Auauna Atu

• Mafaufau i auala ua auauna mai ai tagata ia te oe ma lou aiga.

Na fetalai Iesu, “O a’u nei, o loo ia te outou e pei o le auauna” (Luka 22:27). I le avea ai ma soo moni o Iesu, e tatau foi ona tatou auauna atu i isi.

O le auauna atu, o le fesoasoani atu lea i isi o loo manaomia le fesoasoani. O le auauna atu FaaKeriso, e tupu mai i le alofa moni mo le Faaola ma le alofa ma le popole mo i latou ua Ia tuuina mai ia i tatou le avanoa ma le taitaiga e fesoasoani atu i ai. O le alofa ua sili atu nai lo na o se lagona; pe a tatou alolofa i isi, tatou te fia fesoasoani atu ia i latou.

E tatau ia i tatou uma ona fiafia e auauna atu, e tusa po o a tupe tatou te maua, lo tatou matutua, tulaga o le soifua maloloina, po o tulaga o aga fesootai o tatou i ai. E i ai nisi tagata e manatu na o e matitiva ma faatauvaa e tatau ona avea ma auauna. Ae manatu isi tagata na o e mauoa e tatau ona tuuina atu i ai le avanoa e auauna atu ai. Peitai e ese le mea ua aoao mai e Iesu. Ina ua talosaga atu ia te Ia le tina o nisi o Ona soo e toalua, ia Ona faamamaluina lana fanau tama i Lona malo, sa tali mai Iesu, “O sē fia sili ia te outou, ia fai o ia ma a outou auauna; o sē fia muamua ia te outou; ia fai o ia ma a outou auauna” (Mataio 20:26–27).

E tele auala tatou te auauna atu ai. E mafai ona tatou fesoasoani atu i isi i mea tau tupe, vafealoai, i mea faaletino, ma faaleagaga. Mo se faataitaiga, e mafai ona tatou tuuina atu tupe, meaai, po o isi mea, i e ua manaomia ia mea. E mafai ona tatou fesoasoani ia i latou e manaomia le fesoasoani i le tuuina atu lea o se taulaga anapogi lima foai tele. E mafai ona tatou faauo i se tagata fou. E mafai ona tatou fai se togalaau mo se tagata matua, pe tausi se ua ma’i. E mafai ona tatou aoao atu le talalelei i se tasi na te manaomia le upumoni pe faamafanfana atu i se tasi ua faanoanoa.

E mafai ona tatou faia mea laiti ma mea tetele e auauna atu ai i isi. E le tatau lava ona tuua lo tatou fesoasoani atu i se tasi ona ua le mafai ona tatou faia ni mea tetele e fesoasoani atu ai. Na faamatala mai e se fafine ua oti lana tane, e uiga i ni tamaiti se toalua na o mai ia te ia ina ua faatoa alu atu e nofo i se nuu fou. Sa aumai e ia tamaiti mo ia se meaai ma se pepa na tusi ai upu nei, “A e manaomia se tagata e faia sau feau, valaau mai i ma’ua.” Sa fiafia lenei tina i lenei mea itiiti na faia e nei tamaiti e faaali mai ai le agalelei, ma sa le galo ia te ia lena mea.

Peitai, e i ai nisi taimi e tatau ai ona tatou osia ni taulaga tetele e auauna atu ai i se tasi. Sa tuuina mai e le Faaola Lona soifua e auauna mai ai ia i tatou.

• Mafaufau i tagata i lou aiga po o lou nuu o loo i ai ni manaoga tau tupe, faalevafealoai, faaletino, po o le faaleagaga. Mafaufau loloto i ni mea e mafai ona e faia e auauna atu ai ia i latou.

• Aisea e finagalo ai le Alii tatou te auauna atu i isi?

O le auauna atu o alii ma tamaitai ma tamaiti ma teineiti, e faataunuu ai le galuega a le Atua. Na faamalamalama mai e Peresitene Spencer W. Kimball: “Ua silafia i tatou uma e le Atua, ma ua Ia leoleo mai ia i tatou. Ae masani ona Ia faataunuu mea tatou te manaomia, e ala mai i se tasi tagata” (Peresitene o le Ekalesia: Spencer W. Kimball [2006], 94).

I o tatou olaga atoa, o i tatou uma lava e faalagolago i isi mo le fesoasoani. A o tatou laiti sa fafaga, faalavalava, ma tausia i tatou e o tatou matua. A na leai lena tausiga, semanu ua tatou feoti. Ina ua tatou tutupu ae, sa fesoasoani mai isi tagata e aoao mai ia i tatou tomai ma uiga ma amioga. O le toatele o i tatou sa tatou manaomia le tausiga i taimi tatou te mamai ai po o tupe i taimi o faigata tau tupe. E i ai nisi o i tatou e ole atu i le Atua e faamanuia atu i tagata ua mafatia, ona leai lea o se mea tatou te faia mo i latou. E ao ina tatou manatua e galue le Atua e ala atu ia i tatou.

