Mamona 7–9

Ina ua uma ona otootoina faamaumauga a lona nuu, sa tuuina atu e Mamona lana savali faaiu i le Mamona 7. Aisea e te manatu ai na ia filifilia lenei savali? O le a le uiga ia te oe o le “opogi le talalelei a Keriso? (Mamona 7:8).

Tagai foi “Ou Te Talitonu ia Iesu,” Viiga, nu.71

Na fesili mai Peresitene Russell M. Nelson: “Afai e ofo atu ia te oe ni taimane po o ni penina po o le Tusi a Mamona, o le a le mea e te filifilia? Ma le faamaoni, o le a le mea e sili atu lona taua ia te oe?” (“O Le Tusi a Mamona: Faamata e Faape’i Lou Olaga e aunoa ma Ia?,” Liahona, Nov. 2017, 61).

O le a se mea e te maua i le Mamona 7:8–10; 8:12–22; ma le 9:31–37 e fesoasoani e te malamalama ai pe aisea e taua ai le Tusi a Mamona i o tatou aso? Aisea e taua tele ai ia te oe? Atonu e te maua ni malamalamaaga faaopoopo i le 1 Nifae 13:38–41; 2 Nifae 3:11–12; ma le Mataupu Faavae ma Feagaiga 33:16; 42:12–13.

Ata

o kopi o le Tusi a Mamona i gagana eseese

E i ai taimi atonu e te lagona ai le tuuatoatasi i au taumafaiga e tausi poloaiga. O le a se mea e mafai ona e aoao mai le faataitaiga a Moronae e mafai ona fesoasoani? (tagai Mamona 8:1–11). Afai e mafai ona e fesili atu ia Moronae pe na faapefea ona ia tumau i le faamaoni, o le a sou manatu o le a sana tala?

Tagai foi “All May Know the Truth: Moroni’s Promise” (vitio), Gospel Library.

Sa faaali atu e Iesu Keriso ia Moronae le mea o le a tupu pe a oo mai le Tusi a Mamona (tagai Mamona 8:34–35), lea na taitaia o ia ina ia tuuina mai ni lapataiga malolosi mo o tatou aso. A o e faitauina le Mamona 8:26–41 ma le 9:1–30, mafaufau loloto pe faapefea ona faatatau ana upu ia te oe. Mo se faataitaiga, i nei fuaiupu ua fai atu ai e Moronae fesili e 24. O le a se faamaoniga o e vaaia i nei fesili e faapea na vaai Moronae i o tatou aso? E mafai faapefea ona fesoasoani le Tusi a Mamona i luitau na valoia e Moronae?

Na faaiuina e Moronae tusitusiga a lona tamā i se savali mamana mo tagata i o tatou aso o e e le talitonu i vavega (tagai Mamona 8:26; 9:1, 10–11). Aisea e te lagona ai le manaomia o se talitonuga i vavega i aso nei? Suesue i le Mamona 9:9–11, 15–27 ma le Moronae 7:27–29 ma mafaufau loloto i fesili e pei o:

• O a ni mea ua ou aoaoina e uiga i le Faaola mai nei fuaiupu?

• O le a se mea ua ou aoaoina e uiga i vavega, ua tuanai ma le taimi nei?

• O a faamanuiaga o le talitonu o Iesu Keriso o se Atua o vavega? O a taunuuga o le le talitonu i lenei mea?

• O a vavega—tetele ma laiti—na galue ai le Faaola i lo’u olaga? O a ni mea ua aoao ai a’u e nei vavega e uiga ia te Ia?

Na saunoa mai Peresitene Russell M. Nelson: “O lo tatou Faaola ma le Togiola, o Iesu Keriso, o le a faatinoina nisi o Ana galuega mamana i le va o le taimi nei ma le taimi e toe afio mai ai o Ia. O le a tatou vaai i faailoga faavavega o le pulefaamalumalu ai o le Atua le Tama ma Lona Alo, o Iesu Keriso i luga o lenei Ekalesia i le mamalu ma le viiga” (“Faaaliga mo le Ekalesia, Faaaliga mo o Tatou Olaga,” Liahona, Me 2018, 96). O le a sou manatu o a nisi o nei vavega? O le a se mea e mafai ona e faia e fesoasoani ai i le Faaola e faataunuu ai?

