Upu Moni mai Faataoto a le Faaola i le Mataio 13

“O loo taavavale pea uili o le kariota o le Malo, o loo uunaia i luma e le aao malosi o Ieova; ma e ui lava i tetee uma, o le a taavavale pea i luma, seia oo ina faataunuuina uma Ana afioga.”

Mai le Soifuaga o Iosefa Samita

A o latalata ina maea le fauina o le Malumalu i Katelani, na amata ona saunia e Iosefa Samita ma le Au Paia i latou lava mo faamanuiaga maoae o le a latou maua ai iina. Ina ia fesoasoani i le usoga mo le faapaiaina o le malumalu, na amataina ai se sauniga o le Aoga a Toeaina ia Novema 1835. O lenei aoga na amata i le 1834, o le faaauauina o le Aoga a Perofeta na faia muamua atu.

Faatasi ma isi mataupu, na aoao e Iosefa Samita ma isi o le usoga le faa-Eperu, o le gagana lea ma uluai tusia ai le tele o le Feagaiga Tuai. O loo faaali mai i le tusi faamaumau a le Perofeta mo lea vaitaimi na toetoe lava o aso uma na ia aoaoina ai le faa- Eperu, mo le tele o itula o le aso. O ana tala faamaumau e aofia ai upu e pei o le “Faaaluina le aso i le faitauina o le faa-Eperu” po o le “Auai i le aoga ma faitau le faa-Eperu.”¹ I le aso 19 o Ianuari, 1836, na ia tusia ai faapea: “Faaaluina le aso i le aoga. Na faamanuiaina i matou e le Alii ia matou aoaoga. O le aso lenei na amata ona matou faitau ma le faamanuiaina tele i la matou Tusi Paia faa- Eperu. E peiseai ua tatala e le Alii o matou mafaufau i le auala ofoofogia, ina ia malamalama ai i Lana upu i le gagana autu.”² I se masina mulimuli ane, na ia tusia: “Auai i le aoga ma faitau ma faaliliu faatasi ma la’u vasega e pei ona masani ai. E olioli lo’u agaga i le faitauina o le upu a le Alii i lona uluai tusitusiga.”³

O le aafiaga o Iosefa Samita i le Aoga a Toeaina ua na o se tasi o faailoga o lona alofa mo tusitusiga paia. Na ia suesueina ma le filiga tusitusiga paia, ma maua ai iina le filemu, malamalama, ma le musumusuga i lona olaga. I lona itu taua, o se fuaitau mai le Tusi Paia na taitaiina ai o ia e saili le poto mai le Atua ma maua ai le Uluai Faaaliga ina ua na o le 14 ona tausaga (tagai i le Iakopo 1:5).

O tusitusiga ma lauga a le Perofeta o loo faatumulia i upusii ma faaliliuga mai tusitusiga paia, aua na matua lautele lona suesueina o tusitusiga paia na avea ai ma vaega taua o ona manatunatuga. I ana aoaoga, na ia sii sao mai ai mau, na ia faatatau i ai, na ia faamatalaina mau, ma ia faaaogaina e fai ma faavae o ana lauga. “Ua ou iloa tusitusiga paia ma ou malamalama ai,” na ia folafola mai ai ia Aperila 1844.⁴

O lona malamalama uiga ese i tusitusiga paia na mafai ai e ia ona aoao atu ma faaliliuina i latou i le maoae o le mana ma le manino, ma o i latou uma o e na faalogo o lauga o ia latou te manatuaina lenei tomai. Na manatuaina e Peresitene Polika Iaga na mafai e le Perofeta ona “ave tusitusiga paia ma faamaninoina ma faafaigofie ina ia mafai ai ona malamalama tagata uma.”⁵

Na manatuaina e Wandle Mace: “Ua ou faalogo i le Perofeta o Iosefa Samita i le lotoifale ma nofoaga faitele, i le la ma le timu, e pei lava ona faia e le toatele o isi a o ia aoaoina i latou mai le pulelaa. Ma i lo’u fale, ma lona fale, na ou masani ia te ia … ma ou iloa ai e leai lava se tagata e mafai ona faamatalaina tusitusiga paia, ma faafaigofieina ona malamalama manino ina ia leai se tasi e le malamalama ai i o latou uiga, vagana na aoaoina o ia e le Atua.

