1–3 Ioane; Iuta

• E mafai faapefea ona e fesoasoani ia i latou o e aoaoina ina ia iloa le malamalama ma le alofa o le Tama Faalelagi i o latou olaga? Atonu e te amata i le tusia o upu malamalama ma le alofa i luga o le laupapa. Fai atu i tagata o le vasega e faasoa mai ia upu muamua lava na oo atu i o latou mafaufau ina ua latou mafaufau i nei upu e lua. E mafai ona e vaevaeina le vasega i ni vaega ma tofi atu i vaega taitasi se tasi o fuaitau o mau nei: 1 Ioane 1:5–10; 2:3–11; 3:1–3; 4:7–12; 4:16–21; 5:1–3. E mafai e vaega ona sailiili i nei fuaiupu mo faamaoniga o le malamalama ma le alofa o le Atua ma mo mea e mafai ona tatou faia e faaali atu ai lo tatou alofa mo le Atua ma Lana fanau. Ona faasoa mai lea e tagata mai vaega taitasi i le vasega mea na latou maua. E mafai foi ona e valaaulia tagata o le vasega e faasoa mai ni aafiaga o se taimi sa latou lagonaina ai le malamalama ma le alofa o le Tama Faalelagi.

• E mafai faapefea ona e fesoasoani i tagata o le vasega e mafaufau loloto i le malamalama faaleagaga i o latou olaga? E mafai ona e valaaulia tagata o le vasega e tilotilo i se moli i le faalo po o le malamalama e sau mai i se faamalama ma faasoa mai se mea latou te iloa e uiga i le malamalama faaletino. E faapefea ona faapei le malamalama faaletino o le malamalama faaleagaga? Atonu e mafai ona e sailiili i le Salamo 27:1; Ioane 1:4–5; 1 Ioane 1:5–7; 3 Nifae 11:11; Mataupu Faavae ma Feagaiga 88:6–13 ma vaavaai mo ni malamalamaaga manino faaopoopo i le ala e tuuina mai ai e le Atua ma Lona Alo le malamalama i o tatou olaga. E mafai foi e tagata o le vasega ona faasoa mai ni aafiaga i se taimi na latou sailia ma maua ai le malamalama faaleagaga i o latou olaga.

• Atonu o le a fiafia tagata o le vasega e usu faatasi pe faalogologo i se pese e uiga i le malamalama, e pei o le “O Iesu Lo’u Sulu” (Viiga, nu. 49). O le a se mea ua aoao mai e le pese e uiga i le ala e pei le Alii o se malamalama? O le vitio “Choose the Light” (LDS.org) ma le saunoaga a Elder Robert D. Hales i le “Punaoa Faaopoopo” e mafai ona ofoina mai nisi malamalamaaga e uiga i auala e maua ai le malamalama sili atu i o tatou olaga.

• Atonu o loo tauivi nisi o tagata o lau vasega po o e pele ia i latou i le luiina o aoaoga sese o loo faamatauina o latou faatuatua. Atonu e aoga ia i latou le aoao i mea sa aoao mai e Ioane ma Iuta e uiga i le liliuese. Mafaufau e valaaulia le afa o le vasega e sailiili mo faamatalaga o aoaoga sese po o le liliuese i le 1 Ioane 2:18–23, 26–28; 4:3; 2 Ioane 1:7–11; 3 Ioane 1:9–11 ae o le isi afa e sailiili mo faamatalaga faapena i le Iuta. Pe e mafai foi ona latou vaavaai mo tali i fesili e pei o nei: O faapefea ona faamatala e Ioane ma Iuta se anetikeriso? (tagai foi i le Guide to the Scriptures, “Antichrist,” scriptures.lds.org) Pe o i ai se mea i nei fuaiupu e foliga mai e faapitoa le faatatau i luitau o loo tatou feagai i aso nei? E mafai faapefea ona tatou puipuia i tatou lava e faasaga i aoaoga sese?

• O loo faaaoga e Iuta ia ata mataina e faamatala ai faiaoga sese, po o i latou o e “upu leaga i mea latou te le iloa” (Iuta 1:10). Atonu e te valaaulia ni nai tagata o le vasega e tusi i luga o le laupapa nisi o ata o loo faamatalaina i le Iuta 1:12–13 ae mate e isi tagata o le vasega po o le fea le fasifuaitau o loo tusi e le tagata le ata. E faapefea ona avea nei ata ma faatusa o faiaoga sese ma anetikeriso? Mo se faataitaiga, e faapefea ona fai e faiga piopio ia “papa i o [tatou] faigaai alofa”? O le a se mea e mafai ona tatou faia e puipui ai i tatou lava faasaga i “tagata tauemu”? (tagai Iuta 1:18–21). Aisea atonu na fautua mai ai Iuta ia tatou “alofa atu” (Iuta 1:22) ia i latou o e tauemu i le talalelei?

