E ui e moni o ala a le Atua e maualuluga atu nai lo o tatou ala, ma e tatau ona tatou gauai atu e le aunoa i Lona finagalo, ae ua Ia faamalosiauina foi i tatou e mafaufau ma galulue mo i tatou lava. O se tasi lena o lesona na aoaoina e Iareto ma lona uso. Mo se faataitaiga, o le manatu e malaga atu i se laueleele fou lea sa “silisili ona lelei i luga o le lalolagi atoa” sa foliga mai na amataina ia Iareto, ma na taliaina e le Alii le talosaga i le fetalai atu i le uso o Iareto “O le a faapea ona ou faia ia te oe ona o lenei taimi umi ua e tagi mai ai ia te au” (tagai Eteru 1:38–43). Ma ina ua iloa e le uso o Iareto le matuai pogisa o totonu o vaa o le a aveina atu i latou i le nuu folafolaina, sa fesiligia o ia e le Alii i se fesili lea e masani ona tatou fai atu ia te Ia: “O le a se mea tou te mananao ia ou faia?” (Eteru 2:23). E finagalo o Ia e faafofoga mai i o tatou mafaufauga ma manatu, ma o le a Ia faafofoga mai ma tuu mai Lana faamautinoaga pe fautuaina i tatou i se isi mea. O nisi taimi, e pau lava le mea o loo vavaeeseina ai i tatou mai faamanuiaga tatou te sailia, o lo tatou lava “veli o le le talitonu,” ma afai e mafai ona tatou “saeia lena veli” (Eteru 4:15), atonu o le a faateia i tatou i mea ua naunau le Alii e faia mo i tatou.
Tagai foi “The Lord Appears to the Brother of Jared” (vitio), Gospel Library.
Pe a ou tagi atu i le Alii, o le a Ia agalelei mai ia te a’u.
O leEteru 1:33–43 o loo faamatala ai ni tatalo se tolu a le uso o Iareto. O le a se mea ua e aoaoina mai le tali a le Alii i tatalo taitasi? Mafaufau i se taimi na e maua ai le agalelei o le Alii ao e tagi atu ia te Ia i le tatalo. Atonu e te manao e tusifaamaumau lenei aafiaga ma faasoa atu i se tasi o ono manaomia ona faalogo i lau molimau.
Na saunoa Peresitene Russell M. Nelson: “Ou te aioi atu ia te outou ia faateleina lo outou gafatia faaleagaga e maua ai faaaliga. … Filifili e fai le galuega faaleagaga e manaomia e olioli ai i le meaalofa o le Agaga Paia ma faalogo soo atu ma le manino atili i le siufofoga o le Agaga” (“Faaaliga mo le Ekalesia, Faaaliga mo o Tatou Olaga,” Liahona, Me 2018, 96).
A o e suesueina le Eteru 2; 3:1–6; 4:7–15, o le a se mea ua e aoaoina e uiga i “le galuega faaleagaga” na saunoa i ai Peresitene Nelson? E mafai ona e faailogaina i se lanu se tasi ia fesili po o atugaluga sa i ai a le uso o Iareto, ma mea na ia faia i ai, ae i se isi lanu e mafai ona e faailogaina ai le ala na fesoasoani ai le Alii ia te ia ma faailoa mai i ai Lona finagalo.
O nisi nei o fesili e te mafaufau loloto i ai ao e suesue:
O le a se mea ua faagaeetia ai oe e uiga i le ala na tali atu ai le Alii i fesili a le uso o Iareto i le Eteru 2:18–25?
E mafai faapefea ona e faaaogaina le Eteru 3:1–5 e fesoasoani ai i se tasi o loo aoao pe faapefea ona tatalo?
O le a se mea e ono taofia ai oe mai le mauaina o faaaliga mai le Alii? (tagai Eteru 4:8–10). E mafai faapefea ona e maua soo faaaliga mai ia te Ia? (tagai Eteru 4:7, 11–15).
O le a sou manatu i le uiga o le “saeia [le] veli o le le talitonu” i lou olaga” (Eteru 4:15).
O le a se isi mea ua e aoaoina mai le uso o Iareto e uiga i faaaliga faaletagata lava ia?
Na aoao mai Elder Dale G. Renlund i le “O Se Taiala mo Faaaliga Faaletagata Lava Ia” (Liahona, Nov. 2022, 16–19). Mafaufau e tusi se ata ma tusi ia elemene e fa o le taiala i itu taitasi. E mafai faapefea e lenei taiala ona fesoasoani ia te oe e “faateleina lou gafatia e maua ai faaaliga”?
Tagai foi Gospel Topics, “Personal Revelation,” Gospel Library.
E ala mai i Lana aoaiga, ua valaaulia a’u e le Alii ia salamo ma sau ia te Ia.
E oo lava i se perofeta e sili e pei o le uso o Iareto na manaomia le aoaiina e le Alii. O le a se mea ua e aoao mai le Eteru 2:14–15 e uiga i le aoaiga a le Alii? Mafaufau i le ala o le aoaiga a le Alii ma le tali atu a le uso o Iareto atonu na mafai ona fesoasoani e saunia ai o ia mo le aafiaga na ia oo i ai i le Eteru 3:1-20.
