មេរៀនទី ២ ៖ ថ្ងៃទី ២
យ៉ូសែប ស៊្មីធ—ប្រវត្តិ ១:២១-២៦
បុព្វកថា
បន្ទាប់ពីយ៉ូសែប ស្ម៊ីធ បានទទួលការនិមិត្តដំបូងក្នុងឆ្នាំ ១៨២០ ហើយ លោកបានចែកចាយពីបទពិសោធន៍នោះទៅកាន់គ្រូបង្រៀនសាសនាម្នាក់ ប៉ុន្តែគាត់បានច្រានចោលទីបន្ទាល់របស់លោក ។ មនុស្សដទៃទៀតក្នុងសហគមន៍ក៏បានបដិសេធ ហើយបៀតបៀនដល់យ៉ូសែបដ៏វ័យក្មេងនេះដែរ ។ ជនមានឋានៈខ្ពង់ខ្ពស់ក្នុងសង្គមជាច្រើននាក់បានខិតខំរិះគន់លោកដល់សាធារណជន ។ ទោះជាមានការប្រឆាំងយ៉ាងនេះក្ដី យ៉ូសែប ស៊្មីធ នៅតែបន្តស្មោះត្រង់ចំពោះទីបន្ទាល់របស់លោកដដែល ។
យ៉ូសែប ស៊្មីធ—ប្រវត្តិ ១:២១-២៣
សេចក្ដីបៀតបៀនប្រឆាំងនឹងយ៉ូសែប ស្ម៊ីធ បានរីករាលដាលឡើង
ប្រធាន ហ្គរដុន ប៊ី ហ៊ិងគ្លី បានចែកចាយពីបទពិសោធន៍ដែលលោកបានមានក្នុងនាមជាអ្នកផ្សព្វផ្សាយសាសនាវ័យក្មេងមួយរូបនៅទីក្រុង ឡុងដ៏ ប្រទេស អង់គ្លេស ។ នៅពេលអ្នកអានពីដំណើររឿងរបស់លោក សូមពិចារណាពីអ្វីដែលអ្នកអាចនឹងធ្វើប្រសិនបើអ្នកស្ថិតក្នុងស្ថានភាពដូចយុវជនរូបនេះ ។
« [ យុវជនម្នាក់បានមក ] ដល់ផ្ទះរបស់ពួកយើងដោយដើរកាត់ភ្លៀងនាពេលរាត្រីមួយ ។ គាត់បានគោះទ្វារផ្ទះរបស់យើង ហើយខ្ញុំបានអញ្ជើញគាត់ឲ្យចូលក្នុង ។
« គាត់ប្រាប់ថា ‹ ខ្ញុំត្រូវការនិយាយជាមួយនឹងនរណាម្នាក់ ។ ខ្ញុំឯកោណាស់… › ។
« រួចខ្ញុំពោលថា ‹ តើប្អូនមានបញ្ហាអ្វី ? ›
« រួចគាត់និយាយថា ‹ នៅពេលខ្ញុំចូលរួមក្នុងព្រះវិហារមិនបានមួយឆ្នាំផង នោះឪពុកខ្ញុំបានដេញខ្ញុំចេញពីផ្ទះរបស់គាត់ និងឲ្យត្រឡប់ទៅវិញឡើយ › ។ ហើយខ្ញុំពុំដែលបានទៅវិញទេ ›។
« គាត់បានបន្ដថា ‹ ប៉ុន្មានខែក្រោយមក ក្រុមកីឡាក្រិកខិត ដែលខ្ញុំជាសមាជិក បានដកខ្ញុំចេញពីក្រុម រារាំងខ្ញុំមិនឲ្យមានទំនាក់ទំនងនឹងយុវជនដែលខ្ញុំបានធំឡើងជាមួយ និងពីមិត្តភក្ដិជិតស្និតរបស់ខ្ញុំ ›។
« រួចគាត់និយាយថា ‹ កាលពីខែមុន ចៅហ្វាយខ្ញុំបានបណ្ដេញខ្ញុំចេញ ដោយសារតែខ្ញុំជាសមាជិកនៃព្រះវិហារនេះ ហើយខ្ញុំពុំអាចរកការងារផ្សេងធ្វើបានទេ › ។…
« ‹ ហើយយប់មិញនេះ នារីដែលខ្ញុំបានស្គាល់អស់រយៈពេលមួយឆ្នាំកន្លះ បានប្រាប់ខ្ញុំថា នាងពុំរៀបការជាមួយខ្ញុំឡើយ ដោយសារតែខ្ញុំជាពួកមរមន › » ( «The Loneliness of Leadership » [ ថ្ងៃទី ៤ ខែ វិច្ឆិកា ឆ្នាំ ១៩៦៩ ] ទំព័រ ៣ speeches.byu.edu) ។
តើអ្នកធ្លាប់បានទទួលអារម្មណ៍ថាអ្នកត្រូវគេប្រព្រឹត្តមិនល្អដាក់ ឬ រិះគន់ដោយសារតែជំនឿសាសនារបស់អ្នកដែរឬទេ ? តើអ្នកមានអារម្មណ៍ដូចម្ដេចនៅពេលនោះ ?
