O Le Tulafono a le Alii mo le Soifua Maloloina

O se tasi o faamanuiaga silisili ua tatou maua ina ua tatou o mai i le lalolagi, o le mauaina lea o se tino faaletino. Tatou te manaomia se tino faaletino ina ia avea i tatou e pei o lo tatou Tama Faalelagi. Ua matua taua lava o tatou tino ua ta’ua ai e le Alii o ni malumalu o le Atua (tagai i le 1 Korinito 3:16–17; 6:19–20). Ua paia lava o tatou tino.

Talu ai le taua tele o o tatou tino, ua finagalo lo tatou Tama Faalelagi ia tatou tausia lelei. Ua Ia silafia e mafai ona avea i tatou ma tagata sili ona fiafia ma lelei, pe a tatou malolosi. E mafai ona mafuta le Agaga Paia ma i tatou pe afai e mama o tatou tino ma mafaufau. Ua silafia e lo tatou Tama Faalelagi o le a faaosoosoina i tatou e faia ma le le faautauta lelei o tatou tino, pe tuu i ai ni mea e faaleagaina ai. O le pogai lea ua Ia ta’u mai ai ia i tatou mea e lelei mo lo tatou soifua maloloina, ma mea foi e leaga. O le tele o mea ua tuuina mai e le Atua ia i tatou e faatatau i lo tatou soifua maloloina, o loo maua i le Mataupu Faavae ma Feagaiga 89. Ua ta’ua lenei faaaliga o le Upu o le Poto.

E ao ina tatou usiusitai i le Upu o le Poto ina ia tatou agavaa ai e ulu atu i le malumalu. Afai tatou te le usitai i le Upu o le Poto, o le a aveesea le Agaga o le Alii mai ia i tatou. Afai tatou te faaleaga le “malumalu o le Atua,” o o tatou tino ia, ua tatou faatiga ia i tatou lava faaletino ma faaleagaga.

• O a mea ua poloaiina i tatou e le Alii e aua le tuuina i totonu o o tatou tino?

Ua poloaiina i tatou e le Alii aua tatou te inuina le uaina ma mea inu malolosi, o lona uiga o mea inu ua i ai le alakaholo. Ua aoao mai e le Au Peresitene Sili o mea inu malolosi e masani ona aumai ai le faasaua, mativa, ma’i, ma le malaia i le aiga. E masani lava o le inu ava malosi o le pogai lea o le le faamaoni, ola le mama, ma le le faautauta. E avea o se mala ia i latou uma o e inuina ia mea. (Tagai i le “Message of the First Presidency,” Improvement Era, Nov. 1942, 686.) O tina maitaga o e inu ava, e mafai ona latou faatupuina ai faatama’iaga faaletino ma faalemafaufau ia latou fanau. E tele faalavelave faafuasei i taavale i tausaga taitasi e mafua mai tagata inu ava malolosi.

Ua fetalai mai le Alii ia i tatou o le “tapaa e le mo le tino” (MFF 89:8). E leaga mo o tatou tino ma o tatou agaga. E le tatau ona tatou ula sikaleti poo sikā pe lamu tapaa. Ua faamaonia mai e saienitisi o le tapaa e tupu mai ai le tele o faamai, ma afaina ai fanau e le i fananau mai.

Ua lapatai mai le Alii ia i tatou e faatatau i le faaaogaina o “mea inu vevela” (MFF 89:9). Ua fai mai taitai o le Ekalesia, o lona uiga, o le kofe ma le lauti, ua i ai ni mea e faataumaoia ai. E tatau ona tatou aloese mai mea inu uma ua i ai ni mea faataumaoi.

E le tatau ona tatou faaaogaina fualaau oona, sei vagana ua tatau ai e avea ma vailaau mo gasegase. O nisi fualaau e sili atu ona matautia nai lo le alakaholo ma le tapaa (o ia foi mea o fualaau oona). O i latou o e faaaoga sese fualaau oona, e tatau ona saili mo se fesoasoani, tatalo mo le malosi, ma talanoa ma o latou epikopo ina ia mafai ona atoatoa lo latou salamo ma faamamā ai i latou.

E tatau ona tatou aloese mai soo se mea ua tatou iloa e faatamaia ai o tatou tino. E le tatau ona tatou faaaoga soo se mea e tupu mai ai se mausa le lelei ia i tatou. E tatau ona tatou aloese mai le soona ’ai tele. Ua le ta’u maia e le Upu o le Poto mea uma e tatau ona tatou aloese ai pe faaaogaina, ae ua tuuina mai ai ia i tatou ni taiala. O le Upu o le Poto o se tulafono taua tele lenei faaletino. O le Upu o le Poto foi o se tulafono taua tele lenei faaleagaga. O lo tatou ola ai i le Upu o le Poto, tatou te malolosi atili ai faaleagaga. Ua faamamaina o tatou tino ina ia mafai ona mafuta le Agaga o le Alii ma i tatou.

• O a nisi o mea e le o maoti ona ta’u mai i le Upu o le Poto e tatau ona tatou aloese ai?

• E tusa ai ma le Upu o le Poto, o a nisi o mea ua fetalai mai le Alii e lelei mo i tatou?

O fualaau aina suamalie, fualaau ai mata, ma laulaau aoga, e lelei mo i tatou. E tatau ona tatou faaaogaina ma le poto ma le faafetai ia mea.

