Oti, Faaleagaga

O le oti faaleagaga o le vavaeeseina lea mai le Atua. O loo aoao mai tusitusiga paia e uiga i faapogai e lua o le oti faaleagaga. O le faapogai muamua o le Pā’u, ma le lona lua o lo tatou lava le usiusitai. O le oti faaleagaga e mafai ona faatoilaloina e ala i le Togiola a Iesu Keriso ma e ala i le usiusitai i Lana talalelei.

Na aoao mai Samuelu le Perofeta o le Tusi a Mamona, “Ua vavae ese tagata uma, i le pā’u o Atamu, mai luma o le Alii, ma ua faapea ua feoti, e faatatau i mea faaletino ma mea faaleagaga” (Helamana 14:16). I lo tatou olaga i le fogaeleele, ua vavaeese mai ai i tatou mai le afioaga o le Atua. E ala mai i le Togiola, ua togiolaina ai e Iesu Keriso tagata uma mai le oti faaleagaga. Na molimau mai Samuelu e faapea, o le Toetu o le Faaola, ua “togiola ai tagata uma mai le oti muamua—le oti faaleagaga lena. … Ae faauta, o le toetu mai o Keriso ua togiolaina ai tagata, ioe, o tagata uma, ma toe aumai ai i latou i luma o le Alii” (Helamana 14:16–17). Na aoao mai le perofeta o Liae e faapea, ona o le Togiola, “e o atu tagata uma i le Atua; o le mea lea, latou te laulaututu ai i ona luma, ia faamasinoina e ia e tusa ma le upumoni ma le paia ua ia te ia” (2 Nifae 2:10).

E oo mai isi oti faaleagaga o se taunuuga o lo tatou lava le usiusitai. O a tatou agasala tatou te le mamā ai ma le mafai ai ona tatou nonofo i le afioaga o le Atua (tagai i le Roma 3:23; Alema 12:12–16, 32; Helamana 14:18; Mose 6:57). E ala i le Togiola, ua ofoina mai ai e Iesu Keriso le faaolataga mai le oti faaleagaga, ae seiiloga tatou te faaalia le faatuatua ia te Ia, salamo i a tatou agasala, ma usitai i mataupu faavae ma sauniga o le talalelei (tagai i le Alema 13:27–30; Helamana 14:19; Mataupu Faavae o le Faatuatua 1:3).

Tusifaamaumau Ou Lagona Uunai