປັນຈັ່ງໃດ ຖ້າຫາກໄດ້ຢູ່ໃນຄວາມມືດເຖິງສາມວັນ. ແລ້ວພວກທ່ານສາມາດເວົ້າລົມກັນກ່ຽວກັບວ່າ ເປັນຫຍັງພຣະເຢຊູຄຣິດຈຶ່ງເອີ້ນພຣະອົງເອງວ່າ “ຄວາມສະຫວ່າງຂອງໂລກ (ເບິ່ງ 3 ນີໄຟ 9:18). ພຣະເຢຊູໄດ້ເຊື້ອເຊີນຜູ້ຄົນ, ແລະ ເຮົາ, ໃຫ້ເຮັດຫຍັງ ເພື່ອວ່າພຣະອົງຈະໄດ້ເປັນແສງສະຫວ່າງໃຫ້ແກ່ເຮົາ? (ເບິ່ງ 3 ນີໄຟ 9:20–22).

3 ນີໄຟ 10:4–6

ພຣະເຢຊູປົກປ້ອງຜູ້ຄົນຂອງພຣະອົງຄືກັນກັບແມ່ໄກ່ປົກປ້ອງລູກຂອງມັນ.

ການວາດພາບເຫັນແມ່ໄກ່ເຕົ້າໂຮມລູກຂອງມັນ ສາມາດເປັນເຄື່ອງມືສິດສອນທີ່ມີພະລັງ ເພື່ອຊ່ວຍໃຫ້ເດັກນ້ອຍເຂົ້າໃຈລັກສະນະ ແລະ ພາລະກິດຂອງພຣະຜູ້ຊ່ວຍໃຫ້ລອດ. ທ່ານສາມາດອ່ານ 3 ນີໄຟ 10:4–6 ຂະນະທີ່ຄອບຄົວຂອງທ່ານເບິ່ງຮູບແມ່ໄກ່ ແລະ ລູກຂອງມັນ. ເປັນຫຍັງແມ່ໄກ່ຈຶ່ງຈຳເປັນຕ້ອງເຕົ້າໂຮມລູກຂອງມັນ? ເປັນຫຍັງພຣະຜູ້ຊ່ວຍໃຫ້ລອດຈຶ່ງປະສົງທີ່ຈະເຕົ້າໂຮມເຮົາໃຫ້ຢູ່ໃກ້ພຣະອົງ? ເຮົາມາຫາພຣະອົງເພື່ອຄວາມປອດໄພແນວໃດ?

3 ນີໄຟ 11:1–15

ພຣະເຢຊູຄຣິດເຊື້ອເຊີນເຮົາໃຫ້ມາຫາພຣະອົງ.

ທ່ານຈະຊ່ວຍໃຫ້ລູກໆຂອງທ່ານຮູ້ສຶກເຖິງພຣະວິນຍານຂະນະທີ່ທ່ານອ່ານ 3 ນີໄຟ 11:1–15 ນຳກັນໄດ້ແນວໃດ? ບາງທີທ່ານສາມາດຂໍໃຫ້ພວກເຂົາບອກທ່ານເຖິງຕອນທີ່ພວກເຂົາພົບເຫັນບາງຢ່າງຢູ່ໃນຂໍ້ເຫລົ່ານີ້ ທີ່ຊ່ວຍໃຫ້ພວກເຂົາຮູ້ສຶກເຖິງຄວາມຮັກຂອງພຣະເຈົ້າ. ທ່ານສາມາດເຮັດເຊັ່ນດຽວກັນ ກັບຮູບຢູ່ໃນໂຄງຮ່າງນີ້ ຫລື ວິດີໂອ “Jesus Christ Appears at the Temple” (ຫ້ອງສະໝຸດພຣະກິດຕິຄຸນ). ບອກລູກໆຂອງທ່ານວ່າທ່ານຮູ້ສຶກແນວໃດ ເມື່ອທ່ານອ່ານ ແລະ ໄຕ່ຕອງກ່ຽວກັບເຫດການເຫລົ່ານີ້. ປ່ອຍໃຫ້ພວກເຂົາແບ່ງປັນຄວາມຮູ້ສຶກຂອງພວກເຂົາຄືກັນ.

3 ນີໄຟ 11:1–8

ພຣະເຈົ້າກ່າວກັບເຮົາໃນສຸລະສຽງທີ່ແຜ່ວເບົາ.

ບາງທີທ່ານສາມາດອ່ານບາງຂໍ້ເຫລົ່ານີ້ ດ້ວຍ, “ສຽງ [ແຜ່ວ] ເບົາ” (3 ນີໄຟ 11:3). ຫລື ທ່ານສາມາດເປີດເພງເຊັ່ນ “This Is My Beloved Son” (Children’s Songbook, 76) ຄ່ອຍໆ ຈົນມັນຍາກທີ່ຈະໄດ້ຍິນ. ຜູ້ຄົນຕ້ອງເຮັດສິ່ງໃດ ເພື່ອຈະເຂົ້າໃຈສຸລະສຽງຈາກສະຫວັນ? (ເບິ່ງ ຂໍ້ທີ 5–7). ເຮົາຮຽນຮູ້ຫຍັງແດ່ຈາກປະສົບການຂອງພວກເຂົາ?

3 ນີໄຟ 11:21–26

ພຣະເຢຊູຄຣິດຢາກໃຫ້ເຮົາຮັບບັບຕິສະມາ.

ຂະນະທີ່ທ່ານອ່ານ 3 ນີໄຟ 11:21–26, ທ່ານສາມາດເຊື້ອເຊີນລູກໆຂອງທ່ານໃຫ້ຢືນຂຶ້ນ ທຸກຄັ້ງທີ່ພວກເຂົາໄດ້ຍິນຄຳວ່າ ບັບຕິສະມາ. ພຣະເຢຊູສິດສອນຫຍັງແດ່ກ່ຽວກັບການບັບຕິສະມາ? ຖ້າວ່າລູກໆຂອງທ່ານເຄີຍໄດ້ເຫັນການບັບຕິສະມາ, ຂໍໃຫ້ພວກເຂົາບັນຍາຍສິ່ງທີ່ພວກເຂົາໄດ້ເຫັນ. ເປັນຫຍັງພຣະເຢຊູຈຶ່ງຢາກໃຫ້ເຮົາຮັບບັບຕິສະມາ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

One Shepherd [ຜູ້ລ້ຽງແຕ່ພຽງຜູ້ດຽວ], ໂດຍ ຮາວເວີດ ລີອອນ

ຮູບພາບ

ໜ້າກິດຈະກຳ: ພຣະເຢຊູເຊື້ອເຊີນເຮົາໃຫ້ມາຫາພຣະອົງ