Li tijok chiru li qaChoxahil Yuwaʼ

Li Jesus kixye: “Junelik tento textijoq chiru li Yuwaʼbʼej saʼ lin kʼabʼaʼ” (3 Nefi 18:19).

Li tijok aʼan jun rehebʼ li osobʼtesink qʼaxal nim naqakʼul naq wanko arin saʼ li ruchichʼochʼ. Rikʼin li tijok naru nokoʼaatinak rikʼin li qaChoxahil Yuwaʼ, ut wulaj wulaj naru naqasikʼ qabʼeresinkil rikʼin Aʼan.

Li tijok, aʼan aatinak rikʼin li qaChoxahil Yuwaʼ rikʼin xʼanchalil li qachʼool. Tento naq kaʼajwiʼ chiru li Dios tootijoq, ut maaʼani chik. Inkʼaʼ nokotijok chiru anihaq chik malaj kʼaʼruhaq chik li yiibʼanbʼil xbʼaan junaq winq malaj xbʼaan li Dios (chiʼilmanq Exodo 20:3–5).

Li tijok kʼaʼjoʼ naq wan xwankil saʼ li evangelio chalen chaq saʼ xtiklajik li ruchichʼochʼ. Jun lix anjel li Qaawaʼ kixtaqla re laj Adan ut li xEva naq teʼxjal xkʼaʼuxlebʼ ut teʼxbʼoq xkʼabʼaʼ li Dios saʼ lix kʼabʼaʼ li Kʼajolbʼej (chiʼilmanq Moises 5:8). Maajoʼqʼe xʼisiman li taqlahom aʼin. Li tijok toxtenqʼa chixjilosinkil qibʼ rikʼin li Dios. Li qatij naru chi kʼanjelak saʼ chixjunil li kʼaʼru naqakʼoxla, naqaye, ut˛naqabʼaanu.

Tento tootijoq re xkʼulbʼal qametzʼew chixyalbʼal qu rikʼin li aaleek xbʼaan laj Satanas ut ebʼ li nekeʼtaaqenk re (chiʼilmanq 3 Nefi 18:15; Tz. ut S. 10:5). Tento tootijoq re xchʼolobʼankil li qamaak chiru li Dios ut re xpatzʼbʼal xkuybʼal qamaak chiru (chiʼilmanq Alma 38:14).

Tento tootijoq re xpatzʼbʼal chiru li Qaawaʼ naq tixkʼam li qabʼe ut toxtenqʼa saʼ li qayuʼam re wulaj wulaj. Us naq tootijoq chirix li qajunkabʼal ut li ani raabʼil qabʼaan, li qech kabʼal, li qawimq ut li qaxul, li qatrabʼaaj re wulaj wulaj, ut li kʼaʼaq chik re ru naqabʼaanu. Tento tootijoq re tookoleʼq chiruhebʼ li xikʼ nekeʼilok qe. (Chiʼilmanq Alma 34:17–27).

Tento tootijoq re xyeebʼal re li qaChoxahil Yuwaʼ naq naqara, ut re reekʼankil naq nachʼ wanko rikʼin. Tento tootijoq chiru li qaYuwaʼ re xbʼantioxinkil chiru Aʼan li sahil wank ut li xyaalalil li wanko wiʼ, joʼ ajwiʼ li kʼaʼaq re ru naxkʼe chaq qe wulaj wulaj (chiʼilmanq 1 Tesalonicenses 5:18). Tento tootijoq re xpatzʼbʼal chiru li qaChoxahil Yuwaʼ naq tixkʼe qametzʼew re taqapaabʼ li evangelio saʼ li qayuʼam.

Tento ajwiʼ tootijoq re naq tookanaaq saʼ li laatzʼ ut kaʼchʼin ruhil bʼe li naxik saʼ li junelik yuʼam. Tento tootijoq chiru li Dios, laj eechal re chixjunil li tiikilal, re naq tiikaqo saʼ li kʼaʼru naqakʼoxla, naqaye, ut naqabʼaanu.

• Chan ru naq li tijok xatxtenqʼa chi nachʼok rikʼin laa Choxahil Yuwaʼ?

