Chara li Dios, chara laa was aawiitz’in

Jalam-uuch

reetalil li k’anjelak chiru asb’ej iitz’inb’ej

Re aatenq’ankil chixsik’b’al ru li us, li Dios naxk’eheb’ li taqlahom. Xb’aan lix rahom choq’ aawe naq naxk’eheb’. Ut jwal us naq taapaab’eb’ lix taqlahom li Dios xb’aan naq nakara a’an. Li rahok wan sa’ xch’oolileb’ lix taqlahom li Dios.

Jalam-uuch

Jun saaj winq naxtenq’a jun li tiixil ixq chi nume’k chiru li b’e sa’ lix silla de ruedas.

Li Dios nakatxra. A’an laa Yuwa’. Lix rahom li tz’aqal re ru naru tatxmusiq’a chixraab’al ajwi’ a’an. Naq laa rahom choq’ re laa Choxahil Yuwa’ wan jo’ xb’eenil sa’ laa yu’am, saqen wi’chik ru li b’e taasik’ ru.

Li wiib’ xninqal ru taqlahom, jo’ kixye li Jesus, a’an xraab’al li Dios ut xraab’al laa was aawiitz’in. Ut ani laa was aawiitz’in? Chixjunileb’ li kristiaan! Chixjunil chik li k’utb’il sa’ li loq’laj hu ut xb’aaneb’ li profeet naxtaw rib’ rik’ineb’ li wiib’ chi taqlahom a’in.

Chixjunileb’ li kristiaan a’aneb’ laa was aawiitz’in—naraj ajwi’ naxye eb’ li kristiaan li jalaneb’ ut jalaneb’ xk’a’uxl aawik’in. Li qaChoxahil Yuwa’ naraj naq eb’ li ralal xk’ajol te’xra rib’. Naq nakatk’anjelak chiruheb’ li ralal xk’ajol, yookat ajwi’ chi k’anjelak chiru li Dios.

K’ut laa rahom choq’ re li Dios rik’in xpaab’ankileb’ lix taqlahom. Qayehaq, wi nakawoxloq’i li hilob’aal kutan, rik’in xkawresinkil aawib’ ut xk’ulb’al li loq’laj wa’ak, nakak’ut chiru li Dios naq wan aach’ool chixk’eeb’al jun kutan re li xamaan choq’ re a’an. Wi nakakuy aasa’ ut nakatoj laa lajteqil ut mayej, nakak’ut chiru li Dios naq aajel wi’chik ru lix k’anjel chiru li k’a’aq re ru re li ruchich’och’. Naq nakayaab’asi xk’ab’a’ li Dios ut li Kristo rik’in oxloq’, maajo’q’e chi maakʼaʼ xyaalal, nakak’ut naq nakab’antioxi chixjunil li neke’xb’aanu choq’ aawe.

Il chixjunileb’ laa was aawiitz’in jo’ ralal xk’ajol li Dios. Jo’ xtzolom li Jesukristo, naru tatwanq jo’ eetalil sa’ rilb’aleb’ li kristiaan re chixjunil b’onol, paab’aal, ut xkomoneb’ chik li ch’uut rik’in rahok, oxloq’, ut k’ulub’aak—ut jwal wi’chik eb’ li neke’rahob’tesiik rik’in rahil aatin ut b’aanuhom. Ye’ laa wuq’ reheb’ li ani wankeb’ sa’ junaatalil, li wankeb’ xjunes, ut li neke’raj tenq’aak. Tenq’aheb’ chireek’ankil lix rahom li qaChoxahil Yuwa’.

Jalam-uuch

Wiib’ li saaj winq tiqtookeb’ sa’ kamiis ut korbaat.

K’e reetal naq li nakaye naxk’ut laa rahom choq’ re li Dios ut laa was aawiitz’in—sa’ laa yu’am ut sa’ internet. Ye li k’a’ru nawaklesin—maawa’ li najachok, li narahob’tesin, li nahobok, ut wan naq li nayoob’ank. Nim xwankileb’ laa waatin. K’e reetal naq nim xwankileb’ choq’ re li us.

Xraab’al chixjunileb’ li ralal xk’ajol li Dios natikla sa’ li ochoch. Yal aaq’e chixk’eeb’al chi eek’amank lix rahom li Kolonel sa’ laa wochoch.

Taachaab’ilo’q laa sumwanjik rik’in li Dios naq nakak’ut laa rahom rik’in xpaab’ankileb’ lix taqlahom ut eb’ laa sumwank rik’in a’an.

Taachaab’ilo’q laa sumwanjik rik’ineb’ laa was aawiitz’in naq nakak’ut laa rahom rik’in k’anjelak chiruheb’ jo’ li Kristo. Taasaho’q aach’ool naq nakatamresi li rahok sa’ li ruchich’och’.