• O se tasi o gaoioiga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga o loo fautuaina ai le sailiili i le 1 Ioane 5 e iloa ai auala e mafai ona tatou faatoilalo ai le lalolagi. Atonu e mafai ona e valaaulia tagata o le vasega e faasoa mai ni mea sa latou maua ma tusi i luga o le laupapa. (Atonu e te manao e tuu atu sina taimi ia i latou i le vasega e toe faamanatu puupuu ai le mataupu.) Pe e mafai ona e valaaulia le vasega e faitau vaega o le savali a Elder Neil L. Andersen “Manumalo i le Lalolagi” (Ensign po o le Liahona, Me 2017, 58–62) ma faasoa mai mea ua latou aoaoina. Mo se faataitaiga, o a ni malamalamaaga manino latou te maua mai i tala sa faasoa mai e Elder Andersen e uiga ia Peresitene Tavita O. Makei ma Elder Bruce D. Porter? Atonu e mafai e tagata o le vasega ona faasoa mai a latou lava faataitaiga o tagata o e latou te manatu na faia ni taumafaiga e faatoilalo ai le lalolagi.

  Ata

  o se aiga o loo tootutuli faatasi i le tatalo

• Atonu o loo i ai ni tagata i lau vasega o e e mafai ona fesootai i le mea na lagona e Ioane ina ua ia fai mai sa “leai [sona] fiafia e sili” nai lo le faalogo atu o loo savali Kaio (o se tasi o ana “fanau”) i le upumoni. Atonu o le a faamanuiaina tagata o le vasega mai le faalogo atu i aafiaga o le tasi ma le isi. Atonu e mafai ona e amata i le faitau faatasi o le 3 Ioane 1:1–4 ma mau o loo i le “Punaoa Faaopoopo.” O a mea o aoao mai e nei mau ia i tatou e uiga i le puna o le olioli moni? E mafai e tagata o le vasega ona talanoa e uiga i o latou lagona o ni matua, faifeautalai, taitai o le Ekalesia, po o faiaoga ina ua latou iloa o loo savavali tagata sa latou aoaoina i le upumoni. Atonu e te faafesootaia ni nai tagata o le vasega ao lei faia le vasega ma fai atu ia i latou e aumai ni ata o tagata sa latou fesoasoani e aumai ia Keriso ma faamatala e uiga i o latou aafiaga.

Na aoao mai e Elder Robert D. Hales le auala e mafai ona tatou aveesea ai le pouliuli mai o tatou olaga ae savavali i le malamalama:

“A o ou laitiiti, e masani ona ou tietie mai la’u uila i le fale, pe a uma a’oga pasiketipolo i le po. Ou te tago faapipii se afi e pei o se foliga o se pea, i le pa’u o la’u uila. Afai la ou te viliina [le uila], ona vili lea e le pa’u o se tamai peapea e maua ai le eletise ma maua mai ai si sulu laitiiti o le malamalama. E faatauvaa, ae o se meafaigaluega lelei tele. Peitai, e tatau ona ou viliina ina ia mafai ai ona aoga! Sa vave ona ou aoaoina afai e tuu lo’u viliina o la’u uila, ona pe foi lea o le sulu. Sa ou aoaoina ai foi afai ou te ‘galue ma le naunautai’ [MFF 58:27] i le viliina, ona atili ai lea ona malamamalama le sulu, ma aveesea ai le pogisa sa i o’u luma.

O le faaolaolaina o le malamalama faaleagaga, e maua mai i aso taitasi i taumafaiga faaleagaga. E maua mai i le tatalo, suesue i tusitusiga paia, anapogi, ma le auauna atu—e maua mai le ola ai i le talalelei ma le usitai i poloaiga” (“Nai le Pouliuli i Lona Lava Malamalama e Matua Ofo Ai,” Ensign, Me 2002, 71).

• Teuteronome 6:6–7

• Faataoto 22:6

• Ioane 4:36

• 1 Tesalonia 3:9

• Mosaea 4:14–15

• Alema 17:1–2; 26:11–37

• Mataupu Faavae ma Feagaiga 18:10–16; 50:22