Li taqenaqil loqʼal

Naq koowan rikʼin li qaChoxahil Yuwaʼ, Aʼan kixkʼut chiqu jun li kʼuubʼanbʼil naʼlebʼ choqʼ re qachaabʼilobʼresinkil. Taaruuq toowulaq chanchan Aʼan, chi taqsinbʼil qaloqʼal joʼ chanru Aʼan. Saʼ lix kʼuubʼanbʼil naʼlebʼ, kiʼajman naq taajacheʼq qu rikʼin Aʼan ut toochalq saʼ li ruchichʼochʼ. Kiʼajman ru xjachbʼal qibʼ rikʼin Aʼan re xyalbʼal rix ma tooʼabʼinq chiruhebʼ lix taqlahom li qaYuwaʼ, us ta moko wanko ta chik chiru li rilobʼaal. Saʼ li kʼuubʼanbʼil naʼlebʼ aʼin, kʼuubʼanbʼil naq joʼqʼe taaraqeʼq li qayuʼam saʼ li ruchichʼochʼ, taaraqmanq aatin chiqix ut taqakʼul li qaqʼajkaamunkil aʼ yaal joʼ xnimal li qapaabʼaal, ut chan ru naq xoʼabʼink chiru li chaqʼrabʼ.

Saʼebʼ li loqʼlaj hu naqil naq wankebʼ oxibʼ chi awaʼbʼejihom re loqʼalil saʼ choxa. Li Apostol aj Pablo kixye resil naq kixnaw ru jun winq li “xsaapuuk toj saʼ rox xkʼojaril li choxa” (2 Korintios 12:2). Laj Pablo kixye resil jalan jalanq paay chi loqʼalil, joʼ li choxahil ut li ruchichʼochʼil (terrestil), aʼanebʼ reetalilebʼ li awaʼbʼejihom saʼ choxa (chiʼilmanq 1 Korintios 15:40–42). Li choxahil awaʼbʼejihom, aʼan li loqʼalil li qʼaxal taqenaq, ut li terrestil kubʼenaq wiʼchik xwankil chiru aʼan. Rikʼin li naʼlebʼ kʼutbʼesinbʼil saʼ rosoʼjikebʼ li kutan, naqanaw naq li rox awaʼbʼejihom aʼan li teleestil awaʼbʼejihom (chiʼilmanq Tz ut S. 76:81). Naqatzol ajwiʼ naq wankebʼ oxibʼ choxa malaj tasal saʼ li choxahil awaʼbʼejihom (chiʼilmanq Tz. ut S. 131:1).

• Kʼaʼru li taqenaqil loqʼal?

Li taqenaqil loqʼal aʼan li junelik yuʼam, li yuʼam wan wiʼ li Dios. Aʼan nawan saʼ nimla loqʼalil. Tzʼaqal re ru aʼan. Aʼan wan re chixjunil li nawom ut chixjunil lix chaabʼilal li naʼlebʼ. Aʼan xyuwaʼebʼ li musiqʼejil alal kʼajolbʼej. Aʼan aj yoʼobʼtesinel. Laaʼo naru toowulaq joʼ chanru li qaChoxahil Yuwaʼ. Aʼin li taqenaqil loqʼal.

Wi naqakʼut naq tiiko chixpaabʼankil li Qaawaʼ, toowanq saʼ li jun tasal qʼaxal taqenaq re li choxahil awaʼbʼejihom. Toowanq chi taqenaq qaloqʼal, re toowanq rikʼin li qaChoxahil Yuwaʼ saʼebʼ li junkabʼalej li junelik teʼwanq. Li taqenaqil loqʼal aʼan li jun chi maatan qʼaxal nim naru naxkʼe li qaChoxahil Yuwaʼ rehebʼ li ralal xkʼajol (chiʼilmanq Tz. ut S. 14:7).

• Kʼaʼru junjunq li osobʼtesink li taakʼeemanq rehebʼ li taqenaqebʼ xloqʼal?