“E i ai taimi na ou lagona ai lo’u maasiasi aua, i le tele o la’u suesuega i tusitusiga paia, talu mai lava o ou laitiiti, ou te le’i vaai i mea sili ona manino ina o ia talanoaina i latou. O ia, na foliga mai, na ia kiina le ki, ma matala vatele faafuasei ai le faitotoa o le malamalama, ma faailoa mai ai mataupu faavae taua, e le gata i mataupu fou a o mataupu tuai.”⁶

O le malamalama o le Perofeta i tusitusiga paia o loo manino mai i le tusi lea, na ia tuuina mai ai faaliliuga faaperofeta o faataoto a le Faaola i le Mataio 13. Na ia aoao mai o nei faataoto e faamatalaina mai le faavaeina o le Ekalesia i le taimi o le Faaola ma le tupu a’e ofoofogia [o le Ekalesia] ma lona taunuuga i aso e gata ai.

Aoaoga a Iosefa Samita

Na aoao mai le Faaola i faataoto ina ia malamalama atili ai i latou o e talitonu ia te ia, a o i latou o e teena Ana aoaoga o le a aveesea ai le malamalama na ia i latou.

“ ‘Ona o mai ai lea o ona soo, ua faapea mai ia te ia [le Faaola], Se a le mea ua e fetalai atu ai ia te i latou i faataoto? [Ou te faapea atu i i, o le upu “latou” o loo faaaogaina i lenei fesili … e faatatau i le motu o tagata.] Ona tali atu ai lea o ia, ua faapea atu ia te i latou, [i ona soo], aua ua foaiina atu ia te outou ia iloa mealilo o le Malo o le Lagi, peitai ia i latou [o tagata e le talitonu,] ua le foaiina atu i ai, aua o le ua i ai mea, e foaiina atu ia te ia, e atili tele ai ana mea; a o se le i ai mea, e aveeseina foi ia te ia le mea ua ia te ia.’ [Mataio 13:10–12.]

“Tatou te malamalama mai lenei saunoaga, o i latou o e na sailiili muamua mo se Mesia e oo mai e tusa ai ma molimau a Perofeta, ma e oo mai i lena taimi o loo sailiili mo se Mesia, ae e le i lava se malamalama ona o lo latou le talitonu e iloa o Ia o lo latou Mesia, ma talu ai o Ia o le Mesia moni, o se taunuuga na tatau lava ona oo i ai o lo latou le fiafia, ma aveesea ai le atamai uma, po o le aveesea mai ia i latou o le malamalama uma, poto, ma le faatuatua lea na ia i latou e uiga i lenei mataupu. ‘O le mea lea,’ ua fetalai mai ai le Faaola, ‘ou te tautala atu ai ia te i latou i faataoto, aua o lo latou vaai latou te le vaai ai, o lo latou faalogo foi, latou te le faalogo ai, pe lagona.’ [Mataio 13:13–14.]

“O lenei ua tatou iloaina o le mafuaaga tonu lava na ta’uina mai e lenei perofeta [Isaia], o le mafuaaga latou te le taliaina ai le Mesia, ona, talu ai latou te lei malamalama pe le fia malamalama foi; ma vaai ai, latou te le i lagonaina; aua ua mafiafia loto o lenei nuu, ma ua faalogo gata o latou taliga i faalogo, ua moeiini foi o latou mata; ne’i vaai o latou mata, ma faalogo o latou taliga, ma lagona o latou loto ma liliuina i latou, ma ou faamaloloina i latou.’ [Mataio 13:15.]

