Faaaliga 1–11

• Talu ai ona sa faaaoga e Ioane ia ata ma faatusa i le Faaaliga 1 e faamatala ai le Faaola toetu ma Ana faatinoga, o le suesueina o le mataupu lenei o se auala maoae lea e atinae ai le faatuatua e faapea, o loo soifua o Ia ma o loo Ia taitaia Lana Ekalesia. Atonu e mafai e tagata o le vasega ona tusi i luga o le laupapa ni fasifuaitau mai le Faaaliga 1 o loo aofia ai ata po o faafaatusa ma faasoa mai po o le a se mea o aoao mai e ia mea taitasi ia i latou e uiga ia Iesu Keriso. Mo se faataitaiga, o a ni mea ua tatou aoao mai i nei faailoga e uiga i le auala o loo taitai ai e Keriso ia Lana Ekalesia i aso nei? O le a le faatusatusaga o le faamatalaina e Ioane o le Faaola i le faamatalaga o loo i le Mataupu Faavae ma Feagaiga 110:1–4?

• Ua pei i tatou o le Au Paia sa tusi atu i ai Ioane i se tasi o auala: tatou te fetaiai ma faigata. Valaaulia tagata o le vasega e sue i le Faaaliga 2–3 ma faailoa mai tofotofoga sa fetaiai ma le Au Paia i aso o Ioane, ma fesoasoani ia latou iloa sa silafia e Iesu Keriso ia tofotofoga ma malosiaga o paranesi taitasi. Atonu e mafai ona latou faasoa mai ni aafiaga na faapea ona latou lagonaina ai, sa silafia lava e le Faaola o latou tulaga ese. O le a le fautuaga na tuuina mai e le Alii i le Au Paia lea e mafai foi ona fesoasoani e faatoilalo ai o tatou faafitauli?

• I nei lava foi mataupu, sa fofogaina ai e le Alii ni folafolaga musuia ia i latou o e manumalo mai tofotofoga. E mafai ona e valaauliaina tagata o le vasega e galulue i ni paga e saili i le Faaaliga 2–3; 7:13–17 e sue ai folafolaga a le Alii. Atonu foi e mafai ona latou tusia ni ata e faatusa i nisi o nei folafolaga, ona faasoa mai lea i le vaega ia mea latou te maua. E faapefea ona musuia e nei folafolaga i latou ia faaauau ona taumafai e faatoilalo o latou lava tofotofoga ma vaivaiga?

• Mata o le a fesoasoani se lesona faatino e malamalama ai lau vasega i le faafaatusa i le Faaaliga 5 e uiga i le tatalaina e le Faaola o le tusi na faamaufaailogaina? Atonu e mafai ona e aumaia se meaai itiiti i totonu o se koneteina e loka e faasoa atu i le vasega. A o lei amataina le vasega, ia tuu atu faanana i se tagata le ki o le loka. Faamatala atu i le vasega le mea o loo i totonu o le koneteina, ma tuu atu i nisi o le vasega e taumafai e tatala le pusa ona faatoa tatala ai lea e le tagata o loo i ai le ki. Ona faatusatusa lea e le vasega lenei lesona faatino i le Faaaliga 5. Atonu e fesoasoani ia fesili e pei o nei: E faapefea ona faapei le faaolataga o le fanau a le Tama Faalelagi o le koneteina na loka po o le tusi na faamaufaailogaina? Aisea ua na o Iesu Keriso ai e mafai ona tatalaina ia faamaufaailoga? (tagai i le upusii i le “Punaoa Faaopoopo”). O a faamanuiaga sa faalagolago i le agavaa o le Faaola e tatalaina ia faamaufaailoga? (tagai Faaaliga 7:14–17).

