Tagata Matutua Nofofua o le Ekalesia

O le talalelei a Iesu Keriso sa tuuina mai e le Atua ia manuia ai Ana fanau. O tagata taitoatasi o se vaega o le aiga toatele a o tatou Matua Faalelagi. O i latou o e auai i le Ekalesia e avea o se vaega o se isi faaaumeaga maoae, o se faaaumeaga moni o uso ma tuafafine o e ua filifili e mulimuli ia Iesu Keriso.

O tagata nofofua o le Ekalesia—e aofia ai i latou o e e le’i faaipoipoina, ua tatala faaipoipoga, pe ua maliliu taitoalua—e auauna ma tapuai i le Ekalesia faatasi ma isi tagata o a latou uarota ma paranesi. Na faamalamalama mai e Peresitene Gordon B. Hinckley: “Pe a uma uma mea uma, e le tatau ona faailogaina i tatou o ni tagata ua faaipoipoina pe nofofua ae o ni tagata o le Ekalesia, ua tofu agavaa i ua’iga e tasi, le tausiga e tasi, o avanoa e tasi e auauna atu ai” (“O Se Talanoaga ma Tagata Matutua Nofofua,” Liahona, Nov. 1997, 18).

E taua fanau uma a le Atua i Lana fuafuaga, ma e mafai e tagata uma ona faia se matafaioi taua i le fausiaina o Lona malo. E le gata i lea, e mafai e tagata uma ona saili mo faamanuiaga uma o loo i ai i lo tatou Tama Faalelagi mo Lana fanau—e aofia ai faamanuiaga o se faaipoipoga e faavavau—tusa lava pe latou te maua le olioli i o latou tulaga o i ai nei (tagai Mosaea 2:41). Na faamalamalama mai e Elder Robert D. Hales: “Ona o Lona alofa tele mo i tatou taitoatasi e finagalo le Atua ia fiafia i tatou uma. Na Ia ta’u mai ia i tatou e ala mai i le perofeta o Liae, ‘Ua i ai tagata, ina ia latou maua le olioli’ (2 Ni. 2:25). O le olioli ua tatou ta’ua o le taimi nei. Tatou te le tau faatalitali mo se isi aso, mo se isi tausaga, seia suia o tatou tulaga, pe seia tatou maliliu ma o atu i lo tatou mamalu e faavavau. E tatau ona tatou maua le olioli i le taimi nei. Afai tatou te alolofa i le talalelei a Iesu Keriso, e mafai ona tatou maua le olioli” (“O Le Auai i se Aiga o le Uarota,” Liahona, Mat. 1999, 14).

Tusifaamaumau Ou Lagona Uunai

Savali Faaopoopo

“I’m a Mormon, Single Mother, and Special Needs Advocate”