“Tatou te toe faia foi le faamatalaga i i—aua ua tatou iloa o le mataupu faavae tonu lava lea na maua ai faamanuiaga o le au soo, ona sa faatagaina i latou e vaai i o latou mata ma faalogo i o latou taliga—o le faasalaga na oo i luga o le motu o tagata o e na le taliaina Lana upu, na mafua ona o lo latou le naunau e vaai i o latou mata, ma faalogo i o latou taliga; e le faapea ona ua latou le mafai, ma e na latou le maua se avanoa e vaai ai ma faalogo, ae ona o o latou loto na tumu i agasala ma amioleaga, ‘e pei o o outou tama, ua faapea foi outou.’ [Galuega 7:51.] O le perofeta, na uluai vaai i ai o le a faapea lava ona faamaaaina o latou loto, na manino lava ona folafola mai ai; O le faasala foi lenei o le lalolagi; ina ua oo mai le malamalama i le lalolagi, a o tagata, e sili lo latou manao i le pouliuli i lo latou manao i le malamalama; aua e leaga a latou amio. Na aoaoina mai ma le manino lenei mea e le Faaola, o le tagata e tau lava ina faia se mea e le tatau ona faia le mea sese lea.

“… A oo ina faaalia e auauna a le Atua le upu moni, ua fai ma masani a tagata le faapea mai, O mea lilo mea uma; ua latou tautatala i faataoto, ma, o le mea lea, e le mafai ai ona malamalama i ai. E moni lava e i ai o latou mata e vaai ai, ae le vaai lava, ae e leai lava se e sili atu le tauaso e pei o i latou o e ua le fia vaai; ma, e ui ina fetalaia atu lenei mea e le Faaola i nei ituaiga o tagata, ae na ia faamalamalamaina ma le manino i Ona soo; ma ua i ai ia i tatou le mafuaaga e tatau ai ona tatou matua faamaulalo ai i luma o le Atua o o tatou tama, ona ua Ia tuuina nei mea i faamaumauga mo i tatou, e ese le manino, ma e ui lava i taumafaiga ma uunaiga tuufaatasi a ositaulaga a Paala, na le i ai lava se mana ia i latou e faatauasoina ai o tatou mata, ma faapogisa ai lo tatou malamalamaaga, pe a fai tatou te faitau ma le tonu, mo sina taimi.”⁷

O le faataoto o le lulu saito ua faaalia mai ai aafiaga o le talaiga o le talalelei; e faaalia mai ai foi na faatuina e le Faaola Lona malo i le vaeluaga o aso.

“I le taimi na fetalai ai le Faaola i nei fetalaiga ma faataoto matagofie o loo i le [Mataio 13], tatou te iloa ai o Ia o loo afio i totonu o se vaa ona o le motu o tagata na lolofi atu ia te Ia e fia faalogo i Lana afioga; ona amata ai lea ona Ia aoaoina i latou, ma faapea atu:

“ ‘Faauta, ua alu atu le tagata lulu saito e lulu ai saito. Ua ia lulu saito, ua pauu ai isi i le auala; ona o ane lea o manu felelei, ma aai ai. Ua pauu foi isi i le mea papa, e itiiti le eleele sa i ai; ona vave tupu ai lea, ona o le eleele ina itiiti; ua alu ae le la, ua velasia; ona magumagu ai lea, ona ua leai ni aa. Ua pauu foi isi i le vao tuitui, ua tutupu ae foi le vao tuitui, ona fetinaiina ai lea. A ua pauu isi i le eleele lelei, ona fua mai ai lea e taiselau i nisi ma taionogafulu i nisi ma taitolugafulu i nisi. O le ua i ai taliga e faalogo ai, ina faalogo mai ia o ia.’ [Mataio 13:3–9.]…