O le a se mea ua e aoaoina e uiga i le faatuatua ma vavega mai aafiaga o le Au Paia i Samoa, Toga, Fiti, ma Tahiti ina ua asiasi atu Peresitene ma Sister Nelson ia i latou? (tagai Russell M. Nelson, “Ua Toetu Keriso; O Le Faatuatua ia te Ia o le a Aveesea ai Mauga,” Liahona, Me 2021, 101–4).

Tagai foi Ronald A. Rasband, “Faauta! O A’u o se Atua o Vavega,” Liahona, Me 2021, 109–12; Autu o le Talalelei, “Vavega,” Potutusi o le Talalelei.

• Ina ia faamamafa atu le sootaga i le va o le Tusi Paia ma le Tusi a Mamona, e pei ona faia e Moronae, e mafai ona e faia se taaloga faapenei ma lau fanau: Fai atu ia i latou e fai mai “Feagaiga Tuai, Feagaiga Fou” pe a e uuina i luga se kopi o le Tusi Paia ma le “O Se Tasi Molimau” pe a e uuina i luga se kopi o le Tusi a Mamona. E mafai foi ona e filifilia ni nai mea na tutupu o loo molimau mai ai le Tusi Paia ma le Tusi a Mamona—e pei o le soifua mai, maliu, ma le Toetu o Iesu—ma valaaulia lau fanau e sue ni ata o nei mea na tutupu (mo se faataitaiga, i le Tusi Ata o le Talalelei).

• Ina ia fesoasoani i lau fanau e aoao le mataupu faavae o le faatuatua lona valu, e mafai ona e tusia upu taitasi i ni fasipepa eseese. Valaaulia lau fanau e galulue faatasi e tuu upu i le faasologa sa’o ma toe fai mo ni nai taimi.

• O le faataitaiga a Moronae e mafai ona musuia ai lau fanau e usitai i poloaiga a le Atua tusa lava pe latou te lagonaina le tuuatoatasi. A uma ona e faitauina faatasi ma i latou le Mamona 8:1–7 e mafai ona latou faasoa atu o latou lagona pe ana faapea o i latou o Moronae. I fuaiupu 1, 3, ma le 4, o le a le mea na poloaiina Moronae e fai, ma na faapefea ona ia usitai? E faapefea ona avea atili i tatou faapei o Moronae?

• Atonu e mafai e oe ma lau fanau ona talanoa e uiga i tulaga e tatau ona latou filifili ai i le va o le sa’o ma le sese pe a leai se tasi o tilotilo mai. E faapefea e le i ai o le faatuatua ia Iesu Keriso ona fesoasoani ia i tatou i nei tulaga? O se pese e pei o le “Tu mo le Mea Tonu” (Tusipese a Tamaiti, 81) e mafai ona faaopoopo i lenei talanoaga.

• Atonu e te manao e faamalamalama atu i lau fanau o se vavega o se mea e faia e le Atua e faaalia ai Lona mana ma faamanuia ai o tatou olaga. Ona mafai lea ona e faitau fasifuaitau mai le Mamona 9:11–13, 17 o loo faamatala ai nisi o vavega a le Atua, ma e mafai e lau fanau ona mafaufau i isi vavega (ata mai le Tusi Ata o le Talalelei, e pei o le nu.26, 40, 41, ma le83, e mafai ona fesoasoani). Talanoa e uiga i vavega na faia e le Atua i lou olaga.

• Faaali atu i lau fanau se fua o se kuka, ma talanoa e uiga i le mea o le a tupu pe afai e galo se mea taua. Faitau faatasi le Mamona 8:24 ma le 9:20–21 e sue ai “mea e manaomia” e mafai ona taitai atu ai i vavega mai le Atua.