O Le Pa’ū o Atamu ma Eva

• O a ni faailoga ua fesoasoani ia i tatou e iloa ai o Atamu ma Eva sa avea ma agaga totoa?

Sa saunia e le Atua lenei lalolagi e avea ma se aiga mo Lana fanau. Na filifilia Atamu ma Eva e avea ma tagata muamua e nonofo i le lalolagi (tagai i le Mose 1:34; 4:26). O la laua vaega i le fuafuaga a le Tamā, o le aumai o le ola faaletino i le lalolagi. E avea i la’ua ma uluai matua. (Tagai i le MFF 107:54–56.)

O Atamu ma Eva o nisi o fanau tamalii a lo tatou Tama Faalelagi. A o i ai i le muai olaga, sa ta’ua Atamu o Mekaeli le Agelu Sili (tagai i le MFF 27:11; Iuta 1:9). Sa filifilia o ia e lo tatou Tama Faalelagi e taitaia o e amiotonu i le taua ma Satani (tagai i le Faaaliga 12:7–9). Sa tofia Atamu ma Eva e avea ma o tatou uluai matua. Sa folafola atu e le Alii ia Atamu faamanuiaga silisili: “Ua ou faatu oe ia e i le ulu; o vao atunuu o le a tupu mai ia te oe, o oe o le aloalii ia i latou e faavavau” (MFF 107:55).

O Eva o le “tina o tagata ola uma” (Mose 4:26). Sa aumaia faatasi e le Atua ia Atamu ma Eva i le faaipoipoga aua “e le lelei ona nofo toatasi o le tagata” (Mose 3:18; tagai foi i le 1 Korinito 11:11). Sa ia te ia foi tiute na tuuina atu ia Atamu, ma o le a ia maua foi faamanuiaga e faavavau o le a tuuina atu ia Atamu.

• O a ni mea e mafai ona tatou aoao mai i faataitaiga a Atamu ma Eva?

• O a ni aiaiga na tuuina atu ia Atamu ma Eva e ola ai i le Faatoaga o Etena?

I le taimi na tuuina ai Atamu ma Eva i le Faatoaga o Etena, sa le i i ai i laua i le tulaga faaletino. I le laasaga lea, “ua le fananau foi i laua” (2 Nifae 2:23). Sa leai se oti. Sa ia i laua le ola faaletino aua sa faaofuina o laua agaga i ni tino faaletino sa faia i le efuefu o le eleele (tagai i le Mose 6:59; Aperaamo 5:7). Sa ia i laua le ola faaleagaga aua sa i ai i laua i luma o le Atua. O le taimi lea e le i faia e laua se filifiliga i le lelei ma le leaga.

Sa poloaiina i laua e le Atua ia maua ni fanau. Sa ia fetalai atu ia i laua, “Ia lua fanafanau ma uluuluola, ma faatumuina ai le lalolagi, ma faatoilalo i ai, ma pule … i meaola uma e fetolofi i luga o le fogaeleele” (Mose 2:28). Sa fetalai atu le Atua ia i laua e mafai ona la aai i laau uma o le faatoaga, vagana ai le laau e tasi, o le laau e iloa ai le lelei ma le leaga. Sa faapea le fetalaiga a le Atua e uiga i lena laau, “O le aso e te ai ai e te oti ai lava” (Mose 3:17).

O Satani, o le na le iloa le finagalo o le Atua, ae ua taumafai e faaumatia le fuafuaga a le Atua, na alu ane ia Eva i le Faatoaga o Etena. Sa faaosooso o ia e ai le fua o le laau e iloa ai le lelei ma le leaga. Sa ia tautino atu ia te ia o le a le oti o ia, ae o le a ia “pei o atua, i le iloa o le lelei mai le leaga” (Mose 4:11). Sa oo ina gauai Eva i le faaosoosoga ma ia ai le fua o le laau. Ina ua iloa e Atamu le mea ua tupu, sa ia filifili foi e ai. O suiga na oo ia Atamu ma Eva ina ua la aai i le fua o le laau, ua faaigoaina o le Pa’ū.

• O a ni suiga faaletino ma faaleagaga na oo ia Atamu ma Eva, o se taunuuga o la laua solitulafono?

Talu ai ona ua ai e Atamu ma Eva le fua o le laau e iloa ai le lelei ma le leaga, sa oo ina auina ese atu i laua e le Alii mai le Faatoaga o Etena i le lalolagi. Sa oo ina suia lo laua tulaga faaletino, o se taunuuga lea o lo laua aai i le fua o le laau sa faasaina. E pei ona folafola mai e le Atua, sa oo ina avea i laua ma tagata faaletino. O le a oo ia i laua ma a laua fanau o ma’i, tiga, ma le oti faaletino.

Ona o la laua solitulafono, ua oo ai foi ia i laua le oti faaleagaga. O le uiga o lena mea, o le a le mafai e i laua ma a laua fanau ona savavali ma talatalanoa fesagai ma le Atua. Sa vavaeeseina loa Atamu ma Eva ma a laua fanau mai luma o le Atua i le faaletino ma le faaleagaga.

• E faapefea e le Pa’ū ona saunia avanoa mo i tatou e avea ai faapei o lo tatou Tama Faalelagi?

E i ai nisi tagata ua talitonu sa faia e Atamu ma Eva se agasala mamafa ina ua la aai i le fua o le laau e iloa ai le lelei ma le leaga. Peitai, ua fesoasoani mai tusitusiga paia o aso e gata ai ia i tatou ua tatou malamalama ai o lo laua pa’ū o se mea tatau ai i le ata o le faaolataga, ma o se faamanuiaga sili mo i tatou uma. Ona o le Pa’ū, ua tatou maua ai ni tino faaletino, le aia tatau tatou te filifili ai i le lelei ma le leaga, ma le avanoa tatou te maua ai le ola e faavavau. Semanu tatou te le maua ia avanoa, pe a na tumau pea Atamu ma Eva i le faatoaga.

Ina ua mavae le Pa’ū, sa faapea Eva, “Ana le seanoa la ta solitulafono, semanu ta te le maua ni fanau, ma lē iloa le lelei mai le leaga, ma le olioli o le togiolaina o i taua, ma le ola e faavavau e tuuina mai e le Atua ia i latou uma o e usiusitai” (Mose 5:11).

Ua faamalamalama mai e le perofeta o Liae:

“O lenei, faauta, ana le solitulafono Atamu, po ua le pa’ū o ia [tuliesea mai luma o le Atua], ae tumau pea o ia i le Faatoaga o Etena. Ma ua tumau lava mea uma e pei ona i ai ina ua uma ona faia. …

“Ma ua le fanafanau foi i laua; o lea e tumau ai i laua i le le agasala, ua leai se olioli, aua ua le iloa se malaia; ua le fai se lelei, aua ua le iloa se agasala.

“Ae peitai, faauta, ua faia mea uma i le poto o Le ua silafia mea uma.

“Na pa’ū Atamu ina ia i ai tagata; ua ola tagata ina ia latou maua le olioli” (2 Nifae 2:22–25).

• Aisea e te manatu ai e taua le iloa e uiga i le Pa’ū ma le auala e aafia ai i tatou i le Pa’ū?

• 1 Nifae 5:11; 2 Nifae 2:20 (Atamu ma Eva o uluai matua, aiga)

• 2 Nifae 2:14–21 (faafeagai o mea ma le Pa’ū; o le olaga o se taimi faataitai)

• 2 Nifae 2:22–26 (O le Pa’ū o se vaega o le ata o le faaolataga)