“Ae faalogo i le faamatalaina o le faataoto i le Lulu saito: ‘A faalogo se tasi i le upu o le malo, a e le lagona, ona alu ane ai lea o le ua leaga, ua fao le mea sa luluina i lona loto.’ Ia matau le faamatalaga— le mea sa luluina i lona loto. ‘O le mea lea sa luluina i le auala.’ [Mataio 13:19.] O tagata o e leai ni mataupu faavae o le amiotonu i totonu ia te i latou, ma e tumu o latou loto i amioletonu, ma leai se naunautaiga mo mataupu faavae o le upu moni, e le malamalama i le afioga o le upu moni pe a latou faalogo i ai. E aveesea e le tiapolo le upu moni mai o latou loto, aua e leai se naunautaiga i totonu ia te i latou mo le amiotonu.

“‘A o le mea sa luluina i le mea papa, o le tagata lea ua faalogo i le upu, ona talia loa lea ma le fiafia; a ua leai ni aa ia te ia, ua faaletumau ia; aua pe a tupu le puapuaga, po o le sauaga ona o le upu, ona tausuai loa lea o ia. O le mea sa luluina i le vao tuitui, o ia lea ua faalogo i le upu, a o le loto e popole i mea a lenei lalolagi, ma le pepelo o le oa ua fetinaiina ai le upu, ona le fua mai lava lea. A o le mea sa luluina i le eleele lelei, o ia lea ua faalogo i le upu, ma lagona ai; ua fua mai lava ia, e taiselau i nisi, e taionogafulu i nisi, ae e taitolugafulu foi i nisi.’ [Mataio 13:20–23.]

“Ona faapea ai lava lea ona faamatala e le Faaola Lava Ia i Ona soo le faataoto lea na Ia tuuina atu, ma e leai ni mea lilo po o se pogisa i manatu o i latou o e talitonu maumaututu i Lana afioga.

“Tatou te faia la le faaiuga, o le mafuaaga na ala i le motu o tagata, po o le lalolagi, e pei ona valaaulia e le Faaola, ona latou le mauaina lea o le faamalamalamaga o Ana faataoto, ona o le le talitonu. Ia te outou, ua Ia faapea atu, (ua Ia fetalai ai i Ona soo), ua foaiina atu ia te outou ia outou iloa mea lilo a le malo o le lagi [tagai Mataio 13:11]. Aisea ea? Ona o le faatuatua ma le talitonu o i latou ia te Ia. O lenei faataoto na faia ina ia faailoa ai le aafiaga e maua i le talaiina o le upu; ma tatou te talitonu e i ai se faatatau tonu lava i le amataina, po o le faatuina, o le Malo i le tupuaga lena; o le mea lea o le a tatou faaauau ai pea ona tatou mulimuli i Ana saunoaga faatatau i lenei Malo mai le taimi lena e agai atu i luma, e oo lava i le iuga o le lalolagi.”⁸

O le faataoto o le saito ma le titania e aoaoina mai ai o e amiotonu ma e amioletonu o le a tutupu faatasi seia oo i le iuga o le lalolagi, o le taimi e faapotopotoina ai e amiotonu ma susunuina e amioletonu.

“ ‘Ona Ia tuuina atu ai foi lea o se isi faataoto ia te i latou, ma faapea atu, [o lenei faataoto e i ai sona faatatauga i le faatuina o le Malo, i lena foi tupuaga o le lalolagi,] ua faatusaina le malo o le lagi i le tagata ua luluina le saito lelei i lona fanua; ua momoe tagata, ona alu ane ai lea o le ua ita mai ia te ia, ua na luluina le titania i totonu o le saito, ona alu ese ai lea o ia. Ua totogo ae le saito, a fua mai, ona iloa ai lea o le titania. Ona o mai ai lea o auauna a le matai o le aiga, ua faapea mai ia te ia, Le Alii e, e le o le saito lelei ea na e luluina i lou fanua? O lenei, pe na ifea nei titania? Ona fai atu ai lea o ia ia te i latou, Ua fai lenei mea e se tagata ua ita mai. Ona fai mai ai lea o auauna ia te ia, E te finagalo ea matou te o atu e veleeseina ia mea? A ua fai atu ia, Aua; ina nei outou liai ma le saito pe a outou vele ese le titania. Tuu ia, ia tupu lua pea seia oo i le seleselega; a oo atu i ona po e selesele ai, ou te fai atu ai i e selesele, Ia outou muai faapotopoto mai le titania, ma outou fusia i fusi e susunu ai; a o le saito, tou te faaputuina lea i lo’u fale saito.’ [Mataio 13:24–30.]