Li qaChoxahil Yuwaʼ tzʼaqal re ru, ut naxnima xloqʼal rikʼin naq naru naq ebʼ li ralal xkʼajol teʼwulaq joʼ chanru Aʼan. Lix kʼanjel ut lix loqʼal, aʼan “xkʼeebʼal chi uxmank lix kolbʼal chiru li kamk ut lix yuʼam chi junelik li winq” (Moises 1:39).

Ebʼ li nekeʼkʼuluk re li taqenaqil loqʼal saʼ li choxahil awaʼbʼejihom xbʼaan xpaabʼankil li Jesukristo teʼxkʼul li chaabʼil osobʼtesihom. Li Qaawaʼ kixye: “rehebʼ aʼan chixjunil li kʼaʼaq re ru” (Tz. ut S. 76:59). Aʼan aʼin junjunq li osobʼtesink li taakʼeemanq rehebʼ li ani taqsinbʼilebʼ xloqʼal:

1. Teʼwanq chi junelik chiru li rilobʼaal li qaChoxahil Yuwaʼ ut li Jesukristo (chiʼilmanq Tz. ut S. 76:62).

2. Diosaqebʼ naq teʼwanq (chiʼilmanq Tz. ut S. 132:20–23).

3. Teʼjunajiiq chi junelik rikʼinebʼ li ani tiik xchʼool saʼ lix junkabʼalebʼ, ut taaruuq teʼwanq xkʼiijik saʼ li junelik qʼe kutan.

4. Teʼxkʼul xtzʼaqalil li sahil chʼoolejil.

5. Teʼxkʼul joʼ kʼihal li wan re li qaChoxahil Yuwaʼ ut li Jesukristo—chixjunil li wankilal, li loqʼalil, li awaʼbʼejil, ut li nawom (chiʼlmanq Tz. ut S. 132:19–20). Li Awaʼbʼej Joseph Fielding Smith kixtzʼiibʼa: “Li Yuwaʼbʼej xyeechiʼi rikʼin xtzʼuumal re li Kʼajolbʼej naq chixjunil li kʼaʼru re taakʼeemanq rehebʼ li ani nekeʼabʼink chiruhebʼ lix taqlahom. Ebʼ aʼan teʼninqanq rikʼin nawom, xchaabʼilal li naʼlebʼ, ut wankilal, teʼnumeʼq chalen chaq saʼ li jun usilal toj saʼ li jun chik, toj reetal naq lix tzʼaqalil li kutan taamoq saʼ xbʼeenebʼ” (Doctrina de Salvación, kʼuubʼanbʼil xbʼaan laj Bruce R. McConkie, 3 tasal li hu 1954–56, 2:36; ak kʼeebʼil xkawil li aatin saʼ li hu).

Aʼan li kutan aʼin li tento taqabʼaanu wiʼ li kʼaʼru naʼajman re xkʼulbʼal li taqenaqil loqʼal (chiʼilmanq Alma 34:32–34). Li Awaʼbʼej Joseph Fielding Smith kixye: “Re taaruuq taqakʼul li taqenaqil loqʼal tento taqakʼulubʼa li evangelio ut chixjunil lix sumwank; ut taqakʼul saʼ qabʼeen li jar tenebʼaak li yeechiʼinbʼil xbʼaan li Qaawaʼ; ut toobʼeeq saʼ xsaqenkil li yaal chi tawbʼil ru chiqu; ut taawanq qayuʼam «rikʼin li junjunq chi aatin li naʼel chaq saʼ xtzʼuumal re li Dios»” (Doctrina de Salvación, 2:41).

Re taataqsimanq qaloqʼal, tento xbʼeen wa taqapaabʼ li Jesukristo, tojaʼ naq tookuyuq saʼ li paabʼaal aʼan toj saʼ rosoʼjik li qayuʼam. Tento naq tzʼaqalaq qapaabʼaal chirix Aʼan re naq taqajal qakʼaʼuxl chirix li qamaak ut tooʼabʼinq chiruhebʼ lix taqlahom.

