Papatisoga mo e ua Maliliu

Na aoao mai Iesu Keriso, o le papatisoga e taua i le faaolataga o i latou uma o e na ola i le lalolagi (tagai Ioane 3:5). Ae peitai, e toatele tagata ua maliliu ae le’i papatisoina. O isi sa papatisoina e aunoa ma le pule tatau. Ona e alofa mutimutivale le Atua, ua Ia saunia ai se ala mo tagata uma e maua ai faamanuiaga o le papatisoga. E ala i le faia o papatisoga sui e fai ai ma sui o i latou ua maliliu, ua ofo atu ai e tagata o le Ekalesia nei faamanuiaga i tuaa ua maliliu. Ona mafai lea e tagata taitoatasi ona filifili e talia pe teena le mea ua faia e fai ai ma o latou sui.

Na fetalai Iesu Keriso, “Afai e le fanau se tasi i le vai ma le Agaga, e le mafai ona sao o ia i le malo o le Atua” (Ioane 3:5 O Iesu Keriso Lava Ia sa papatisoina (tagai Mataio 3:13–17).

E toatele tagata sa ola i le lalolagi sa le’i faalogo lava i le talalelei a Iesu Keriso ma sa le’i papatisoina. O isi sa ola e aunoa ma le malamalama atoatoa i le taua o le sauniga o le papatisoga. Ae o isi sa papatisoina, e aunoa ma le pule tatau.

Ona o Ia o se Atua agalelei, e le faasalaina ai e le Alii na tagata o e, sa le o so latou sese, na le’i maua ai le avanoa mo le papatisoga. O lea ua Ia faatagaina ai papatisoga ina ia faia e ala, i se tagata e sui mo i latou. O se tagata o loo soifua e masani lava o se tupuga [mai i lē ua maliu] ua avea ma se tagata o Le Ekalesia a Iesu Keriso o le Au Paia o Aso e Gata Ai, e papatisoina e fai ma sui o se tagata ua maliu. O lenei galuega e faia e tagata o le Ekalesia i totonu o malumalu i le lalolagi atoa.

Ua i ai ni manatu sese o isi tagata e faaepa, a faataunuu papatisoga mo e ua maliliu, ua papatisoina tagata ua maliliu i totonu o le Ekalesia ae latou te le’i loto i ai. E le o le tulaga lena. Ua i ai i tagata taitoatasi le faitalia, po o le aiā e filifili ai. O le aloaia o se papatisoga mo e ua maliliu, e faalagolago lea i le taliaina e le tagata ua maliu ma filifili ai e talia ma mulimuli i le Faaola a o nofo ai i le lalolagi o agaga. O igoa o tagata ua maliliu e le faaopoopoina i pepa faamaumau o le Ekalesia.

Ua faailoa mai i le Feagaiga Fou e faapea, o le papaptisoga mo e ua maliliu sa faia i le taimi o le Aposetolo o Paulo (tagai 1 Korinito 15:29). O lenei sauniga sa toefuatai mai faatasi ma le faavaeina o Le Ekalesia a Iesu Keriso o le Au Paia o Aso e Gata Ai.

Tusifaamaumau Ou Lagona Uunai

Savali Faaopoopo

“Baptism for Dead”

“Glad Tidings: The History of Baptisms for the Dead”

“Change Your Temple Experiences and Your Life”

“What Are Baptisms for the Dead?”

“Baptism for the Dead | Now You Know”