“O lenei tatou te aoao mai i lenei faataoto, e le gata i le faatuina o le Malo i aso o le Faaola, lea e faailoa mai e le fatu lelei, lea na fua mai, ae faapena foi mea leaga i le Ekalesia, ia e faailoa mai e titania, ia na totoina e le fili, ia na semanu e se’iina e Ona soo, pe loto ina ia faamama eseina mai le Ekalesia, pe ana taliaina e le Faaola o latou manatu. Ae o Ia, e silafia mea uma, ua faapea mai, Aua le faia. Ua pei ua faapea mai lava, o o outou manatu ua le sa’o, o le Ekalesia o loo i lona tulaga tau amata, ma afai tou te faia lena tulaga matuia, o le a outou faatamaiaina le saito, po o le Ekalesia, faatasi ai ma le titania; o le mea lea e sili ai le tuu pea o i latou e tutupu faatasi seia oo i le taimi o le seleselega, po o le iuga o le lalolagi, o lona uiga o le faaumatiaina o le amioleaga, lea e lei oo mai le taimi e faataunuuina ai. …

“ ‘… Ona oo mai ai lea ia te Ia o Ona soo, ua faapea mai, Ia e faamatala mai ia te i matou le faataoto i le titania i le fanua. Ona tali atu ai lea o ia, ua faapea atu ia te i latou, O le lulu le saito lelei, o le Atalii lea o le tagata; a o le fanua, o le lalolagi lea; o le saito lelei, o tagata ia o le malo; o le titania, o le fanau ia a le ua leaga.’ [Mataio 13:36–38.]

“O lenei ia matau e o tatou tagata faitau le faaupuga—‘o le fanua o le lalolagi lea, …o le titania o le fanau ia a le ua leaga, o le ua ita mai na na luluina ia mea, o le tiapolo lea, o le seleselega o le gataaga lea o le lalolagi, [ia latou matau ma le faaeteete lenei faaupuga—o le gataaga o le lalolagi,] a o e selesele o agelu ia.’ [Mataio 13:38–39.]

“O lenei e leai lava se mafuaaga e tatau ai ona faapea mai tagata o lenei [faataoto] e i ai sona uiga lua loloto, pe e ese foi lona uiga ma le mea o loo fai mai ai, aua o loo Ia faamatalaina mai mea na Ia fetalai mai ai muamua i faataoto; ma e tusa ai ma lenei gagana, o le gataaga o le lalolagi o le faaumatiaina lea o e amioleaga; o le seleselega ma le gataaga o le lalolagi e faatatau tonu lava lea i le aiga o le tagata i le aso gataaga, ae le o le lalolagi, e pei ona manatu i ai le toatele, ma le tulaga o le a muamua mai i le afio mai o le Atalii o le Tagata, ma le toefuataiina mai o mea uma lava e pei ona fetalaia mai e le fofoga o perofeta paia uma lava talu mai le amataga o le lalolagi; ma o agelu e i ai lo latou sao i lenei galuega taua, aua o i latou ia o ē selesele.

