O Le Foafoaga

• Aisea na tatau ai ona tatou o mai i le lalolagi?

A o tatou mau faatasi ma o tatou matua faalelagi o ni fanau agaga, sa ta’u mai e lo tatou Tama Faalelagi ia i tatou Lana fuafuaga ina ia avea i tatou e pei o Ia. Sa tatou alalaga ona o le fiafia ina ua tatou faalogo i Lana fuafuaga (tagai i le Iopu 38:7). Sa tatou naunau mo ni tulaga fou. Ina ia tatou maua ia mea, sa tatau ona tatou tuua le afioaga o lo tatou Tama ma maua ni tino faaletino. Sa tatou manaomia se tasi mea tatou te nonofo ai e saunia ai i tatou e avea e pei o Ia. O le igoa o lo tatou aiga fou, o le lalolagi.

• Aisea e te manatu ai na tatou alalaga fiafia ina ua tatou malamalama i le ata o le faaolataga?

O Iesu Keriso na faia lenei lalolagi ma mea uma o i ai. E tele foi isi lalolagi na Ia faia. Sa Ia faia ia lalolagi e ala i le mana o le perisitua, i lalo o le taitaiga a lo tatou Tama Faalelagi. Na fetalai mai le Atua le Tama, “E le mafaitaulia lalolagi ua ou foafoaina,… ma na ou foafoaina ia lalolagi e ala atu i le Atalii, o lo’u Atalii lea e Toatasi na Fanaua” (Mose 1:33). Ua ia i tatou foi isi molimau e uiga i lenei upu moni. Sa vaai Iosefa Samita ma Sini Rikitone ia Iesu Keriso i se faaaliga. Na la molimau mai “e mai ia te Ia, ma ui mai ia te Ia, ma o Ia, na foafoaina ai lalolagi uma, o e nonofo ai foi o atalii ma afafine na fanaua e le Atua” (MFF 76:24).

• O a faamoemoega o le Foafoaga?

O le lalolagi ma mea uma o i ai, sa foafoaina muamua faaleagaga a o le i foafoaina faaletino (tagai i le Mose 3:5). I le fuafuaga o le faia o le lalolagi faaletino, sa fetalai atu Keriso ia i latou o e sa faatasi ma Ia, “Ina tatou o ifo ia i lalō, aua o loo avanoa lava,…ma tatou faia ai se lalolagi e nonofo ai i latou nei [le fanau agaga a lo tatou Tama Faalelagi]” (Aperaamo 3:24).

Sa faatulaga ma faavaeina e Keriso le lalolagi, i lalo o le taitaiga a le Tama. Sa Ia vavae ese le malamalama mai le pouliuli, e fai ai ao ma po. Sa Ia faia le la, le masina, ma fetu. Sa Ia vavae ese vai mai le eleele matutu e fai ai sami, vaitafe, ma vaituloto. Sa faia e Ia le lalolagi ia matagofie ma aoga. Sa Ia faia le mutia, laau, fugalaau, ma isi laau o ituaiga eseese. Ua i ai i ia laau ni fatu e mafai ona tutupu mai ai ni laau o ituaiga fou. Ona Ia faia lea o manu—o i’a, manu vaefa, iniseti, manulele o ituaiga uma. Ua i ai i ia manu le mana e fanafanau ai i o latou lava ituaiga.

Ua saunia nei loa le lalolagi mo le foafoaga aupito sili i mea uma ua foafoaina—o tagata ia. O le a tuuina mai i agaga o tagata ni tino o aano ma le toto ina ia mafai ona latou nonofo i lenei lalolagi. “Ma o A’u, o le Atua, na ou fai atu i lo’u Atalii e Toatasi na Fanaua, o Le na i ai faatasi ma A’u talu mai le amataga: Ina ta faia ia o le tagata i lo ta faatusa, ia foliga ia i ta’ua; ma ua faapea lava ona faia” (Mose 2:26). Ma o lea na faia ai le uluai tane, o Atamu, ma le uluai fafine, o Eva, ma tuuina i ai tino e foliga lava i tino o o tatou matua faalelagi. “O le faatusa o le Atua, na Ia faia ai o ia, na faia e Ia o i laua o le tane ma le fafine” (Kenese 1:27). Ina ua uma ona faia e le Alii Lana foafoaga, sa fiafia o Ia ma sa Ia silafia ua lelei le galuega ua Ia faia, ma ua malolo ai mo se taimi.

• E faapefea ona faaali mai i foafoaga a le Atua e alofa o Ia ia i tatou?

Ua tatou nonofo nei i lenei lalolagi matagofie. Se’i mafaufau i le la, ua tatou maua ai le mafanafana ma le malamalama. Mafaufau foi i le timu, ua tutupu ae ai laau ma faamama ma faafelesi ai le lalolagi. Mafaufau foi i le malie o le faalogo atu i le tausani mai o manulele po o le ‘ata mai o se uo. Sei manatu foi i le ofoofogia o o tatou lava tino—i le mafai ona tatou galulue ma taaalo ma malolo. A tatou mafaufau i ia foafoaga uma, e amata ona tatou malamalama i le popoto, mamana, ma le alolofa o Iesu Keriso ma lo tatou Tama Faalelagi. Ua La faaali mai lo Laua alolofa tele ia i tatou, i lo Laua saunia o mea uma lava tatou te manaomia.

Ua faia foi laau ola ma manu ola tatou te maua ai le fiafia. Ua fetalai mai le Alii, “Ioe, o mea uma e maua mai le eleele, i lona lava tau, ua faia mo le lelei ma le aoga i tagata ina ia fiafia ai mata ma faaolioli ai le loto; Ioe, ia aoga mo meaai ma ofu, mo le tofo ma le manogi, ia faamalosi ai le tino ma faaolaola ai le agaga” (MFF 59:18–19). E ui ina tele foafoaga a le Atua, ua Ia silafia ia foafoaga uma ma alofa i ai. Ua Ia fetalai mai, “Ua ou mafaitaulia mea uma, aua o A’u lava mea, ma ua Ou iloa uma i latou” (Mose 1:35).

• O a nisi o mea e te talisapaia e faatatau i foafoaga a le Atua?

• Kenese 1; 2:1–7; Aperaamo 3:22–23; 4–5; Mose 1:27–42; 2–3 (tala o le Foafoaga)

• Eperu 1:1–3; Kolose 1:12–17; MFF 38:1–3 (o Iesu Le Foafoa)

• MFF 59:18–20; Mose 2:26–31; MFF 104:13–17; Mataio 6:25–26 (Ua faailoa mai i le Foafoaga le alofa o le Atua)