Naru tootijoq yalaq joʼqʼe naq naqaj raatinankil li qaChoxahil Yuwaʼ, us ta chi yeebʼil, malaj yal saʼ qaam. Wan naq naʼajman naq toowanq qajunes bʼar wiʼ nokoru chixhoybʼal xʼanchalil li qaam chiru Aʼan (chiʼilmanq Mateo 6:6). Joʼkan ajwiʼ, naru nokotijok naq yooko chixbʼaanunkil li kʼaʼaq re ru re wulaj wulaj. Naru nokotijok naq wanko saʼ junaq chʼutam re li Iglees, naq wanko waʼ kabʼl, naq yooko chi bʼeek saʼ bʼe, naq yooko chi kʼanjelak, chi kʼuubʼank wa, malaj yalaq bʼar wanko ut yalaq kʼaʼru yooko. Naru nokotijok chi yalaq hoonal chi kutan malaj chi qʼeq. Naru nokotijok naq wanko qajunes malaj naq wanko rikʼin anihaq chik. Naru nawan li qaChoxahil Yuwaʼ chi kʼoxlanbʼil qabʼaan rajlal (chiʼilmanq Alma 34:27). Naru naq tootijoq “junelik” (Tz. ut S. 10:5).

Wan naq maare taqeekʼa naq inkʼaʼ naqaj tijok. Maare yoo qajosqʼil, malaj naʼaaloʼ li qachʼool, malaj xoopoʼ. Naq joʼkan wanko, qʼaxal wiʼchik naq aajel ru naq taqayal qaqʼe chi tijok (chiʼilmanq 2 Nefi 32:8–9).

Aajel ru choqʼ qe chiqajunqal naq tootijoq saʼ junesal rajlal qʼojyin ut rajlal eqʼla. Saʼebʼ li loqʼlaj hu, naʼaatinak chirix li tijok eqʼla, waʼlebʼ, ut ewu (chiʼilmanq Alma 34:21).

Taqlanbʼilo chi tijok saʼ junkabʼal re naq teʼosobʼtesiiq li qajunkabʼal (chiʼilmanq 3 Nefi 18:21). Ebʼ laj jolominel saʼ li Iglees xeʼxkʼe li qanaʼlebʼ re naq tootijoq saʼ junkabʼal rajlal eqʼla ut rajlal qʼojyin.

Kʼeebʼil ajwiʼ qe li tijok re xbʼantioxinkil ut rosobʼtesinkil li tzakemq rajlal sut naq nokowaʼak.

Naqatikibʼ ut naqachoy chixjunilebʼ li chʼutam saʼ li Iglees rikʼin li tijok. Naqabʼantioxi chiru li Qaawaʼ chixjunil li osobʼtesink li naxkʼe, ut naqatzʼaama li qatenqʼankil re tooruuq chi loqʼonink joʼ chanru nawulak chiru Aʼan.

Maakʼaʼ naxye bʼar wanko, ma chi xaqxo malaj chi wiqʼwo, ma rikʼin xtzʼuumal qe malaj saʼ qaam, ma qajunes malaj naq chʼutchʼuuko, junelik tento tootijoq rikʼin paabʼaal, “rikʼin xʼanchalil eechʼool, chi tiik eerajom” (Mosoni 10:4).

Naq nokotijok chiru li qaChoxahil Yuwaʼ, us naq taqaye re kʼaʼru tzʼaqal li naqeekʼa saʼ li qachʼool, naq taqakanabʼ qibʼ chiru, naq taqapatzʼ xkuybʼal qamaak, naq tootzʼaamanq chiru, naq toobʼantioxinq chiru, ut naq taqaye re naq naqara. Inkʼaʼ us naq yal taqaye kʼiila aatin chi maakʼaʼ rajlbʼal (chiʼilmanq Mateo 6:7–8). Junelik tento tapatzʼ naq chiʼuxq li kʼaʼru naraj Aʼan, ut taajultikoʼq qe naq li kʼaʼru naqaj laaʼo maare maawaʼ li kʼaʼru us choqʼ qe (chʼilmanq 3 Nefi 18:20). Saʼ rosoʼjik li qatij, naqachoy saʼ lix kʼabʼaʼ li Jesukristo (chiʼilmanq 3 Nefi 18:19).