“ ‘O lea, e pei ona faaputuina ai o le titania ma susunuina i le afi, e faapea foi ona faia i le gataaga o lenei lalolagi’ [Mataio 13:40]; o lona uiga, a o o atu auauna a le Atua e lapatai atu i nuu uma, o ositaulaga foi faatasi ma tagata, ae o loo faamaaaina o latou loto ma teteeina le malamalama o le upumoni, e tuuina atu muamua i latou ia i tu’iga a Satani, ae faamaufaailoga le tulafono ma fusifusia le mau, … ona tuua ai lea o i latou i le pouliuli, ma tuuina atu i le aso o le faatafunaga; ua faapea lava ona saisaitia i o latou lava talitonuga, ma faamalosia ai o latou noanoataga e a latou ositaulaga, ua saunia [i latou] mo le faataunuuina o le fetalaiga a le Faaola—‘E aauina atu e le Atalii o le Tagata ana agelu, latou te faapotopotoina nai lona malo mea uma e tausuai ai ma e amioleaga, ma lafoina i latou i totonu o le ogaumu aasa; e i ai le tagiaue ma le lilivau o nifo.’ [Mataio 13:41–42.]

“Ua tatou malamalama o le galuega o le faaputuina faatasi o le saito i le fale e tuu ai saito, po o faaputuga, o le a faataunuuina a o fusifusi titania ma saunia mo le aso o le faatafunaga; ma a mavae le aso o le faatafunaga, ‘ona pupula ai lea o e amiotonu e pei o le la i le malo o lo latou Tama. O le ua i ai taliga e faalogo ai, ina faalogo mai ia o ia.’ [Mataio 13:43].”⁹

O le faataoto o le fatu sinapi ua aoaoina mai o le Ekalesia ma le malo o le Atua, lea e faatuina i nei aso e gata ai, o le a salalau i le lalolagi atoa.

“Ma o lenei foi, na tuuina atu foi e Ia ia te i latou se isi faataoto, ua i ai le faatatau i le Malo lea e tatau ona faatuina i luma tonu lava o le seleselega po o le taimi foi o le seleselega, lea e faitauina faapea—E tusa le Malo o le Lagi ma le fua o le sinapi, ua ave e le tasi tagata, ma toto i lona fanua; e itiiti lava ia i fua o laau uma; pe a uma ona tupu, e sili ia i laau afu, e iu ina fai ma laau tele, e o mai manu felelei, ma latou momoe i ona la.’ [Mataio 13:31–32.] O lenei e mafai ona tatou iloaina manino o lenei faailoga ua tuuina mai e faailoa mai ai le Ekalesia e pei ona o le a oo mai i aso gataaga. Faauta, ua faatusaina i ai le Malo o le Lagi. O lenei, o le a se mea ua faatusa i ai?

“Sei o tatou vaai i le Tusi a Mamona, lea na aveina e se tagata ma nanaina i lana faatoaga, ma faamautuina i lona faatuatua, o le a tupu ae i aso gataaga, po o le taimi ua atofaina; se i o tatou vaai atu i ai ua alu a’e mai le eleele, faauta o lea na ta’ua o le fatu pito sili ona itiiti o fatu uma, ae faauta ia ua falala ona lala, ioe, ua matua tupu tele ma ona lala maualuluga e pei o le mamalu o le Atua, seia, e pei o le fatu sinapi, avea ma laulaau silisili ona maoae o laau uma. Ma o le upu moni, ua tupu a’e mai le lalolagi, ae vaavaai ifo foi le amiotonu mai le lagi [tagai Salamo 85:11; Mose 7:62], ma ua auina ifo e le Atua Ona mana, o Ana meaalofa, ma agelu e momoe ai i ona lala.

