“ວັນທີ 11–17 ເດືອນພະຈິກ: ‘ເປີດມ່ານຂອງຄວາມບໍ່ເຊື່ອຖືນັ້ນອອກ.’ ອີເທີ 1–5,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 11–17 ເດືອນພະຈິກ. ອີເທີ 1–5,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

ຮູບພາບ

ຊາວຢາເຣັດກຳລັງເດີນທາງຜ່ານຖິ່ນແຫ້ງແລ້ງກັນດານ

The Jaredites Leaving Babel [ຊາວຢາເຣັດໜີຈາກບາເບນ], ໂດຍ ອາບິນ ເວແຊວກາ

ວັນທີ 11–17 ເດືອນພະຈິກ: “ເປີດມ່ານຂອງຄວາມບໍ່ເຊື່ອຖືນັ້ນອອກ”

ອີເທີ 1–5

ເຖິງແມ່ນມັນເປັນຄວາມຈິງທີ່ວ່າ ວິທີຂອງພຣະເຈົ້າແມ່ນສູງກວ່າວິທີຂອງເຮົາ ແລະ ເຮົາຄວນຍອມຕໍ່ພຣະປະສົງຂອງພຣະອົງສະເໝີ, ແຕ່ພຣະອົງກໍຍັງຊຸກຍູ້ໃຫ້ເຮົາຄິດ ແລະ ກະທຳເພື່ອຕົວເອງ. ນັ້ນຄືບົດຮຽນຢ່າງໜຶ່ງທີ່ຢາເຣັດ ແລະ ນ້ອງຊາຍຂອງລາວໄດ້ຮຽນຮູ້. ຍົກຕົວຢ່າງ, ແນວຄິດທີ່ຈະເດີນທາງໄປຫາແຜ່ນດິນໃໝ່ “ທີ່ປະເສີດເລີດລ້ຳກວ່າແຜ່ນດິນອື່ນໃດໃນໂລກ” ເບິ່ງຄືໄດ້ເລີ່ມຕົ້ນຈາກຢາເຣັດ, ແລະ ພຣະຜູ້ເປັນເຈົ້າໄດ້ຍອມຮັບຄຳຂໍນັ້ນ, ໂດຍກ່າວຕໍ່ນ້ອງຊາຍຂອງຢາເຣັດວ່າ, “ເຮົາຈະໃຫ້ເຈົ້າດັ່ງນີ້ຍ້ອນວ່າເຈົ້າໄດ້ຂໍເຮົາເປັນເວລາອັນຍາວນານ” (ເບິ່ງ ອີເທີ 1:38–43). ແລະ ເມື່ອນ້ອງຊາຍຂອງຢາເຣັດຕ້ອງການແສງສະຫວ່າງທາງໃນເຮືອທີ່ຈະພາເຂົາເຈົ້າໄປຫາແຜ່ນດິນແຫ່ງຄຳສັນຍານັ້ນ, ພຣະຜູ້ເປັນເຈົ້າໄດ້ຖາມຄຳຖາມທີ່ໂດຍປົກກະຕິແລ້ວ ເຮົາຈະເປັນຜູ້ຖາມ ພຣະອົງ: “ເຈົ້າຢາກໃຫ້ເຮົາເຮັດສິ່ງໃດໃຫ້ເຈົ້າ?” (ອີເທີ 2:23). ພຣະອົງຢາກໄດ້ຍິນຄວາມຄິດ ແລະ ແນວຄິດຂອງເຮົາ, ແລະ ພຣະອົງຈະຮັບຟັງ ແລະ ໃຫ້ການຢືນຢັນ ຫລື ແນະນຳໃຫ້ເຮົາເຮັດຢ່າງອື່ນ. ບາງເທື່ອສິ່ງດຽວທີ່ແຍກເຮົາຈາກພອນທີ່ເຮົາສະແຫວງຫາ ແມ່ນ “ມ່ານຂອງຄວາມບໍ່ເຊື່ອຖື” ຂອງເຮົາເອງ, ແລະ ຖ້າຫາກເຮົາສາມາດ “ເປີດມ່ານ” (ອີເທີ 4:15), ເຮົາອາດປະຫລາດໃຈກັບສິ່ງທີ່ພຣະຜູ້ເປັນເຈົ້າເຕັມພຣະໄທທີ່ຈະກະທຳເພື່ອເຮົາ.

