Li Jesukristo, li qaJolominel ut li qaKolonel li sikʼbʼil ru

• Kʼaʼut naq kiʼajman ru naq kooʼel chaq rikʼin li qaChoxahil Yuwaʼ? Kʼaʼut naq naʼajman ru jun aj Kolol qe?

Aran saʼ li ruchichʼochʼ rehebʼ li musiqʼej, naq kikʼutman chiqu li kʼuubʼanbʼil naʼlebʼ choqʼ re li qakolbʼal, kʼaʼjoʼ naq kisahoʼ saʼ qachʼool, joʼkan naq kiqajap qe rikʼin xsahil qachʼool (chiʼilmanq Job 38:7).

Kiqanaw naq taaʼajmanq ru naq tooʼeelq chaq saʼ li qachoxahil ochoch chiru jarubʼaq chihabʼ. Inkʼaʼ chik toowanq chiru rilobʼaal li qaChoxahil Yuwaʼ. Naq maaʼanihaqo chik chiru aʼan, chiqajunil toomaakobʼq, ut wankebʼ li teʼsachq xbʼe. Li qaChoxahil Yuwaʼ kixnaw qu ut koxra chiqajunqal. Kixnaw naq taqaj qatenqʼankil, joʼkan naq kixkʼuub chanru naq tootenqʼaaq.

Kiʼajman naq taawanq jun aj Kolonel re xtojbʼal rix li qamaak ut re xkʼutbʼal chiqu chanru naq toosutqʼiiq wiʼchik rikʼin li qaChoxahil Yuwaʼ. Li qaYuwaʼ kixye: “Ani tintaqla?” (Abrahan 3:27). Li Jesukristo, aʼan li Jehova kiyeeman re, kixye: “Wahiʼin, taqlahin laaʼin” (Abrahan 3:27; chiʼilmanq ajwiʼ Moises 4:1–4).

Li Jesus kiwan xchʼool chi kʼulunk arin saʼ li ruchichʼochʼ, chixmayejankil lix yuʼam choqʼ qe, ut chixkʼulbʼal li qamaak saʼ xbʼeen. Joʼ chanru li qaChoxahil Yuwaʼ, Aʼan kiraj naq tooruuq chixsikʼbʼal ru ma taqapaabʼebʼ lix taqlahom li qaChoxahil Yuwaʼ. Kixnaw naq kaʼajwiʼ wi kanabʼanbʼilo chixsikʼbʼal ru li qabʼe, taaruuq taqakʼut qibʼ chi kʼulubʼej choqʼ re li taqenaqil loqʼal. Li Jesus kixye: “At inYuwaʼ, chiʼuxq laa wajom, ut aawehaq taxaq li loqʼalil chi junelik” (Moises 4:2).

Kichal ajwiʼ laj Satanas, aʼan ajwiʼ aj Lucifer xkʼabʼaʼ, ut kixye: “Kʼe reetal, wahiʼin, taqlahin laaʼin, ut laaʼin tinwanq choqʼ aawalal, ut tintojebʼ rix chixjunilebʼ li winq, re naq maajun aamej taasachq, ut chi yaal tinbʼaanu, joʼkan ut, kʼe chaq we lix nimal aawu” (Moises 4:1). Laj Satanas kiraj xminbʼal qu chixbʼaanunkil joʼ chanru naraj aʼan. Saʼ lix kʼuubʼanbʼil naʼlebʼ aʼan, inkʼaʼ raj tookanabʼaaq chixsikʼbʼal ru li qabʼe. Aʼan kixmaqʼ raj chiqu li wankilal re sikʼok, li kʼeebʼil chaq qe xbʼaan li qaYuwaʼ. Laj Satanas kiraj raj naq kaʼajwiʼ aʼan taanimaaq xloqʼal xbʼaan li qakolbʼal. Wi ta kiʼux joʼ chanru naraj aʼan, kisach raj li ajom koochal wiʼ saʼ li ruchichʼochʼ (chiʼilmanq Enseñanzas de los Presidentes de la Iglesia: David O. McKay 2004, perel 228).

• Naq nakawil li jun tasal aʼin, kʼoxla kʼaʼru nakaweekʼa saʼ aachʼool chirix li Kolonel.

Naq li qaChoxahil Yuwaʼ ak kirabʼi chi aatinak xkabʼichalebʼ li ralal, kixye, “Tintaqla li xbʼeen” (Abrahan 3:27).

Li Jesukristo kisikʼman ru ut kikʼojobʼaman chi junxilaj re taawanq choqʼ qaKolonel. Wankebʼ naabʼal li aatin saʼebʼ li loqʼlaj hu li nekeʼxye resil aʼin (chiʼilmanq 1 Pedro 1:19–20; Moises 4:1–2). Saʼ jun raqal rehebʼ li loqʼlaj hu naxye naq naabʼalaq chihabʼ chik ma nayoʼla li Jesus, Aʼan kixkʼut ribʼ chiru jun profeet saʼ lix Hu laj Mormon li nawbʼil ru joʼ li ras laj Jared, ut kixye: “Kʼe reetal, laaʼin li kikawresiman chalen chaq saʼ xkʼojlajik li ruchichʼochʼ re xtojbʼal rix lin tenamit. Kʼe reetal, laaʼin li Jesukristo. … Wikʼin laaʼin teʼwanq xyuʼam chixjunilebʼ li winq, ut aʼanaq chi junelik, ebʼ ajwiʼ aʼan li teʼpaabʼanq re lin kʼabʼaʼ” (Eter 3:14).

