“21–27 Sānuali. Sione 1: Kuo Mau ʻIlo ʻa e Mīsaiá,” Haʻu, ʻo Muimui ʻIate Au—Maʻá e Lautohi Faka-Sāpaté: Fuakava Foʻoú 2019 (2019)
“21–27 Sānuali. Sione 1” Haʻu, ʻo Muimui ʻIate Au—Maʻá e Lautohi Faka-Sāpaté: 2019
21–27 Sānuali
Sione 1
Kuo Mau ʻIlo ʻa e Mīsaiá
Kimuʻa pea ke lau ha ngaahi naunau kehe, lau mo ke fakalaulauloto ki he Sione 1, pea lekooti e ngaahi ongo ʻokú ke maʻú. ʻE fakaafeʻi heni e Laumālié ki hoʻo teuteú.ʻE lava ke tokoni ʻa e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí mo e ngaahi fakakaukau ko ʻení, ke ueʻi e loto ʻo e kakai ʻi hoʻo kalasí ke mahino kiate kinautolu mo nau moʻui ʻaki e tokāteline ʻi he vahe ko ʻení.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
Ke tokoni ki he kau mēmipa ʻo e kalasí ke nau vahevahe e meʻa ʻoku nau akó, te ke ala kole ke nau tohi ʻi ha laʻi pepa ha ngaahi fehuʻi, ngaahi fakamatala, pe ngaahi fakakaukau mei heʻenau laukongá, pea faʻo kinautolu ki ha foʻi hina. Toʻo hake ha ngaahi laʻi pepa mei he foʻi hiná ke aleaʻi ʻe he kalasí.
Akoʻi e Tokāteliné
Naʻe “ʻi he kamataʻangá” ʻa Sīsū Kalaisi “mo e ʻOtuá.”
-
Naʻe kamata e fakamoʻoni ʻa Sione kia Kalaisí ʻi heʻene fakamoʻoni ki he ngaahi fatongia ʻo e Fakamoʻuí kimuʻa pea toki ʻaloʻí. Ko e hā naʻe akoʻi ʻe Sione fekauʻaki mo Kalaisi ʻi he maama fakalaumālié? Ko e hā ʻoku mahuʻinga ai ke ʻiloʻi e ngaahi fatongia ʻo Kalaisi ʻi he maama fakalaumālié? ʻE ala tokoni ke hiki e ngaahi fehuʻi ko ʻení ʻi he palakipoé pea kole ki he kalasí ke nau fekumi ki he ngaahi talí ʻi he Sione 1:1–5 (vakai foki, Liliu ʻa Siosefa Sāmita, Sione 1:1–5 [ʻi he Fakahinohino ki he Ngaahi Folofolá]) mo e fakamatala ʻa ʻEletā James E. Talmage ʻi he “Ngaahi Maʻuʻanga Tokoni Kehé.” Ko e hā ha ngaahi potufolofola kehe ʻe lava ʻe he kau mēmipa ʻo e kalasí ʻo vahevahe, ʻoku akoʻi lahi ange ai ʻa Kalaisi ʻi he maama fakalaumālié? (Hangē ko ʻení, vakai, “Sīsū Kalaisi” ʻi he Fakahinohino ki he Ngaahi Folofolá) Te mou lava ʻo vakaiʻi fakataha mo e kalasí ʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló” (Ensign pe Liahona, Apr. 2000, 2).
-
Kapau te ke fie fakaʻaongaʻi ʻa e ngaahi veesi ko ʻení ke talanoa fekauʻaki mo e ngaahi fakatupu ʻa e ʻEiki, ʻe lava ke ke lau leʻolahi ʻa e Sione 1:3 pea fakaʻaliʻali ha ngaahi fakatātā ʻokú ne fakahaaʻi e fakaʻofoʻofa ʻo e māmaní. ʻE lava ke ke fakaʻaliʻali ʻa e vitiō “Our Home” (lds.org/topics/environmental-stewardship-and-conservation). Fakaafeʻi e kau mēmipa ʻo e kalasí ke nau vahevahe e founga ʻoku tokoniʻi ai kinautolu ʻe he fakatupu ʻa e Fakamoʻuí ke nau ongoʻi ʻEne ʻofá.