ទោះជា យ៉ូសែប ស៊្មីធ បានទទួលពរយ៉ាងអស្ចារ្យដោយសារតែលោកនៅតែបន្តស្មោះត្រង់ចំពោះទីបន្ទាល់នៃការនិមិត្តដំបូងរបស់លោកយ៉ាងណាក៏ដោយ ក៏លោកត្រូវបានសាកល្បងជាទម្ងន់ដែរ ។ នៅពេលអ្នកសិក្សានៅថ្ងៃនេះ សូមពិចារណាពីអ្វីដែលអ្នកអាចនឹងរៀនពីរបៀបដែលយ៉ូសែប ស្ម៊ីធ បានឆ្លើយតបទៅនឹងការប្រឆាំងចំពោះទីបន្ទាល់របស់លោក ដែលអាចជួយអ្នកឲ្យស៊ូទ្រាំនឹងការប្រឆាំងដែលអ្នកអាចនឹងប្រឈមមុខនាពេលបច្ចុប្បន្ន ឬ នៅថ្ងៃណាមួយនាពេលអនាគត ។
ក្នុង យ៉ូសែប ស្ម៊ីធ—ប្រវត្តិ ព្យាការីបានប្រាប់ពីការប្រឆាំងដែលលោកបានប្រឈមមុខដោយសារតែទីបន្ទាល់របស់លោក ។ សូមអាន យ៉ូសែប ស្ម៊ីធ—ប្រវត្តិ ១:២១–២៣ ដោយរកមើលពាក្យ ឬ ឃ្លាដែលជួយអ្នកឲ្យយល់ពីអ្វីដែលលោកបានមានបទពិសោធន៍ ។ យោងតាម ខទី ២២ តើនរណាដែលរួមចំណែកធំជាងគេក្នុងការបៀតបៀនដល់យ៉ូសែប ស៊្មីធ ? កាលអ្នកគិតពីវ័យរបស់យ៉ូសែប ស៊្មីធ និងស្ថានភាពនៃជីវិតលោក តើអ្នកគិតថាហេតុអ្វីបានជាការបៀតបៀនចេញពីមនុស្សទាំងនេះអាចក្លាយជាការលំបាកដ៏ធំសម្រាប់លោក ?
សូមកត់ចំណាំឃ្លាដែលនៅជិតចុងបញ្ចប់នៃ យ៉ូសែប ស្ម៊ីធ—ប្រវត្តិ ១:២០ ដែលចាប់ផ្ដើមដោយពាក្យ « មើលទៅហាក់បីដូចជា… » ។ ដោយចាប់ផ្ដើមជាមួយនឹងពាក្យទាំងនេះ សូមអានខគម្ពីរនេះដល់ចប់ ដោយរកមើលមូលហេតុដែលបណ្ដាលឲ្យយ៉ូសែប ស្ម៊ីធ ទទួលការបៀតបៀននេះ ។ យោងតាមយ៉ូសែប ហេតុអ្វីបានជាលោកត្រូវទទួលបទពិសោធន៍នៃការបៀតបៀនដ៏ធំនោះនៅវ័យដ៏ក្មេងបែបនេះ ?
