“Li Jesukristo tatxtenq’a,” Choq’ re Xkawilaleb’ li Saaj: Jun tenq’ re xsik’b’al ru laa b’e (2022)
“Li Jesukristo tatxtenq’a,” Choq’ re Xkawilaleb’ li Saaj
Li Jesukristo tatxtenq’a
Salmos 147:3
Li Jesukristo a’an laa metz’ew. Ak xb’aanu chixjunil li na’ajman re naq taawanq xsahil aach’ool sa’ li yu’am a’in ut chi junelik. Wi nakasik’ ru a’an ut lix evangelio, nakasik’ ajwi’ ru li sahil ch’oolejil maak’a’ roso’jik.
Us ta nakayal aaq’e chixsik’b’al ru li us, wan naq nakatpaalto’k. Nakab’aanu li ink’a’ xawaj raj. Kama’an naqak’ul chiqajunil. Naq nak’ulman, maare nawiib’an aach’ool ut nakaweek’a naq maajo’q’e tatk’ulub’aaq. A’b’an wan jun chaab’il esil—k’a’jo’ xchaq’alil ru ut aj k’ehol yo’onihom. Li Dios nakatxra, jo’kan naq kixtaqla li Jesukristo, li Ralal, li kixk’ul laa maak sa’ xb’een re naq tatruuq chixjalb’al aak’a’uxl ut chi xik chi uub’ej.
Li junelikil yaal
Li Jesukristo naru tixk’e laa metz’ew. Naru tatxtenq’a chixjalb’al laa wajom, laa k’oxlahom, ut laa b’aanuhom. Naq wan laa k’a’uxl, laa xiw, malaj laa ch’a’ajkilal, a’an tixk’ojob’ laa ch’ool. Tatxtenq’a sa’ chixjunil.
Li jalb’a-k’a’uxlej maawa’ tojb’a-maak xb’aan laa maak; a’an b’an li b’e nokorach’ab’ wi’ li Jesus chiru li maak. Xjalb’al qak’a’uxl naraj naxye xjalb’al qayu’am—xsutq’isinkil qib’ rik’in li qamaak ut sutq’iik rik’in li Dios. Naraj naxye chaab’ilo’k ut xk’ulb’al xkuyb’al li qamaak. Moko yal jun sut ta ajwi’ nak’ulman; rajlal yoo chi k’ulmank.
Li b’oqok
Jal aak’a’uxl. Sik’ li Qaawa’ chi wan aach’ool chixchaab’ilob’resinkil aawib’. Naq nakab’aanu li ink’a’ us, ch’olob’ li xab’aanu chiru li Dios chi maak’a’ aab’alaq’, ut, wi na’ajman, chiru laa obiisp ut yalaq ani rahob’tesinb’il aab’aan. Yal aaq’e chixtuqub’ankil li ink’a’ us xab’aanu.
Chisaho’q aach’ool rik’in li maatan re yalok ut chaab’ilo’k. Us ta ch’a’aj ut hoonal naraj, maakanab’ xyalb’al aaq’e. K’e aach’ool ut paab’ li Qaawa’. Li Kolonel tatxtenq’a sa’ chixjunjunqaleb’ li yokb’.
Eb’ li osob’tesink yeechi’inb’ileb’
Li Jesukristo tixkuy aamaak ut tatxk’irtesi wi nakajal aak’a’uxl. Tixk’e li tuqtuukilal ut li sahil ch’oolejil sa’ xna’aj li xutaan. Ink’a’ chik taajultiko’q re laa maak. Rik’in lix metz’ew, taanimanq laa wajom chixpaab’ankileb’ lix taqlahom.
Tixjal laa waam ut laa yu’am. Timil timil tatk’iiq ut tatwulaq jo’ chanru a’an. Laa wanjik rik’in a’an sa’ li sumwank tixk’e xkomon chik lix wankilal aawe.
Li patz’ok ut li sumenk
Chan ru tinnaw naq kuyb’il inmaak xb’aan li Dios? Li Dios naxye naq tixkuy xmaak li ani naxjal xk’a’uxl. Naq nak’ojob’aak aach’ool xb’aan li Musiq’ej, naru taanaw naq lix wankilal li Kolonel re xtojb’al aawix yoo chi k’anjelak sa’ laa yu’am.
Jo’q’e na’ajman ru xtenq’ li obiisp re xjalb’al ink’a’uxl? Wan xlaawil li tijonelil ut musiq’ejil maatan rik’in li obiisp re naq tatxtenq’a chixjalb’al aak’a’uxl. Naru taasik’ lix tenq’ ut lix na’leb’ yalaq jo’q’e. Wi ninqeb’ laa maak, jo’ xq’etb’al li chaq’rab’ re saq ru ch’oolej, aatinan rik’in laa obiisp. Ink’a’ tatxjit. A’an ruuchil li Jesukristo ut tatxtenq’a chixnawb’al chan ru taajal aak’a’uxl chi tz’aqal ut taak’ul lix wankil li Kolonel re aak’irtesinkil ut aakawob’resinkil.
Ninyal inq’e chixjalb’al ink’a’uxl, a’b’an ninb’aanu wi’chik li ink’a’ us. K’a’ru tento tinb’aanu anajwan? Hoonal naraj re xk’aytesinkil qib’ chixb’aanunkil li us ut chixkanab’ankil li ink’a’ us, jo’kan naq maakanab’ xyalb’al aaq’e. Sutq’in rik’in li Kristo. Tz’aqal li rusilal. Yal xb’aanunkil wi’chik. Moko aajunes ta wankat sa’ lix yalb’al aaq’e. Li Jesukristo junelik nawan aawochb’een.
Chi’ilmanq Enos 1:6 (naru taamesuuq chaq li xutaan); Mosiah 4:3 (rik’in li Santil Musiq’ej, li Dios naxk’e chanaw naq kuyb’il aamaak); 26:30 (jo’ k’ihal sut naqajal qak’a’uxl li Kolonel naxkuy qamaak); Eter 12:27 (li rusilal li Kolonel naru tixkʼe li kʼaʼru qʼun xmetzʼew choqʼ kawilal); Moroni 6:8 (li ani naxjal xk’a’uxl nakuye’ xmaak); 10:32 (chitzʼaqloq aawe aawu rikʼin li Kristo); Tzol’leb’ ut Sumwank 1:32 (li Qaawa’ naxkuy xmaak li ani naxjal xk’a’uxl); 58:42–43 (xch’olob’ankil ut xkanab’ankil li maak a’an xcha’al li jalb’a-k’a’uxlej).
Eb’ li patz’om re li recomendacion re li santil ochoch
Ma wan aapaab’aal ut xnawom aach’ool chirix li Dios, li Junelik Yuwa’b’ej, li Jesukristo li Ralal, ut li Santil Musiq’ej?
Ma wan xnawom aach’ool chirix lix tojb’al rix li maak xb’aan li Jesukristo, ut chirix lix k’anjel a’an jo’ aj Kolol aawe ut aj Tojol aawix?