Ko Sīsū Kalaisi ʻa e Māmá.
-
ʻE lava ke tokoni e maama fakatuʻasinó ke mahino kiate kitautolu ʻa e fakataipe ʻo e maama fakalaumālié. Te ke lava fēfē ʻo fakatātaaʻi e fakataipe ko ʻení ki hoʻo kalasí? Te ke lava ‘o tamateʻi e ngaahi maama ʻi he lokí pea fakamoʻui ha kasa ke fakahaaʻi e faikehekehe ʻo e māmá mo e fakapoʻulí. Hili iá peá ke kole ki he kalasí ke nau kumi e meʻa kotoa pē fekauʻaki mo e foʻi lea maama ʻi he Sione 1:1–14, pea fakaafeʻi kinautolu ke nau vahevahe e founga ʻoku ʻomi ai ʻe he Fakamoʻuí mo ʻEne ongoongoleleí ha maama fakalaumālie ki heʻenau moʻuí. Kuo aʻusia fēfē ‘e he kau mēmipa ʻo e kalasí ʻEne māmá? Mahalo te ke fie maʻu ke nau laukonga lahi ange, ko ha konga ʻo e fealēleaʻaki ko ʻení, fekauʻaki mo e Maama ʻo Kalaisí ʻi he Tokāteline mo e Ngaahi Fuakava 84: 45–46; 88: 11–13, pe tuku ke nau vakai ki he “Maama ʻo Kalaisi” ʻi he Fakahinohino ki he Ngaahi Folofolá. Te tau lava fēfē ʻo hoko ko ha maama ki he māmaní?
ʻĪmisisunlight through rock formation at beachʻOku ʻomi ʻe he Fakamoʻuí mo ʻEne ongoongoleleí ha maama fakalaumālie.
-
Koeʻuhí ʻoku hiki e tohi ʻa Sione 1:1–14 ʻi ha lea fakataipe, ʻe ngali faingataʻa ke mahino ia kiate kitautolu. Ko ha founga ʻe taha ʻe lava ke mahino ai ki he kau mēmipa ʻo e kalasí e fakamoʻoni ʻa Sioné, ko hono fakaafeʻi kinautolu ke nau lisi e ngaahi lea pe kupuʻi lea ʻoku toutou ngāue ʻaki ʻi he ngaahi veesi ko ʻení pea vahevahe e meʻa ʻokú ne akoʻi fekauʻaki mo e Fakamoʻuí.
-
Ko ha founga ʻeni ke fakakau mai ai e kau mēmipa ʻo e kalasí ʻi he ngaahi veesi ko ʻení: Fakaʻaliʻali ha ngaahi fakatātā (kau ai mo e tā mei he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí) ʻokú ne fakatātaaʻi e ngaahi tafaʻaki ʻo e moʻui ʻa Sīsū Kalaisí pea mo Hono misiona fakalangí. Fakaafeʻi e kau mēmipa ʻo e kalasí ke nau fekumi ʻi he Sione 1:1–14, ʻo kumi ha ngaahi foʻi lea pe kupuʻi lea ʻe lava ke fakahingoa ʻaki e ngaahi fakatātaá.
ʻE lava ke tau maʻu haʻatau fakamoʻoni ki he Fakamoʻuí pea fakaafeʻi e niʻihi kehé ke nau “haʻu ʻo mamata.”
-
ʻOku hā tuʻo ua e fakaafe ʻi he Sione 1, ke “haʻu ʻo mamatá” (vakai, veesi 39, 46). Mahalo he ʻikai ke tau maʻu ha faingamālie ke tau mamata tonu ki he Fakamoʻuí ʻo hangē ko ʻAnitelū mo Natanielá, ka te tau lava ʻo tali ʻa e fakaafe tatau. Te ke lava ʻo ʻeke ki he kau mēmipa ʻo e kalasí pe ko e hā e ʻuhinga kiate kinautolu e “haʻu ʻo mamatá” ʻi hotau kuongá, pea vahevahe ʻenau ngaahi aʻusia ʻo ʻenau maʻu ha fakamoʻoni ki he Fakamoʻuí.