យ៉ូសែប ស៊្មីធ—ប្រវត្តិ ១:២៤-២៦
ទោះជាយ៉ូសែប ស្ម៊ីធ ត្រូវបានគេស្អប់ និងបៀតបៀនយ៉ាងណាក្ដី ក៏លោកនៅតែបន្តស្មោះត្រង់ចំពោះទីបន្ទាល់របស់លោកដែរ
សូមគិតពីដំណើររឿងជាច្រើនអំពីសេចក្ដីជំនឿ និងទីបន្ទាល់ខុសប្លែកពីគ្នាដែលមាននៅក្នុងព្រះគម្ពីរ ។ តើមានតួអង្គណាមួយផ្សេងទៀតនៅក្នុងព្រះគម្ពីរដែលមានលក្ខណៈសម្បត្តិ ឬ ភាពរឹងមាំនៃសេចក្ដីជំនឿដែលអ្នកកោតសរសើរជាខ្លាំងដែរឬទេ ?
-
សូមអាន យ៉ូសែប ស្ម៊ីធ—ប្រវត្តិ ១:២៤ រួចស្វែងរកតួអង្គម្នាក់នៅក្នុងព្រះគម្ពីរដែលយ៉ូសែប ស៊្មីធ កោតសរសើរ ហើយលើកឡើងដោយសារតែការបៀតបៀនដែលលោកបានជួបប្រទះ ។ នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមឆ្លើយសំណួរខាងក្រោមនេះ ៖
-
តើអ្នកគិតថាវាអាចនឹងមានគុណប្រយោជន៍ដូចម្ដេចសម្រាប់យ៉ូសែប ស្ម៊ីធ ដែលបានឃើញរឿងដែលលោកមានដែលដូចគ្នាទៅនឹងរឿងរបស់សាវកប៉ុល ?
-
តើយើងអាចរៀនមេរៀនអ្វីអំពីរបៀបដោះស្រាយឧបសគ្គលំបាកៗពីគំរូរបស់យ៉ូសែប ស្ម៊ីធ ដែលបានសិក្សា ហើយពិចារណាអំពីបទពិសោធន៍របស់ប៉ុល ?
-
មេរៀនមួយដែលយើងអាចរៀនគឺ នៅអំឡុងពេលលំបាក យើងអាចទាញយកភាពរឹងមាំចេញពីគំរូនៃតួអង្គស្មោះត្រង់ជាច្រើនដែលមាននៅក្នុងព្រះគម្ពីរ ។ ( អ្នកអាចនឹងចង់សរសេរគោលការណ៍នេះនៅគែមព្រះគម្ពីររបស់អ្នកក្បែរ យ៉ូសែប ស្ម៊ីធ—ប្រវត្តិ ១:២៤ ) ។
-
សូមសរសេរនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នកអំពីគ្រាដែលអ្នកធ្លាប់ត្រូវបានពង្រឹងដោយការសិក្សាពីបទពិសោធន៍របស់តួអង្គស្មោះត្រង់ដែលមាននៅក្នុងព្រះគម្ពីរ ។
ក្នុងការសិក្សាគោលលទ្ធិ និង សេចក្ដីសញ្ញារបស់អ្នកនៅឆ្នាំនេះ អ្នកនឹងជួបប្រទះតួអង្គជាច្រើនដែលអ្នកអាចរកឃើញ និងជាតួអង្គមានបទពិសោធន៍ដែលអ្នកអាចទាញយកភាពរឹងមាំដែលអ្នកត្រូវការបាន ។
សូមពិចារណាឃ្លានេះចេញពីទីបន្ទាល់របស់ព្យាការីក្នុង យ៉ូសែប ស្ម៊ីធ—ប្រវត្តិ ១:២៥ ៖ « ខ្ញុំបានឃើញការនិមិត្ត ខ្ញុំដឹងថាខ្ញុំបានឃើញការនិមិត្ត ហើយខ្ញុំដឹងថា ព្រះទ្រង់ក៏ដឹងថាខ្ញុំបានឃើញការនិមិត្ត ហើយខ្ញុំពុំអាចបដិសេធរឿងនេះ » ។
-
នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក សូមឆ្លើយសំណួរមួយ ឬ ទាំងពីរនៃសំណួរខាងក្រោមនេះ ៖
-
តើឃ្លានៅក្នុង យ៉ូសែប ស្ម៊ីធ—ប្រវត្តិ ១:២៥ បង្រៀនអ្នកដូចម្ដេចអំពីទីបន្ទាល់នៃការនិមិត្តដំបូងរបស់យ៉ូសែប ស្ម៊ីធ ?
