Mamona 1–6

E oo atu i le taimi sa na o le 10 ona tausaga, sa matuai ese lava Mamona mai tagata sa siomia o ia. A o e faitauina le Mamona 1–6, vaavaai mo auala na tulaga ese ai le faatuatua o Mamona ia Iesu Keriso ma tuuina atu ai ia te ia ni avanoa e auauna atu ai ma faamanuia isi. E mafai ona e amata i fuaiupu nei:

Mamona 1:2–3, 13–17.O a ni eseesega ua e matauina i le va o Mamona ma lona nuu? O a ni ona uiga auaumama na fesoasoani ia te ia e tumau malosi ai faaleagaga i se taimi faigata tele?

Mamona 2:18–19.O a upu na faaaoga e Mamona e faamatala ai le lalolagi sa ia ola ai? Na faapefea ona ia faatumauina le faamoemoe e ui i lona siosiomaga?

Mamona 3:12.O a ni lagona o Mamona e uiga i tagata na siomia o ia? O a ni mea e mafai ona e faia e atiinae ai le ituaiga alofa sa ia te ia?

O a isi fuaiupu i le Mamona 1–6 o loo faamamafa mai ai le faatuatua o Mamona ia Iesu Keriso? O a ni avanoa na tuuina atu ia te ia ona sa ia filifili e tumau faamaoni?

Mafaufau e suesue i le savali a Peresitene Thomas S. Monson “Avea ma se Faataitaiga ma se Malamalama” (Liahona, Nov. 2015, 86–88), ma vaavaai mo mafuaaga e taua ai mo soo o Iesu Keriso ona tu matila mai pe ese foi. E faapefea ona e faaumaina fuaiupu faapenei? “ sa avea ma se faataitaiga ia te au ina ua ia . Sa fesoasoani lenei mea ou te manao ai e .”

Atonu na lagona e Mamona o lana faataitaiga e lei faia ai se eseesega i lona nuu. Afai e i ai sou avanoa e talanoa ai ia Mamona, o le a se mea e te ta’u atu ia te ia e uiga i le ala na faia ai e lana faataitaiga se eseesega mo oe?

Tagai foi David A. Bednar, “Quick to Observe,” Ensign, Tes. 2006, 30–36, po o le Liahona, Tes. 2006, 14–20; “Something Different about Us: Example” (vitio), Gospel Library; Autu o le Talalelei, “Ola i le Talalelei a Iesu Keriso,” Potutusi o le Talalelei.

Ata

O sa Nifae ma sa Lamana o loo fetaua’i

Ina ua vaai Mamona i le faanoanoa o lona nuu, sa faamoemoe o ia o le a latou salamo. Ae “o lo latou faanoanoa sa le tupu mai i le salamo” (Mamona 2:13)—sa le o se tiga faaleatua ae o le tiga faalelalolagi. Ina ia malamalama i le eseesega, mafaufau e tusifaamaumau mea ua e aoaoina mai le Mamona 2:10–15 i se siata faapenei:

E faapefea ona e iloa pe o lou faanoanoa e faaleatua pe faalelalolagi? Afai o loo e oo i le faanoanoa faalelalolagi, e mafai faapefea ona e suia i le faanoanoa i la le atua?

Tagai foi 2 Korinito 7:8–11; Michelle D. Craig, “Lē Faamalieina Faaleagaga,” Liahona, Nov. 2018, 52–55.

Na matauina e Mamona faapea e lei faailoaina e sa Nifae ia auala na faamanuiaina ai i latou e le Alii. A o e faitau i le Mamona 3:3, 9, atonu e te mafaufau loloto i auala o loo e faailoaina ai faatosinaga a le Atua i lou olaga. O a faamanuiaga e oo mai pe a e faailoa atu Ana faatosinaga? O a taunuuga o le le faailoaina o Ia? (tagai Mamona 2:26; Mataupu Faavae ma Feagaiga 59:21).

Tagai Henry B. Eyring, “E! Ia Manatua, Ia Manatua Lava,” Liahona, Nov. 2007, 66–69.