A tatou fesoasoani atu le tasi i le isi, ua tatou auauna atu lava i le Atua. O le Tupu o Peniamina, o se tupu tautaua i le Tusi a Mamona, sa aoao atu i lona nuu lenei mataupu i le ala na soifua ai o ia. Sa ia auauna atu ia i latou i lona olaga atoa, ma sa ia tausia o ia lava, ae le i faalagolago i tagata. Sa ia faamatala mai i lana lauga lauiloa le pogai na ia fiafia ai e auauna atu, na ia saunoa mai:

“Pe a i ai outou i le galuega a o outou uso, ua i ai outou i le galuega a le Atua. …

“Ae afai e galue a’u, o le ua ta’ua e outou o lo outou tupu, e auauna atu ia te outou ona le tatau ea lea ona outou galulue ia auauna le tasi i le tasi?” (Mosaea 2:17–18).

• O a ni mea e mafai ona tatou faia e saunia ai i tatou e fesoasoani i manaoga o isi?

• O a faamanuiaga tatou te maua e ala i lo tatou auauna atu i isi?

A tatou auauna atu i isi, tatou te maua ni faamanuiaga taua. O le auauna atu e faateleina ai lo tatou alofa. E faaitiitia ai lo tatou manatu faapito. A tatou mafaufau i faafitauli o isi, ona foliga mai lea ua le mamafa tele o tatou faafitauli. E ao ina tatou auauna atu i isi ina ia tatou maua ai le ola e faavavau. Ua fetalai mai le Atua o i latou o e mau faatasi ma Ia, e ao ina latou alolofa ma auauna atu i Ana fanau (tagai i le Mataio 25:34–40).

A tatou manatunatu i olaga o e auauna atu ma le le manatu faapito, tatou te iloa e sili atu mea na latou maua nai lo mea na latou tuuina atu. O se tasi o tagata faapena o se alii e igoa ia Paulo, o se uso o le Ekalesia, sa le toe aogā ona vae uma e lua ona o se faalavelave na tupu. Atonu o nisi tagata e oo i ai le ita ma lē toe aogā, peitai sa filifili Paulo e mafaufau i isi. Sa oo ina ia alu atu ma aoaoina se galuega, ma sa ia maua ai se tupe e faatau ai se fale. O iina na la faia ai ma lona toalua ni potu e nonofo ai le toatele o fanau ua leai ni aiga ma ua le manaomia e tagata. O nisi o i latou sa matua tugā le le atoatoa o le malosi. Sa ia auauna atu i nei fanau ma isi, seia oo ina maliu o ia i le 20 tausaga mulimuli ane. Sa alofagia lava o ia, ma sa le i toe mafaufau o ia i ona vae pipili. Sa ola mafuta o ia i le Alii.

Ua saunoa mai Peresitene Spencer W. Kimball, “O le a avea atili i tatou ma ni tagata taua ao tatou auauna atu i isi—o le mea moni, e sili atu ona faigofie ona tatou ‘maua’ i tatou lava aua foi e tele naua isi vaega o i tatou e tatau ona sailia!” (Aoaoga a Peresitene o le Ekalesia: Spencer W. Kimball, 98).

O nisi o i tatou, na o tagata tatou te fiafia i ai tatou te auauna atu i ai, ae tatou te aloese mai isi tagata uma. Peitai, ua poloai mai Iesu ia tatou alolofa ma auauna atu i tagata uma. O loo i ai le tele o avanoa e auauna atu ai (tagai i le Mosaea 4:15–19).

E mafai ona tatou auauna atu i tagata o o tatou aiga. E tatau i tane ma ava ona iloa e le tasi ia mea e manaomia e le isi. E le tatau i matua ona auauna atu ia latou fanau i le na o le fafaga ma faalavalava o i latou, ae tatau foi ona latou aoao, taaalo, ma galulue faatasi ma i latou. E mafai e fanau ona auauna atu e ala i le fesoasoani i feau i le fale, ma le fesoasoani i o latou uso ma tuafafine/tuagane.

O tane ma ava e auauna ma fesoasoani le tasi i le isi. E mafai ona fesoasoani le tasi i le isi i le tausia o tamaiti, ma e mafai foi ona felagolagomai i mea latou te fiafia ai ma a latou sini faaletagata lava ia. E mafai e le tina ma le tama ona ositaulaga i le auina atu o se tasi o le fanau e fai se misiona. E mafai e se tama matua ona faamafanafana i sona tuafafine laitiiti ua fefe i le pogisa pe fesoasoani ia te ia e faitau. Fai mai o tatou perofeta, o le aiga o le iunite sili lea ona taua i le lalolagi. E ao ina tatou tautua pe auauna lelei i o tatou aiga (tagai i le Mosaea 4:14–15).