“O le Malo o le Lagi e pei o se fatu sinapi. Faauta, foi, e le o le Malo ea lenei o le Lagi o loo sii a’e lona ulu i le aso gataaga i le mamalu o lona Atua, e oo lava i le Ekalesia o aso e Gata Ai, e pei o se papa e le ma tu’ia ma le ma fulieseina i le totonugalemu o le sami loloto, e mafai ona aafia i afa ma matagi malolosi a Satani, ae o lea e oo mai lava i lenei taimi, o tumau mausali pea, ma o loo tetee atu pea i mauga o galuega a le tetee, ia o loo uunaiina mai e matagi matautia o vaa o loo magoto ifo, ae o lea na alu atu vave ma o loo alu atu vave pea ma lona galu sisina maoae i ona mata; o loo uunaia i le faaluaina o le ita tele o le fili o le amiotonu?. …

“O … ao o le pouliuli ua leva ona sasa e pei o galu matautia i luga o le maa le masiitia o le Ekalesia o Aso e Gata Ai; ae ui lava i nei mea uma, o loo alu ae pea i luga ona lala maualuluga, alu ae pea ma alu ae atili pea i luga, ma faalauteleina ia lava ia matua lautele ma lautele atili lava; ma o loo taavavale mai pea uili o le kariota o le Malo, o loo uunaia e le aao malosi o Ieova; ma e ui i le tetee uma, o le a taavale atu pea, seia oo lava ina faataunuuina uma Ana afioga.”¹⁰

O molimau a Molimau e Toatolu ma tusitusiga paia o aso e gata ai e pei o le fefete lea na natia i totonu o le luutaga o falaoa; o le faataoto o le upega o loo aoao mai faatatau i le faapotopotoina i le lalolagi atoa.

“ ‘Ua fetalai atu e ia le tasi faataoto ia te i latou, E tusa le malo o le lagi ma le mea faafefete, na ave e le fafine, ma tuu i totonu o le falaoa e tolu tumu, ua oo ina faafefeteina uma ai. [Mataio 13:33.] E mafai ona malamalama o le Ekalesia o Aso e Gata Ai ua fefete i sina fefete na tuu i ai e le au molimau e toatolu. Faauta, i le matua tutusa o lenei [tulaga] ma le faataoto! O loo vave lava ona faafefeteina le palugafalaoa, ma o le a vave ona faafefeteina le mea atoa. …

“‘E tusa foi le malo o le lagi ma le upega ua lafo i le vai, ua maua ai i’a eseese uma, lea ina ua tumu, ona latou toso ae ai lea i le matafaga, ua nonofo i lalo, ma fafao i’a lelei i le ola, a o i’a leaga ua lafoai.’ [Mataio 13:47–48.] Mo le galuega o lenei faataoto, faauta i le fanau a Iosefa, o loo lafoina atu le upega o le Talalelei i luga o le lalolagi, ma faapotopotoina ituaiga uma, ina ia faasaoina i latou o e lelei i maota ua uma ona saunia mo lena faamoemoe, ma o le a pule agelu i e leaga. ‘E faapea foi i le gataaga o le lalolagi—e o atu le au agelu e vavaeese i e amio leaga ma e amiotonu, ona latou lafoina lea ia te i latou i le ogaumu aasa, e i ai le tagiaue ma le lilivau o nifo. Ona fetalai atu lea o Iesu ia te i latou, Ua outou lagona ea nei mea uma? Ua latou fai mai ia te Ia, Ioe, le Alii e.’ [Mataio 13:49–51.] Ma ua tatou faapea, Ioe, le Alii e; ma e faapena foi ona latou faapea, Ioe, le Alii e; aua o nei mea ua matua manino ma mamalu tele, ma o soo se tasi lava o le Au Paia i aso e gata ai e tatau ona tali atu i le Amene ma le loto ia te i latou.

“ ‘Ona fetalai atu lea o ia ia te i latou, o lenei, o tusiupu uma o e ua aoaoina i le Malo o le Lagi, e tusa i latou ma le matai o le aiga, ua aumai mea fou ma mea tuai mai lona fale oloa.’ [Mataio 13:52.]

