“Chatb’eeq sa’ xsaqen li Dios,” Choq’ re Xkawilaleb’ li Saaj: Jun tenq’ re xsik’b’al ru laa b’e (2022)
“Chatb’eeq sa’ xsaqen li Dios,” Choq’ re Xkawilaleb’ li Saaj
Chatb’eeq sa’ xsaqen li Dios
Galatas 5:25
Naq saqen ru nakat-ilok, chaab’il ajwi’ li b’e nakasik’ ru. Chi jo’kan naq jwal aajel ru li saqen: li saqen nokoxtenq’a chixk’eeb’al reetal li chaab’il b’e. Laa Choxahil Yuwa’ naxk’e li choxahil saqen aawe—a’an li maatan re li Santil Musiq’ej—re aatenq’ankil chixk’eeb’al reetal chi saqen ru li chaab’il ut li moko chaab’il ta, li us ut li ink’a’ us.
Li junelikil yaal
Naq nakub’e aaha’ nakat-ok sa’ jun sahil sumwank rik’in laa Choxahil Yuwa’ ut li Jesukristo. Sa’ li santil ochoch tat-ok sa’ xkomoneb’ chik li sumwank li naru tixkawob’resi laa wanjik rik’ineb’. Rajlal xamaan sa’ li loq’laj wa’ak naka’ak’ob’resiheb’ laa sumwank. Nakak’ut laa wajom chixpaab’ankileb’ lix taqlahom, ut li Qaawa’ nakatrosob’tesi rik’in li Santil Musiq’ej jo’ laa wochb’een rajlal. A’an jun reheb’ lix maatan q’axal nim choq’ aawe.
Xsik’b’al ru li us nakatxtenq’a chireek’ankil li Musiq’ej. Wan naab’al li chaab’ilal sa’ ruchich’och’. Jo’ naq najala laa junxaqalil rik’in li nakawa’ ut nakawuk’, najala chi yaal laa k’a’uxleb’aal ut laa musiq’ rik’in li nakawil ru, li nakawil, ut li nakawab’i.
Li b’oqok
K’e xhoonal li Qaawa’ wulaj wulaj. Tzolon chirix a’an. Chijultiko’q aawe junelik. Tijon chiru laa Choxahil Yuwa’. Tzoleb’ li loq’laj hu ut li raatineb’ li yo’yookil profeet. Chirix a’an yal aaq’e chixyu’aminkil li nakatzol.
Sik’ li k’a’ru nawaklesin ch’oolej, namusiq’an k’a’uxlej, ut naxb’oq li Musiq’ej. Naq nakasik’ ru li taawil, taawil ru, ut taawab’i, malaj tattz’aqonq wi’, k’oxla li naxk’e chaweek’a. Ma narala li chaab’il k’oxlahom? Najtob’resi aawib’ rik’in yalaq k’a’ru nareetz’u li k’a’ru loq’ ut yalaq k’a’ru moko tiik ta. Mattz’aqon sa’ li k’a’ru naxpo’ laa seeb’al chi tz’ilok-ix malaj chireek’ankil li Musiq’ej, jo’ li rahob’tesink, li uk’a nakaltesin, ut eb’ li droga. Kawaq aach’ool re xchupb’al junaq video malaj b’atz’unk, elk sa’ jun li pelicula malaj xajok, xjalb’al jun li son, malaj xkanab’ankil yalaq k’a’ru ink’a’ naxk’am rib’ rik’in li Musiq’ej.
Oksiheb’ li redes sociales re waklesink ch’oolej. Li redes sociales naru neke’tenq’an sa’ li aatinak-ib’. Wi nakawoksi, puktesi li saqen, li paab’aal, ut li yaal. Maajuntaq’eeta laa yu’am rik’in li yookeb’ chixk’ulb’al jalaneb’ chik. Chijultiko’q aawe naq aaloq’al nachal xb’aan naq laa’at jun ralal malaj xrab’in li choxahil na’b’ej yuwa’b’ej, ink’a’ rik’ineb’ li redes sociales.
Sik’ li chaab’ilal ut eb’ li tz’aqal amiiw li te’kanaaq. K’e reetal naq li roksinkileb’ li k’anjeleb’aal a’in ink’a’ tixchap xna’aj li hoonal taanumsi raj rik’in laa junkab’al ut eb’ laa wamiiw. Li redes sociales ut xkomoneb’ chik li k’anjeleb’aal naru te’xchap naab’al laa hoonal chi b’ab’ay ajwi’ li chaab’ilal neke’xsutq’isi aawe. Us naq wan naq taakanab’ li internet, ut tat-aatinaq rik’ineb’ li kristiaan sa’ laa yu’am.