E tele avanoa tatou te auauna atu ai i o tatou tuaoi, uo, e oo lava i tagata ese. A manaomia e se tuaoi se fesoasoani i le seleseleina o lana faatoaga a o le i sau se afa, e mafai ona tatou fesoasoani i ai. Afai o ma’i se tina, e mafai ona tatou vaaia lana fanau pe fesoasoani i feau o lona fale. A pa’ū ese se alii talavou mai le Ekalesia, e mafai ona tatou toe taitai mai o ia. A tauemuina se tamaitiiti, e mafai ona tatou faauo mai o ia ma fai atu i isi ia agalelei ia te ia. E tau le manaomia lo tatou iloa o tagata tatou te auauna i ai. E tatau ona tatou vaavaai mo auala e mafai ona tatou maua tatou te auauna atu ai i le toatele o fanau a lo tatou Tama Faalelagi.

Afai e i ai ni a tatou taleni faapitoa, e tatau ona tatou faaaogaina e auauna atu ai i isi. E faamanuiaina i tatou e le Atua i taleni ma tomai e fesoasoani ai e faaleleia atili olaga o isi.

Ua i ai ni avanoa tatou te auauna atu ai i le Ekalesia. O se tasi o faamoemoega o le faatulagaga o le Ekalesia, o le tuuina mai lea ia i tatou o avanoa tatou te fesoasoani ai o le tasi i le isi. E auauna atu tagata o le Ekalesia i le faia o galuega faafaifeautalai, talia o tofiga faaletaitai, asiasi atu i uso o le Ekalesia, faiaoga i vasega, ma le faia o isi galuega a le Ekalesia. I le Ekalesia a Iesu Keriso o le Au Paia o Aso e Gata Ai, e leai ni faifeau totogi, ma o lea ua faia ai e tagata lautele o le Ekalesia gaoioiga uma a le Ekalesia.

• E mafai faapefea ona faapaleni o tatou tiutetauave i o tatou aiga ma o tatou avanoa e auauna atu ai i le Ekalesia ma le nuu?

• O a nisi o tala i tusitusiga paia e sili ona e fiafia i ai o loo faia ai e le Faaola se faataitaiga o le auauna atu?

Ua tuuina mai e le Faaola le faataitaiga sili o le auauna atu. Sa Ia fetalai mai e le i afio mai o ia i le lalolagi ina ia auauna atu tagata ia te Ia, ae na afio mai e auauna atu ma tuu atu Lona soifua mo i tatou (tagai i le Mataio 20:28).

E tele atu le alofa o Iesu ia i tatou uma nai lo le mea e mafai ona tatou malamalama i ai. Ao soifua o Ia i le lalolagi, sa Ia auauna atu i e matitiva, i e sa le malamalama, o le tagata agasala, ma ē sa inosia e tagata. Sa Ia aoao atu le talalelei i tagata uma o e sa fia faalogo mai ia te Ia, ma sa Ia fafaga le motu fia aai o tagata o e sa o mai e faalogologo ia te Ia, ma faamalolo i e mamai, ma faatutu mai e na oti.

O Ia o lo tatou Mataisau o le lalolagi ma lo tatou Faaola, peitai e tele galuega auauna ma le loto maulalo sa Ia faia. Ao lei mamao ae Faasatauroina o Ia, sa mafuta o Ia ma Ona soo. Ina ua uma ona Ia aoao atu ia i latou, sa Ia avane se pesini vai ma se solo ma mulumulu ai o latou vae (tagai i le Ioane 13:4–10; tagai foi i le ata o loo i le mataupu lenei). I ona po na, o le mulumuluina o vae o se tagata asiasi mai, o se faailoga lea o le mamalu, ma sa na o auauna sa latou faia lea galuega. Sa faia e Iesu lena mea o se faataitaiga o le alofa ma le auauna atu. A tatou auauna atu i isi ma le loto i ai, i le agaga o le alofa, e avea atili i tatou e faapei o Keriso.

• O le a se mea e mafai ona tatou aoaoina mai i faataitaiga a le Faaola, o le auauna atu?

• Mosaea 2 (lauga a le Tupu o Peniamina e uiga i le auauna atu)

• MFF 81:5 (fesoasoani atu, sii a’e, faamalosi atu)

• Kolose 3:23–24 (auauna atu i isi, e pei ona outou auauna atu i le Alii)

• Alema 17–18 (auauna atu Amona i le tupu)

• Kalatia 5:13 (auauna atu le tasi i le isi i le alofa)