ເບິ່ງ “The Lord Appears to the Brother of Jared” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ອີເທີ 1:33–43

ຂະນະທີ່ເຮົາເອີ້ນຫາພຣະຜູ້ເປັນເຈົ້າ, ພຣະອົງຈະມີຄວາມເມດຕາປານີຕໍ່ເຮົາ.

ອີເທີ 1:33–43 ບອກເຖິງການອະທິຖານສາມເທື່ອຂອງນ້ອງຊາຍຂອງຢາເຣັດ. ທ່ານຮຽນຮູ້ຫຍັງແດ່ຈາກຄຳຕອບຂອງພຣະຜູ້ເປັນເຈົ້າຕໍ່ແຕ່ລະຄຳອະທິຖານ? ໃຫ້ຄິດກ່ຽວກັບເວລາຕອນທີ່ທ່ານໄດ້ປະສົບກັບຄວາມເມດຕາປານີຂອງພຣະຜູ້ເປັນເຈົ້າ ເມື່ອທ່ານເອີ້ນຫາພຣະອົງໃນຄຳອະທິຖານ. ທ່ານອາດຢາກບັນທຶກປະສົບການນີ້ໄວ້ ແລະ ແບ່ງປັນມັນກັບບາງຄົນທີ່ອາດຢາກໄດ້ຍິນປະຈັກພະຍານຂອງທ່ານ.

ເບິ່ງ “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5 ນຳອີກ.

ອີເທີ 2; 3:1–6; 4:7–15

ຮູບພາບ
ໄອຄອນຫ້ອງຮຽນສາດສະໜາ
ເຮົາສາມາດຮັບການເປີດເຜີຍສຳລັບຊີວິດຂອງເຮົາ.

ປະທານຣະໂຊ ເອັມ ແນວສັນ ໄດ້ກ່າວວ່າ, “ຂ້າພະເຈົ້າຂໍໃຫ້ທ່ານຈົ່ງຂະຫຍາຍຄວາມສາມາດທາງວິນຍານຂອງທ່ານ ເພື່ອຈະໄດ້ຮັບການເປີດເຜີຍ. … ໃຫ້ເລືອກເຮັດສິ່ງທີ່ຈຳເປັນທາງວິນຍານ ເພື່ອຈະຊື່ນຊົມກັບຂອງປະທານແຫ່ງພຣະວິນຍານບໍລິສຸດ ແລະ ໄດ້ຍິນສຸລະສຽງຂອງພຣະວິນຍານຫລາຍກວ່າເກົ່າ ແລະ ແຈ່ມແຈ້ງກວ່າເກົ່າ” (“Revelation for the Church, Revelation for Our Lives,” Liahona, May 2018, 96).

ຂະນະທີ່ທ່ານສຶກສາ ອີເທີ 2; 3:1–6; 4:7–15, ທ່ານຮຽນຮູ້ຫຍັງແດ່ກ່ຽວກັບ “ສິ່ງທີ່ເປັນທາງວິນຍານ” ທີ່ປະທານແນວສັນໄດ້ກ່າວເຖິງ? ທ່ານສາມາດໝາຍຄຳຖາມ ຫລື ຄວາມເປັນຫ່ວງຂອງນ້ອງຊາຍຂອງຢາເຣັດ ແລະ ສິ່ງທີ່ລາວໄດ້ເຮັດກ່ຽວກັບມັນ ດ້ວຍສີໜຶ່ງ, ແລະ ອີກສີໜຶ່ງ ທ່ານສາມາດໝາຍວິທີທີ່ພຣະຜູ້ເປັນເຈົ້າໄດ້ຊ່ວຍລາວ ແລະ ໃຫ້ລາວຮູ້ຈັກເຖິງພຣະປະສົງຂອງພຣະອົງ.