Aʼan naxtaqla naq chiqajunil tento taqakʼul junjunq li kʼojobʼanbʼil kʼanjel:

1. Tento taakubʼeeq qahaʼ.

2. Tento taqakʼul xkʼeebʼal li uqʼej re tookʼojobʼaaq choqʼ komon saʼ lix Iglees li Jesukristo ut taqakʼul li maatan re li Santil Musiqʼej.

3. Ebʼ li komon winq tento teʼxkʼul li Tijonelil re Melkisedek ut teʼxnimobʼresi lix kʼanjel saʼ li tijonelil.

4. Tento taqakʼul li tiqibʼaak saʼ li santil ochoch.

5. Tento toosumlaaq choqʼ re li junelik qʼe kutan, saʼ li yuʼam aʼin malaj saʼ li yuʼam li taachalq.

Rochbʼeen xkʼulbʼal chixjunilebʼ li kʼojobʼanbʼil kʼanjel li tenebʼanbʼil, li Qaawaʼ nokoxtaqla chixbʼaanunkil aʼin:

1. Taqara li Dios ut ebʼ li qas qiitzʼin.

2. Taqapaabʼebʼ li taqlahom.

3. Taqajal qakʼaʼuxl chirix li kʼaʼru inkʼaʼ us naqabʼaanu.

4. Taqasikʼebʼ li qaxeʼ qatoon li kamenaqebʼ ut taqabʼaanu li kʼojobʼanbʼil kʼanjel aj kolonel re li evangelio choqʼ rehebʼ.

5. Toowulaq saʼebʼ li chʼutam re li Iglees aʼ yal chi kokʼ aj xsaʼ joʼ li naru chiqu, re tooruuq chixʼakʼobʼresinkil li qasumwank re li kubʼihaʼ rikʼin xkʼulbʼal li loqʼlaj waʼak.

6. Taqarahebʼ li qakomon saʼ li qajunkabʼal, ut taqakawobʼresihebʼ saʼ xbʼehil li Qaawaʼ.

7. Tootijoq qajunes ut saʼ junkabʼal wulaj wulaj.

8. Taqakʼut li evangelio chiruhebʼ li qas qiitzʼin rikʼin li qaatin ut qabʼaanuhom.

9. Tootzoloq saʼebʼ li loqʼlaj hu.

10. Taqabʼi ut tooʼabʼinq chiru lix musiqʼanbʼil aatinebʼ lix profeet li Qaawaʼ.

Chirix chixjunil, li junjunq qe tento tixkʼul li Santil Musiqʼej ut tixtzol xtaaqenkil li bʼe naxkʼut saʼ li qayuʼam wulaj wulaj.

• Chan ru naq ebʼ li kʼojobʼanbʼil kʼanjel ut sumwank nokoheʼxkawresi choqʼ re li taqenaqil loqʼal?

• Chan ru naq li paabʼaal chirix li Jesukristo nokoxtenqʼa chi abʼink chiruhebʼ li taqlahom?

• Kʼaʼut naq tento taqatzol xbʼaanunkil li bʼeresinbʼil xbʼaan li Santil Musiqʼej re taataqsimanq li qaloqʼal?

• Kʼaʼru taqakʼul chirix naq xookuyuk toj saʼ rosoʼjik joʼ chaabʼil tzolom re li Kristo?

Li Qaawaʼ kixye: “Wi nakapaabʼebʼ lin taqlahom ut nakatkuyuk toj saʼ rosoʼjik, taawanq aayuʼam chi junelik, aʼ li maatan li qʼaxal nim re chixjunilebʼ lix maatan li Dios” (Tz. ut S. 14:7). Li Awaʼbʼej Joseph Fielding Smith kixye: “Wi nokokana rikʼin li Dios, aʼan naraj naxye xpaabʼankil lix taqlahom, xloqʼoninkil Aʼan ut wank saʼ xbʼe li yaal naxkʼe; chirix aʼan taachalq xkutankil naq atisinbʼilaqo rikʼin xtzʼaqalil li yaal, li yooq chi nimank xlemtzʼunkil toj reetal li tzʼaqal kutan” (Doctrina de Salvación, 2:34).