• Kʼaʼut nakakʼoxla naq wan naq inkʼaʼ junelik kʼutkʼu naq sumenbʼil li qatij? Kʼaʼut nakakʼoxla naq wan naq inkʼaʼ nasumeman li qatij joʼqʼe naqaj malaj joʼ chanru naqaj laaʼo?

Junelik nasumeek li qatij li bʼaanunbʼil chi anchal qachʼool. Wan naq lix sumenkil naxye qe naq inkʼaʼ, xbʼaan naq li kʼaʼru xqatzʼaama maawaʼ li tixkʼe tzʼaqal qachaabʼilal. Wan naq lix sumenkil naxye qe naq us, ut nachal xkʼojobʼankil qachʼool ut xqʼixnal li qachʼool, chirix li kʼaʼru tento taqabʼaanu (chiʼilmanq Tz. ut S. 9:8–9). Wan naq lix sumenkil naxye qe, “oybʼeni chiru jarubʼaq kutan”. Li Qaawaʼ junelik naxkʼoxla joʼqʼe ut chanru naq taasumeeq li qatij, re naq qʼaxal wiʼchik tootenqʼaaq rikʼin.

Wan naq li Qaawaʼ naxsume li qatij rikʼin ruqʼ jalanebʼ chik li qas qiitzʼin. Junaq komon raaro qabʼaan, li qixaqil malaj qabʼeelom, li qanaʼ qayuwaʼ malaj junaq qech alal, jun aj jolominel re li Iglees, jun aj kʼamol aatin—yalaq ani rehebʼ aʼin nekeʼru chi eekʼasiik xchʼool re teʼxbʼaanu li kʼaʼru taasumenq re li qatij. Joʼkaʼin kixkʼul jun li naʼbʼej li xtochʼeʼ lix kʼulahal saʼ li rochoch. Li ixq aʼan inkʼaʼ kiru chixkʼambʼal li kʼulahal rikʼin jun aj bʼanonel. Tojaʼ xqʼaxonik chaq saʼ li tenamit wan wiʼ, ut inkʼaʼ naxnawebʼ ru li rech kabʼal. Li naʼbʼej kitijok re xpatzʼbʼal xtenqʼankil. Junpaataq chik naq xolnumeʼq jun li rech kabʼal, ut kixye, “xweekʼa saʼ inchʼool naq tento tinnumeʼq re tinwil ma taawaj aatenqʼankil.” Li rech kabʼal kixtenqʼa li ixq chixkʼambʼal li kʼulahal rikʼin laj bʼanonel.

Wan naq li Dios naxkʼe qawankil re naq qajunes taqataw xsumenkil ru li qatij. Naq nokotijok re xsikʼbʼal qatenqʼankil, tento ajwiʼ taqabʼaanu joʼ kʼihal li naru chiqu re naq taʼuxq li kʼaʼru ajbʼil qabʼaan.

Wi naqapaabʼ lix evangelio li Jesukristo saʼ li qayuʼam ut junelik nokotijok, taawanq xsahil li qachʼool. “Tuulanaq aachʼool; ut li Qaawaʼ laa Dios tatxbʼeresi chawuqʼ, ut tixkʼe xsumenkil ru laa tij” (Tz. ut S. 112:10).

• Chan ru naq laa Choxahil Yuwaʼ xsume laa tij?

• Santiago 1:5 (kʼaʼru taqatzʼaama naq nokotijok)

• 1 Tesalonicenses 5:17; Salmos 55:17; 2 Nefi 32:9 (joʼqʼe tootijoq)

• Alma 34:26 (bʼar tootijoq)

• 3 Nefi 19:6, 24 (chan ru tootijoq)

• Tz. ut S. 88:63–65 (chan ru nekeʼsumeek li qatij)

• Moroni 10:3–5; Alma 37:37 (li kʼaʼru yeechiʼinbʼil naq nokotijok)

• Santiago 5:16 (lix nimal xwankil lix tij li ani tiik xchʼool)

• Kʼutul Raqal rehebʼ li Loqʼlaj Hu, “Tijok”.