O Le Meaalofa o le Agaga Paia

Sa tatou aoaoina i le mataupu 7, o le Agaga o se tasi o le AigaAtua. O Ia “o le peresona o Agaga” (MFF 130:22). E leai sona tino o aano ma ivi. E mafai ona i ai Lana uunaiga i soo se mea i le taimi e tasi. O Lana misiona o le molimau lea i le Tama ma le Alo, ma mea moni uma. E le gata i lea, o le Agaga Paia e faamamaina, pe faapaiaina i tatou ma saunia ai i tatou e mau i le afioaga o le Atua. O le Agaga Paia e faamamaina o tatou loto ina ia le toe i ai ia te i tatou le manao e faia mea leaga.

E i ai le eseesega o le Agaga Paia ma le meaalofa o le Agaga Paia. O le a tatou aoaoina i le mataupu lenei le uiga o le meaalofa o le Agaga Paia, ma le ala e mafai ona tatou maua ai lenei meaalofa silisili mai le Atua.

• O le a le eseesega i le va o le Agaga Paia ma le meaalofa o le Agaga Paia?

O le meaalofa o le Agaga Paia, o le avanoa lea—e tuu atu i le tagata ua tuuina atu lona faatuatuaga ia Iesu Keriso, ua papatisoina, ma ua faamauina o ia o se tagata o le Ekalesia—e maua le taitaiga ma musumusuga mai le Agaga Paia.

Sa saunoa mai Iosefa Samita tatou te talitonu o loo faamanuiaina i tatou i le meaalofa o le Agaga Paia i ona po nei e pei lava ona faia i ona po o uluai Aposetolo. Tatou te talitonu i lenei meaalofa i lona atoaga, mana, tulaga maoae, ma le mamalu. (Tagai i le Aoaoga a Peresitene o le Ekalesia: Iosefa Samita [2007], 104.)

E mafai ona taitaiina le tagata e le Agaga Paia mo se taimi puupuu, e aunoa ma lona mauaina o le meaalofa o le Agaga Paia (tagai i le MFF 130:23). Peitai, e le tumau pea lenei taitaiga ia te ia, vagana ua papatisoina o ia ma maua le faaee atu o lima mo le meaalofa o le Agaga Paia. Ua tatou faitau i le Galuega 10 sa maua e le fitafita Roma o Konelio ia musumusuga mai le Agaga Paia ma sa ia iloa ai e moni le talalelei a Iesu Keriso. Peitai sa le i maua e Konelio le meaalofa o le Agaga Paia vagana ina ua uma ona papatisoina o ia. Sa aoao mai le Perofeta o Iosefa Samita, a na le talia e Konelio le papatisoga ma maua le meaalofa o le Agaga Paia, semanu e alu ese le Agaga Paia mai ia te ia (tagai i le Aoaoga a Peresitene o le Ekalesia: Iosefa Samita, 103).

I ona po nei, e toatele tagata lotu ese ua latou iloa mai le mana o le Agaga Paia, e moni le Tusi a Mamona (tagai i le Moronae 10:4–5). Peitai e alu ese mai ia i latou lena molimau, pe afai latou te le mauaina le meaalofa o le Agaga Paia. E le faaauau pea ona latou maua lena mautinoa lea e mafai ona oo mai i e ua latou maua le meaalofa o le Agaga Paia.

• O a mea e ao ona tatou faia e maua ai le mafutaga tumau a le Agaga Paia?

O tagata ua papatisoina ma faamauina, e tuuina atu i ai le meaalofa o le Agaga Paia e ala i le faaee atu o lima o toeaina o le Ekalesia. Ua fetalai mai le Alii, “O e faatuatua, ia oulua faamauina i la’u Ekalesia, i le faaeega o lima, ma o le a ou foai atu le mea foai fua o le Agaga Paia” (MFF 33:15).

E mafai e soo se toeaina agavaa o le Ekalesia, pe a faatagaina ai o ia, ona tuuina atu le meaalofa o le Agaga Paia i se isi tagata. E ui i lea, e leai se faamaoniga o le a maua e lena tagata musumusuga ma le taitaiga mai le Agaga Paia, ona ua faaee atu e toeaina o latou lima i luga o lona ulu. E tatau i tagata taitoatasi ona “talia le Agaga Paia.” O lona uiga, o le a oo mai le Agaga Paia i se tagata pe afai e faamaoni o ia ma manaomia le feasoasoani mai lenei avefeau faalelagi.

Ina ia agavaa mo le fesoasoani a le Agaga Paia, e tatau ona tatou saili ma le naunautai e usiusitai i poloaiga a le Atua. E tatau ona tausia o tatou mafaufauga ma amioga i le mamā.

E masani lava ona fesootai lemu mai le Agaga Paia ia i tatou. O Lana uunaiga e masani ona ta’ua o le “leo itiiti ma le filemu” (tagai i le 1 Tupu 19:9–12; Helamana 5:30; MFF 85:6). Na faamalamalama e Peresitene Boyd K. Packer: “E saunoa le Agaga Paia ma se leo e sili atu ona e lagonaina nai lo lou faalogoina. … Ao tatou talanoa e uiga i le ‘faalogo’ i musumusuga a le Agaga, e masani tele ona faamatalaina ai se uunaiga faaleagaga i le faapea mai, ‘Sa i ai lo’u lagona…’” Na ia faaauau faapea: ‘O le leo o le Agaga e malu, e musuia oe i mea e fai pe tautala ai, pe lapataia oe” (in Conference Report, Oketopa 1994, 77; or Ensign, Novema 1994, 60).

• O a faamanuiaga e mafai ona tatou maua e ala i le meaalofa o le Agaga Paia?

O le meaalofa o le Agaga Paia o se tasi lea o meaalofa silisili a le Atua ia i tatou. O le Agaga Paia e mafai ai ona tatou iloa o loo soifua le Atua, o Iesu o le Keriso, ma ua toefuatai mai Lana Ekalesia i le lalolagi. E mafai ai ona tatou maua musumusuga a le Agaga Paia e ta’u mai ia i tatou mea uma e tatau ona tatou faia (tagai i le 2 Nifae 32:5). O le Agaga Paia e faapaiaina i tatou ma saunia ai i tatou mo le afioaga o le Atua. E mafai ai foi ona tatou maua meaalofa a le Agaga (tagai i le mataupu 22 i le tusi lenei). O lenei meaalofa silisili mai lo tatou Tama Faalelagi, e mafai ai foi ona tatou maua le filemu i o tatou loto, ma le malamalama i mea a le Atua (tagai i le 1 Korinito 2:9–12).

• Aisea ua avea ai le meaalofa o le Agaga Paia o se tasi o meaalofa silisili a le Atua mo i tatou?

• 1 Korinito 3:16–17; MFF 130:22–23 (e mafuta le Agaga Paia ma ē faamaoni)

• Galuega 19:1–7 (sa faaeeina le meaalofa o le Agaga Paia anamua)

• Moronae 8:25–26 (o le ala e maua ai le Agaga Paia)

• Moronae 10:5 (o le Agaga Paia o se molimau o le upu moni)

• Mosaea 5:2 (o le Agaga Paia e suia loto)

• Alema 5:54 (o le Agaga Paia e faapaiaina)