Jalam-uuch

reetalil li patz’ok ut li sumenk

Li patz’ok ut li sumenk

Chan ru tweek’a lix rahom li Dios? Junelik naru nakaweek’a lix rahom li qaChoxahil Yuwa’. Aatinan rik’in a’an sa’ tijok chi kok’ aj xsa’. Wotz li nakaweek’a rik’in, ut ab’i li tixye aawe. Il li raatin a’an sa’ li loq’laj hu. K’oxla chixjunil li xb’aanuhom choq’ aawe. Wanqat sa’eb’ li na’ajej ut kok’ k’anjel b’ar wi’ nawan lix Musiq’.

Ma naraj li Qaawa’ nax tinraheb’ chixjunil li kristiaan, jo’eb’ ajwi’ li neke’raj inrahob’tesinkil? Li Qaawa’ naraj naq taaraheb’ li xik’ neke’ilok aawe ut naq tattijoq chirixeb’ li neke’rahob’tesink aawe. A’b’anan, moko tento ta naq tatkanaaq b’ar wi’ taak’ul rahilal sa’ k’a’uxlej, tib’elej, malaj musiq’ej. Najtob’resi aawib’ rik’in li taarahob’tesinq aawe ut k’e reetal naq sa wanqat. Wi wankeb’ li neke’rahob’tesink aawe—malaj wi nakanaw naq wan ani chik yoo chi rahob’tesiik—aatinan rik’in jun kristiaan ak nim.

Jo’q’e ut chan ru tin’ok chixnawb’aleb’ ru li saaj ixq (wi saaj winqin) malaj saaj winq (wi saaj ixqin). Us naq taanaweb’ ru rik’in li ok choq’ amiiw. Sa’ laa saajilal, taweb’ naab’aleb’ li amiiw. Sa’ junjunqeb’ li na’ajej, eb’ li saaj neke’ok chixnawb’al rib’ sa’eb’ li chaab’il kok’ k’anjel jo’ ch’uut. Re naq sa sa tatk’iiq sa’ k’a’uxlej ut musiq’ej, us naq ink’a’ tat-elq aajunes rik’in junaq chik li saaj ixq malaj saaj winq toj reetal naq nimaqat chik—maare naq 16 chihab’ wanq aawe. Aatinan rik’ineb’ laa na’ aayuwa’ ut eb’ laj jolominel. Oyb’eni li elk rik’in jun li mukuy toj reetal naq nimaqat chik. Wanqat aawochb’eeneb’ li te’tenq’anq aawe chixpaab’ankileb’ laa teneb’ankil rik’in li Jesukristo.

K’a’ru tinb’aanu wi maak’a’ li rahok sa’ li wochoch? Laa Kolonel naxnaw li wankat wi’, ut a’an nakatxra. Wanq aakuyum, paab’eb’ lix taqlahom li Dios, ut b’aanu li us chiru laa junkab’al. Taweb’ laa wamiiw sa’ laa teep sa’ li Iglees. Kawresi aawib’ anajwan re naq laa junkab’al xaqab’anb’ilaq sa’ xb’eeneb’ lix k’utum li Jesukristo.

Chi’ilmanq Isaias 58:3–11 (li rajom li kuyuk sa’); 58:13–14 (li osob’tesiik re roxloq’inkil li hilob’aal kutan); Malakias 3:8–10 (li osob’tesiik re xtojb’al li lajteqil); Lukas 6:27–28 (raheb’ li xik’ neke’ilok aawe); 10:25–37 (ani li was wiitz’in?); Jwan 3:16–17 (li Dios kooxra, jo’kan naq kixtaqla li Ralal); 14:15 (naqapaab’eb’ li taqlahom xb’aan naq naqara li Dios); 1 Jwan 4:19 (naqara li Dios xb’aan naq a’an nokoxra); Mosiah 2:17 (naq nokok’anjelak chiru li qas qiitz’in, nokok’anjelak ajwi’ chiru li Dios).

Jalam-uuch

reetalil li santil ochoch

Eb’ li patz’om re li recomendacion re li santil ochoch

Ma nakataaqe li k’a’ru k’utb’il sa’ lix Iglees li Jesukristo sa’ laa b’aanuhom sa’ k’utk’u ut sa’ muqmu rik’ineb’ li komon sa’ laa junkab’al ut rik’in anihaq chik?

Ma nakayal aaq’e chixk’uulankil chi sant li hilob’aal kutan, sa’ kab’l jo’ ajwi’ sa’ iglees, chi wulak sa’eb’ aach’utam, chixkawresinkil aawib’ ut chixk’ulb’al chi tiik li loq’laj wa’ak, ut chi wank sa’ aayu’am jo’ chanruheb’ li chaq’rab’ ut li taqlahom re li evangelio?

Ma nakatoj li lajetqil chi tzʼaqal?