ຕໍ່ໄປນີ້ແມ່ນບາງຄຳຖາມເພື່ອໃຫ້ໄຕ່ຕອງ ຂະນະທີ່ທ່ານສຶກສາ:

ແມ່ນຫຍັງທີ່ປະທັບໃຈທ່ານກ່ຽວກັບວິທີທີ່ພຣະຜູ້ເປັນເຈົ້າຕອບຄຳຖາມຂອງນ້ອງຊາຍຂອງຢາເຣັດໃນ ອີເທີ 2:18–25?
ທ່ານຈະໃຊ້ ອີເທີ 3:1–5 ເພື່ອຊ່ວຍຄົນອື່ນທີ່ກຳລັງຮຽນຮູ້ວິທີອະທິຖານແນວໃດ?
ແມ່ນຫຍັງທີ່ຂັດຂວາງທ່ານບໍ່ໃຫ້ຮັບການເປີດເຜີຍຈາກພຣະຜູ້ເປັນເຈົ້າ? (ເບິ່ງ ອີເທີ 4:8–10). ທ່ານຈະສາມາດຮັບການເປີດເຜີຍຈາກພຣະອົງໃຫ້ດຸຂຶ້ນໄດ້ແນວໃດ? (ເບິ່ງ ອີເທີ 4:7, 11–15).
ທ່ານຄິດວ່າ ການ “ເປີດມ່ານຂອງຄວາມບໍ່ເຊື່ອຖື” ໃນຊີວິດຂອງທ່ານນັ້ນ ໝາຍຄວາມວ່າແນວໃດ? (ອີເທີ 4:15).

ທ່ານຮຽນຮູ້ຫຍັງແດ່ຈາກນ້ອງຊາຍຂອງຢາເຣັດກ່ຽວກັບການເປີດເຜີຍສ່ວນຕົວ?

ແອວເດີ ແດວ ຈີ ເຣັນລັນ ໄດ້ສິດສອນກ່ຽວກັບ “A Framework for Personal Revelation [ກະຕິກາສຳລັບການເປີດເຜີຍສ່ວນຕົວ]” (Liahona, Nov. 2022, 16–19). ໃຫ້ພິຈາລະນາແຕ້ມກອບຮູບ ແລະ ຂຽນອົງປະກອບສີ່ຢ່າງຂອງກະຕິການັ້ນໃສ່ແຕ່ລະດ້ານ. ກະຕິການີ້ຈະສາມາດຊ່ວຍໃຫ້ທ່ານ “ເພີ່ມຄວາມສາມາດໃນການຮັບການເປີດເຜີຍ” ໄດ້ແນວໃດ?

ເບິ່ງ Gospel Topics, “Personal Revelation,” ຫ້ອງສະໝຸດພຣະກິດຕິຄຸນ ນຳອີກ.

ອີເທີ 2:14–15; 3:1–20

ຜ່ານການຕີສອນຂອງພຣະອົງ, ພຣະຜູ້ເປັນເຈົ້າເຊື້ອເຊີນເຮົາໃຫ້ກັບໃຈ ແລະ ມາຫາພຣະອົງ.