-
តើអ្នកអាចពង្រឹងទីបន្ទាល់របស់អ្នកអំពីការនិមិត្តដំបូងបានយ៉ាងដូចម្ដេច ?
-
-
សូមរំឭក យ៉ូសែប ស្ម៊ីធ—ប្រវត្តិ ១:២៤ រួចសិក្សា ខទី ២៥ ដោយស្វែងរកគោលលទ្ធិ និង គោលការណ៍បន្ថែមដែលអាចជួយអ្នកពេលអ្នកប្រឈមមុខនឹងការផ្ទុយ ឬ អារម្មណ៍ដែលត្រូវបានល្បួងឲ្យរារែកនឹងទីបន្ទាល់របស់អ្នក ។ សូមសរសេរសេចក្ដីពិតបន្ថែមទាំងនេះដែលអ្នករកឃើញនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។
-
សូមជ្រើសរើសសេចក្ដីពិតមួយដែលអ្នកបានរកឃើញចេញពី យ៉ូសែប ស្ម៊ីធ—ប្រវត្តិ ១:២៤–២៥ ។ សូមឆ្លើយនឹងសំណួរខាងក្រោមនេះដោយផ្អែកទៅលើសេចក្ដីពិតដែលអ្នកបានជ្រើសរើសដាក់នៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ។
-
តើព្យាការីយ៉ូសែប ស្ម៊ីធ បានបង្ហាញភស្ដុតាងនៃសេចក្ដីពិតនេះក្នុងជីវិតរបស់លោកយ៉ាងដូចម្ដេច ?
-
តើសេចក្ដីពិតនេះអាចនឹងមានគុណប្រយោជន៍យ៉ាងដូចម្ដេចចំពោះអ្នក ?
-
តើការរស់នៅតាមសេចក្ដីពិតនេះនឹងមានឥទ្ធិពលលើជម្រើសរបស់អ្នកយ៉ាងដូចម្ដេច ឬតើការរស់នៅតាមសេចក្ដីពិតនេះបានមានឥទ្ធិពលលើជីវិតរបស់អ្នកហើយឬនៅ ?
-
គោលលទ្ធិ និង គោលការណ៍បន្ថែមមួយចំនួនដែលអ្នកអាចរកឃើញក្នុង យ៉ូសែប ស្ម៊ីធ—ប្រវត្តិ ១:២៤–២៥ គឺ ៖ ចំណេះដឹងដែលយើងទទួលបានពីព្រះគឺជាចំណេះដឹងពិត ទោះជាលោកិយបដិសេធចំណេះដឹងនោះយ៉ាងណាក៏ដោយ ។ យើងគប្បីខ្វាយខ្វល់ពីអ្វីដែលព្រះទ្រង់មានព្រះទ័យរំពឹងពីយើងជាងអ្វីដែលមនុស្សរំពឹងពីយើង ។ ទោះជាយើងត្រូវគេស្អប់ ហើយបៀតបៀនដោយសារទីបន្ទាល់របស់យើងយ៉ាងណាក្ដី ក៏យើងត្រូវតែបន្តស្មោះត្រង់ចំពោះទីបន្ទាល់របស់យើងដែរ ។
សូមគិតអំពីដំណើររឿងដែលប្រធាន ហ៊ិងគ្លី បានមានប្រសាសន៍ប្រាប់អំពីយុវជនម្នាក់នៅទីក្រុង ឡុងដ៍ ប្រទេស អង់គ្លេស ដែលបានប្រឈមមុខនឹងការប្រឆាំងមួយដ៏ធំដោយសារតែជំនឿសាសនារបស់គាត់ ។ ប្រធាន ហ៊ិងគ្លី បានបន្តតំណាលរឿងរបស់លោកថា ៖
