1 ma le 2 Peteru

• Ina ia fesoasoani ia i latou o loo e aoaoina ia malamalama lelei ma faaaoga le fautuaga a Paulo e uiga i le mauaina o le fiafia i tulaga faigata, e mafai ona e tuu atu i tagata o le vasega ni fasipepa ma fai atu i ai e tusi ai se fasifuaitau mai le 1 Peteru 1:3–9; 2:19–24; 3:14–17; 4:12–19 e mafai ona fesoasoani ia i latou i taimi o tofotofoga ma faigata. I le isi itu o le pepa, e mafai ona latou tusi ai e uiga i se taimi na latou lagonaina ai le filemu po o le olioli i taimi o tofotofoga. E mafai ona faasoa mai e ni nai tagata e ofo mai a latou fasifuaiupu ma o latou aafiaga, ona talanoa lea e tagata o le vasega i mea ua latou aoaoina.

• O se tasi o auala e toe iloilo ai le fautuaga a Peteru o loo i le 1 Peteru 1:3–9; 2:19–24; 3:14–17; 4:12–19 o le valaaulia o tagata o le vasega e mafuafau e uiga i se tasi latou te iloa o loo feagai ma se tofotofoga. Tuu atu ia i latou se taimi i totonu o le vasega e tusi ai se tusi i lena tagata ia aofia ai upumoni mai nei fuaiupu o le a faapea ona faamalosiauina ai lena tagata (tagai foi MFF 121:1–8; 123:17). Ona talanoa lea o tagata o le vasega e uiga i upumoni na latou filifilia.

• I le avea ai ma ni tagata o le Ekalesia a Keriso, ua valaauina i tatou e mulimuli ia Iesu Keriso. O lona uiga o a tatou filifiliga o le a masani ona ese mai filifiliga a isi tagata. E mafai faapefea ona fesoasoani aoaoga a Peteru o loo i le 1 Peteru 1:13–20; 2:1–12 ia i latou o loo e aoaoina ia malamalama lelei ai i le misiona a le Faaola ma mananao ai ia avea atili e pei o Ia? Atonu e mafai ona e valaaulia tagata o le vasega e sailiili i nei fuaiupu e vaavaai ai mo faamatalaga o le uiga o le avea ma “nuu o le Atua” (1 Peteru 2:10) ona talanoa lea i mea latou te maua. Atonu e te faamatala atu o le upu “faatauina mai” o loo i le 1 Peteru 2:9 o lona uiga o le “faatauina” po o le “faapolopoloina” (tagai vaefaamatalaga f). O le a le mea ua aoao mai e le [mau] ia i tatou e uiga i lagona o le Atua ia i tatou ma le auala o loo Ia finagalo tatou te ola ai?

• O le Tusi Muamua a Peteru o loo i ai se tasi o nai faasinoga a le Tusi Paia i le asiasiga a Iesu Keriso i le lalolagi o agaga ina ua mavae Lona maliu—o se mea na tupu ua fesoasoani faaaliga i onaponei ia tatou malamalama atoatoa i ai. Ina ia fesoasoani i tagata o le vasega ia faaloloto atili o latou malamalamaaga i le lalolagi o agaga, e mafai ona e valaaulia i latou e faitau mau nei ma tusi i luga o le laupapa se mea latou te aoao mai ai: Ioane 5:25; 1 Peteru 3:18–20; 4:6; Alema 40:7–14, 21; Mataupu Faavae ma Feagaiga 138:11–32.

  O faamatalaga o loo tuuina mai i le “Punaoa Faaopoopo” ua faaalia ai, o le asiasiga a Keriso i le lalolagi o agaga sa malamalama i ai ma aoaoina atu e le gata e Ana Aposetolo ae faapea foi i faiaoga Kerisiano anamua. O le malamalama ai e faapea, o lenei malamalamaaga sa leiloa i le taimi o le Liliuese Tele, ma ua toefuataiina mai i o tatou aso, e mafai ona fesoasoani i tagata o le vasega e faamalosia ai a latou molimau ia Iosefa Samita ma le Toefuataiga o le talalelei.