ແມ່ນແຕ່ສາດສະດາທີ່ຍິ່ງໃຫຍ່ດັ່ງນ້ອງຊາຍຂອງຢາເຣັດ ກໍຈຳເປັນຕ້ອງຖືກພຣະຜູ້ເປັນເຈົ້າຕີສອນ. ທ່ານຮຽນຮູ້ຫຍັງແດ່ຈາກ ອີເທີ 2:14–15 ກ່ຽວກັບການຕີສອນຂອງພຣະຜູ້ເປັນເຈົ້າ? ໃຫ້ຄິດກ່ຽວກັບວ່າ ການຕີສອນຂອງພຣະຜູ້ເປັນເຈົ້າ ແລະ ການຕອບຂອງນ້ອງຊາຍຂອງຢາເຣັດ ໄດ້ຊ່ວຍກຽມລາວສຳລັບປະສົບການຂອງລາວແນວໃດໃນ ອີເທີ 3:1–20.

ອີເທີ 2:16–25

ພຣະຜູ້ເປັນເຈົ້າຈະຕຽມເຮົາໃຫ້ຂ້າມ “ຄວາມເລິກອັນກວ້າງໃຫຍ່” ຂອງເຮົາ.

ບາງເທື່ອ, ການຂ້າມ “ຄວາມເລິກອັນກວ້າງໃຫຍ່” ເປັນວິທີດຽວເທົ່ານັ້ນທີ່ຈະບັນລຸພຣະປະສົງຂອງພຣະເຈົ້າສຳລັບເຮົາ. ທ່ານເຫັນສິ່ງທີ່ຄ້າຍຄືກັນກັບຊີວິດຂອງທ່ານບໍ່ ຢູ່ໃນ ອີເທີ 2:16–25? ພຣະຜູ້ເປັນເຈົ້າໄດ້ຕຽມທ່ານສຳລັບການທ້າທາຍຂອງທ່ານແນວໃດ? ພຣະອົງຂໍໃຫ້ທ່ານເຮັດຫຍັງແດ່ໃນເວລານີ້ ເພື່ອກະກຽມສຳລັບສິ່ງທີ່ພຣະອົງຕ້ອງການໃຫ້ທ່ານເຮັດໃນອະນາຄົດ?

ເບິ່ງ L. Todd Budge, “Consistent and Resilient Trust,” Liahona, Nov. 2019, 47–49 ນຳອີກ.

ນຳໃຊ້ສິ່ງທີ່ທ່ານຮຽນຮູ້. ການສຶກສາພຣະກິດຕິຄຸນຄວນດົນໃຈເຮົາໃຫ້ປ່ຽນແປງຊີວິດຂອງເຮົາ. ຫລັງຈາກທີ່ອ່ານ ອີເທີ 4:11–12, ທ່ານອາດຢາກຂຽນລາຍການອິດທິພົນຕ່າງໆໃນຊີວິດຂອງທ່ານລົງໄວ້ ແລະ ພິຈາລະນາວ່າ ມັນຊັກຊວນໃຫ້ທ່ານເຮັດດີຫລືບໍ່. ມີສິ່ງໃດແດ່ທີ່ທ່ານຮູ້ສຶກໄດ້ຮັບດົນໃຈໃຫ້ປ່ຽນແປງ?

ອີເທີ 5

ພະຍານທັງຫລາຍເປັນປະຈັກພະຍານເຖິງຄວາມຈິງຂອງພຣະຄຳພີມໍມອນ.

ຂະນະທີ່ທ່ານອ່ານຄຳທຳນາຍຂອງໂມໂຣໄນໃນ ອີເທີ 5, ໃຫ້ໄຕ່ຕອງຈຸດປະສົງຂອງພຣະຜູ້ເປັນເຈົ້າໃນການກະກຽມພະຍານຫລາຍໆຄົນຂອງພຣະຄຳພີມໍມອນ. ບັນດາພະຍານທັງຫລາຍໄດ້ດົນໃຈຫຍັງໃຫ້ທ່ານເຊື່ອວ່າ ພຣະຄຳພີມໍມອນເປັນພຣະຄຳຂອງພຣະເຈົ້າ? ພຣະຄຳພີມໍມອນໄດ້ສະແດງໃຫ້ທ່ານເຫັນ “ອຳນາດຂອງພຣະເຈົ້າ ແລະ ພຣະຄຳຂອງພຣະອົງອີກ” ແນວໃດ? (ອີເທີ 5:4).