-
Ke fakafeʻiloaki ha fealēleaʻaki fekauʻaki mo e ngaahi veesi ko ʻení, fakakaukau ke kole ki he kalasí ke nau vahevahe ha ngaahi talanoa fekauʻaki mo e founga kuo nau fakafeʻiloaki ai e ongoongolelei ʻo Sīsū Kalaisí ki he niʻihi kehé. Ko hai naʻa nau fakaafeʻi ke “haʻu ʻo mamatá”? Ko e hā kuo tau ako meia ʻAnitelū mo Filipe fekauʻaki mo hono vahevahe ʻo ʻetau fakamoʻoni kia Kalaisí?
-
ʻI he taimi ʻe niʻihi he ʻikai vahevahe ʻe he kakaí e ongoongoleleí koeʻuhi ko ʻenau ʻilo ʻoku fakalotosiʻi mo faingataʻa hono faí. ʻOku fakahaaʻi ʻe he fakamatala ʻi he Sione 1:35–51, ʻe lava ke faingofua mo fakanatula pē hono vahevahe ʻo e ongoongoleleí. ʻE lava ke ke kole ki he kau mēmipa ʻo e kalasí ke nau lau e ngaahi veesi ko ʻení pea aleaʻi e founga te nau lava ai ʻo fakaʻaongaʻi kinautolu ke tokoniʻi ha taha ʻoku tailiili ʻi hono vahevahe e ongoongoleleí. Te nau lava ke maʻu ha ngaahi fakakaukau ʻi hono fakaʻaongaʻi e lea ʻa ʻEletā Neil L. Andersen ʻi he “Ngaahi Maʻuʻanga Tokoni Kehé.” (Vakai foki ki he vitiō “Good Things to Share” ʻi he LDS.org.)
Poupouʻi ʻo e Ako ʻi ʻApí
Ke poupouʻi e kau mēmipa ʻo e kalasí ke nau ako e Mātiu 3, Maʻake 1, mo e Luke 3, te ke lava ʻo kole ange ke nau fakakaukau ki ha taha te nau loto ke tokoni ki hono ʻomi kia Kalaisí. Fakahā ange kiate kinautolu te nau lau ʻi he ngaahi vahe ko ʻení fekauʻaki mo ha palōfita ko hono misioná ke teuteuʻi e kakaí ke tali e Fakamoʻuí.
Ngaahi Maʻuʻanga Tokoni Kehé
Naʻe ʻafio fakataha ʻa Sīsū Kalaisi mo e Tamai Hēvaní ʻi he kamataʻangá.
Naʻe akonaki ʻa ʻEletā James E. Talmage ʻo pehē: “Kuo fakapapauʻi moʻoni mai e Folofolá ʻa Sīsū Kalaisi, ʻa ia naʻe ʻafio fakataha mo e Tamaí ʻi [he] kamataʻangá mo Ia naʻá Ne maʻu e mālohi mo e tuʻunga faka-ʻOtuá, pea naʻá Ne hāʻele mai ki he māmaní ʻo ʻafio ʻi he lotolotonga ʻo e tangatá. ʻOku poupouʻi e ngaahi fakamatala ko ʻení ʻi he fakahā naʻe fai kia Mōsesé, ʻa ia naʻe fakangofua ai ia ke ne mamata ki ha konga lahi ʻo e ngaahi fakatupu ʻa e ʻOtuá, pea mo fanongo ki he leʻo ʻo e Tamaí ʻo fakatatau mo e ngaahi meʻa kuo fakatupú: ‘Pea ʻi he folofola ʻo hoku mālohí, kuó u fakatupu ia, ʻa ia ko hoku ʻAlo pē Taha naʻe Fakatupú, ʻa ia ʻoku fonu ʻi he ʻaloʻofá mo e moʻoní’ [Mōsese 1:32, 33]” (Jesus the Christ, 3rd ed. [1916], 10).
Te tau lava ʻo fakaafeʻi e niʻihi kehé ke nau “haʻu ʻo mamata.”