« ខ្ញុំបាននិយាយថា ‹ បើរឿងនេះ ធ្វើឲ្យអ្នកត្រូវបាត់បង់ច្រើនយ៉ាងនេះ ហេតុអ្វីក៏អ្នកមិនចាកចេញពីសាសនាចក្រនេះ ហើយត្រឡប់ទៅផ្ទះរកឪពុកអ្នកវិញ ទៅរកក្រុមកីឡាក្រិកខិតរបស់អ្នក និងទៅរកកន្លែងការងារ ដែលមានន័យយ៉ាងខ្លាំងចំពោះអ្នក និង ទៅរកមិត្តស្រី ដែលអ្នកគិតថាអ្នកស្រឡាញ់នោះវិញទៅ ? ›
« គាត់ពុំបាននិយាយអ្វីជាយូរ ។ រួចហើយគាត់យកដៃអោបក្បាលចុះ គាត់យំខ្សឹកខ្សួលយ៉ាងខ្លាំង ។ ទីបំផុត គាត់បានងើបឡើងវិញនិយាយទាំងទឹកភ្នែកថា ‹ ខ្ញុំមិនអាចធ្វើដូច្នោះបានទេ ។ ខ្ញុំដឹងថា សាសនាចក្រនេះពិត ហើយបើវាត្រូវចំណាយទាំងជីវិតខ្ញុំក្ដី ក៏ខ្ញុំពុំអាចលះបង់វាចោលឡើយ ។
« គាត់បានយកមួកសើមរបស់គាត់ ហើយបានដើរសំដៅទៅទ្វារ ហើយបានចេញទៅទាំងភ្លៀង តែម្នាក់ឯង ទាំងរងារ និងភ័យខ្លាច ប៉ុន្តែមានការតាំងចិត្តដ៏មុតមាំ ។ នៅពេលដែលខ្ញុំបានឃើញគាត់ដូច្នេះ ខ្ញុំបានគិតដល់ភាពឯកោនៃសតិសម្បជញ្ញៈ ភាពឯកោនៃទីបន្ទាល់ និងភាពឯកោនៃសេចក្ដីជំនឿ ថែមទាំងភាពរឹងមាំ និងការលួងលោមចិត្តពីព្រះវិញ្ញាណនៃព្រះ » ( «The Loneliness of Leadership, » ទំព័រ ៣-៤ ) ។
សូមជ្រើសរើសសេចក្ដីពិតមួយដែលអ្នករាយក្នុងបញ្ជី រួចដាក់គោលដៅដើម្បីអនុវត្តសេចក្ដីពិតនោះនៅក្នុងជីវិតអ្នក ។ ( អ្នកអាចនឹងចង់សរសេរគោលការណ៍នេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ) ។
ដើម្បីបញ្ចប់ សូមអាន យ៉ូសែប ស្ម៊ីធ—ប្រវត្តិ ១:២៦ រួចស្វែងរកគោលការណ៍តទៅនេះដែលយ៉ូសែប ស្ម៊ីធ បានបង្រៀន ៖ ដោយការប្រព្រឹត្តតាមគោលការណ៍ទាំងឡាយដែលបានបង្រៀននៅក្នុងព្រះគម្ពីរ នោះយើងអាចបង្កើនទីបន្ទាល់នៃសេចក្ដីពិតរបស់គោលការណ៍ទាំងនោះបាន ។ នៅពេលអ្នកប្រព្រឹត្តតាមគោលលទ្ធិ ឬ គោលការណ៍ដែលអ្នកបានសរសេរ នោះទីបន្ទាល់របស់អ្នកនឹងត្រូវបានពង្រឹង ហើយអ្នកនឹងអាចមានជោគជ័យលើការផ្ទុយ ឬឧបសគ្គនានាដែលអ្នកអាចនឹងជួបប្រទះ ។
-
សូមសរសេរឃ្លាខាងក្រោមនេះ ពីខាងក្រោមកិច្ចការថ្ងៃនេះនៅក្នុងសៀវភៅកំណត់ហេតុការសិក្សាព្រះគម្ពីររបស់អ្នក ៖
ខ្ញុំបានសិក្សា យ៉ូសែប ស្ម៊ីធ—ប្រវត្តិ ១:២១–២៦ ហើយបានបញ្ចប់មេរៀននេះនៅ ( កាលបរិច្ឆេទ ) ។
សំណួរ គំនិត និង ការយល់ដឹងបន្ថែម ដែលខ្ញុំចង់ចែកចាយជាមួយគ្រូរបស់ខ្ញុំ ៖