ແນວຄິດສຳລັບການສິດສອນເດັກນ້ອຍ

ອີເທີ 1:33–37; 2:16–25; 3:1–6

ພຣະບິດາເທິງສະຫວັນໄດ້ຍິນ ແລະ ຕອບຄຳອະທິຖານຂອງເຮົາ.

ຖ້າທ່ານຮູ້ພາສາທີ່ລູກໆຂອງທ່ານບໍ່ຮູ້, ລອງອອກຄຳສັ່ງງ່າຍໆໃນພາສານັ້ນ (ຫລື ເປີດອັດສຽງຂອງອີກພາສາໜຶ່ງ). ທ່ານສາມາດໃຊ້ສິ່ງນີ້ເພື່ອອະທິບາຍວ່າ ເປັນຫຍັງນ້ອງຊາຍຂອງຢາເຣັດຈຶ່ງໄດ້ອະທິຖານຂໍຄວາມຊ່ວຍເຫລືອໃນ ອີເທີ 1:33–37. ເນັ້ນວ່າ ພຣະຜູ້ເປັນເຈົ້າຮູ້ສຶກແນວໃດກັບຄຳອະທິຖານນີ້ ແລະ ພຣະອົງໄດ້ຕອບວ່າແນວໃດ (ເບິ່ງ “ບົດທີ 50: ຊາວຢາເຮັດໜີຈາກເມືອງບາເບນ,” ເລື່ອງພຣະຄຳພີມໍມອນ, 143–44 ນຳອີກ).
ລູກໆຂອງທ່ານສາມາດທຳທ່າສ້າງເຮືອ ຂະນະທີ່ທ່ານອ່ານ ອີເທີ 2:16–17. ແລ້ວທ່ານ ແລະ ລູກໆຂອງທ່ານກໍສາມາດອ່ານກ່ຽວກັບບັນຫາທີ່ຊາວຢາເຣັດໄດ້ມີກັບເຮືອຂອງພວກເຂົາ (ເບິ່ງ ອີເທີ 2:19) ແລະ ວິທີທີ່ແຕກຕ່າງທີ່ພຣະຜູ້ເປັນເຈົ້າໄດ້ຕອບຄຳອະທິຖານຂອງຢາເຣັດ (ເບິ່ງ ອີເທີ 2:19–25; 3:1–6). ຮູບພາບ ແລະ ໜ້າກິດຈະກຳຢູ່ທ້າຍໂຄງຮ່າງນີ້ ສາມາດຊ່ວຍທ່ານ ແລະ ລູກໆຂອງທ່ານເລົ່າເລື່ອງໄດ້. ເຮົາຮຽນຮູ້ຫຍັງແດ່ຈາກນ້ອງຊາຍຂອງຢາເຣັດກ່ຽວກັບການອະທິຖານ? ໃຫ້ຄິດທີ່ຈະແບ່ງປັນປະສົບການ ຊຶ່ງທ່ານໄດ້ອະທິຖານຂໍຄວາມຊ່ວຍເຫລືອ ແລະ ພຣະບິດາເທິງສະຫວັນໄດ້ຊ່ວຍທ່ານ.

ອີເທີ 3:6–16

ເຮົາໄດ້ຖືກສ້າງຂຶ້ນຕາມຮູບຮ່າງລັກສະນະຂອງພຣະເຈົ້າ.