Ua tuuina mai foi aano o manulele ma manuvaefa mo a tatou meaai. E ui i lea, e tatau ona tatou aai ma le faatatau i aano o manu fasi (tagai i le MFF 49:18; 89:12). Ua lelei foi i’a mo le tagata.

O saito o ni meaai ua lelei mo i tatou. O le fatu saito o le [wheat] e lelei faapitoa mo i tatou.

• Ua faapefea ona faamanuiaina oe i le faaaogaina o nei mea?

• O le a le sootaga a le galue, malolo, ma le faamalositino, i le tulafono a le Alii o le soifua maloloina?

E le gata i le Mataupu Faavae ma Feagaiga 89, o loo i ai isi mau o loo ta’u maia ia i tatou le ala e maua ai le soifua maloloina. Ua fai mai nei mau ia “tuu le faatalanoa, ia tuu le le tumama; … ia tuu le moe loa e sili atu i lo lona aogā; ia vave momoe ina ia outou le vaivai; ia alapopo, ina ia faafouina o outou tino ma o outou mafaufau” (MFF 88:124). Ua ta’u mai foi ia i tatou, “O aso e ono e te galue ai, ma fai ai au galuega uma lava” (Esoto 20:9). Ua lapatai mai le Alii ia i tatou e aua tatou te galulue e sili atu i lo tatou malosi (tagai i le MFF 10:4).

Ua ta’u mai ia i tatou e se perofeta o ona po nei, e tatau ona tatou tausia o tatou tino ia maloloina. Na ia fautua mai:, “O mea taumafa tatau aoga, faamalositino fai fai pea, ma le lava o le moe e matua taua mo se tino malosi, e pei lava o le tausisi i le suesue i tusitusiga paia ma le tatalo e le aunoa e faamalosi ai le mafaufau ma le agaga” (Thomas S. Monson, i le Conference Report, Oketopa 1990, 60; po o le Ensign, Nov. 1990, 46).

• O a faamanuiaga tatou te maua pe a tatou usiusitai i le Upu o le Poto?

Ua tuuina mai e lo tatou Tama Faalelagi tulafono o le soifua maloloina e aoao ai i tatou i ala e tausia ai o tatou tino. Ua ta’u mai e tusitusiga paia ia i tatou e uiga i tulafono a le Atua: “E leai se poloaiga faaletino na ou tuuina atu … , aua o a’u poloaiga e faaleagaga ia” (MFF 29:35). O lona uiga o Ana poloaiga e faatatau i lo tatou tulaga faaletino, e mo lo tatou lelei faaleagaga.

A tatou tausia le tulafono a le Alii mo le soifua maloloina ma usiusitai i isi Ana poloaiga, ua folafola mai e le Alii Na te faamanuiaina i tatou faaletino ma faaleagaga.

Ua folafola mai ia i tatou i le tulaga faaletino le soifua maloloina lelei. O le taunuuga o lena soifua maloloina lelei, o le a mafai ai ona tatou “taufetuli ae le vaivai, ma savavali ae le matapogia” (MFF 89:20). O se faamanuiaga sili lea, ae o faamanuiaga faaleagaga ua Ia folafola mai ia i tatou, ua silisili atu nai lo faamanuiaga faaletino.

Ua folafola mai e le Alii ia i tatou o le a tatou “maua foi le poto ma oa sili o le malamalama e oo lava i oa natia” (MFF 89:19). O le a aoao mai ia i tatou e le Agaga Paia upu moni taua e ala i faaaliga. Ua aoao mai e Peresitene Boyd K. Packer: “O o tatou tino faaletino o le meafaigaluega lea a lo tatou agaga. I lena faaaliga ofoofogia o le Upu o le Poto, o loo ta’u mai ai le auala e puipuia ai o tatou tino mai mea e le mama ia e ono faaleagaina ai, pe faatamaia ai sane maaleale faaletino, ia e faaaoga mo fesootaiga faaleagaga. O le Upu o le Poto o le ki lea i faaaliga mo tagata taitoatasi” (in Conference Report, Oct. 1989, 16; po o le Ensign, Nov. 1989, 14).

Ua folafola mai foi e le Alii o le a laaloa le agelu o le faafanoga ia i tatou. Na saunoa mai Peresitene Heber J. Grant, “Afai tou te mananao ma ou manao i faamanuiaga o le olaga, o le soifua maloloina, o le tino ma le mafaufau malosi; afai tatou te mananao e laaloa le agelu o le faafanoga ia i tatou, e pei ona ia faia i ona po o le fanauga a Isaraelu, e tatau ona tatou usitai i le Upu o le Poto; ona noatia lea o le Atua, ma oo mai ai faamanuiaga ia i tatou” (Aoaoga a Peresitene o le Ekalesia: Heber J. Grant [2002], 207).

• E faapefea ona tatou fesoasoani i fanau iti ma le autalavou ia malamalama i le taua e faavavau o le Upu o le Poto?

• O a mea e mafai ona tatou faia e fesoasoani ai i tagata o aiga po o uo o e o loo faigata ia i latou ona usiusitai i le Upu o le Poto?

• Faamasino 13:13–14; Faataoto 20:1; Isaia 5:11–12; Tanielu 1 (aloese mai mea inu malolosi)

• MFF 59:16–20 (o mea o le fogaeleele mo le manuia o le tagata)

• Faataoto 23:20–21 (lapataiga e uiga i le onā, ‘aitele, ma le paie)

• MFF 136:24 (ia tuu le onā)