• E pei o tagata fiafia o loo taua i le Faaaliga 5, o aso nei, e mafai foi ona sii a’e o tatou leo e vivii i le Faaola o Le ua agavaa e ofoina mai ia i tatou le faaolataga. Atonu e mafai e tagata o le vasega ona usu faatasi nisi o viiga o le faamanu e sili ona fiafia i ai e uiga i le Faaola. Mo se faataitaiga, e mafai ona outou usuina le “Mamalu i le Atua” (Viiga, nu. 40; po o le matamata i le vitio “Worthy Is the Lamb” i le LDS.org) ma faailoa mai upumoni o loo aoao mai e lenei viiga e uiga ia Iesu Keriso. O a ni aafiaga na fesoasoani tatou te maua ai ni molimau e uiga i nei upumoni? O a ni mea e tutusa ai lo tatou vaai i le va o savali o a tatou viiga o le faamanu ma folafolaga o loo i le Faaaliga 5:9–14? E mafai faapefea ona tatou faaaogaina lelei ia viiga i le aiga ma i le lotu e tapuai ma vivii ai i le Alii?

• O leFaaaliga 7 o loo faamatala ai mea e tutupu o le “faamaufaailoga lona ono,” o nisi o ia mea ua faatusa i o tatou aso. Ua tali ai foi le fesili o loo i le faaiuga o le mataupu e 6: “Ua oo mai le aso tele o lona toasa, o ai foi se na te mafaia ona tu atu?” (fuaiupu 17). Atonu e mafai e tagata o le vasega ona vaavaai mo tali i lenei fesili i le mataupu 7. O nisi nei o fesili e mafai ona latou talanoaina: Aisea na faatuai ai e le Alii ona faatamaia le lalolagi mo se taimi? E faapefea ona “faamau ai [e sauniga ma feagaiga] i [tatou] mo le aso o le a sasaa mai ai ma le lē fuaina le toasa o le Atua”? (MFF 1:9). O le a la tatou galuega i le sauniaina o le lalolagi mo le Afio Mai Faalua? E mafai e le Mataupu Faavae ma Feagaiga 1:4–23; 77:8–11 ona tuuina mai ni malamalamaaga loloto faaopoopo.

• Atonu e faigata i nisi o tagata o le vasega ona malamalama i le Tusi o Faaaliga. Atonu o le a aoga pe a latou mafaufau i tusitusiga a Ioane i le anotusi o le fuafuaga a le Tama Faalelagi e faaeaina Ana fanau. A o faitau e tagata o le vasega le Faaaliga 1–11 i le fale, atonu na latou maua ai upumoni e faapea ona fesoasoani latou te malamalama ai i le fuafuaga a le Tama Faalelagi mo Lana fanau (tagai otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga). Valaaulia i latou e faasoa mai mea na latou maua. Atonu foi latou te iloa le aoga o le toe faamanatu o le vaega i le “Punaoa Faaopoopo” o loo faaautuina “O mau e uiga i le ata o le faaolataga.” Ia uunaia tagata o le vasega e faaauau ona vaavaai mo mau o loo aoao mai ai upumoni e uiga i le ata o le faaolataga, a o latou faitau i mataupu o totoe o le Faaaliga, ma tuu atu ia i latou se avanoa i le taimi o lesona i le lumanai e faasoa mai ai mea latou te mauaina.

O le faamatalaina o mea na tutupu i le muai olaga, sa aoao mai ai Elder Jeffrey R. Holland:

“Sa ofo atu ai Keriso e faamamaluina le saolotoga lelei o tagata uma, ae Ona tauaveina uma a latou agasala. I le faatinoina, o le a Ia faafoi i le Tama le mamalu uma mo lena alofa faaola.

“O le Togiola le gata mai a Keriso na mafai ona taunuu ona (1) Ua na o Ia le tagata ua ola i le lalolagi e leai sana agasala ma o le mea lea na le mafai ai ona oo le oti faale-agaga, o le iuga o le agasala, ia te Ia, (2) Ua na o Ia le Alo Pele o le Atua ma o lea na i ai ia te Ia uiga faa-atua na mafai ai ona Ia maua le mana e manumalo ai i le oti faale-tino, ma (3) e foliga mai ua na o Ia ua atoatoa lona loto maualalo ma loto i ai i le fono tele i le muai olaga e muai faauuina i lena auaunaga” (“O Le Togiola a Iesu Keriso,” Ensign po o le Liahona, Mat. 2008, 35).