ຂະນະທີ່ພວກເຂົາເຕີບໃຫຍ່ຂຶ້ນ, ລູກໆຂອງທ່ານຈະພົບກັບຂ່າວສານປອມກ່ຽວກັບພຣະເຈົ້າ, ພວກເຂົາເອງ, ແລະ ຝ່າຍຮ່າງກາຍຂອງພວກເຂົາ. ທ່ານອາດຂໍໃຫ້ພວກເຂົາຊ່ວຍທ່ານຊອກຫາຄວາມຈິງກ່ຽວກັບຫົວຂໍ້ເຫລົ່ານີ້ໃນ ອີເທີ 3:6–16. ເພື່ອທີ່ຈະເນັ້ນຄວາມຈິງທີ່ສິດສອນຢູ່ໃນ ອີເທີ 3:13, 15, ພວກທ່ານສາມາດເບິ່ງໄປທີ່ຮູບຂອງພຣະຜູ້ຊ່ວຍໃຫ້ລອດນຳກັນ ແລະ ເຊື້ອເຊີນລູກໆຂອງທ່ານໃຫ້ຊີ້ໄປຍັງຫລາຍໆສ່ວນໃນພຣະກາຍຂອງພຣະອົງ. ແລ້ວພວກເຂົາກໍສາມາດຊີ້ໃສ່ສ່ວນທີ່ຄືກັນຂອງຮ່າງກາຍຂອງພວກເຂົາເອງ. ທ່ານຍັງສາມາດຮ້ອງເພງທີ່ກ່ຽວຂ້ອງກັບຮ່າງກາຍຂອງເຮົານຳກັນ, ເຊັ່ນ “ພຣະເຈົ້າມອບພຣະວິຫານແກ່ເຮົາ” (ເພງສວດ ແລະ ເພງຂອງເດັກນ້ອຍ, 68). ທ່ານ ແລະ ລູກໆຂອງທ່ານສາມາດເວົ້າກ່ຽວກັບວ່າ ເປັນຫຍັງທ່ານຈຶ່ງຮູ້ສຶກຂອບພຣະຄຸນສຳລັບຮ່າງກາຍຂອງພວກທ່ານ.

ອີເທີ 5

ພະຍານສາມຄົນເປັນປະຈັກພະຍານເຖິງພຣະຄຳພີມໍມອນ.

ໂມໂຣໄນໄດ້ທຳນາຍວ່າ ພະຍານສາມຄົນ ຈະຊ່ວຍສະຖາປະນາຄວາມຈິງຂອງພຣະຄຳພີມໍມອນ. ເພື່ອທີ່ຈະສິດສອນວ່າ ພະຍານແມ່ນຫຍັງ, ທ່ານສາມາດຂໍໃຫ້ລູກໆຂອງທ່ານບັນຍາຍບາງຢ່າງທີ່ພວກເຂົາເຄີຍເຫັນ ຫລື ເຄີຍປະສົບ ທີ່ຄົນອື່ນບໍ່ເຄີຍ. ແລ້ວໃນຂະນະທີ່ພວກທ່ານອ່ານ ອີເທີ 5 ນຳກັນ, ທ່ານສາມາດເວົ້າກ່ຽວກັບເຫດຜົນທີ່ພຣະເຈົ້າໃຊ້ພະຍານໃນວຽກງານຂອງພຣະອົງແນວໃດ. ພວກທ່ານຍັງສາມາດແບ່ງປັນນຳກັນ ວ່າພວກທ່ານຮູ້ວ່າພຣະຄຳພີມໍມອນເປັນຄວາມຈິງໄດ້ແນວໃດ ແລະ ພວກທ່ານຈະສາມາດແບ່ງປັນຄຳພະຍານຂອງພວກທ່ານກັບຄົນອື່ນໄດ້ແນວໃດ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

Sawest Thou More Than This? [ເຈົ້າເຫັນຫລາຍກວ່າສິ່ງນີ້ບໍ?], ໂດຍ ມາກັສ ອາລານ ວິນເຊັນ

ຮູບພາບ

ໜ້າກິດຈະກຳ: ພຣະບິດາເທິງສະຫວັນໄດ້ຕອບຄຳອະທິຖານຂອງນ້ອງຊາຍຂອງຢາເຣັດ