Naʻe akonaki ʻa ʻEletā Neil L. Andersen ʻo pehē:
“Naʻe akoʻi mai ʻe he Fakamoʻuí e founga ʻo hono vahevahe ʻo e ongoongoleleí. ʻOku ou saiʻia he talanoa ʻo ʻAniteluú, naʻá ne fehuʻi, ‘ʻEiki, ʻokú ke nofó ʻi fē?’ [Sione 1:38]. Naʻe mei fakahā ange ʻe Sīsū e feituʻu ʻokú Ne ʻafio aí. Ka naʻá Ne folofola ange kia ʻAnitelū, ‘Haʻu ʻo mamata’ [Sione 1:39]. ʻOku ou fakakaukau ki ha mei pehē ange ʻe he Fakamoʻuí, “ʻOua te ke haʻu pē ʻo mamata he feituʻu ʻoku ou nofo aí ka ko e anga foki ʻo ʻeku moʻuí. Haʻu ʻo mamata pe ko hai Au. Haʻu ʻo ongoʻi e Laumālié.’ ʻOku ʻikai ke tau ʻiloʻi e meʻa kotoa ne hoko he ʻaho ko iá, ka ʻoku tau ʻiloʻi ko e taimi ko ia ne ʻilo ai ʻe ʻAnitelū hono tokoua ko Saimoné naʻá ne pehē ange, ‘Kuo mau ʻilo … ʻa e Kalaisí’ [Sione 1:41].
“Kiate kinautolu ʻoku nau tokanga mai ki heʻetau talanoá, te tau lava ʻo muimui he sīpinga ʻa e Fakamoʻuí ʻo fakaafeʻi ke nau ʻhaʻu ʻo mamata.’ ʻE ʻi ai e niʻihi te nau tali ʻetau fakaafé pea ʻikai tali ʻe ha niʻihi. ʻOku tau ʻiloʻi kotoa ha taha naʻe toutou fakaafeʻi kimuʻa peá ne toki tali e fakaafe ke ‘haʻu ʻo mamatá.’ Tau toe fakakaukau ki ha niʻihi ne tau kau fakataha ka kuo tātaaitaha ʻetau sio ki aí, ʻo toe fakaafeʻi ke nau foki mai ʻo toe mamata. …
Kiate kimoutolu ʻoku mou ngāue ʻaki e ʻInitanetí mo e telefoni toʻotoʻó, ʻoku ʻi ai ha ngaahi founga foʻou ki hono fakaafeʻi e niʻihi kehé ke “haʻu ʻo mamatá.” ʻOku totonu ke hoko hono vahevahe atu ʻetau tuí he ʻinitanetí ko ha konga ʻo ʻetau moʻui fakaʻahó” (“Ko ha Mana,” Ensign pe Liahona, Mē 2013, 79).
ʻE lava ke akoʻi kitautolu ʻe he hivá fekauʻaki mo Kalaisi.
Fakakaukau ke fakaʻaongaʻi ʻa e himi “Māmani Fakaʻofoʻofa” Ngaahi Himi, fika 29, ʻi hoʻomou talanoa ki he fatongia ʻo e Fakamoʻuí ko e Tokotaha Fakatupú (vakai, Sione 1:3). Te ke lava foki ʻo fakaʻaongaʻi e vitiō “For the Beauty of the Earth” ʻi he mormontabernaclechoir.org.
Fakatupulaki ʻEtau Founga Akoʻí
Tokoni ke fakafehoanaki ʻe he kau akó e folofolá kiate kinautolu. ʻE tokoniʻi ʻe he fakaafe tatau naʻe fai ʻe Kalaisi ki Heʻene kau ākongá—ke haʻu ʻo mamatá—ʻa kinautolu ʻokú ke akoʻí ke nau maʻu ha holi ke muimui ʻi he Fakamoʻuí. Poupouʻi e kau akó ke nau moʻui ʻaki ʻi heʻenau moʻuí e ngaahi tefitoʻi moʻoni ʻoku maʻu ʻi he folofolá pea fakaafeʻi e niʻihi kehé ke fai e meʻa tatau. (Vakai, 1 Nīfai 19:23; Ko e Faiako ‘i he Founga ʻa e Fakamoʻuí 21.)