O le a saunia a’u e le Alii ia sopoia lo’u “moana tele.”
O nisi taimi, o le sopoia o le “moana tele” ua na o le pau lea o le ala e faataunuu ai le finagalo o le Atua mo i tatou. O e vaaia ni mea e talitutusa ai ma lou olaga i le Eteru 2:16–25? O faapefea ona saunia oe e le Alii mo ou luitau? O le a se mea o fetalai mai o Ia e te faia i le taimi nei e saunia ai mo le mea o loo Ia manaomia ona e faia i le lumanai?
Ia faaaoga mea e te aoaoina. O le suesueina o le talalelei e tatau ona musuia ai i tatou e suia o tatou olaga. A uma ona faitau le Eteru 4:11–12, e mafai ona e lisiina nisi o faatosinaga i lou olaga ma mafaufau pe latou te faatauanauina oe e fai mea lelei. O a suiga ua e lagona le musuia e fai?
Ua molimau mai molimau i le moni o le Tusi a Mamona.
A o e faitau i le valoaga a Moronae i le Eteru 5, mafaufau loloto i le faamoemoega o le Alii i le sauniaina o molimau e toatele o le Tusi a Mamona. O a ni molimau ua musuia oe e talitonu o le Tusi a Mamona o le afioga a le Atua? Ua faapefea ona faaali atu e le Tusi a Mamona ia te oe “le mana o le Atua ma lana afioga foi”? (Eteru 5:4).
E faafofoga ma tali mai le Tama Faalelagi i a’u tatalo.
Afai e te iloa se gagana e le iloa e lau fanau, tuu atu ia i latou ni nai faatonuga faigofie i lena gagana (pe ta se leo pue o se isi gagana). E mafai ona e faaaogaina lenei mea e faamatala ai pe aisea na tatalo ai le uso o Iareto mo se fesoasoani i le Eteru 1:33–37. Faamamafa atu lagona o le Alii e uiga i lenei tatalo ma le ala na Ia tali atu ai (tagai foi “Mataupu 50: Ua Tuua e sa Iareto Papelu,” Tala o le Tusi a Mamona, 143–44).
E mafai e lau fanau ona faafoliga o fausia se vaa, ao e faitauina le Eteru 2:16–17. Ona mafai lea e oe ma lau fanau ona faitau e uiga i faafitauli na i ai ia sa Iareto ma a latou vaa (tagai Eteru 2:19) ma auala eseese na tali atu ai le Alii i tatalo a le uso o Iareto (tagai Eteru 2:19–25; 3:1–6). O le ata ma le itulau o gaoioiga i le faaiuga o lenei otootoga e mafai ona fesoasoani ia te oe ma lau fanau e faamatala ai le tala. O le a se mea ua tatou aoao mai le uso o Iareto e uiga i tatalo? Mafaufau e faasoa atu se aafiaga na e tatalo ai mo se fesoasoani ma sa fesoasoani le Tama Faalelagi ia te oe.
Ao latou tuputupu ae, o le a fetaiai lau fanau ma le tele o savali sese e uiga i le Atua, i latou lava, ma o latou tino faaletino. E mafai ona e fai atu ia i latou e fesoasoani ia te oe e sue upumoni e uiga i nei autu i le Eteru 3:6–16. Ina ia faamamafa atu le upumoni o loo aoao mai i le Eteru 3:13, 15, e mafai ona outou tilotilo faatasi i se ata o le Faaola ma valaaulia lau fanau e faasino i vaega eseese o Lona tino. Ona mafai lea ona latou faasino atu i le vaega lava e tasi o o latou lava tino. E mafai foi ona outou usu faatasi se pese e faatatau i o tatou tino, e pei o le “Ua Tuu Mai E Le Alii Se Malumalu” (Tusipese a Tamaiti, 73). E mafai e oe ma lau fanau ona talanoa e uiga i le mafuaaga e te faafetai ai mo o outou tino.
Na valoia e Moronae o Molimau e Toatolu o le a fesoasoani e faatuina le moni o le Tusi a Mamona. Ina ia aoao atu po o le a le molimau, e mafai ona e fai atu i lau fanau e faamatala mai se mea na latou vaaia pe oo i ai e le’i vaaia e isi. A o outou faitauina faatasi le Eteru 5 e mafai ona outou talanoa pe aisea e faaaoga ai e le Atua molimau i Lana galuega. E mafai foi ona e faasoa atu i le tasi ma le isi pe faapefea ona e iloa e moni le Tusi a Mamona ma pe mafai faapefea ona e faasoa atu lau molimau i isi.
Mo nisi manatu, tagai i le lomiga o lenei masina o le mekasini o le Uo .
Ata
O Iesu o loo pai atu i maa e 16 a o i ai le uso o Iareto
E Sili Atu Ea Lau Lūlū Nai Lo Lenei?, saunia e Marcus Alan Vincent