• O le talanoaina o le 1 Peteru 3:18–20; 4:6 e mafai ona fesoasoani e musuia ai tagata o le vasega ia auai atili atoatoa i galuega o talafaasolopito aiga ma galuega faalemalumalu. Ina ia faia lenei mea, e mafai ona e vaevaeina le vasega i ni vaega se tolu, ma tuu atu i vaega taitasi se tasi o fesili nei e faatatau i le togiolaina o e ua maliliu: O le a le matafaioi a le Faaola i le togiolaina o e ua maliliu? O le a le matafaioi a i latou o e ua maliliu—o e faamaoni ma i latou o e ua maliliu e aunoa ma se malamalama o le talalelei? O le a la tatou matafaioi? Fai atu i vaega taitasi e toe iloilo le 1 Peteru 3:18–20; 4:6; Mataupu Faavae ma Feagaiga 128:17–18; 138:11–32, 57–59, ma vaavaai mo tali o a latou fesili. Fai atu i vaega taitasi e faasoa mai ni mea na latou aoaoina, ma mafaufau e faasoa atu le upusii a Elder D. Todd Christofferson po o se tasi o vitio o loo maua i le “Punaoa Faaopoopo.” O a ni faamanuiaga ua tatou molimauina a o tatou auai i le aumaia o le faaolataga i o tatou tuaa ua maliliu?

• Ina ia faamalosiauina i latou o loo e aoaoina i a latou taumafaiga ia avea atili e pei o Iesu Keriso, e mafai ona e valaaulia i latou e faailoa mai uiga auaumama faaKeriso o loo faamatalaina i le 2 Peteru 1:1–11. Mafaufau e tusi nei uiga auaumama i le laupapa ma fai atu i le vasega e tau mai o latou uiga. Ona talanoa lea o tagata o le vasega pe faapefea e le atinaeina o se tasi o uiga auaumama ona taitai atu i le atinaega o isi uiga auaumama. Tuu atu se taimi mo i latou e mafaufau loloto ai po o le fea o uiga o le a latou mananao e atinae atili atoatoa (tagai foi Talai La’u Talalelei, 126).

Ata

o se ie lalaga lavelave

Na aoao mai Elder D. Todd Christofferson:

“Ua leva ona tauivi le au failotu Kerisiano ma le fesili, O le a le faasinomaga o le anoano o piliona o tagata o e na ola ma maliliu e aunoa ma se malamalama e uiga ia Iesu? Faatasi ai ma le Toefuataiga o le talalelei a Iesu Keriso, ua oo mai ai le malamalama i le faaolaina o i latou ua maliliu ae lei papatisoina ma le avea ai o le Atua ma se “Atua e sao ona lelei, o se Atua amiotonu, o se Atua foi ua finagalo alofa’ [Alema 42:15].

“Ae peitai a o i ai i le soifuaga lenei, sa valoia e Iesu e faapea, o le a Ia talai atu foi i e ua maliliu [tagai Ioane 5:25]. Ua tau mai e Peteru o lenei mea na tupu i le va o le Faasatauroga ma le Toetu o le Faaola [tagai 1 Peteru 3:18–19]. Sa molimauina e Peresitene Iosefa F. Samita i se faaaliga vaaia e faapea, sa asiasi atu le Faaola i le lalolagi o agaga [tagai MFF 138:30, 33]. …

“O lo tatou naunau ina ia faaolaina e ua maliliu faapea ma le taimi ma punaoa o loo tatou faaaogaina mo lena tautinoga, i mea uma, o se faaalia o a tatou molimau e uiga ia Iesu Keriso. E faaalia ai se faamatalaga e sili ona mamana e mafai ona tatou faia e uiga i Lona tagata ma Lana misiona paia. E molimau mai, muamua, i le Toetu a Keriso; lona lua, i le mamao e le gata mai o Lana Togiola; lona tolu, o Ia o le punavai e tasi o le faaolataga; lona fa, ua Ia faatulagaina tuutuuga mo le faaolataga; ma le lona lima, o le a toe afio mai o Ia” (“O Le Togiolaina o e ua Maliliu ma le Molimau a Iesu,” Ensign po o le Liahona, Nov. 2000, 9–10).

Origen: “Ina ua avea [Iesu] ma agaga [o se agaga], ua aunoa ma le ufiufi o le tino, sa afio o Ia ma agaga o e sa leai ni ufiufi o tino, ma faaliliuina i latou ao latou gauai atu ia te Ia” (i le The Ante-Nicene Fathers, ed. Alexander Roberts and James Donaldson [1907], 4:448).

Hermas: “O aposetolo ma faiaoga o e sa talaia le suafa o le Alo o le Atua, ina ua maliliu i latou i le mana ma le faatuatua i le Alo o le Atua, sa talai atu foi ia i latou o e sa maliliu muamua atu ia i latou” (i le The Apostolic Fathers, trans. J. B. Lightfoot [1898], 472).

• “Their Hearts Are Bound to You”

• “All the Families of the Earth”

• “Will I Do My Part?”