Li osob’tesink yeechi’inb’ileb’
Li Musiq’ej naru nawan aawik’in junelik. Li Santil Musiq’ej naxch’olob’ xyaalal laa Choxahil Yuwa’ ut li Jesukristo chawu. Naxk’ojob’ aach’ool, naxk’am aab’e, ut nakatxsantob’resi. Nakatxtenq’a chixk’eeb’al reetal li yaal ut li chaab’ilal sa’ li ruchich’och’.
Li patz’ok ut li sumenk
Chan ru tinnaw ma yookin chireek’ankil li Santil Musiq’ej? Li xk’eeb’al reetal li Musiq’ej naraj hoonal, yalok, ut kuyuk. Jalan jalanq naq nokoraatina chiqajunjunqal. Misach sa’ aach’ool li k’a’ru ka’ch’in—li tuqtuukilal nakaweek’a naq nakawab’i xch’olob’ahom jun kristiaan malaj li rahil k’a’uxlej nakaweek’a naq nakab’aanu li ink’a’ us. Sik’ sa’eb’ li loq’laj hu chan ru naq na’aatinak li Musiq’ej, tijon chirix, ut makanab’ xsik’b’al li tixk’e chaweek’a li Musiq’ej.
K’a’ru li pornografia? K’a’ut naq tento tintz’eqtaana? Li pornografia a’aneb’ eetalil sa’ jalam-uuch malaj aatin, li nokoreek’asi chixb’aanunkil li k’a’ru tz’aj naqak’oxla. K’iila paay li pornografia wan, sa’ video, sa’ jalam-uuch, sa’ hu, ut sa’ son. A’an ajwi’ li aatin malaj li jalam-uuch neke’xtaqla rib’ chirib’il rib’ li amiiw. Li pornografia nareetz’u li k’a’ru loq’—li qajunqaxalil ut li qachaab’il wanjik sa’ sumalil. Wan naq taawil li pornografia us ta ink’a’ xawaj. Us ta nakawil chi wan aach’ool malaj ink’a’, kanab’ sa’ junpaat. Maare us ajwi’ aatinak rik’in laa na’, laa yuwa’, malaj jalan chik ani li ak nim. Rilb’al li pornografia chi wan aawajom a’an maak ut naxpo’ laa wankilal chireek’ankil li Musiq’ej. Naxq’unob’resi laa seeb’al rilb’al aawib’ aajunes, ut naxjal chan ru nakawil aawib’ ut eb’ laa komon. Li Jesukristo wan xwankil chatenq’ankil chixtz’eqtaanankil li pornografia ut chixjalb’al aak’a’uxl. Sik’ li Kristo; tz’eqtaana li aak’ab’. Laa obiisp naru chatenq’ankil chixk’ulb’al laa metz’ew ut xkuyb’al laa maak rik’in li Kolonel.
Chi’ilmanq Amos 5:14 (sik’ li us); Galatas 5:22–23 (li ruuchinihom li Musiq’ej); Moroni 7:18–19 (lix saqen li Kristo); Tzol’leb’ ut Sumwank 6:23 (li Qaawa’ naxyaab’asi tuqtuukilal); 20:77, 79 (eb’ li tij re li loq’laj wa’ak).
Eb’ li patz’om re li recomendacion re li santil ochoch
Li Qaawa’ xye naq chixjunil li k’a’aq re ru tento taab’aanumanq “chi ch’ajch’o” chiru a’an (Tzol’leb’ ut Sumwank 42:41). Ma nakayal aaq’e re naq saqaq ru aak’oxlahom ut aab’aanuhom? Ma nakapaab’ li chaq’rab’ re li saq ru ch’oolej?
Ma nakayal aaq’e chixk’uulankil chi sant li hilob’aal kutan, sa’ kab’l jo’ ajwi’ sa’ iglees, chi wulak sa’eb’ aach’utam, chixkawresinkil aawib’ ut chixk’ulb’al chi tiik li loq’laj wa’ak, ut chi wank sa’ aayu’am jo’ chanruheb’ li chaq’rab’ ut li taqlahom re li evangelio?