Chasik’ ru li chaab’il

Sa’ li hu Choq’ re Xkawilaleb’ li Saaj, taataw lix k’utum li Jesukristo ut eb’ lix profeet. Rik’ineb’ li k’utum a’in jo’ aj k’amol aab’e, naru taasik’ ru li chaab’il li tatrosob’tesi anajwan ut chi junelik q’e kutan.

Li Jesukristo a’an li b’e re xtawb’al li sahil ch’oolejil maak’a’ roso’jik. Naq nakawoksi xtaql aach’ool re xtaaqenkil li Jesukristo, wankat sa’ li b’e li nak’amok sa’ li sahil ch’oolejil maak’a’ roso’jik. K’e li Jesukristo jo’ eetalil chawu, laa kawil k’ojleb’aal. K’ojob’ laa yu’am sa’ xb’eeneb’ lix k’utum, ut b’is li b’e nakasik’ ru rik’ineb’ a’an. Eb’ li sumwank nakat-ok wi’ sa’ li kub’iha’, li loq’laj wa’ak, ut li santil ochoch neke’xk’e xkawilal laa kawil k’ojleb’aal rik’in li Kristo. Toj te’chalq li ch’a’ajkilal ut li aaleek, a’b’an laa Choxahil Yuwa’ ut li Jesukristo tate’xtenq’a chixq’axb’aleb’ ru.

Laa’at jun xraarookil musiq’ejil ralal li Dios. Lix nimla k’uub’anb’il na’leb’ re sahil ch’oolejil naxk’e aawankil chi k’iik sa’ musiq’ej ut chixnimob’resinkil laa choxahilal. Xb’aan a’in naq kixtaqla li Jesukristo jo’ aj Kolol aawe.

Laa Yuwa’ sa’ Choxa naxnaw k’a’ru naru taab’aanu. K’a’jo’ naq nakatrosob’tesi, jo’ rik’in lix tz’aqalil li evangelio ut eb’ li loq’laj k’ojob’anb’il k’anjel ut sumwank li nakate’xbak’ rik’in a’an ut neke’xk’e lix wankilal sa’ laa yu’am. Rochb’eeneb’ li osob’tesink a’an nachal li teneb’ank. A’an naxnaw naq naru taajal li ruchich’och’, ut re xb’aanunkil, wan naq tento naq jalanaqat rik’in li ruchich’och’. Sik’ lix b’eresihom laa Choxahil Yuwa’ naq nakasik’ ru laa b’e. A’an tatrosob’tesi rik’in li musiq’anb’il na’leb’ li taachalq rik’in li Santil Musiq’ej.

Li rajom li hu Choq’ re Xkawilaleb’ li Saaj maawa’ xyeeb’al “us” malaj “ink’a’ us” chirix li jar paay chi na’leb’ taak’ul sa’ xb’ehil laa yu’am. Li Qaawa’ yoo b’an chab’oqb’al chi b’eek sa’ jun b’e taqenaq ut sant wi’chik—a’an lix b’e. Li hu a’in tixk’ut lix b’e chawu. Tixch’olob’eb’ li yaal li naxk’utb’esi. Chak’eheb’ li yaal a’an jo’ aj k’amol aab’e—rik’ineb’ li ninqi na’leb’, jo’ li ok sa’ sumwank sa’ li santil ochoch ut li xik sa’ mision, ut rik’ineb’ li kok’ na’leb’ re wulaj wulaj, jo’ raatinankileb’ laa was aawiitz’in ut roksinkil laa hoonal.

Us ta wankeb’ li naru te’tenq’anq aawe, laa k’iijik sa’ musiq’ej aawe aajunes. A’an nak’ulman aawik’in ut rik’in li Qaawa’. A’an naxnaw ru laa waam, ut ka’ajwi’ a’an naraqok aatin sa’ roso’jik. Yal aaq’e wulaj wulaj, paab’eb’ lix taqlahom li Dios ut oxloq’iheb’ laa sumwank, ut tenq’aheb’ laa was aawiitz’in chi nach’ok rik’in li Kolonel.

Chi’ilmanq Mosiah 4:29–30 (maak’a’ rajlankileb’ li k’iila paay chi maak, jo’kan naq tento taqil qib’); Helaman 5:12 (k’e laa k’ojleb’aal sa’ xb’een li Kristo); Tzol’leb’ ut Sumwank 45:57 (k’e li Santil Musiq’ej jo’ aj k’amol aab’e); 82:15 (bak’ aawib’ rik’in li Qaawa’ rik’ineb’ li sumwank).

Jalam-uuch

eb’ li kristiaan neke’roksi li reetalil li ch’och’

Chan ru k’uub’anb’il li hu a’in

Wan oxib’ xraqalil li jolomil na’leb’:

1. Li junelikil yaal, malaj li tzol’leb’ re lix evangelio li Jesukristo li k’ojob’anb’il wi’chik

2. Li b’oqok re xk’anjelankileb’ li yaal a’an

3. Eb’ li osob’tesink yeechi’inb’ileb’ xb’aan li Qaawa’ reheb’ li neke’xpaab’ lix k’utum