Afai e i ai se taimi e te lagona ai le lotovaivai e uiga i au lava agasala, o le faamatalaga a Mamona e uiga i le Faaola o loo tu “ma aao faaloaloa mai e talia oe” e mafai ona maua ai le faamautinoaga. A o e faitauina le Mamona 5:8–24 ma le 6:16–22, o le a se mea ua e aoaoina e uiga i lagona o le Tama Faalelagi ma Iesu ia te oe, e tusa lava pe e te agasala? Na faapefea ona e lagonaina le aapa mai o Iesu Keriso ia te oe ma aao faaloaloa? O le a se mea ua musuia oe e fai o se taunuuga [o lena mea]?

Tagai foi “O Mai ia Iesu,” Viiga, nu. 65.

• Ona sa fai si laitiiti o Mamona ina ua ia atiina ae lona faatuatua ia Keriso, e mafai ona avea o ia ma se uunaiga i lau fanau. Atonu e te faitauina le Mamona 1:1–3 ma e mafai e lau fanau ona faalogo pe o le a le matua o Mamona ina ua tuuina atu e Amorona ia te ia se misiona faapitoa. E mafai foi ona e fesoasoani ia i latou e saili i nei fuaiupu ia uiga na vaai i ai Amorona ia Mamona. E mafai faapefea e nei uiga ona fesoasoani ia i tatou e mulimuli ai ia Iesu Keriso?

  Ata

  O Mamona a o tamaitiiti

• Ona sa mulimuli Mamona ia Iesu Keriso, sa tuuina atu ai ia te ia ni avanoa e auauna atu ai ma faamanuia ai isi. E mafai ona e valaaulia lau fanau e faitau se tasi pe sili atu o fuaitau nei ma fesoasoani ia i latou e faasoa mai mea ua latou aoaoina e uiga ia Mamona: Mamona 1:1–3; 2:1, 23–24; ma le 3:1–3, 12, 20–22 (tagai foi “Mataupu 49: Mamona ma Ana Aoaoga,” Tala o le Tusi a Mamona, 138–42). Na faapefea ona ia mulimuli ia Iesu Keriso? Na faapefea ona fesoasoani pe faamanuia isi i lona faatuatua ia Iesu Keriso? E mafai faapefea e lo tatou faatuatua ona fesoasoani i tagata tatou te iloa?

• Atonu e mafai ona e faia se siata e pei o lea o loo i le “Manatu mo le Aoaoina i le Aiga ma i le Ekalesia” e fesoasoani ai i lau fanau ia malamalama i le eseesega i le va o le faanoanoa faalelalolagi ma i la le Atua a o latou faitauina le Mamona 2:8, 10–15. Ona mafai lea ona latou suesue foi le Mamona 2:12 e sue ai mafuaaga e tatau ai ona faia e le salamo ia “olioli … [o tatou] loto.” E faapefea ona tatou mautinoa o le faanoanoa tatou te lagona mo a tatou agasala e taitai atu ai i tatou ia suia?

• O le valaauliaina o lau fanau e lisi (pe tusi ni ata o) nisi o mea latou te faafetai ai atonu o se auala lelei lea e fesoasoani ai ia latou lagona le lotofaafetai mo le Atua. A uma ona latou faia se lisi, e mafai ona e faitauina le Mamona 3:3, 9 ma faamalamalama atu na faamanuiaina foi e le Tama Faalelagi ia sa Nifae, ae latou te lei iloaina. O le a se mea e mafai ona tatou faia e faaali atu ai ua tatou faafetai i le Tama Faalelagi mo o tatou faamanuiaga?

• E ui lava ina amioleaga sa Nifae, ae sa lei taofia lava le alofa o Mamona ia i latou. Fesoasoani i lau fanau e sue upu “alofaina” ma le “alofa” i le Mamona 3:12. E mafai foi ona outou usu faatasi se pese e faatatau i le alofa i isi, e pei o le “Fetalai Mai Iesu e Alofa i Tagata Uma” (Tusipese a Tamaiti, 39), aʻo faʻaalia ata o tamaiti mai le salafa o le lalolagi. Molimau atu i le alofa o le Atua mo Ana fanau uma.