Naq kiwan li Jesus saʼ li ruchichʼochʼ, Aʼan kixye: “Xinkubʼe chaq saʼ choxa moko re ta xbʼaanunkil li wajom laaʼin, re bʼan xbʼaanunkil li rajom li kitaqlank chaq we. … Xbʼaan naq aʼan aʼin li rajom lin Yuwaʼ: naq yalaq ani taaril ru li Kʼajolbʼej ut tixpaabʼ, wanq xyuʼam chi junelik, ut laaʼin tinwaklesi chi yoʼyo saʼ rosoʼjikebʼ li kutan” (Jwan 6:38, 40).

Rikʼin naq li qaChoxahil Yuwaʼ kixsikʼ ru li Jesukristo, laj Satanas kichal xjosqʼil ut kixpoʼresi xchʼool. Kiwan jun li pleet saʼ choxa. Laj Satanas ut ebʼ li keʼtaaqenk re keʼxpleeti li Jesukristo ut ebʼ li keʼtaaqenk re aʼan. Ebʼ li nekeʼtaaqenk re li Kolonel “keʼxqʼax ru [laj Satanas] saʼ xkʼabʼaʼ lix kikʼel li Karneer joʼ ajwiʼ rikʼin li aatin xeʼxye chi yaal” (Apokalipsis 12:11).

Saʼ li nimla poʼresink chʼoolej aʼin, laj Satanas, rochbʼeenebʼ chixjunil li musiqʼej li keʼtaaqenk chaq re, keʼisiik chaq chiru li rilobʼaal li Dios ut keʼtzʼeqeʼ chaq saʼ choxa. Jun rox xjachalil lix teepal li choxa keʼxkʼul tojbʼa-maak xbʼaan xtaaqenkil laj Satanas (chiʼilmanq Tz. ut S. 29:36). Kirameʼ chiruhebʼ xkʼulbʼal li tzʼejwalejil junxaqalil.

Rikʼin naq wanko arin saʼ li ruchichʼochʼ ut xqakʼul li tzʼejwalejil junxaqalil, naqanaw naq kiqasikʼ ru xtaaqenkil li Jesukristo ut li qaChoxahil Yuwaʼ. Laj Satanas ut ebʼ li keʼtaaqenk chaq re wankebʼ ajwiʼ saʼ li ruchichʼochʼ, aʼbʼan musiqʼejebʼ aʼan. Toj jultikebʼ re aniho laaʼo, ut wankebʼ chiqasutam wulaj wulaj, yookebʼ chiqaalenkil re taqabʼaanu li kʼaʼaq re ru inkʼaʼ nawulak chiru li qaChoxahil Yuwaʼ. Saʼ li qayuʼam naq majiʼ nokochal saʼ li ruchichʼochʼ, kiqasikʼ ru xtaaqenkil li Jesukristo ut xkʼulubʼankil lix kʼuubʼanbʼil naʼlebʼ li Dios. Toj tento taqataaqe li Jesukristo arin saʼ li ruchichoʼchʼ. Kaʼajwiʼ rikʼin xtaaqenkil Aʼan nokoru chi sutqʼiik saʼ li qachoxahil ochoch.

• Chan ru naq toj yoo chi pleetimank li pleet li kiwan saʼ choxa?

• Kʼoxla chan ru naq xatbʼeresiik xbʼaan lix yehom li Kolonel.

Chalen chaq saʼ xtiklajik, li Jesukristo yoo chixkʼutbʼesinkil li evangelio, li naxkʼut chiqu kʼaʼru tento taqabʼaanu re toosutqʼiiq rikʼin li qaChoxahil Yuwaʼ. Naq kixtaw tzʼaqal xqʼehil, Aʼan ajwiʼ kikʼulun saʼ li ruchichʼochʼ. Kixkʼut li kʼuubʼanbʼil naʼlebʼ re li kolbʼa-ibʼ ut re li taqenaqil loqʼal rikʼin li raatin joʼ ajwiʼ rikʼin li kixbʼaanu saʼ lix yuʼam. Aʼan kixxaqabʼ lix iglees ut lix tijonelil saʼ li ruchichʼochʼ. Kixkʼul li qamaak saʼ xbʼeen.

Rikʼin xtaaqenkil li raatin Aʼan, naru taqeechani jun li qanaʼaj saʼ li choxahil awaʼbʼejihom. Aʼan kixbʼaanu joʼ kʼihal li kiʼajman re qatenqʼankil chi sutqʼiik saʼ li qachoxahil ochoch. Anajwan aʼ yaal re li junjunq qe laaʼo ma taqabʼaanu li kʼaʼru naʼajman re naq qakʼulubʼaq li taqenaqil loqʼal.

• Moises 4:1–4; Abrahan 3:22–28 (kisikʼman ru li Kolonel saʼ li yuʼam naq majiʼ nawan li ruchichʼochʼ)

• Tz. ut S. 76:25–29 (li pleet saʼ choxa)

• Apokalipsis 12:7–9, 11 (ebʼ li keʼtaaqenk re li Kolonel saʼ li pleet saʼ choxa keʼxqʼax ru laj Satanas saʼ xkʼabʼaʼ lix kikʼel li Karneer ut li aatin xeʼxye chi yaal)

• Isaias 14:12–15 (kʼaʼut naq ki-isiik chaq laj Lucifer)