Faaaliga 12–22

• O le aoao e uiga i le Taua i le Lagi e mafai ona fesoasoani tatou te malamalama lelei ai i le olaga i le lalolagi. E mafai ona faitau e tagata o le vasega le Faaliliuga a Iosefa Samita, Faaaliga 12:7–11 (i le faaopoopoga i le Tusi Paia) ma faailoa mai auala sa tatou manumalo ai ia Satani ma ana au i le Taua i le Lagi. O a nisi malamalamaaga manino tatou te maua mai tusiga e uiga i le Taua i le Lagi i le Bible Dictionary po o le Gospel Topics? (topics.lds.org). O a ni mea ua tatou aoaoina e mafai ona fesoasoani tatou te faatoilalo ai le fili ao tatou iai i o tatou olaga faitino?

• O le a le uiga o le Tamai Mamoe na “fasia talu ona faavaeina o le lalolagi”? (Faaaliga 13:8; tagai foi i le Faaaliga 5:6). Mafaufau e fesoasoani atu i tagata o lau vasega i le sailia o tali i le fesili i le faitauina o le Mosaea 3:13 ma le Mose 7:47 o se vasega. O le a le uiga o le manumalo ia Satani “ona o le toto o le Tamai Mamoe”? (Faaaliga 12:11).

• E faalemanaia tele le faitau e uiga i le amioleaga o Papelonia ma lona pau i le Faaaliga 17–18, ae e aoga ona e mafai ona avea Papelonia ma se faailoga o le lalolagi amioleaga o loo tatou ola ai nei. Atonu e mafai ona e vaevaeina nei mataupu i vaega toalaiti o tagata o le vasega ma fai atu ia i latou e vaavaai mo tali i fesili e pei o nei: Aisea na ta’iina atu ai tagata i Papelonia, po o le faalelalolagi? Aisea e matautia ai Papelonia? O le a le mea o le a tupu ia Papelonia? O a ni lapataiga na tuuina mai e Ioane e fesoasoani ai ia i tatou e aloese mai le iuga o Papelonia?

• A uma ona faitau le Faaaliga 18:4, atonu o le a mananao tagata o le vasega e talanoa i auala e mafai ona latou “o ese ia” Papelonia “ina nei faatasia outou i ana agasala.” Mo se faataitaiga, o a ni mau po o ni savali mai taitai o le Ekalesia na fesoasoani ia i tatou e tetee ai i faaosoosoga a Papelonia, po o le lalolagi? Mafaufau e matamata le vitio “Dare to Stand Alone” po o le “Separating Ourselves from the World” (LDS.org) pe faitau i le saunoaga a Elder Quentin L. Cook i le “Punaoa Faaopoopo.” O a ni manatu e mafai ona faasoa mai e tagata o le vasega e uiga i auala e faaaoga ai mataupu faavae e lua na ta’ua e Elder Cook? O le a le lagona tatou te “o ese” ai mai Papelonia? (tagai, mo se faataitaiga, MFF 133:12–14). O le a se mea e mafai ona tatou faia e uunaia ai isi ia faia lea lava mea e tasi?

• O le Afio Mai Faalua o Iesu Keriso e masani ona ta’ua “o le aso tele ma le silisili o Ieova” (Ioelu 2:31), ma e faavae i le Faaaliga 19–20, o lena mea e foliga mai o se faamatalaga lelei lea. Mafaufau e tusi i luga o le laupapa nisi o mea e tutupu o loo faamatalaina i le Faaaliga 19:5–20:15. Valaaulia tagata o le vasega e sue ia fuaiupu o loo faamatala mai ai nei mea e tutupu. Aisea ua taua ai nei mea e tutupu e tele ma le silisili? O a ni mea tatou te aoao mai i nei fuaiupu e uiga i le Faaola ma i latou o e mulimuli ia te Ia? O a ni mea e mafai ona tatou faia i le taimi nei ina ia i ai faatasi ma i latou o e o le a olioli i le taimi o Lona afio mai?

• Ina ia musuia se talanoaga e uiga i le tusi o le ola, e mafai ona e valaaulia tagata o le vasega e fai se tusi faigofie e ala i le gagau vaefa o se fasipepa. Ona latou faitauina lea o le Faaaliga 20:12–15, mafaufau i mea latou te mananao e tusi e uiga ia i latou i le tusi o le ola, ona tusi lea o na mea i totonu o a latou tusi. (E mafai ona maua le faauigaga o le “tusi o le ola” i le “Punaoa Faaopoopo.”) O a ni o tatou lagona pe afai na valaauina i tatou e o atu i luma o le nofoalii o le Atua i le aso? Mafaufau e faaaoga le savali a Elder Jörg Klebingat “Faalatalata Atu i le Nofoalii o le Atua ma le Lototele” (Ensign po o le Liahona, Nov. 2014, 34–37) o se vaega o le talanoaga. E mafai foi ona outou toe faamanatuina le savali a Elder Jeffrey R. Holland “Ia Atoatoa Ona Lelei o La Outou Amio—I Le Iuga” (Ensign po o le Liahona, Nov. 2017, 40–42). O a ni mea o saofaga ai nei savali i lenei talanoaga e uiga i le saunia mo le Aso o le Faamasinoga?

• E ui ua valoia o aso amuli o le a tumu i le amioleaga ma faigata, ae o le taui sa vaaia e Ioane mo e faamaoni e sili mamao atu nai lo o faafitauli e muamua atu ai. Ina ia fesoasoani i tagata o le vasega e suesue i lenei faaiuga matagofie i le Faaaliga, e mafai ona e valaaulia i latou e toe faamanatu le Faaaliga 21:1–22:5, ma vaavaai mo fasifuaitau e musuia ai i latou e taumafai mo le malo selesitila. O a folafolaga ua faia i e faamaoni? E fesoasoani faapefea lenei faamatalaga ia i tatou pe a tatou feagai ma o tatou luitau ma tofotofoga i le taimi nei?

Na aoao mai Elder Quentin L. Cook:

“E le mafai ona tatou mulimuli i le lalolagi. O se olaga punipuni, e le o le tali lea. I se lagona lelei, o le tatou saofaga i le lalolagi o se vaega lea o o tatou luitau ma e taua pe afai o le a tatou atinaeina a tatou taleni. … E tatau i tagata o le Ekalesia ona aofia i le lalolagi i se auala lelei. E faapefea la ona tatou faapaleniina le tatau ona saofaga lelei atu i le lalolagi ma ia le lolo atu i agasala o le lalolagi? (Tagai MFF 25:10; MFF 59:9.) E lua ni mataupu faavae o le a faia se eseesega tele.

“1. Ia faailoa atu i tagata o oe o se tagata tuuto o le Au Paia o Aso e Gata Ai. …

“2. Ia e lagona le mautinoa e uiga, ma le ola ai i ou talitonuga” (“Lessons from the Old Testament: In the World but Not of the World,” Ensign, Fep. 2006, 54–55).

Filipi 4:3; Faaaliga 3:5; 17:8; 2 Nifae 29:11; Alema 5:58; Mataupu Faavae ma Feagaiga 127:6–7, 9; 128:6–7.

“I se tasi itu, o le tusi o le ola o le tuufaatasiga lea o mafaufauga ma amioga a se tagata—o le talafaamaumau o lona olaga. E ui i lea, ua faailoa mai e tusitusiga paia o loo tausia se faamaumauga faalelagi o e faamaoni, ua tusia ai o latou igoa, faapea ma se tala i a latou galuega amiotonu” (Bible Dictionary, “Book of life”).