“Mo galuega ua ta’ua i lenei faataoto, tagai i le Tusi a Mamona ua tula’i mai le fale oloa o le loto. E faapena foi feagaiga ua tuuina mai i le Au Paia o Aso e Gata Ai [le Mataupu Faavae ma Feagaiga], faapena foi le faaliliuga o le Tusi Paia—ia ua aumaia mai le loto o mea fou ma mea tuai, ma fai ai ma faatusa o luutaga e tolu o falaoa o loo faataunuuina le faamamaina e ala i le pa’i mai o se faaaliga a Iesu Keriso, ma le galuega a agelu, o e ua amataina lenei galuega i aso e gata ai, ia e fai ma faatusa o le fefete lea na faafefeteina ai le pulugafalaoa atoa. Amene.”¹¹

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau vii–xii.

Toe iloilo itulau 313–14. O le a se mea e mafai ona tatou aoaoina mai le faataitaiga a Iosefa Samita ina ia fesoasoani ia i tatou ia tatou lava suesuega i tusitusiga paia?
Toe iloilo le faamalamalamaaga a Iosefa Samita i le mafuaaga na ala ai i nisi taimi ona aoao atu le Faaola i le faaaogaina o faataoto (itulau 315–16) A o tatou aoaoina upu moni o le talalelei, o le a sou manatu i le uiga o le vaai i o tatou mata ma faalogo i o tatou taliga? Aisea e te manatu ai o le a aveesea le malamalama mai ia i tatou pe a fai tatou te le naunautai e talia le malamalama sili atu? Mafaufau i le mea e tatau ona e faia e maua atili ai le malamalama o le talalelei.
Suesue le faataoto i le lulu saito (itulau 316–18). I lenei faataoto, o loo faaalia ai e le Faaola o feau faaletalalelei lava e tasi e mafai ona maua ai aafiaga eseese e fuafua lava i ala e taliaina ai e tagata. Aisea e le mafai ai e le afioga a le Atua ona tupu i tagata “o o latou loto na tumu i agasala ma amioleaga”? Aisea e taitaiina ai nisi e mafatiaga ma sauaga ina ia tuueseina le afioga a le Atua? O a ni auala atonu e mafai ai e “le loto popole i mea a lenei lalolagi” ma le “pepelo o le oa” ona titinaina le upu i totonu o i tatou?
E faapefea ona tatou faamautinoaina o loo lelei lo tatou “eleele” pe a oo ina totoina le upu i totonu o i tatou? O a mea e mafai ona fai e matua e fesoasoani ai i fanau e saunia o latou loto e taliaina le upu?
I le faataoto o le saito ma le titania (itulau 319–21), o le saito e faatusa lea i e amiotonu, po o “o tagata ia o le Malo.” O le titania, o le fanau ia a le ua leaga.” E faapefea ona tatou tumau i le faatuatua e ui lava o loo faatagaina le “titania” e tutupu faatasi ma le “saito”? E faapefea e le Mataupu Faavae ma Feagaiga 86:1–7 ona fesoasoani ia te oe ia e malamalama i le faataoto?
O a ni auala o loo avea ai le Ekalesia i aso nei e faapei o le tuputupu ae o le laau o loo i le faataoto o le fatu sinapi? (Mo ni faataitaiga, tagai itulau 321–22.)
Toe iloilo itulau 322–23. Matau o le fefete o se gaosiga lea e faatupuina le fefete o le falaoa. O a ni auala e avea ai tusitusiga paia o aso e gata ai ma fefete mo le Ekalesia? E faapefea ona avea i latou ma fefete mo oe lava ia? E faapefea ona avea tusitusiga paia o aso e gata ai e faapei o oa “o mea fou ma mea tuai”?
I le faataoto o le upega faatalalelei (itulau 322–23), aisea e te manatu ai e taua le mauaina o i’a o ituaiga eseese uma? O faapefea ona faataunuuina lenei faataoto i le aso?

Mau E Faatatau I Ai: Luka 8:4–18; Alema 12:9–11; MFF 86:1–11; 101: 63–68