Li Profeet aj Jose Smith kixye: “Naq nakattaqsink chiru jun li eebʼ, tento taatikibʼ taqʼa, ut tatnumneʼq chiru li junjunq chi yokbʼ toj reetal naq tatwulaq taqeʼq; ut joʼkan ajwiʼ wan rikʼin li jar xraqalil li evangelio—tento tattiklaaq rikʼin li xbʼeen, ut tatxik chi uubʼej toj reetal naq taatzol chixjunil li jar raqal chi naʼlebʼ re li taqenaqil loqʼal. Aʼbʼanan toj taanumeʼq kʼiila kutan chirix naq ak xatnumeʼ chiru li tzʼaplebʼ tʼikr [xatkam] rubʼelaj naq akaq xatzolebʼ. Moko tawbʼilaq ta ru chixjunil saʼ li ruchichʼochʼ aʼin; nimaq li kʼanjel re xtzolbʼal li qakolbʼal ut li qataqenaqil loqʼal toj chirix ajwiʼ li muqlebʼaal” (Enseñanzas de los Presidentes de la Iglesia: José Smith 2007, perel 282–283).

Laj Jose Smith kixye: “Aʼan li xbʼeen raqal chi naʼlebʼ re li Evangelio xnawbʼal chi tzʼaqal chan ru naq wan li Dios. … Aʼan kiwan junxil choqʼ winq joʼ laaʼo; … li Dios ajwiʼ, li qaYuwaʼ chiqajunilo, kiwan saʼ jun li ruchichʼochʼ, joʼ chanru ajwiʼ kixbʼaanu li Jesukristo” (Enseñanzas del Profeta José Smith, kʼuubʼanbʼil xbʼaan laj Joseph Fielding Smith 1982, 427–428).

Li qaChoxahil Yuwaʼ naxnaw kʼaʼru lix yalbʼal qix, lix qʼunal qametzʼew, ut li qamaak. Aʼan naxtoqʼobʼa qu ut naruxtaana qu. Aʼan naraj naq tooʼusaaq joʼ chanru ajwiʼ naq kixbʼaanu Aʼan.

Kʼoxla chan ru naq taasahoʼq qachʼool chiqajunqal naq toosutqʼiiq rikʼin li qaChoxahil Yuwaʼ wi naru taqaye: “At inYuwaʼ, xinwan saʼ lin yuʼam joʼ chanru xawaj. Tiikin chi paabʼank, ut xinpaabʼebʼ chixjunil laa taqlahom. Sa saʼ inchʼool chi wank wiʼchik arin.” Tojaʼ naq taqabʼi Aʼan chixyeebʼal: “Us …! Tiik aachʼool naq xatwank rikʼin li bʼabʼay, tinkʼe aawankil saʼ xbʼeen naabʼal chik. Tattzʼaqonq saʼ xsahil xchʼool laj eechal aawe” (Mateo 25:23).

• Chawil Mateo 25:23. Kʼoxla chan ru taaweekʼa wi ta taawabʼi li Qaawaʼ chixyeebʼal li aatin aʼin aawe.

• Tz. ut S. 132:3–4, 16–26, 37 (naʼlebʼ chirix li taqenaqil loqʼal)

• Tz. ut S. 131:1–4 (li junelik sumlaak aʼan xlawil li taqenaqil loqʼal)

• Tz. ut S. 76:59–70 (nachʼolobʼaman kʼaʼru li osobʼtesink re li choxahil loqʼal)

• Tz. ut S. 84:20–21 (nakʼutman li wankilal re choxahilal rikʼinebʼ li kʼojobʼanbʼil kʼanjel re li tijonelil)